Koleshewenu nauma yakuSpiritu

“Ditwikenu mpanda yami, . . . , ninenu mukumona kunooka munyichima yenu.”—MAT. 11:29.

1. Chumanyi chaloñesheliyi Nzambi haMpidi yaSinayi, nawa muloñadi?

 HAMPINJI yatachikiluwu chitiyañenu chaNshimbi haMpidi yaSinayi, chitiyañenu chabombelelumu kwanakana Sabata mulungu nimulungu. Kuhitila mudi ñimenu yindi Mosi, Yehova walejeli munza waIsarela nindi: “Mafuku atanu nadimu wakakalakali nyidimu yeyi, ifuku damuchitanu nachiyedi wakanooki; kulonda niñombi yeyi nichimbulu cheyi akanookuhu, nimwana kanduñu yeyi wamumbanda, nimwenyi, akatiyi hi-i [akanooki].” (Kwid. 23:12) Eñañi, hamuloña wakwakamena antu enkeluwu Nshimbi, Yehova waloñesheli ifuku dakunooka kulonda antu jindi ‘anookeña.’

2. Indi aIsarela ahetelelumu ñahi mukuhemba Sabata?

² Komana ifuku daSabata dadiña dakunooka hohu? Inehi, dadiña ifuku dalema kudi aIsarela dakudifukula kudi Yehova. Kuhemba Sabata kwakwashileña nyitu yayisaka kwikala nampinji yakuleja yisaka yawu kulonda “akakakeli munjila yaYehova, akeli nikuloña.” (Kutach. 18:19) Cheñi kwakwashileña yisaka niamabwambu kwikala nampinji yakushakama hamu nakutoñojoka chikupu hanyidimu yaYehova nikuhanjeka. (Isa. 58:13, 14) Sweje-e dinu, muwuprofwetu Sabata yashimweneña yuma yikamwekana kumbidi hampinji yikanookawu antu chikupu muChiyulu chaKristu Chayaaka Ikombakaji. (Rom. 8:21) Ndochu makonu? Kudihi kwatela akwaKristu alala alondelaña njila jaYehova kuwanawu kukoleshewa kwamuchidiwu, nawa anateli kukoleshewa ñahi?

Koleshewenu Kuhitila Mukudikunda Nawakwenu akwaKristu

3. Munjilanyi akwaKristu akusambila mwadikwashilileñawu wumu namukwawu, nawa chumanyi chafuminumu?

³ Kapostolu Pawulu walumbulwili nindi chipompelu chawakwaKristu “chochishimi nihakolela nsañu yalala.” (1 Tim. 3:15) AkwaKristu akusambila atambwilileña wukwashu kuhitila mukudikolesha wumu namukwawu mukukeña. (Efwes. 4:11, 12, 16) Hampinji yadiñayi Pawulu muEfwesesa, antu amuchipompelu chamuKorinda amukolesheli kuhitila mukumuhempula. Talenu chuma chafuminumu, Pawulu wahosheli nindi: ‘Natiyi kuwaha chanenzuwu aSetefwanasi naFwotunatu niAkayikusi. . . . Wena anatulishi muchima wamami.’ (1 Kor. 16:17, 18) Chochimu, chayiliyi Titusa kuKorinda nakukalakela amana kwindi, Pawulu wasonekeleli cheñi chipompelu nindi: “Muloña mwamutulishili mumuchima wejima wenu.” (2 Kor. 7:13) Nikulelu, aYinsahu jaYehova akoleshewaña chikupu kuhitila mukudikunda kwawakwaKristu.

4. Indi kupompa kwachipompelu kwatukoleshaña ñahi?

⁴ Mweluka nenu kupompa kwachipompelu kwatuzañaleshaña chikupu. Kuchipompelu kwekalaña ‘kudikolesha wumu namukwawu muchikuhwelelu.’ (Rom. 1:12) Amana kwetu niahela akwaKristu bayi neyi hiyantu itweluka hohu kumesuku. Hiyamabwambu jetu chikupu, antu itwakeña nawa itwalemesha. Twazañalalaña chikupu nikukoleshewa kuhitila mukupompa mpinji yejima nawamana kwetu.—Fwile. 7.

5. Tunateli kudikolesha ñahi wumu namukwawu hakupompa kweneni nikwanyanya?

 ⁵ Kupompa kwahachaaka kweneni nikwanyanya nikwena kwatukoleshaña. Kubombela hamenji achalala ahanaña wumu ekala Mwizu daNzambi, Bayibolu, kupompa kweneni nikwanyanya kwatwinkaña mpinji ‘yakusweja’ kudikunda nawamana kwetu. (2 Kor. 6:12, 13) Indi neyi tudi nansonyi nawa twakañanyaña kuhosha nawantu? Njila yimu yakudilukilamu nawamana kwetu niahela yekala yakudihana chikupu hakupompa. Muhela wumu hanyima yakuzataku nyidimu yahakupompa kwanyuza wahosheli nindi: “Nelukili antu amavulu nankashi wanyi, chiña hohu chisaka chami niamabwambu antesha. Ilaña chinazatiluku mudimu wawunyonji, nadilukili nawamana kwetu niahela amavulu! Natiyili kuwaha nankashi!”

