“Bayi Wutiya Womaku, Nukukukwashañaku”

YESU wasoñamishileñahu dehi atumbanji twindi nindi: “Diyabolu keña ashi akwenu amakwawu mukaleya, kulonda ayeseki.” Hela chochu, henohu kanda yahoshi awa mazu akusoñamisha, Yesu wahosheli nindi: “Bayi wutiyaña woma wayuma yiwukukeña kukaba nachuku.” Chineli Satana wuchidi kutwalekahu kuzatisha tuleya neyi njila yakulekeshelamu mudimu wakushimwina Wanta, tunateli kukuhwelela netu nfulumendi jikwawu jikukabishaña akwaKristu alala. (Chim. 2:10; 12:17) Hanu dinu, chumanyi chikutukwasha kwikala adiloñesha kutondolwela nyihetu yaSatana ‘nikubula kutiya woma,’ neyi chasoñamishiliyi Yesu?

Eñañi, wejima wetu mpinji yimu twatiyahu dehi woma. Ilaña, Izu daNzambi datukonkomwenaña nawu nawukwashu waYehova, tunateli kutondolwela kutiya woma. Munjilanyi? Njila yimu mwatukwashilañayi Yehova kwiluka chakutondolwela ikañesha, yidi yakwiluka tufuta twazatishañayi Satana niantu jindi. (2 Kor. 2:11) Tushinshikenu hachuma chamwekeni kumpinji yakunyima, hakwila twiluki chakoñañayi mwenimu. Tukushinshika cheñi hayakutalilahu yamakonu yawakakwitiya ashinshika ‘atwesheli kudikaña namaana adiyabolu akudimbana.’—Efwes. 6:11-13.

Mwanta Wamwakamineña Nzambi Amulukukili Kudi Mwanta Watama

Muyaaka nkulakaji yamuchitanu nachisatu B.C.E., Mwanta watama Senakeribi wakuAshuri washindili nyunza yayivulu. Hamuloña wakuditiya chikupu, wazanzili mesu hadi antu jaYehova nimusumba weneni waYerusalema, mwayulileñayi mwanta Hezekiya wamwakamineña Nzambi. (2 Anya. 18:1-3, 13) Chakadi nikujina, Satana wazatishili iyi mpinji, nawa wamusañumwini Senakeribi yakoñi tufuta twaSatana kulonda kujiyisha kudifukula kwalala hamaseki.—Kutach. 3:15.

Senakeribi watemesheli izanvu dawantu kuYerusalema kulonda kuya nakutiyisha woma antu adiña muwuna musumba. Hanidi izanvu dawantu hadiña Rabishake, wadiña ñimenu yamwanta. * (2 Anya. 18:17) Chikonkwanyi chaRabishake chadiña chakukisañana chikuhwelelu chawaYudeya nikuumika kwawu nikuyileñela ahani musumba chakadi kulwa njita. Njilanyi yazatishiliyi Rabishake hakufwila kutiyisha aYudeya woma?

Wadiña Washinshika Hela Chakwila Wadiña Nkawindi

Rabishake walejeli añimenu jaHezekiya nindi: “Mwanta muneni, mwanta wakuAshuri nahoshi nindi, Wunaditembi chumanyi? . . . Komana wunakuhweleli aEjipitu adi neyi mbwechi  yeteti dachikeka dehi, yakwila muntu wukwila nindi ashilamenuhu hiyikwiñila muchikasa chindi, hiyikumulemeka.” (2 Anya. 18:19, 21) Muloña wamutwikiluwu kudi Rabishake wadiña wakutwamba, muloña Hezekiya hadikwatili wubwambu nawaEjipituku. Hela chochu, muloña wamutwikiluwu washindameneni hachuma chakeñeleñayi Rabishake nindi aYudeya anukeña, wahosheli nindi: ‘Kwosi wukakukwasha. Wudi nkaweyi—wunadambuli.’

