Kwikala Anuñañana muKukeña Chileji Chakubulakana kwahaChaaka

ANTU ayili kukubulakana kwahachaaka Hetala Deneni daKupompela dawaYinsahu jaYehova muMusumba waJersey, New Jersey, U.S.A. azañaleli chikupu. Chikwachili hefuku daOctober 3, 2009, antu akubadika ha 5,000 apompeli kulonda kuwanewa kukubulakana kwahachaaka kwamunaambala 125 kwaWatch Tower Bible and Tract Society of Pennsylvania. Amana kwetu amavulu adiña nakutiyilila nikutala maprogiramu kuhitila muyozelu yasokankesheluwu yamatepu nimavidiyo hanyikala yisatu yaBeteli muUnited States nihaBeteli yakuCanada. Antu ejima adiña nakutiyilila adiña 13,235, anuñañana mukukeña Yehova, adiluñishili hakuwanewa kuniku kubulakana kwamaora asatu.

Geoffrey Jackson waMwizaza Dalombolaña diwadiña cheyamani. Wenzunwini progiramu yakubulakana kuhitila mukutambika akakwimba ahaBeteli embili tumina twakufuma mukamina ketu kakaha. Walombweleña akakwimba mana kwetu mukwawu waMwizaza Dalombolaña, David Splane, walumbulwili mukwihihisha kulema kwatumina mukudifukula kwalala. Alejeli izaza kwimba tumina tusatu twatuha haniku kubulakana; akakwimba asambilili kwimba itu tumina, kuhiñahu, embilili hamu nezaza. Kuzatisha akakwimba kwadiña hohu kwahaniku kupompa kwadimena; bayi neyi dichimukwilaña muyipompelu, hakupompa kwanyanya, hela hakupompa kwankambi kukahiñahuku.

Yileji yaKufuma Kutusanji twaNyitayi

Enyi amuKomiti yaNyitayi ashimwini yileji yakufuma kunyitayi yitanu. Kenneth Little wahosheli nindi mutayi wakuCanada keña wutachiki kupulinta magazini akuUnited States niamuCanada, chikuleñela iwu mutayi kuyilaku hewulu mapampa ikumi. Hakwila nawu iyi nyidimu ayizati, ikina dadiha dalandawu dikupulintaña mapampa kayedi hadi maora 8, maora ejima akushikaña 16 hefuku.

Reiner Thompson washimwini chileji chamudimu waWanta mwituña daDominican Republic, nawa Albert Olih walumbulwili nyidimu yinakuzatawu muNigeria. Emile Kritzinger wakuMozambique walumbulwili nindi hanyima yayaaka yayivulu yakuyiyandisha, aYinsahu jaYehova ayitejeli munshimbi mu 1992. Matuña ejima asatu chakatataka naambala yawakwakushimwina yinayiluku hambidi. Viv Mouritz wakumutayi waAustralia washimwini mudimu chiwunakuyilaku hambidi muEast Timor, mudimu wunakukalakala amana kwetu amuAustralia.

Makomiti Ezaza Dalombolaña

Muchaaka cha 1976, nyidimu yejima yawaYinsahu jaYehova atachikili kuyilombola kudi makomiti atanu nayimu aMwizaza Dalombolaña. Chimwahitili mpinji, amana kwetu amwizaza dawanyikoku yacheñi ayitondeli kwikala ankwashi. Chayinu mpinji, amana kwetu 23 anakukwashana munyidimu yinakuzatawu. Awa ankwashi atanu nawumu ayihujoleli. Wonsu wawu anazati yaaka 341 mumudimu wampinji yejima, dikwila nawu muntu himuntu nazati yaaka 57.

Don Adams, wenjili haBeteli mu 1943, walumbulwili nindi muKomiti yaCo-ordinator mwekala aco-ordinator atanu amumakomiti amakwawu, diyatalaña hamakomiti ejima atanu neyi anakuzatila hamu chachiwahi. Iyi komiti yatalaña hakukala kweneni kwakukasumwisha, neyi aYinsahu anakuyiyandisha, neyi kudi nyiloña muyota, kukala kwamwekanaña niyuma yikwawu yaholokelaña aYinsahu jaYehova mukaayi kejima.

