Twalekenuhu Kukolesha Chipompelu

“Dikundejenu wejima wenu nakudikolesha wumu namukwawu.”—1 TESA. 5:11.

1. Nkiswinyi yitwawanaña hamuloña wakwikala muchipompelu chawakwaKristu, nawa kukalanyi kutwamonaña?

 KWIKALA muchipompelu chawakwaKristu hikukooleka kweneni chikupu. Mukweti wubwambu wawuwahi naYehova. Kushindamena hawunlomboli Wezu dindi kwayikiñaña kuyuma yatama yafumaña muchihandilu chatama. Mukweti amabwambu alala akeñaña nawu mwileña yuma yayiwahi. Eñañi, mudi nkisu jajivulu. Hela chochu, akwaKristu amavulu, anakumona kukala kwashiyashana. Amakwawu anakukeña wukwashu wakutiyisha yuma yakunama yekala Mwizu daNzambi. Amakwawu niwena akata hela adi nachineñi, nawa anakukabakana nayuma yatama yafumaña mukukañanya kufuukula chachiwahi. Nawa wonsu wetu tunakushakama mukaayi katama.

2. Chumanyi chitwatela kwila neyi amana kwetu adi mukukala, nawa muloñadi?

² Wonsu wetu hitwakeñaña kumona akwetu akwaKristu anakuyanda hela anakukabakanaku. Kapostolu Pawulu wafwanishili chipompelu namujimba nawa wahosheli nindi “neyi chidi chimu chikukaba, yidi yejima yamwenaña hamu kukaba.” (1 Kor. 12:12, 26) Mukukala kwamuchidiwu, twatela kufwila kukwasha  amana kwetu niahela. Kwekala nsañu yayivulu muBayibolu yashimunaña antu amuchipompelu chakwashiluwu amakwawu kumanisha kukala kwamweniwu. Chitukushinshikaña haniyi yakutalilahu, toñojokenu ninenu chimwatela kukwasha akwenu munjila jojimu najinatenuwu. Munateli kukwasha ñahi ana kwenu kuspiritu kulonda chipompelu chaYehova chikoli?

‘Amutwalili Kwitala Dawu’

3, 4. Munjilanyi Akwila niPirisila mwamukwashililuwu Apolosi?

³ Apolosi chatachikiliyi kushakama muEfwesesa, wadiña dehi wadikita mumudimu wakushimwina. Nsañu yekala mumukanda waYililu yahoshaña nawu, ‘chekaliliyi neyena muspiritu yindi, hakuhosha nakuleja antu nsañu yaYesu chakashinshi, weluka kwachipapatishu chaYowanu hohu.’ Chineli Apolosi helukili kupapatishewa ‘mwijina daTata, nidaMwana, nidaspiritu yajilaku,’ hadaha watalishili mukwila nindi hekwawu amushimwinini kudi Yowanu Mpapatishu hela kudi atumbanji twaYesu adiñaku henohu chaaka chaPentekosta 33 C.E. kanda chishiki. Hela chakwila Apolosi wadiña wadikita, kudi yuma yalema yabulili kwilukayi. Indi kudikunda nawakwawu akakwitiya kwamukwashili ñahi?—Yil. 1:4, 5; 18:25; Mat. 28:19.

⁴ Akwila nimwinikwindi Pirisila adiña akwaKristu atiyili Apolosi chahosheleñayi chakadi woma musinagogi, hiyakumutwala kwitala dawu, nakumudizisha chikupu. (Tañenu Yililu 18:24-26.) Elili chuma chachiwahi. Hela chochu, Akwila niPirisila atela amulejeli Apolosi munjila yayiwahi, hiyamuleñeleli kutoñojoka nindi amutwikileña muloñaku. Chaleñeleli muloña helukili chatachikili chipompelu chawakwaKristu akusambilaku. Nawa chakadi kujina Apolosi wayisakililili amabwambu jindi amaha hakumuleja iyi nsañu yalema. Chelukiliyi iyi nsañu, Apolosi ‘wayikwashili nankashi’ ana kwindi muAkaya nawa washimwinini chikupu.—Yil. 18:27, 28.

5. Indi akwakushimwina aWanta amavulu akwashaña ñahi amakwawu, nawa yumanyi yafumañamu?

⁵ Antu amavulu makonu muchipompelu chawakwaKristu ahamekaña nankashi antu ayikwashili kudiza Bayibolu. Atudizi aBayibolu anakwati wubwambu wakola chikupu nawantañishi jawu. Kakavulu, chakeñekaña kuhanjeka nawu mpinji yejima hadi tukweji twatuvulu hakukwasha antu kwiluka chalala. Hela chochu, akwakushimwina aWanta afwilaña kukwasha akwawu muloña eluka nawu mawumi awantu adi hakatoña. (Yow. 17:3) Wenowu mumuzañalu wutwatiyaña hakumona antu anakwiluka chalala, nikushakama kwesekeja namwaya nsañu yalala, nikwila kukeña kwaYehova muchihandilu chawu!