Makonu, akwakukañesha kudifukula kwalala azatishaña njila yoyimu yakwambula akwaKristu alala kulonda kuyitiyisha woma. Muhela wumu mukwaKristu, akasiluwu mukaleya hamuloña wachikuhwelelu chindi nakumutwala kwakanka windi hadi yaaka yayivulu kwakadi akwawu akakwitiya, chimwahitili mpinji washimwini chuma chamukwashili kubula kutiya woma. Wahosheli nindi: “Kulomba kwankwashili kukundama kudi Yehova . . . Nanukili mazu akukolesha ekala haIsaya 66:2, akwila nawu Nzambi watalaña ‘kazweñi nimuntu wachikeka mumuchima.’ Awa mazu ankolesheleña mpinji yejima nikunkundeja chikupu.” Munjila yoyimu, mana kwetu akasiluwu mukaleya hadi yaaka yayivulu wahosheli nindi: “Nyikoleki yakutuña kudi antu hiyinateli kumukeñesha Yehovaku, nawa mana kwetu wadiña wamuzañalu hamuloña wawubwambu windi naYehova.” Eñañi, kwikala nawubwambu wawuwahi naYehova kwakolesheli awa akwaKristu ayedi kuumika hampinji yayikasililuwu kwakankawawu. (Mas. 9:9, 10) Antu ayikabishileña ayambwili kuyisaka yawu, amabwambu jawu, nikudi akwawu akakwitiya, ilaña aYinsahu akasiluwu elukili nawu akwakuyikabisha hiyanateli kuyambula kudi Yehovaku.—Rom. 8:35-39.

Dichi chachiwahi kuzatisha mpinji yidi yejima kulonda kukolesha wubwambu wetu naYehova. (Yak. 4:8) Mpinji yejima twatela kudihula netu: ‘Komana Yehova namwiluka chikupu? Komana izu dindi dankwashaña nankashi neyi kudi yuma yinakufuukula yanyanya hela yamaneni, muchihandilu chami?’ (Luka 16:10) Neyi tukuzata nañovu kulonda tuhembi wubwambu wetu naNzambi, kwosi chuma chikutufwisha mutentuku. Kaprofwetu Yeremiya, kwimenaku aYudeya akabishileñawu wahosheli nindi: “Mukaleya kamuwina kakuma kwishina chikupu, natambikili ijina deyi, eyi Yehova . . . Wakundamini kwakwihi ifuku dinakutambikili, welili neyi, Bayi wutiya womaku.”—Mukeŋa 3:55-57.

Ayilumbu Afwilaña Nawu Antu jaNzambi Amujinookeña Akañanyaña

Rabishake wazatishili nsañu yakutwamba kulonda antu atachiki kujinooka. Wahosheli nindi: “[Yehova] hidiyi wukweti yinañanaña nitumeña twanafumishiyi Hezekiya[ku]? . . . Yehova diyi nañili nindi Yaku wakaasi ituñidi wakadijilumuni.” (2 Anya. 18:22, 25) Rabishake wahosheli nindi Yehova kwila yalwila antu Jindi nehi muloña amuneñesheli. Ilaña watwambili chikupu. Yehova wadiñi wamukeña Hezekiya niaYudeya afuntili kukudifukula kwalala.—2 Anya. 18:3-7.

Makonu, akwakuyandisha akasaña tufuta hakuhosha nsañu yatiyakanaña neyi yalala kulonda antu eteji munakuhoshawu, ilaña abombashanaña nsañu yalala nayakutwamba, kulonda antu atachiki kujinooka. Chakutalilahu, amana kwetu niahela adi mutuleya mpinji jikwawu ayilejaña nawu mana kwawu walombolaña mwituña dawu nafumi muchipompelu cheñi nawa chikuwaha neyi niwena akwila mwomumu nakubula kukakela kuyuma yakuhwelelawu. Hela chochu, yitoñojoka yamuchidiwu hiyaleñelaña akwaKristu kutachika kujinookaku.

Talenu chuma chamwekeni kudi muhela mukwaKristu hampinji yavulumukili Njita  yamuKaayi II. Hampinji yadiñayi mukaleya, amutumesheleli mukanda wakumuleja nawu mana kwetu walombweleña nafumi muchipompelu. Mukwakwihujola wamwihwili muhela kulonda yatiyi neyi neteji iyi nsañu. Muhela wakwili nindi, “[Iwu mana kwetu] wawanina wanyi.” Wahosheli cheñi nindi, hamuloña wakulondela nshimbi jamuBayibolu, dichaleñeleli Nzambi yamuzatisheña. “Chineli nsañu yinahoshiyi yinambuki nachahosha Bayibolu, hadi cheñi mana kwamuku.” Iwu muhela wakoñeli mwamaana hakulondela kufumba kwaBayibolu kwakwila nawu: “Bayi mukuhwelela ayilolu, hela mwana kamuntuku, ochu wukukukwashaku wanyi.”—Mas. 146:3.

