Wanenu Kukiñewa Hakachi kaWantu jaNzambi

“Nukukusakilila muchipompelu cheneni.”—MAS. 35:18.

1-3. (a) Yumanyi yinateli kuleñela akwaKristu amakwawu kusha wubwambu wawu naYehova hakatoña? (b) Kudihi kwatela kuwanawu antu jaNzambi chiswamu?

 HAMPINJI yayiluwu nakunooka, Joe niñodindi ayili nakuwela mukaluñalwiji. Avweli yozelu yakonenamu hampinji yajimininuwu hamenji nakutala marubi hadiñi inshi yayivulu nankashi nawa yashiyashana mukutoha nimunyichidi. Atachikili kuya hahalehi nakutala marubi. Chiyashikiluwu kwakunama, ñoda Joe wamwilili mfumwindi nindi, “Namoni tunashiki kwakunama.” Mfumwindi Joe wakwili nindi, “Wundaku, neluki jinakwila.” Joe wanukaña chadihwiliyi chimwahitili hohu kampinji kantesha nindi, ‘Inshi jejima jinayi kudihi?’ Wafwili mutentu, nawa welukili chaleñeleli inshi kupalañana. Kwinyiñi kwafumineña shark wenjeleña nakumudya. Joe wakañenyi mwakwilila. Shark chashikiliyi kwakwihi, wabalumukili nakufunta kwinyiñi.

² MukwaKristu anateli kumukokola nayuma yamukaayi kaSatana, yidi neyi yisela, nyidimu, maheta, chakadi kwiluka nindi nakudibula henyiñi dafwana. Joe hieluda chayinu mpinji nawa wahosheli nindi: “Chuma chinamweni chanleñeleli kutoñojoka hadi antu twadikundaña nawu. Chachiwahi kuwelela kumwaba nawa kwakuwahi, dikwila nawu muchipompelu!” Bayi tuleka yuma yamukaayi yaluwañeshaña yituleñeli kwambuka kuchipompeluku, mwatela kufuma wubanji. Neyi mumona nenu munatachiki kudambula kuchipompelu, nyakalenu kutachika kudikunda cheñi nachipompelu. Neyi nehi, mukusha wubwambu wenu naYehova hakatoña.

³ Makonu, kaayi kanafwani chikupu kushakamamu akwaKristu. (2 Tim. 3:1-5) Satana neluki nindi mafuku indi anakehi dehi, dichi nakufwila kudya azeya. (1 Pet. 5:8; Chim. 12:12, 17) Hela chochu, atukiñaña. Yehova waloñeshela antu jindi chiswamu chakuspiritu, chipompelu chawakwaKristu.

4, 5. Indi antu amavulu atoñojokaña ñahi hachihandilu chawu chakumbidi, nawa chumanyi chaleñelaña?

⁴ Nfulumendi yamwituña yatukiñaña hohu munjila jantesha, chili kumujimba hela muyitoñojoka. Antu amavulu anakumona nawu kukiñewa kwawu kwakumujimba kudi hakatoña muloña wawubanji, ndombu, kukala kwachihandilu, nikutaminaku kwayileñaleña yamukaayi. Antu ejima amonaña kukala kwenzaña hamuloña wawushinakaji nikukatakata. Nawa antu azataña, akweti matala, mali amavulu, nawa akola kunyijimba akamenaña neyi chakwila yumiyi akatwalekahu kwikala nayu.

