Chimwatela Kuumika Neyi Mwinikwenu Yayifutuka

MARGARITA nimfumwindi, Raúl, adiña akwakukalakala ampinji yejima amukalakeleli Yehova hadi yaaka yayivulu. * Ilaña chelili anavwali dehi wedi wawu weyala, Raúl watachikili kumufutalela Yehova. Mukuhita kwampinji, Raúl watachikili kuluwalala nawa amuhañili muchipompelu chawakwaKristu. Margarita wahosheli nindi, “Chamwekeni yuma yejimiyi, natiyili neyi hinukukeña kufwa. Naneñeli nankashi, nawa hineluki mwakwililaku.”

Chelili Jane nasumbuki dehi, mfumwindi walekeli kumukuhwelela nikumukeña munjila yacheñi. Watachikili kumuhumpula. Jane nindi, “Ifuku datachi dañeteliyi ikofu, nahayamini nankashi, natiyili nsonyi nawa nasawukili. Wekalili nachaaku chakunhumpula mpinji yejima nawa chañetayi, walembeleleña nindi nimwanakeni. Hakwikala mukwaKristu, natoñojokeleña nami mudimu wami wakwanakena nikujimbalaku. Natoñojokeleña cheñi nami neyi nileja antu hakukala kutwamweneña, chili tuhu aeluda muchipompelu chetu, chikumwekesha nawu novwahila wanyi. Mfumwami watwalekeluhu nakunhumpula hadi yaaka yayivulu, ami nikuminaña dakumwanakena. Mpinji  yejimiyi, natoñojokeli nami natela kwilahu chuma chimu chikuletesha mfumwami yankeñi. Chatemukiliyi nakunshiya namwanami wamumbanda, natoñojokeli nami nakañanyi, nami kachi neliluhu chuma hela kuhosha jajivulu jadi kunuñañesha maluwi.”

Kufwana Margarita niJane, hadaha munakukabakana muyitoñojoka, nansañu jamali, hela munaneñi kuspiritu muloña wakuyifutuka kudi mfumwenu. Hadaha mwasumbula nawa munakuyanda nayitoñojoka hamuloña wakuluwalala kwañodenu. Eña, tunakushakama ‘munyaka yakala,’ neyi chashimwineñahu dehi Bayibolu. Iwu wuprofwetu washimunaña nawu “mumafuku akukuminina,” yisaka akayilukuka, kuhitila mukubula kukeñañana mwasemwakenawu. Amakwawu adidimbaña nawu amukalakelaña Nzambi. (2 Tim. 3:1-5) AkwaKristu niwena amonaña kukala kwamuchidiwu, dichi, chumanyi chatela kuyikwasha kuumika neyi anayifutuki?

Dimonenu Neyi Chayimonañayi Yehova

Hakusambila, chikuyikalila nankashi kwiteja nenu muntu imwakeña diyi wunakuyineñesha chamuchidiwu. Mukutachika kuditwika enu aweni nyiloña nenu yenu munakojeji.

Hela chochu, anukenu nenu niiyala waloña Yesu amufukejeleli kudi muntu wakuhweleleliyi nawa wakeñeliyi. Yesu watondeli alundanindi, apostolu, hanyima yakutoñojaka haniyi nsañu nakashinshi nikulombelahu. Apostolu ejima 12 adiñi ambuña Yehova ashinshika. Dihafumini Yesu kuneña nankashi chelili Yudasi yekali ‘nfukeji.’ (Luka 6:12-16) Ilaña, Yehova hamwinkeli Yesu muloña nachuma cheliliyi Yudasuku.

Eña, antu ejima eñilaña mumaluwi hiyawaninaku. Wonsu wawu aluwañeshaña. Ñimbi yamasamu wonenenuwu wasonekeli mwalala nindi: “Neyi eyi Yehova wukushinshika mwaluwañawu antu, hinyi wukwimana, eyi Mwanta?” (Mas. 130:3) Kufwana Yehova, eyala namumbanda atela kudanakeña mwadivulumunañawu.—1 Pet. 4:8.

Ilaña dinu, “wejima wetu twamba kalumbulula kudi Nzambi mutwelaña hamuntu hamuntu.” (Rom. 14:12) Neyi mwinikwenu yekala nachaaku chakutukana hela chakwila yuma yatama, samuloña diyi wamba kwakula kudi Yehova. Yehova wahisha ndombu nikutukana, dichi kwosi muloña wetejawu wukuyileñela musweji kumuhela mwinikwenu nikubula kumulemesha. (Mas. 11:5; Efwes. 5:33; Kol. 3:6-8) Dichi neyi mukwaKristu yotwalekahu nayililu yindi yatama yamadombu nawa hakutwesha kuhimpaku, muntu wamuchidiwu atela kumuhaña muchipompelu chawakwaKristu. (Ŋal. 5:19-21; 2 Yow. 9, 10) Mwinikwindi bayi chamukalila kushimuna nsañu yatama yamuchidiwu kudi aeludaku. Yehova watiyilaña wushona antu anakukabishawu chamuchidiwu.