Neyi twiluka Izu daNzambi chikupu nikulondela mudahoshaña chikutukwashaku kutondolwela nsañu yakutwamba yinateli kutuleñela tukañanyi kuumika. (Efwes. 4:13, 14; Heb. 6:19) Dichi, hakwila nawu tudiloñeshi kulonda kutoñojoka chachiwahi neyi tunamona kukala, twatela kusha muchima hakutaña Bayibolu ifuku nifuku nikudiza. (Heb. 4:12) Eñañi, ayinu diyi mpinji yakwiluka chikupu nikukolesha chikuhwelelu chetu. Mana kwetu womikili mukapeka kakuyandishilamu hadi yaaka yayivulu wahosheli nindi: “Inakukeña kukolesha ejima kulonda ekali namuchima wakuhameka yakudya yejima yakuspiritu yatwinkañawu, muloña hituneluki chiyakatukwasha kumbiduku.” Eñañi, neyi tukudizaña chikupu Izu daNzambi ninyikanda yasonekañawu kudi izanvu danduñu, dikwila nawu, mpinji yitukamona kukala, spiritu ‘yakatwanukisha’ yuma yitwadizili.—Yow. 14:26.

Kukiñewa Kudi Akwakutiyisha Woma

Rabishake wesekeli kuyitiyisha aYudeya woma. Wahosheli nindi: “Mwani mwinkenu nkaka yami mwanta wakuAshuri kapopu, ami nakakwinki tuwalu makombakaji ayedi, neyi eyi wunatweshi kushahu akwakwendelahu. Eyi, wukukañanya kutemuna nikachilolu kamu kawambuñankaka yami?” (2 Anya. 18:23, 24) Kwesekeja nayitoñojoka yawuntu, Hezekiya niantu jindi hiyadi kutwesha kwasa njita nawamashidika asweja ñovu akuAshuriku.

Makonu akwakuyandisha anateli kumwekana neyi adi nañovu, sweje-e neyi anakuyikwasha nankashi kudi Nfulumendi. Ichi dicheliluwu akwakuyandisha awaNazi hampinji yaNjita yamuKaayi II. Esekeli kuchinisha antu jaNzambi amavulu. Mana kwetu wumu, washakamini yaaka yayivulu mukaleya, walumbulwili chamutiyishileñawu woma. Ifuku dimu, mushidika wañihwili nindi: “Wamona ntahi ona mana kweyi chamulozawu? Wunadiziluku chumanyi?” Yena wakwili nindi: “Ami nidi chinsahu chaYehova nawa nukutwalekahu kwikala chinsahu.” Mushidika wamutiyishili woma nindi, “Komana yeyi wukuhiñahu kuloza.” Hela chochu, mana kwetu wemikili mushindu nawa chilumbunindi walekeli kumutiyisha woma. Chumanyi chamukwashiluku kuumika? Wakwili nindi: “Nakuhweleli mwijina daYehova.”—Yish. 18:10.

Neyi tumukuhwelela Yehova chikupu, dikwila nawu tukweti nkebu yikutukiña kuyuma yejima yazatishañayi Satana yaleñelaña chihandilu chetu chakuspiritu kwikala muwubanji. (Efwes. 6:16) Dichi, twatela kulomba kudi Yehova kulonda yakoleshi chikuhwelelu chetu. (Luka 17:5) Cheñi, twatela kuzatisha chachiwahi ntanjikilu yakoleshaña chikuhwelelu chetu yaloñeshawu kudi izanvu danduñu washinshika. Neyi anakututiyisha woma, twakolelañaku chikupu neyi twanuka mazu ahosheliyi Yehova akukolesha kaprofwetu Ezekeli, enkeluwu mudimu wakushimuna nsañu kudi antu achinchika nyichima. Yehova wamulejeli nindi: “Nakuumishi dehi hamesu wudikañi namesu awu, nakukoleshi dehi hehama wudikañi namahamawu. Hehama deyi nakoleshuhu dehi neyi diyamondi dabadika ilola kukola.” (Ezek. 3:8, 9) Neyi tunakukeña wukwashu, Yehova nateli kutukolesha neyi diyamondi kufwana chamukolesheluwu Ezekeli.