‘Himuntu Ahamekeluwu Chikupu’

6, 7. (a) Muloñadi Pawulu chamutondeleliyi Timotewu kwikala mukwawu mukwakwenda nindi? (b) Indi Timotewu amukwashili ñahi kupaminaku?

⁶ Chelili kapostolu Pawulu niSilasi ayi kuLisitira halwendu lwawumishonali lwamuchiyedi,  aweneni kwenoku mukwenzi wejina daTimotewu, hadaha wadiña muyaaka yindi yakutachika yamuma 20. ‘Himuntu ahamekeluwu chikupu kudi ana kwindi adiñi kuLisitira nikuIkoniyumu.’ Yunisi, mama yaTimotewu, ninkaka yindi wamumbanda Lowisi adiña akwaKristu adihana, ilaña tata yindi hadiña mukwakwitiyaku. (2 Tim. 1:5) Pawulu watela wadilukili nanichi chisaka halwendu lwakusambila lwendeleliyi idi iluña yaaka yantesha yahitiluhu. Ilaña haniyi mpinji kapostolu waswejeli kumukeña Timotewu muloña wadiña mukwenzi wababala chikupu. Dichi, chamwitejeluwu kudi izanvu dawaeluda amuchipompelu, Timotewu watachikili kumukwasha Pawulu mumudimu wawumishonali.—Tañenu Yililu 16:1-3.

⁷ Timotewu wadizili yuma yayivulu kudi ibwambu dindi wamukulumpi. Wadizili chikupu, chakwila mukuhita kwampinji Pawulu wamutemesheli Timotewu namuchima wumu kwendela yipompelu nikwikala ñimenu yindi. Hadi yaaka 15 hela kubadika, Timotewu wadiluñishili kwenda naPawulu, mukwenzi wadiña kanda yeluki yuma yayivulu nawa wansonyi wapamini nakwikala nkoñi wamuwahi.—Fwi. 2:19-22; 1 Tim. 1:3.

8, 9. Yumanyi yatela kwilawu antu muchipompelu kulonda akoleshi atwansi? Shimunenu chakutalilahu.

⁸ Makonu anyikwenzi niayañadima amavulu muchipompelu chawakwaKristu niwena atela kupama. Neyi akuyikoleshaña nikuyakamena kudi amabwambu jawu asha maana kuyuma yakuspiritu, anateli kupama nikukalakala nyidimu yamaneni hakachi kawantu jaYehova. Shinshikenu chachiwahi muchipompelu chenu! Komana munamonimu atwansi anateli kudihana, neyi chadiheniyi Timotewu? Neyi mukuyikwasha nikuyikolesha, anateli kwikala apayiniya, akaBeteli, amishonali, hela ankoñi endaña. Munateli kuyikwasha ñahi kulonda atweshi kukalakala iyi nyidimu?

⁹ Martin, wunashakami muchisaka chaBeteli hadi yaaka 20, wanukaña nakusakilila hakukeña kwamumwekesheleluwu kudi nkoñi wañinza yaaka 30 yinahituhu hampinji yazatiliwu mwayedi wawu mumudimu wakushimwina. Iwu nkoñi wahosheli namuzañalu hamudimu wakalakeliyi haBeteli hampinji yachidiñayi mukwenzi. Wamukolesheli Martin kutoñojoka hakudihana mukuloñesha kwaYehova munjila yoyimu. Martin wanukaña nindi iku kuhanjeka kwakuwahi kwamukwashili chikupu. Komana muneluki yuma yayiwahi yinateli kufumamu, neyi muhanjekaña hanyidimu yateokalatiki nawamabwambu jenu achidi atwansuku.

‘Kundejenu Ananeñi’

10. Indi Epafwaditu watiyili ñahi chakañenyiyi kuzata mudimu, nawa muloñadi?

¹⁰ Epafwaditu wendeli lwendu lwalulehi  nawa wazeyeli kufuma kuFwilipi nakuya kuRoma nakutala kapostolu Pawulu, akasiluwu mukaleya kukoola chikuhwelelu chindi. Epafwaditu wadiñi neyi ntemesha yawaFwilipi. Hakuminini dakusenda yawana yawu nakumutwalila kapostoluku, ilaña wafuukwiluhu kushakama nindi kulonda yamukwasheñaku Pawulu nakukala kwamweniyi. Hampinji yadiñayi muRoma, Epafwaditu wakatili nawa “kwasheli hanti nakufwa.” Chamweniyi nindi nakañanyi mudimu wafuukwiliyi, Epafwaditu waneñeli.—Fwi. 2:25-27.