Neyi wumu mumaluwi yela wuvumbi, dikwila nawu namuvulumuni mwinikwindi niYehova. (Mat. 19:4-9; Heb. 13:4) Neyi wunabuli muloña walondelaña nshimbi yamuBayibolu, hatela kwikala nachinleji chikweti muloña nakuluwalala kwachivumbuku.

Anukenu nenu Yehova weluka chimwatoñojokaña. Wadilumbulula yomweni nindi diyi mfumwa munza waIsarela, nawa Mwizu dindi mudi nsañu yayivulu yakuneñesha yamwekeshaña chaneñeliyi hamuloña wakubajama kwakuspiritu kwawuna munza. (Isa. 54:5, 6; Yere. 3:1, 6-10) Ilukenu nenu Yehova wamonaña chikupu madilu imwadilaña neyi mwinikwenu nayifutuki. (Mal. 2:13, 14) Weluka nindi munakukeña kukundejewa nikuyikolesha.

Njila Yatukundejelañamu Yehova

Kupompa kwawakwaKristu hinjila yimu mwatukundejelañayi Yehova. Jane amukwashili nankashi. Jane wahosheli nindi, “Nkoñi wañinza wenjili nakunhempula hampinji yinadiñi nachineñi nankashi. Welukili kukala kunamweneña muloña mfumwami wasonekeli nindi yanseñi. Wankwashili kutoñojoka chachiwahi hansona yidi neyi 1 Akorinda 7:15. Mavasi amuBayibolu nikukundeja kwindi kwankwashili kubula kudinka nyiloña nawa  nekalili nakuwunda muyitoñojoka.” *

Margarita, itwatena hansambila, welukili cheñi nindi Yehova watukwashaña chachiwahi kuhitila muchipompelu chawakwaKristu. Margarita wahosheli nindi, “Chinelukili nami mfumwami nekali dehi chiluwañimbi, nasendeli anyanami nakutuntukila kumusumba wacheñi. Chinashikili, nakeñeli itala datupeka tuyedi dakusonkela. Chikwachili, natachikili kuloñolola yuma, iku muchima mwivumu chiwukata hohu, kutiya kuchisu kunakudondomwena. Natoñojokeli nami hekwawu mwiniitala wamumbanda, washakamineña mwitala dikwawu diwenjili. Kutalaku, muhela wadizishileña amama Bayibolu nawa watukwashili kudiza chalala. Helukili nindi yami nasokeli mwitala deniduku, ilaña wenjili kwitala kunadiñi muloña wadizileña Bayibolu namumbanda mwiniitala washakamineñamu. Wenowu muzañalu wunatiyili—nitachika nikudila. Namulumbulwili kukala kwejima, wejima wetu tuholokela nimwikumbu. Chakadi kumba mpinji, waloñesheli kulonda tuyi nakupompa hefuku denidi. Chipompelu chatutambwilili, aeluda aloñesheli njila jakunkwashilamu kulonda nitweshi kwakamena chisaka chami kuspiritu.

Antu Amakwawu Anateli Kuyikwasha

Ana kwetu niahela muchipompelu chawakwaKristu anateli kukwashana muyuma yitunakaankili. Chakutalilahu, Margarita watachikili kukeña mudimu. Chisaka chimu muchipompelu chadihanini kumuhembelañaku anyana neyi anafumi kushikola.

Margarita nindi, “Naswejaña kusakilila nankashi neyi amana kwetu niahela añila nawu nizati nawu nianyanami mumudimu wakushimwina.” Kuhitila muwukwashu wamuchidiwu, antu amuchipompelu akwashanaña ‘kusendañana chisenda chawumu namukwawu’ nawa kuhitila mukwila mwenimu anakushikija “lushimbi lwaKristu.”—Ŋal. 6:2.

Ejima anakumona yihuñu muloña wayiluwa yawakwawu azañalalaña nankashi hakutambwila wukwashu wamuchidiwu. Monique, watemukiluwu kudi mfumwindi, nakumushila mukudi wa $15,000 dola (mali akuAmerica) ninyana yiwana, wahosheli nindi: “Amana kwami niahela akuspiritu amwekesheli kukeña nankashi. Chakadi wena kachi nadi kuhanda chiwahuku. Natoñojokaña nami Yehova wanyikeli amana kwetu amawahi nankashi, adihanini nakukwasha anyanami. Nidi namuzañalu weneni hakumona anyanami anakupama kuspiritu muloña wawukwashu  wawamana kwami. Aeluda anlejeleña mwakwilila neyi inakukeña wukwashu. Neyi kudi muntu inakeñeleña kuhosha nindi, adiña nakutiyilila.”—Maku 10:29, 30.