Kutondolwela Kweseka

Akwakukañesha elukaña nawu neyi tufuta twejima tukañanya, kumudimba muntu nawu akakufweta kunateli kuleñela muntu kufumpa kashinshi kindi. Itu ditufuta twazatishiliyi Rabishake. Walejeli antu amuYerusalema nindi:  “Mwanta wakuAshuri nindi, Tutiyañanenu mwidiki mwinzi kudami . . . nichinakenza nakuyifumishamu, nakayitwali kwituña dafwana neyi ituña denwenu aweni, ituña datidiku navinyu, ituña dayakudya namatempa anyivinyu, ituña damanji aolive nawuchi, mwakahandaña mwakabuli kufwa.” (2 Anya. 18:31, 32) Antu enzeleluwu mukachi kampwembu atela atiyili kuwaha nankashi hakutiya nawu akadyaña makendi atata nikunwa vinyu.

Kukana kwamuchidiku akuzatishili kulonda azeyeshi chikuhwelelu chakamishonali akasiluwu mukaleya. Amulejeli nawu akumutwala “mwitala dadiwahi” dikweti “lubanza lwaluwahi” hadi tukweji tutanu nakamu kulonda yakafuukuluhu chiwahi. Ilaña, mana kwetu watwalekeluhu kwikala wakola kuspiritu nakubula kufumpa nshimbi yawakwaKristu. Chumanyi chamukwashiluku? Chihashimbwili, walumbulwili nindi: “Natoñojokeleña haWanta nami diwu wakamanisha kukala kwejima. . . . Hamuloña wakukoleshewa nansañu yaWanta waNzambi, nikwiluka nami wudi kwoku, nikubula kuwujinooka hela chanti, ankañenyenyuku tuhu tikiliki.”

Komana twakuhwelela netu Wanta waNzambi wudi kwoku? Nkakulula Abarahama, kapostolu Pawulu, niYesu atwesheli kuumika kweseka kwamboka-mboka muloña eluki nawu Wanta wudi kwoku. (Afwi. 3:13, 14; Heb. 11:8-10; 12:2) Neyi tutwalekahu kutwamijaku Wanta muchihandilu chetu nikutoñojokaña hankisu jahaya nyaka jiwakaleta, anetu tunateli kutondolwelela kweseka nakubula kwiteja wukwashu wahakapinji kantesha muloña wayihuñu.—2 Kor. 4:16-18.

Yehova Hamba Katushiyaku

Hela chakwila Rabishake wafwilileña kuchinisha aYudeya, Hezekiya niantu jindi amukuhweleleli Yehova chikupu. (2 Anya. 19:15, 19; Isa. 37:5-7) Yehova niyena, wakwili kulomba kwawu kuhitila mukutemesha kañelu wajahili amashidika 185,000 muwufuku wumu muchilombu chawaAshuri. Chikwachili, Senakeribi watiyili nsonyi nawa wahubili lufuchi nakufunta kumusumba windi waNineve, hamu nawamashidika indi antesha asheluhu.—2 Anya. 19:35, 36.

Chakadi nikujina, Yehova hayishili chisayikila antu jindi amukuhweleleluku. Yakutalilahu yamakonu yawamana kwetu niahela emikaña mushindu mukweseka yamwekeshaña nawu nikulelu Yehova hashiyaña antu jinduku. Dihafuma Tata yetu wamwiwulu kutukana nindi: “Ami Yehova Nzambi yeyi nakakukwataña kuchikasa cheyi chachidiilu, nakakwilaña nami, Bayi wutiya womaku, nukukukwashañaku.”—Isa. 41:13.

[Tumazu twaheshina]

[Mazu ekoku adi hefu 13]

Kubadika mapampa 30 Mwizu dindi, Yehova yomweni wakana antu jindi nindi: “Bayi wutiya womaku”

[Mwevulu wudi hefu 12]

Indi tufuta twaRabishake tunadifwani ñahi natwazatishaña ayilumbu jawantu jaNzambi makonu?

[Nyevulu yidi hefu 15]

Kwikala nawubwambu waweni naYehova kwatukwashaña kuhemba chikuhwelelu chetu neyi tudi mukweseka