6. Njilanyi yitwatela kuwaninamu muzañalu hampinji yitunakunooka?

⁶ A Isarela ayileña nakudifukula kuYerusalema kuyawija yisatu muchaaka. (Kwid. 34:23) Kakavulu ashiyileña mahawu nimastolu nakwenda lwendu lwamafuku amavulu hamaseki munjila yalunkuñu. Hela chochu, kuya kutembeli ‘kwayiluñishileña chikupu’ muloña antu apompeleña ‘amuhamekeleña Yehova.’ (2 Kushi. 30:21) Ambuña aYehova amavulu makonu niwena atiyaña kuwaha kuya hamu nayisaka yawu nakutala haBeteli, mutayi wekala kwakwihi wawaYinsahu jaYehova. Komana kwila mutoñojokahu kuya nakuhempula haBeteli hampinji yakunooka nachisaka chenu nehi?

7. (a) Indi yidika yakudikunda yatukwashaña ñahi? (b) Chumanyi chatela kuleñela mwikali nachidika chachiwahi nawa chakudikolesha?

⁷ Kudikuñulula hamu nachisaka ninawamabwambu nakuhanjeka nikwena kwatukoleshaña. Mwanta wamaana Solomoni wahosheli nindi: “Hikudi chuma chacheñi chakuwahisha muntuku, chiña yowu kudya nakunwa nakuluñisha muchima windi nanyidimu yindi yikukabakanayi.” (Mukwa. 2:24) Yidika yamuchidiwu hiyazañaleshaña nyichima yetu hohuku, ilaña yakoleshaña mpanda yetu yakukeñañana nawakwetu akwaKristu chitwasweja kuyiluka.  Hakwila nawu mudiluñishi nikudikolesha wumu namukwawu, chikuwaha neyi mukwikala nawantu antesha hohu kulonda chiyikwashiku kutala antu ejima, sweje-e neyi kudi walwa.

Mudimu Wakushimwina Watukoleshaña

8, 9. (a) Shimunenu chaambu chadiñi hansañu yashimwineñayi Yesu nayashimwineñawu ansoneki niaFwarisi. (b) Twahetelañamu ñahi mukushimwina nsañu yalala yamuBayibolu?

⁸ Yesu wadikitileña nankashi mumudimu wakushimwina, nawa wakonkomweneni atumbanji twindi kwikala adikita. Mazu ahosheliyi amwekeshaña chumichi, wahosheli nindi: “Chalala mbutu jajivulu jinahi dehi, ilaña akwakukalakala anakehi. Dichi lombenu kudi Mwanta wakumuna atemeshi akwakukalakala kukumuna kwindi.” (Mat. 9:37, 38) Nsañu yashimwinineñayi Yesu yakolesheleña antu chikupu; yadiña “nsañu yayiwahi.” (Mat. 4:23; 24:14) Chumichi chambukili chikupu nanshimbi jakola jawaFwarisi jakanjikijileñawu antu.—Tañenu Matewu 23:4, 23, 24.

⁹ Neyi hitukuleja antu nsañu yaWanta, twayikwashaña kuspiritu nawa, hampinji yoyimu, twaswejaña kwiluka nikuhameka nankashi chalala chalema chekala muBayibolu munyichima yetu. Ñimbi yamasamu wahosheli chiwahi nindi: “Aleluya. Chachiwahi kumuseña Nzambi yetu, chatowala, chatela kushimeka.” (Mas. 147:1) Komana kwila mulejaku akwenu hamuzañalu wumukweti wakushimeka Yehova nehi?

10. Komana kutwesha mudimu wakushimwina kwashindamena hachetejañawu antu nsañu yitwashimwinaña? Lumbululenu.

¹⁰ Eñañi, mumaluña amakwawu antu atambwilaña chikupu nsañu yayiwahi kubadika mumaluña amakwawu. (Tañenu Yililu 18:1, 5-8.) Neyi mwashakamaña mwiluña mwabulaña kwitejawu chikupu nsañu yaWanta, shenu muchima hayuma yayiwahi yimunakuzata mumudimu wakushimwina. Anukenu nenu mudimu wumwadikitaña wakutiyakesha ijina daYehova hiwamukunkulwayuku. (1 Kor. 15:58) Kubombelahu, kutwesha mudimu wetu wakushimwina hikwashindamena hachetejañawu antu nsañu yayiwahuku. Twatela kukuhwelela chikupu netu Yehova wukukokola antu anyichima yayiwahi kwiteja nsañu yaWanta.—Yow. 6:44.