Ilaña, ibwambu denu wayikeña welukaña mpinji yayiwahi yatela kuhoshayi hachuma chatama chinamumwekeni mukwawu. (Mukwa. 3:7) Margarita wahosheli nindi: “Kakavulu, natiyileña kuwaha kuhosha nawahela amuchipompelu chami chachiha hansañu yakushimwina, atudizi etu aBayibolu, anyanetu, nihayuma yikwawu kushiyahu hohu hakukala kwami. Nayisakilili chikupu muloña ankwashileña kubula kutoñojoka hayuma yakunyima nawa ankwashili kutachika chihandilu chachiha.

Kaanenu Yitoñojoka yaKukeña Kufuntisha Katama

Mpinji yikwawu, chatela muditwikeña muloña nenu yenu munakojeji mwinikwenu kuvulumuna, mukwikala nachikela nenu munakuyanda nankashi muloña wayiluwa yamwinikwenu. Neyi mwikala nayitoñojoka yamuchidiwu, chikuyikañesha kutwalekahu kwikala ashinshika kudi Yehova. Chakutalilahu, mukutachika kukeñakeña jinjila mwakutendela mwinikwenu wunavulumuni.

Neyi mwiluka nenu yitoñojoka yakutendana yinenzali mumuchima wenu, mwatela kutoñojoka hachakutalilahu chaYoshuwa niKalebi. Awa amayala ashinshika ashili wumi wawu hakatoña hampinji yayiluwu nakwendesha Ituña daChikaninu. Hakwila akakwendesha ituña amakwawu abulili chikuhwelelu alejeli antu kumufutalela Yehova. A Isarela amakwawu akeñeleña nikuyasa aYoshuwa niKalebi malola hampinji yesekeluwu kukolesha munza nawu wutwalekuhu kwikala nachikuhwelelu. (Kuch. 13:25–14:10) Hamuloña wakudikaña kwawaIsarela, aYoshuwa niKalebi ayileñeleli kwenda mwisaña hadi yaaka 40, muloña wachiluwa chawakwawu, bayi wenaku.

Hela chakwila aYoshuwa niKalebi aneñeli, hiyazuwili hamuloña wanshidi yakoñeli amana kwawuku. Wena ashili hohu muchima hakumukalakela Yehova. Chelili yaaka 40 yakwenda mumasaña yinahiti dehi, wena hamu nawaLevi, ayisomweneni muloña apulukili hawuna munza nawa ayiñijili Mwituña daChikaninu.—Kuch. 14:28-30; Yosh. 14:6-12.

Yiluwa yamwinikwenu yinateli kuyineñesha hadi mpinji yeneni. Maluwi anateli kumana, ilaña munateli kuyanda muyitoñojoka nikubula mali. Ilaña, chatela mutoñojokeña hayuma yamuchidiwu, anukenu nenu Yehova weluka chakubabesha antu adiwulaña nshimbi jindi mumushikila, neyi chochababesheliyi aIsarela abulili chikuhwelelu mwisaña.—Heb. 10:30, 31; 13:4.

Munateli Kuumika

Chatela mwiteji yitoñojoka yatama yiyineñeshi, inzeshenu yitoñojoka yenu nayitoñojoka yaYehova. Jane wahosheli nindi: “Kutiyilila kumatepu aKaposhi Kakutalila niAwake! kwankwashili kuumika. Kupompa nikwena kwankolesheleña hama. Kwakulahu nankashi hakupompa kwankwashili kubula kutoñojoka hakukala kwami. Mudimu wakushimwina niwena wankwashili munjila yoyimu. Kuhitila mukukwasha amakwawu kumukuhwelela Yehova, ninami nakolesheleña chikuhwelelu chami. Nawa kukwasha atudizi aBayibolu kwankwashili kutoñojokaña hayuma yalema nankashi.”

Monique, yitwatena dehi, wahosheli nindi: “Kupompa mpinji yejima nikukalakala mwiha kushika hakumina ñovu yami, kwankwashiluku kuumika. Chisaka chami chinaswejeluku kunuñañana nikukundama kuchipompelu nankashi. Kukala kwami kunankwashi kwiluka kuzeya kwami. Nahiti mukweseka, ilaña Yehova wankwashañaku kuumika.”

Ninenu munateli kuumika kweseka kwamuchidiwu. Hela chikuyikata kumuchima hamuloña wamwinikwenu wunayifutuki, fwilenu kulondela kufumba kwaPawulu kwonenewa kwakwila nawu: “Bayi tuzeyaña nakwila mwamuwahuku, muloña twakadya hachilaaka chakudya, neyi tunabuli kuzeya.”—Ŋal. 6:9.

[Tumazu twaheshina]

[Mwevulu wudi hefu 31]

Antu atemukawu kudi enikwawu ahamekaña antu ayikwashaña mumudimu wamwiha