⁵ Nawa antu amavulu akañanyaña kuwana yuma yatela kukiña yitoñojoka yawu. Chawushona, antu amavulu akuhwelelaña kwikala nakuwunda nimuzañalu mumaluwi nimuchisaka awana nawu yuma yakuhwelelañawu hiyamwekanañaku. Hakukeña kwikala nawubwambu wakola naNzambi, akwamachaachi amavulu ahayamaña nankashi, chayileñela kujinooka wunlomboli watambwilañawu. Ichi chamwekanaña sweje-e neyi ashinshika hayililu yaheña yamwekesheña anlomboli jawu jansakililu nintañishilu yawu yakutwamba. Antu amavulu atoñojokaña nawu njila yayiwahi yidi yakukuhwelela hohu musayansi hela muyuma yayiwahi niwukwashu wawantu. Dichi bayi tuhayamaku, hakumona antu atoñojokaña nawu hiyakiñewaku hela hiyakeñaña kutoñojoka nankashi hachihandilu chawu chakumbiduku.

6, 7. (a) Chumanyi chaleñela antu amukalakelaña Nzambi ekali nayitoñojoka yambukaku nayawantu abulaña kumukalakela? (b) Yumanyi yitukuhanjekahu?

 ⁶ Hadi chaambu cheneni nankashi hakachi kawantu ekala muchipompelu chawakwaKristu nawantu abula kwikala muchipompelu! Hela chakwila etu antu jaYehova, twamonaña kukala nimakabi wowamu naamonañawu antuñi netu, ilaña hadi chaambu nachitwazataña naniku kukala. (Tañenu Isaya 65:13, 14; Malaki 3:18.) Muloñadi? Muloña Bayibolu yatulumbulwilaña chachiwahi chaleñelaña antu amoneña kukala, nawa yatukwashaña kuumika kukala kwamuchihandilu nimakabi. Chafumañamu, hitwaswejaña kwakama hachihandilu chakumbiduku. Hakwikala akwakudifukula aYehova kwatuleñelaña kwikala akiñewa kuyitoñojoka yaluwa nawa yabula kushindamena hansona, kuyililu yatama, nikuyuma yatama yafumañamu. Antu amuchipompelu chawakwaKristu ashakamaña mukuwunda kwabulaña kumonawu antu amakwawu.—Isa. 48:17, 18; Fwi. 4:6, 7.

⁷ Yakutalilahu yikwawu yinateli kutukwasha kushinshika hakukiñewa kwekala nawantu amukalakelaña Yehova kwambukaku nawantu abulaña kumukalakela. Yakutalilahu yamuchidiwu yinateli kutuleñela kushinshika yitoñojoka yetu niyililu nikwiluka neyi twatela kuzatisha chikupu kufumba kwaNzambi, kwaloñeshawu kulonda kutukiñeña.—Isa. 30:21.

“Hasheli Hanti Hohu Nakusenuka Nyendu Yami Munjila”

8. Chumanyi chelañawu ambuña aYehova mpinji yejima?

⁸ Kufuma tuhu kushankulu muchihandilu chawantu, antu atondeluhu kumukalakela Yehova nikumwovwahila afuukwiluhu kutondolwela kudikunda nawantu abulileña kumukalakela. Eñañi, Yehova washimwini nindi hakekala nkunyi hakachi kawakwakudifukula indi nawantu amulondelaña Satana. (Kutach. 3:15) Hamuloña wakukolela kunshimbi yonenawu, antu jaNzambi ambukaku nawantu amuchituñilu. (Yow. 17:15, 16; 1 Yow. 2:15-17) Mpinji yejima chakala kwikala ambukaku nawantu amakwawuku. Eñañi,  antu amakwawu hakachi kawambuña aYehova ajinookaña kulema kwakwikala nachihandilu chakudihana.

9. Lumbululenu kukala kwamweni nsoneki waMasamu 73.

⁹ Hadaha mwana kaAsafwi nsoneki waMasamu 73, diyi kambuña aYehova wajinookeleña neyi wafuukwili mwamuwahi. Ñimbi yamasamu wehwili muloña waleñelaña antu atama ashakameña chachiwahi, amuzañalu, nawa namaheta, ilaña antu amakwawu afwilaña kumukalakela Nzambi ayandaña.—Tañenu Masamu 73:1-13.