Kudifukula kwaChisaka Kwatukoleshaña

11. Mudimwinyi wayinkawu anvwali kudi Yehova, nawa anateli kuwuzata ñahi?

¹¹ Anvwali amwakamaña Nzambi akweti mudimu wakufumba anyanawu kumwiluka Yehova ninjila jindi. (Kuhit. 11:18, 19) Neyi mudi anvwali, komana mwekalaña nampinji yakudizisha anyanenu kumwiluka Tata yetu wamwiwulu wakukeña? Hakwila nawu mutweshi kuzata iwu mudimu walema nikukeñela chisaka chenu yuma yakeñañawu, Yehova wayiloñeshela yakudya yayivulu yakuspiritu kuhitila munyikanda, mumagazini, jividiyo, nimatepu.

12, 13. (a) Indi yisaka yinateli kuhetelamu ñahi muKudifukula kwaChisaka kwamelela? (b) Indi anvwali anateli kuloñesha ñahi kulonda kudifukula kwachisaka kwikala kwakukolesha?

¹² Kubombelahu, izanvu danduñu wamaana nikashinshi analoñeshi mpinji yaKudifukula kwaChisaka kwamelela. Iyi himpinji yamelela yatanjikawu kulonda chisaka chidizeña Bayibolu mulungu nimulungu. Antu amavulu anachiwani neyi iyi ntanjikilu yinayikwashi kusweja kudikeña muchisaka nikukolesha wubwambu wawu naYehova. Indi anvwali anateli kuloñesha ñahi nawu kudifukula kwachisaka kuyikolesheña kuspiritu?

¹³ Mpinji yaKudifukula kwaChisaka kwamelela yatela kwikala mpinji yamuzañalu. Muloña twalombaña ‘Nzambi wamuzañalu,’ nawa wakeñaña nindi tuzañalaleña hakudifukula kudi yena. (1 Tim. 1:11; Fwi. 4:4) Kwikala nampinji yikwawu namelela nakuhanjeka hayuma yalema yakuspiritu yamuBayibolu hikukooleka chikupu. Anvwali atela kuhimpaña ntañishilu yawu, kuzatisha yitoñojoka yawu yakufwikija nikashinshi. Chakutalilahu, chisaka chimu chalejeli mwanawu weyala wayaaka ikumi, Brandon, kushimuna nsañu yahosheleña nawu, “Muloñadi Yehova Chazatishililiyi  Kapela Kwimenaku Satana?” Iyi nsañu yamukabishili chikupu Brandon muloña wakeña nankashi tupela, nawa wahilili hakutiya nawu kapela wemeneneñaku Satana. Yisaka yikwawu yavula kutiyilila kuyimwenu yamuBayibolu, muntu wejima muchisaka wukwikala nhemi, nakutaña chibalu chindi muBayibolu, hela kuhema nsañu yamwekeni. Iyi njila yakutañishilamu bayi neyi yazañaleshaña hohuku ilaña yinateli kukwasha anyanenu kusha maana kukudiza, kulonda nshimbi yamuBayibolu yishiki hanyichima yawu. *

Tondolwelenu Yuma Yatela Kuyizeyesha

14, 15. (a) Indi yineñi nikwakama kunasweji ñahi munanu mafuku akukuminina? (b) Kukalanyi kukwawu kutwatela kumona?

¹⁴ Chineñi nikwakama kunasweji munanu mafuku akukuminina adinu ituña datama. Antu amavulu anakuyumbwañila muloña wakubula nyidimu nikukala kwamali. Hela azataña kakavulu atoñojoka nawu wufwetu watambulañawu awusendelaña mwitumba dalokoka, chaleñelaña yisaka yawu yibuleña kuhetelamu. (Esekejenu Hagayi. 1:4-6.) Akwajipolitiki nianlomboli amakwawu akañanyaña kuwana mwakwilila hakufwila kumanisha wubanji niyuma yikwawu yaletaña kutama. Antu amavulu adi mukukala muloña wayiluwa yawu.—Mas. 38:4.

¹⁵ AkwaKristu alala niwena amonaña kukala kwaletaña ituña daSatana. (1 Yow. 5:19) Mpinji yikwawu, akwaKristu amona kukala kukwawu hakufwila kwikala ashinshika kudi Yehova. Yesu wahosheli nindi, “Chankabishiluwu ami, ninenu nawa akayikabisha.” (Yow. 15:20) Hela chochu, hela chakwila “enda atuhaña,” nawa ‘hiyanatushiyi kanka wetuku.’ (2 Kor. 4:9) Muloñadi?