11. (a) Muloñadi chitukubulila kuhayama neyi antu amakwawu muchipompelu aneña? (b) Indi Pawulu wahosheli nindidi kutalisha hadi Epafwaditu?

¹¹ Makonu antu anakuneña muloña wakukala kwakuvulu kwamonañawu. Kwesekeja nakuchinda kwamutayi waWorld Health Organization ashimunaña nawu muntu wumu hakachi kawantu atanu hadi antu ejima mukaayi nateli kwikala nachineñi mpinji yimu muchihandilu chindi. Niantu jaYehova niwena aneñaña. Kukala kwakukeñela chisaka yakudya, kukatakata, kudihomba muloña wakukañanya yuma yikwawu, hela yuma yikwawu yinateli kuneñesha muntu chikupu. Indi aFwilipi adi kumukwasha ñahi Epafwaditu? Pawulu wasonekeli nindi: “Mutambulenu mudi Mwanta nakuzañalala kwakweni; yilemeshenu antu adochu; muloña wakeñeli kufwa kukoola mudimu waKristu; haakamini kufwaku, kulonda awanishi nyidimu yimwakañenyi kuñilila.”—Fwi. 2:29, 30.

12. Twatela kukundeja ñahi ananeñi?

¹² Ninetu nawa twatela kukolesha amana kwetu ananeñi. Chakadi nikujina kudi yuma yayiwahi yakalakalañawu mumudimu waYehova yitwatela kuhoshahu. Hadaha kudi yuma yahimpiluwu chikupu muchihandilu chawu hakwila ekali akwaKristu hela atachiki kukalakala mudimu wakushimwina wampinji yejima. Twahamekaña hanyidimu yazatañawu, nawa twatela kuyileja netu Yehova niyena wahamekaña. Neyi amana kwetu amakwawu ashinshika anakukañanya kuzata nañovu hamuloña wawushinakaji hela yikatu, twatela kuyilemesha chikupu muloña wayaaka yayivulu yinakalikaluwu. Hela chinakali ñahi, Yehova wafumbaña antu jindi ashinshika ejima nindi: ‘Kundejenu ananeñi, koleshenu akwakuzeya, ilukenu dakudiwunjika nawantu ejima.’—1 Tesa. 5:14.

‘Mwanakenenu niKumukundeja’

13, 14. (a) Chumanyi cheneni chelili chipompelu chamuKorinda, nawa muloñadi? (b) Chumanyi chafumini mukumuhaña ona muntu?

¹³ Muchipompelu chamuyaaka nkulakaji yakusambila chawaKorinda mwadiña muntu welileña wuvumbi chakadi kubalumuka mumuchima. Yililu yindi yatamishileña ijina dadiwahi dachipompelu nawa wahayamishileña niantu abula kwitiya. Dichi, Pawulu washimwini nindi iwu muntu amuhañi muchipompelu.—1 Kor. 5:1, 7, 11-13.

¹⁴ Hamuloña wakumuhaña iwu muntu muchipompelu, mwafumini yuma yayiwahi. Chipompelu hichaluwankeni nayililu yatamaku, nawa chaleñeleli mukwakuvulumuna kuhimpa yitoñojoka yindi nakubalumuka chikupu. Nyidimu yakoñeliyi ona muntu yamwekesheli nawu nabalumuki mumuchima, dichi Pawulu mumukanda windi wamuchiyedi wasonekeleli china chipompelu nindi owu iyala mufuntishenu. Hela chochu, kudi yuma yikwawu yakeñekeleña. Pawulu walejeli cheñi chipompelu nindi “balumukenu mumwanakeni nikumukundeja [mukwanshidi wunabalumuki], kuchina muntu wudi ochu kuchikika nehuñu odu danamoniyi.”—Tañenu 2 Akorinda 2:5-8.

15. Twatela kumona ñahi antu avulumwini anabalumuki mumuchima anafuntishuwu muchipompelu?

¹⁵ Chumanyi chitwadizilaña kuniyi nsañu? Chatuneñeshaña hama neyi antu ayihaña muchipompelu. Hadaha analeti kasawuntu hejina daNzambi nikusawisha chipompelu. Nawa atela anatuvulumuni ninetu. Ilaña, neyi aeluda analejuwu kushinshika hanoyu nsañu afuukulahu, kwesekeja nawunlomboli waYehova, nawu mukwanshidi wunabalumuki  atela mufuntishi muchipompelu, chamwekeshaña nawu Yehova namwanakeni. (Mat. 18:17-20) Komana ninetu kwila tumwimbujola Yehova nehi? Eñañi, neyi tusweja kuzuwa nawa tukaana kumwanakena dikwila nawu tunakudikaña naYehova. Hakwila nawu tuleti kuwunda nikunuñañana muchipompelu chaNzambi nawa twikali nawuselewa waYehova, komana kwila ‘tukolesha kukeña kwetu’ kudi akwanshidi anabalumuki chikupu nawa anafuntishuwu muchipompelu nehi?—Mat. 6:14, 15; Luka 15:7.