10. Muloñadi nsañu yahosheliyi ñimbi yamasamu chiyalemena kudi enu?

¹⁰ Mwehulahu dehi malwihu adi neyi asonekeliyi ñimbi yamasamu? Neyi mwehulahu dehi awa malwihu, bayi mutiya kukala hela kutoñojoka nenu chikuhwelelu chenu chinakuzeyaku. Chochimu, ambuña aYehova amavulu, kubombelahu niazatishiliyi Yehova hakusoneka Bayibolu, adiña nayitoñojoka yoyimu. (Yoba 21:7-13; Mas. 37:1; Yere. 12:1; Hab. 1:1-4, 13) Mwalala, antu ejima afwilaña kumukalakela Yehova chiña atoñojokahu nikwiteja ñakwilu yanilu lwihu lwakwila nawu: Komana kumukalakela Nzambi nikumwovwahila dichuma chachiwahi chinatela kwila? Iyi nsañu yabombelamu muloña waleteliyi Satana mwitempa daEdeni. Hilwihu lunakundami kudi antu ejima lwawanta wakuleña kwejima. (Kutach. 3:4, 5) Dichi wejima wetu twatela kutoñojoka chachiwahi hansañu yahosheliyi ñimbi yamasamu. Komana twatela kutiyila antu atama ichima ashakamaña chachiwahi? Komana twatela ‘kusenuka munjila’ nakuleka kumukalakela Yehova nikwila yuma yelañawu? Ichi dichuma chakeñañayi Satana nindi twili.

11, 12. (a) Indi ñimbi yamasamu walekeli ñahi kujinooka, nawa chinakutudizisha chumanyi? (b) Chumanyi chinayikwashuku kutoñojoka neyi chatoñojokeliyi ñimbi yamasamu?

¹¹ Chumanyi chamukwashili ñimbi yamasamu kuleka kujinooka? Hela chakwila wetejeli nindi wadiña kwakwihi nakusenuka munjila yaloña, yitoñojoka yindi yabalumukili hampinji yeñililiyi “mumalala aNzambi”—dikwila nawu, hampinji yatachikili kudikunda nawantu awuspiritu mutabanaka yaNzambi hela mutembeli nikutoñojoka hankeñelu yaNzambi. Dihafumini ñimbi yamasamu kutoñojoka nindi hanakukeña yuma yatama yakamonawu antu atama yakamumwekenuku. Welukili nindi yuma yakoñañawu niyafuukulañawu muchihandilu yayendeshaña ‘hasenena.’ Ñimbi yamasamu welukili nindi, antu ejima afumaña kudi Yehova muloña wayililu yatama, jikayikuma ‘namutentu wukafwawu,’ ilaña Yehova wukakwasha antu amukalakelaña. (Tañenu Masamu 73:16-19, 27, 28.) Chakadi kujina, muneluki nenu awa mazu alala. Kudishindamena etu awani chakadi kulemesha nshimbi jaNzambi kunateli kukokola antu amavulu, ilaña yuma yatama yafumañamu kwosi watela kuyitemukaku.—Ŋal. 6:7-9.

¹² Chumanyi chikwawu chitwatela kudizila kuyuma yamweniyi ñimbi yamasamu? Waweni kukiñewa nimaana hakachi kawantu jaNzambi. Watachikili kutoñojoka chachiwahi hampinji yayiliyi kutembeli kwadifukwileñawu antu kudi Yehova. Makonu, tunateli kuwana antu atela kutuleja maana nikudya yakudya yayiwahi yakuspiritu hakupompa. Dichalejelañayi Yehova ambuñindi nindi ayeña kukupompa kwawakwaKristu. Akuyikolesha nikuyisañumuna kwila yuma yayiwahi.—Isa. 32:1, 2; Heb. 10:24, 25.

Tondenu Amabwambu Chachiwahi

13-15. (a) Chumanyi chamweniyi Dina, nawa chinakumwekeshadi? (b) Muloñadi kudikunda nawakwetu akwaKristu chikwatela kutukiña?