16. Chumanyi chatela kutukwasha kutwalekahu kwikala namuzañalu?

¹⁶ Yesu wahosheli nindi: “Inzenu kudami enu ejima mudi nakukabakana, mwasenda yalema, ami nukuyinookesha.” (Mat. 11:28) Neyi tukuhwelela chikupu muchamukunkulu chefutu daKristu, dikwila nawu tukwikala mumakasa aYehova. Muniyi njila, akutwinka “ñovu jabadika nankashi.” (2 Kor. 4:7) Spiritu yaNzambi yajila, “nkwashi” yakoleshaña chikuhwelelu chetu chikupu kulonda chitukwasheñaku kuumika kweseka nimakabi itwamonaña nikwikala amuzañalu.—Yow. 14:26; Yak. 1:2-4.

17, 18. (a) Yililu yamuchidinyi yitwatela kutondolwela? (b) Yumanyi yatela kutumwekena neyi tusweja kukeña yuma yakumujimba?

¹⁷ AkwaKristu alala makonu atela kubabala kuchina kuluwankana nayililu yakufwila yuma yamukaayi yaleñelaña antu kusweja kukeña yiseki. (Tañenu Aefwesesa 2:2-5.) Neyi kubabala nehi, tukufwa mumuhetu “[wa]kufwila kwachisemwa chaheseki, nikufwila kwamesu, nikudisamba kwamukunkulwayi kwawumi wunu.” (1 Yow. 2:16) Hadaha tunateli kutoñojoka chaluwa netu kulondela yuma yakumujimba dikwatela kutuzañalesha. (Rom. 8:6) Chakutalilahu, antu amakwawu azatishaña yitumbu nikunwa walwa chatama, kutala nyevulu yanzekesi, kusweja kukeña yisela, hela yuma yatama yamboka-mboka kulonda adizañalesheña. “Maana akudimbana” aSatana ekala akuluwañesha muloña aleñelaña muntu kutoñojoka nindi nawani muzañalu walala.—Efwes. 6:11.

 ¹⁸ Eñañi, kudya, nakunwa, nikwila yisela yayiwahi mukwesekeja yatama wanyi. Ilaña, hitunakukeña yumiyi yikali yasweja kulema muchihandilu chetuku. Kwesekeja yuma nikwiluka mwakukumina kwalema, sweje-e muyinu yaaka yitunakushakamamu. Kufwila yuma yakumujimba kukutuzeyesha chakwila kukutuleñela ‘kwikala ankopi, hela akwakubula kusoña nyikabu, yakushika mukumwiluka Mwanta wetu Yesu Kristu.’—2 Pet. 1:8.

19, 20. Tunateli kuwana ñahi kukoleshewa kwalala?

¹⁹ Neyi yitoñojoka yetu yilondelaña nshimbi jaYehova, tukwiluka netu kukala kwejima kwaletaña kaayi kwampinji yantesha. Mosi welukili mwenimu, ninetu nawa dichitweluka. (Heb. 11:25) Eñañi, kukoleshewa kwalala, kwaletaña muzañalu waweni watwalekañahu, kwafumaña mukwila mwaya kukeña kwaTata wamwiwulu.—Mat. 5:6.

²⁰ Tutwalekuhu kukoleshewa nayuma yakuspiritu. Kuhitila mukwila mwenimu, “tuleki kusekesha Nzambi, nikufwila yatama yampata yamunu mwishina, . . . nakutalila kuchiñeja kwatiyishaña kuwaha, nichakamwekana lubanji lwakulema kwaNzambi yetu muneni, Chamwinu chetu Yesu Kristu.” (Tit. 2:12, 13) Dichi tufwilenu kushakama mumpanda yaYesu kuhitila mukwovwahila wunlomboli windi nimwatulejañayi. Chitwela mwenimu, tukwikala amuzañalu chikupu nikukoleshewa!

[Tumazu twaheshina]

Mukwakula Nenudi?

• Indi antu jaYehova akoleshewaña ñahi makonu?

• Munjilanyi mudimu wakushimwina muwatukoleshelaña nikukolesha antu itwashimwinaña?

• Yumanyi yatela kwila nyitu yayisaka kulonda kudifukula kwawu kwachisaka kwikali kwakukolesha?

• Yumanyi yatuzeyeshaña kuspiritu?

[Malwihu aKuzatisha haKudiza]

[Nyevulu yidi hefu 26]

Kuhitila mukuvwala mpanda yaYesu, twawanaña yuma yatukoleshaña