‘Wankwashaña kuMudimu’

16. Muloñadi Pawulu chaneñeleliyi naMaku?

¹⁶ Nsañu yikwawu yamuNsoña yatulejaña nawu bayi tuhililaña akwetu anatuneñeshi munyichima yetuku. Chakutalilahu, Yowanu Maku wamuneñesheli chikupu kapostolu Pawulu. Wamuneñesheli ñahi? Hampinji yayiluwu aPawulu naBaranaba halwendu lwawu lwatachi lwawumishonali, Maku wayili nawu hamu nakuyikwashaku. Ilaña chashikiluwu hakachi, Yowanu Maku wafuntilumu nakushiya akwawu nawa hiyashimuna jiika chaleñeleluku. Pawulu waneñeli chikupu nachuma cheliliyi Maku chakwila hampinji yafuukwileñawu lwendu lwamuchiyedi, wabobweli naBaranaba hansañu yakumusenda cheñi Maku. Pawulu hakeñeleña nindi Maku yayinawuku muloña wachuma chazatikili halwendu lwatachi.—Tañenu Yililu 13:1-5, 13; 15:37, 38.

17, 18. Tuneluki ñahi netu kukala kwamwekeni hakachi kaPawulu naMaku akumanishili ñahi, nawa tukudizilaku chumanyi?

¹⁷ Hela chochu, Maku haswejeli kuneña chamukaaninuwu kudi Pawuluku, ilaña watwalekeluhu namudimu windi wawumishonali mumaluña amboka-mboka hamu naBaranaba. (Yil. 15:39) Nsañu yasonekeliyi Pawulu kutalisha hadi Maku chimwahitili yaaka yamwekesheña nawu wamwekesheli kanshinshi nikulumbuluka. Iku wudi mukaleya muRoma, Pawulu wamutambikili Timotewu kuhitila mukumusonekela mukanda. Hamukanda wowumu, Pawulu wahosheli nindi: “Inzaku naMaku muloña wankwashaña kumudimu.” (2 Tim. 4:11) Mwalala, Pawulu wamweni nindi Maku wapamini kuspiritu.

¹⁸ Kudi chuma chitwatela kudizilaku. Maku wamwekesheli yililu yakwikala kamishonali wamuwahi. Chamukaaninuwu kudi Pawulu hakusambila hichamuneñesheluku. Yena niPawulu adiña antu awuspiritu, nawa hiyadishilili chikinzaku. Ilaña, chimwahitili yaaka Pawulu welukili nindi Maku wamukwashileña chikupu. Dichi neyi amana kwetu amanisha kukala niyikonkojola, chikuwaha neyi akutwalekahu nakukwasha akwawu kupaminaku kuspiritu. Neyi tukushinshika hayuma yayiwahi yakoñañawu amakwawu, chipompelu chikukola.

Enu niChipompelu

19. Indi antu amuchipompelu chawakwaKristu anateli kudikwasha ñahi wumu namukwawu?

¹⁹ Muyinu “nyaka yakala,” mwatela mudikwasheña nawana kwenu niahela muchipompelu. (2 Tim. 3:1) Muloña bayi neyi akwaKristu ejima elukaña mwakwilila nakukala kwamonañawuku, ilaña Yehova diyi weluka. Nawa nateli kuzatisha antu amboka-mboka muchipompelu, kushilahu ninenu, kulonda mukwasheñaku akwenu alondeleña njila yayiwahi. (Isa. 30:20, 21; 32:1, 2) Dichi tuzatenu nañovu, kulonda tulondeli kufumba kwakapostolu Pawulu! Twalekenuhu ‘nakudikundeja wejima wenu nakudikolesha wumu namukwawu, mwomumwelaña.’—1 Tesa. 5:11.

Mukwakula Nenudi?

• Muloñadi chitwatela kudikolesha wumu namukwawu muchipompelu chawakwaKristu?

• Kukala kwamuchidinyi kumunateli kukwasha amakwawu kushinda?

• Muloñadi chitwakeñelaña akwetu kutukwasha muchipompelu?

[Malwihu aKuzatisha haKudiza]

[Mwevulu wudi hefu 11]

Neyi mukwetu mukwaKristu wudi mukukala, tunateli kumukwasha

[Mwevulu wudi hefu 12]

Makonu anyikwenzi niayañadima amavulu muchipompelu chawakwaKristu niwena atela kupama