¹³ Mwana kaYakoba wamumbanda Dina hichakutalilahu chamuntu wadiñijili mukukala kweneni hamuloña wakudikunda nawantu akwituña. Nsañu yekala mumukanda waKutachika yahoshaña hadi Dina yatulejaña nawu wadiña nachaaku chakudikunda nawayañadima amuKenani ashakamineña kwakwihi nakwadiña chisaka chindi. AkwaKenani hiyadiña nayililu yayiwahi neyi yadiña nawakwakudifukula aYehovaku. Ilaña, wunsahu washimunañawu  akwakuvumbujola wamwekeshaña nawu yuma yakoñeleña akwaKenani yaleñeleli mwituña dawu mwikali kupesha, yililu yatama, kudifukula kuyuma yawuvumbi, nindombu. (Kwid. 23:23; Lev. 18:2-25; Kuhit. 18:9-12) Toñojokenu hayuma yafumini muwubwambu waDina naweniKenani.

¹⁴ Shekemi, iyala wamunodu iluña, ateneneñawu nawu “kwitala datata yindi diyi alemesheluwu chakubadika akwawu ejima,” wamumweni Dina “hakumutambula, hakukama nindi, hakumutamisha.” (Kutach. 34:1, 2, 19) O chishimashima chamwekeni! Komana mwafwikijaña nenu Dina watoñojokeleña nindi yuma yamuchidiwu yateleleli kumumwekena? Hekwawu wakeñeleña hohu kudikunda atwansi amudina iluña, amweneñayi nindi hiyantu amawahi. Ilaña, Dina amudimbili chikupu.

¹⁵ Chumanyi chitwatela kudizila kuniyi nsañu? Yinakutuleja nawu kwila tudikunda nawantu abula kwitiya chakadi kumona kalulaku. Bayibolu yatulejaña nawu “kudikunda nawantu atama kwatamishaña maana amawahi.” (1 Kor. 15:33) Cheñi nawa, kudikunda nawantu akuhwelela yuma yimwetiya, alemesha nshimbi yalema yimwalemesha ninenu, nawa amukeña Yehova hikukiñewa. Amabwambu amawahi amuchidiwu akuyikwashaku kwila yuma yayiwahi.—Yish. 13:20.

‘Anayiweleshi Dehi’

16. Indi kapostolu Pawulu wahosheli nindidi hadi antu amakwawu amuchipompelu chawaKorinda?

¹⁶ Chipompelu chawakwaKristu chinakwashi antu amavulu kuditookesha kuyililu yatama. Kapostolu Pawulu chasonekeliyi mukanda watachi kuchipompelu chamuKorinda, wahosheli nindi akwaKristu muKorinda ahimpili yililu yawu nakulondela nshimbi yaNzambi. Amakwawu adiña ayivumbi, akwakupesha, asenji, amayala adilishileña neyi ambanda, hela aditamishileña nawakwawu amayala, amakombi, akwakusheta, niyuma yikwawu. Ilaña Pawulu wayilejeli nindi ‘anayiweleshi.’—Tañenu 1 Akorinda 6:9-11.

17. Indi kulondela nshimbi jamuBayibolu kunahimpi ñahi yihandilu yawantu?

¹⁷ Antu abula chikuhwelelu hiyakweti nshimbi yalala yakuyilombolaku. Elaña munafuukuluwu hela elaña yuma yatama yelañawu akwawu, neyi cheleliluwu antu ashakamineña muKorinda wakushankulu henohu kanda ekali akwakwitiya. (Efwes. 4:14) Kwiluka kwalala kwekala Mwizu daNzambi, ninkeñelu yindi, kukweti ñovu yakubalumuna chiwahi yihandilu yawantu ejima azatishaña kufumba kwamuBayibolu. (Kol. 3:5-10; Heb. 4:12) Antu amavulu makonu ekala muchipompelu chawakwaKristu anateli kuyileja nawu henohu kanda adizi nikutachika kulondela nshimbi yaYehova yaloña, elileña yuma yatama. Chihandilu chawu chadiña chakadi muzañalu. Awanini kuwunda hampinji yatachikiluwu kudikunda nawantu jaNzambi nikulondela nshimbi yamuBayibolu.