Dan Molchan walumbulwili mudimu wazataña Personnel Committee, yatalaña akaBeteli 19,851  mukaayi kejima chahandañawu kuspiritu nikumujimba. David Sinclair wahosheli chalombolaña akaPublishing Committee mudimu wakulanda yuma niyozelu yakuzatisha munyitayi. Kuhiñahu, Robert Wallen, wunakalakali haBeteli kwakwihi nayaaka 60, washimwini chalombolaña Service Committee mudimu wawantu jaYehova mwiha nimuyipompelu. William Malenfant walumbulwili mudimu weneni wadikitañawu akaTeaching Committee wakuloñesha progiramu yakupompa kwankambi. Nkumininaku, John Wischuk walumbulwili chalombolañawu akaWriting Committee mudimu wakuloñesha nikusoneka nsañu chiwahi munyikanda yetu. *

Nsona yaChaaka cha 2010 Yinashindameni haKukeña

Mpanji jisatu jalondeleluhu ajiheneni kudi amamembala aMwizaza Dalombolaña. Gerrit Lösch watachikili mpanji yindi nalwihu lwahosheleña nawu, “Komana Mwakeñaña nenu ayikeñi kudi akwenu?” Walumbulwili nindi kukeña kwalema nankashi kudi antu, nawa chihandilu chetu chashindamena hakukeña. Kukeña dikwaleñeleli nawu twikaluku muloña Yehova watuleñeli mukukeña. Twashimwinaña nikutañisha muloña twamukeña Yehova.

Hitwamwekeshaña kukeña kwalala kudi antuñi netu hohuku, ilaña nikudi ayilumbu jetu. (Mat. 5:43-45) Antu apompeli ayilejeli kushinshika hayuma yahitulumu Yesu, amweteli yikoti, amuseheli, amufwijilili mazeñi, nawa amupwikili. Hela wamweni yihuñu yamuchidiwu, Yesu wayilombeleluku amashidika amupopeli. Komana chumichi hichikutuleñela tusweji kumukeñaku? Nkumininaku, Mana kwetu Lösch wabidikili nsona yachaaka cha 2010 kushindamena ha 1 Akorinda 13:7, 8, ‘Kukeña kwomikaña yuma yejima. Kukeña hikwakañanyañaku.’ Twachiñeja bayi neyi kushakama haya nyaka hohuku, ilaña nikudikeña wumu namukwawu.

Komana Munakwenda naMotoka Yakadi Manji?

Samuel Herd watachikili mpanji yindi nachakutalilahu. Twili netu ibwambu denu nayisenduku mumotoka yindi halwendu lwamakilomita 50. Iku munashakami muchitwamu chakumbidi, nenu mutali, chipimu chamanji chinakumwekesha nawu manji anamani. Dichi mumuleja nenu, yaleyi manji keña amani. Yena nindi kwakama nehi; muchidi malita awana mutanki. Hakushimbula wanyi manji akumana. Komana mukutwalekahu ‘kwenda namotoka wunabuli manji’ henohu muneluki nenu mukuyandila hanjila? Chikuwaha neyi mwinzesha tanki yamanji. Chochimu ninetu twatela kwendaña natanki yenzala, kumwiluka Yehova diwu manji etu achifwikija.

Twatela kuloñaña manji amavulu nawa twatela kwila mwenimu mpinji yejima. Kudi njila jiwana mutwatela kuloñela manji amuchidiwu. Njila yatachi, yidi yakudiza halwetu, twatela kwiluka chahosha Bayibolu kuhitila mukuyitaña hefuku  hefuku. Kubadika kutaña hohu mazu, twatela tutiyisheña yuma yitwatañaña. Chamuchiyedi, twatela kwikala naKudifukula kwaChisaka kwamelela. Komana mulungu nimulungu twenzeshaña tanki yetu tahindi twaloñañamu twantesha hohu? Chamuchisatu, kudiza kwachipompelu nikupompa. Chamuchiwana, kushakama kwamwena nakutoñojoka chikupu hanjila jaYehova. Mukanda waMasamu 143:5 wahosha nawu: “Hinukwanuka mafuku akumwaka, hinukutoñojoka mwejima muwelaña.”

“Aloña Akatoñeka”

John Barr wahanini mpanji yamuchisatu nawa yakukumisha, yalumbulwili chishimu chaYesu chatidiku namatahu. (Mat. 13:24-30, 38, 43) Ichi chishimu chahoshaña ‘hakumuna’ hampinji yakupompesha “anyana kawanta” nikwambula matahu kulonda akayochi.

Mana kwetu Barr walumbulwili chachiwahi nindi kupompesha hikwakatwalekahu haya nyakaku. Wateneni mukanda waMatewu 24:34 wahosha nawu: “Chisakichi hichakahitaku, chiña yuma yejimiyi yinamani.” Watañili mapampa kayedi mazu akwila nawu: “Yesu watalishili mukwila nindi ikiñu daawayishewa adiñaku hampinji yatachikili kumwekana chinjikijilu mu 1914 dikatwalekahu nakushika mwikiñu daawayishewa akamona kutachika kwehuñu deneni.” Tuneluki wanyi kuleha kwampinji ‘yachisakichi,’ ilaña mudi mazanvu ayedi ashiyashana yaaka yakusemuka akulumpi atwalekañahu kuhanda muyaaka yawu yakumelela, ilaña atwansi azabukaña muyaaka yawu yakubudidi. Hela chakwila awayishewa ashiyashana muyaaka yakusemuka, antu adi munawa mazanvu ayedi diwu adi munichi chisaka anakushakama hampinji yoyimu kunsa yamafuku akukuminina. Twazañalalaña chikupu hakwiluka netu awayishewa achidi akwenzi anakushakama hampinji yoyimu nawawayishewa ashinakaja dehi amweneñahu dehi chinjikijilu hampinji yichamwekeni kutachika mu 1914 hiyakafwa henohu ihuñu deneni kanda ditachikiku!

“Anyana kawanta” atalilaña chikupu wuloku wawu wamwiwulu, ilaña wonsu wetu twatela kwikala ashinshika, nakutwalekahu kutoñeka ndo-o nikunsa. Twakooleka chikupu hakumona chinakukuñwijawu “tidiku” makonu.

Hanyima yakwimba kamina kamakumishilu, mana kwetu Theodore Jaracz waMwizaza Dalombolaña diyi walombeli kulomba kwamakumishilu. Mwalala progiramu yakuhumañana kwahachaaka yakolesheli chikupu antu apompeli!

[Tumazu twaheshina]

[Chikasha chidi hefu 5]

SHIKOLA YAWAELUDA

Hakuhumañana kwahachaaka, Anthony Morris, membala waMwizaza Dalombolaña, wabidikili nindi kukwikala shikola yikutwalekañahu kudizisha aeluda amuchipompelu. Shikola yawaeluda muUnited States yatachikili kukutachika kwachaaka cha 2008 haeducational center kuPatterson, New York. Shikola yanaambala 72 yamana tuhu katataka, nawa aeluda 6,720 anayidizishi. Ilaña kuchidi nyidimu yayivulu. Mwituña daUnited States hohu, mudi aeluda akubadika ha 86,000. Dihafumini Izaza Dalombolaña kwiteja shikola yikwawu kwikalaku muBrooklyn, New York, yatachikili haDecember 7, 2009.

Ankoñi endaña awana ayidizishili hadi tukweji tuyedi kwikala antañishi kuPatterson. Kufumahu akayitwala kuBrooklyn nakudizisha, kuhiñahu akadizisha cheñi ankoñi awana. Diwu akudizishaña shikola yamuBrooklyn, nawa awana adizishiluwu hakusambila akudizishaña shikola yikekalaña muMatala Amaneni aKupompelamu nimuMatala aWanta. Akutwalekahu nakuyidizisha sampu anekali antañishi 12 akadizishaña mashikola atanu nayimu muWundeli mumulungu nimulungu muUnited States. Antañishi awana akuyidizisha kulonda akatañisheña mwidimi daSpanish. Iyi shikola hiyikahiña haShikola yaMudimu waWanta yiduhuku; analoñeshi awa mashikola kulonda akwasheñaku aeluda kutwalekahu kupama mukwiluka chalala. Nyitayi yamukaayi kejima yikatachika kwikala namashikola wenawa haMatala Amaneni aKupompelamu nimuMatala aWanta muchaaka chamudimu cha 2011.

[Nyevulu yidi hefu 4]

Progiramu yakuhumañana kwahachaaka ayitachikili nakwimba tumina twamumukanda wetu wawuha wakamina, wunakwila nawu “Mwimbilenu Yehova”