18. Kukalanyi kwamweni chañadima wamumbanda, nawa chinakumwekeshadi?

¹⁸ Ilana, antu amakwawu afuukwiluhu kufuma muchipompelu chawakwaKristu chayinu mpinji aditoñeshaña chikupu. Muhela wumu, itukutena netu Tanya, washimwini nindi “chakulileñayi wadiña nakudizaku chalala,” ilaña chashikijiliyi yaaka 16, wafumini muchipompelu nakutachika “kufwila yuma yakwituña yekoku.” Hakachi kayuma yafuminumu amwimitishili nawa wafumishili ivumu. Chayinu mpinji wahoshaña nindi: “Hadi yaaka yisatu yinafumini muchipompelu nashala nayibata yamaneni muyitoñojoka yikabula kukusuka swañu. Chuma chinikabula kujimbala, najahili mwanami henohu kanda yovwaliki. . . . Dichi inakuleja  atwansi ejima anakukeña ‘kutompa’ yuma yamukaayi hela tuhu hakampinji kantesha nami: ‘Bayi muchesekaku!’ Hakutachika yatiyakanaña kutowala, ilaña mwafumaña jomisha mbaña. Kwosi yuma yayiwahi yahanaña kaayi ilaña katumweshaña kwelamba hohu. Ami nakiluki kaayi. Muloña nakitompeli. Shakamenu mukuloñesha kwaYehova! Diyi njila hohu yaletaña muzañalu.”

19, 20. Indi kukiñanyi kwekala muchipompelu chawakwaKristu, nawa munjilanyi?

¹⁹ Toñojokenu chuma chatela kuyimwekena neyi mufuma muchipompelu chawakwaKristu mwayikiñañawu? Antu amavulu, chanukawu yuma yatama yakoñeleñawu kunyima henohu kanda adizi chalala, hiyakeñaña nikutoñojokahu cheñuku. (Yow. 6:68, 69) Mukutwalekahu kukiñewa kuyihuñu nimakabi anasweji kuvula mwituña daSatana kuhitila mukudikunda chikupu nawamana kwenu niahela akwaKristu. Neyi mukuhanjekaña nawu nikupompaña mpinji yejima kukuyanukishaña maana ekala munshimbi jaloña jaYehova nawa chikuyikwasha kujilondela. Kudi yuma yayivulu yikuyileñela ‘kumusakilila Yehova muchipompelu cheneni,’ neyi cheliliyi ñimbi yamasamu.—Mas. 35:18.

²⁰ Eñañi, kudi yuma yayivulu, yaleñela akwaKristu kuhita mukukala kwaleñela chiyikalileña kutwalekahu ashinshika. Anateli kukeña muntu wakuyileja njila yayiwahi yakulondela. Indi enu, niantu ejima muchipompelu munateli kwila ñahi, kulonda mukwashi akwenu akakwitiya mumpinji yamuchidiwu? Chibaaba chinalondeluhu chikushimuna chimwatela ‘kutwalekahu kukundeja nikukolesha’ amana kwenu.—1 Tesa. 5:11.

Mukwakula Nenudi?

• Yumanyi yitukudizila kuyuma yamweniyi nsoneki waMasamu 73?

• Indi kukala kwamweniyi Dina kwatudizishañadi?

• Muloñadi chimwatela kuwanina kukiñewa muchipompelu chawakwaKristu?

[Malwihu aKuzatisha haKudiza]

[Nyevulu yidi hefu 7]

Welelenuña kwakuma; shakamenu muchipompelu!