Kwashenu Anyanenu Ekali naMpwila yaKukeña Kutaña niKudiza
Kwashenu Anyanenu Ekali naMpwila yaKukeña Kutaña niKudiza
KUSHAKU kashinshi chikupu kulonda mudizishi anyanenu kwiluka kutaña nikudiza hinjila yalema nankashi yimwatela kuwahishilamu chihandilu chawu chakumbidi. Nyidimu yeniyi yaletaña muzañalu nankashi! Antu amakwawu atiyaña kuwaha kwanuka anvwali jawu chiyadiña nakuyitañila hampinji yadiñawu atwansi. Kutaña kwazañaleshaña chikupu, nawa mwafumaña yuma yayiwahi. Sweje-e kudi ambuña aNzambi, muloña twekalaña nawubwambu wakola naYehova kuhitila mukudiza nsañu yamuBayibolu. Nvwali wumu mukwaKristu wahosheli nindi, “Kutaña nikudiza diyuma yitwalemesha nankashi.”
Njila jajiwahi jakudizilamu jinateli kukwasha anyanenu kwikala nawubwambu wawuwahi naNzambi. (Mas. 1:1-3, 6) Hela chakwila kwiluka kutaña hikwatela kupulwisha muntuku, Bayibolu yashimunaña nawu kutaña kwaletaña nkisu jajivulu. Chakutalilahu, mukanda waChimwekeshu 1:3 wahosha nawu: “Yowu wukutañila akwawu nakooleki, ninawa akutiya mazu awuprofwetu iwu anakooleki.” Kubombelahu, kushaku muchima, hichuma chalema chikupu hakudiza, achilumbulula nankashi mukufumba kwonenewa kwasonekeliyi kapostolu Pawulu kudi Timotewu nindi: “Dikwatishi muyumiyi, wudinkumu chikupu.” Muloñadi? “Kulonda chiwukuyaña kumbidi chimwekanaña kudi antu ejima.”—1 Tim. 4:15.
Hela chochu, kwiluka hohu kutaña nikudiza hikwatalisha mukwila nawu muntu wukuhetelamuku. Antu amavulu eluka kutaña nikudiza hiyajizatishañaku; ilaña, azatishaña mpinji yawu kuyuma yabula kulema. Hanu dinu anvwali anateli kukwasha ñahi anyanawu kwikala nampwila yakukeña kutaña nikudiza?
Kukeña niChakutalilahu Chenu
Anyana adiluñishaña mpinji yakudiza neyi anvwali amwekeshaña kukeña. Owen niClaudia, akwaKristu adisumbula, ahoshaña hadi anyanawu ayedi nawu: “Atiyileña kuwaha chikupu neyi mpinji yakudiza yinashiki muloña yadiña mpinji yayiwahi nankashi, yatiyileñawu nawu akiñewa muchisaka chawu. Elukili nawu mpinji yakudiza diyi mpinji yayiwahi yakukeñañana.” Nawa anyana chikukulañawu nakushika muyaaka yamonañawu kukala, mpinji yayiwahi yakudiza muchisaka yikuyileñelaña kukeñesha kudiza. Anyana kaOwen niClaudia chayinu mpinji hiyapayiniya nawa anakutwalekahu kuhetela mukukeña kutaña nikudiza kwayidizishiluwu anvwali jawu.
Chakutalilahu chakukeña diyi njila yeneni yakwashanaña. Anyana avulaña kumona anvwali jawu anakutaña nikudiza niwena anateli kulemesha iyi nyidimu muchihandilu chawu. Hanu dinu anvwali munateli kwimika ñahi chakutalilahu chachiwahi neyi chakwila kutaña kwayikalilaña? Hadaha mwatela kuhimpa yuma yimwasweja kulemesha hela yitoñojoka yenu kutalisha hakutaña. (Rom. 2:21) Neyi mwatañaña mpinji yejima, anyanenu niwena akukeñaña kutaña. Neyi musweja kusha maana kukutaña Bayibolu, kuloñesha nsañu yimukudiza kukupompa, nikudiza kwachisaka, mukumwekesha nawu mwalemesha chikupu iyi nyidimu.
Dichi, kukeña nichakutalilahu chenu chachiwahi hiyuma yalema nankashi yikuleñela anyanenu kwikala nampwila yakukeña kutaña. Njilanyi jajiwahi jimwatela kulondela hakwila nawu muyikolesha anyanenu?
Anyana Chatela Kutachikawu Kukeña Kutaña
Njilanyi jalema jimwatela kulondela hakwila nawu mukwashi anyanenu ekali nampwila yakukeña kutaña? Yinkenu nyikanda yakutaña iku achidi atwansi. Eluda wumu mukwaKristu akolesheluwu kudi anvwali jindi kwikala nampwila yakukeña kutaña wahosheli nindi: “Mwatela kwinjilisha anyanenu kukwataña kunyikanda nikuyizatisha. Neyi elaña mwenimu, akukeñesha nyikanda nawa akuyilemesha chikupu muchihandilu chawu.” Nyikanda yashindamena haBayibolu, yidi neyi Mukanda Wami waMpanji Jamu Bayibolu, anyana amavulu mukanda weniwu awukeñaña nankashi henohu kanda eluki nikutaña. Neyi mutañilaña anyanenu mukanda weniwu, mukuyileñela kwiluka idimi ‘niyuma yawuspiritu’ nawa ‘nimazu awuspiritu.’—1 Kor. 2:13.
Tañenuña nezu datiyakana. Mwatela kutañaña nawanyanenu ifuku nifuku. Kwilaña mwenimu kukuleñela anyanenu kwiluka kutena mazu chachiwahi nikwikala nachaaku chakutañaña. Njila yimwatañilañamu niyena yalema. Neyi mutañaña nañovu, niwena akutañaña chochimu. Kakavulu, mukuwana anyanenu akuyilejaña nawu muyitañileña nsañu yoyimu mpinji yejima. Ilenu munakukeñawu! Mukuhita kwampinji, akutachika kukeña kutiyilila kunsañu yayiha. Ilaña hakuyitañila anyana bayi muyikanjikijañaku. Yesu wemikili chakutalilahu chachiwahi kuhitila mukutañisha antiyilili indi kushika hohu “mwatwesheli kutiyilawu.” (Maku 4:33) Neyi mubulaña kukanjikija anyanenu, akukeñaña kutaña mpinji yejima, nawa chikuyileñela enu kushika hachikonkwanyi chenu chakudizisha anyanenu kwikala nampwila yakukeña kutaña.
Yikoleshenu ahosheñahu, nawa hanjekenu hayuma yimunatañi. Anyanenu akunyakala kwiluka mazu, chakuyitena, nikwiluka chalumbuluka mazu amavulu, nawa mukuzañalala. Kuhanjeka hayuma yimunatañi kunateli kukwasha chikupu anyanenu kuyilaku hambidi. Mukanda wahosha hansañu yakukwasha anyana eluki kutaña chiwahi walumbulula nawu, kuhanjeka kwakwashaña anyana “kudiza mazu akelukawu kumbidi nikuyitiyisha hakutaña.” Mukanda wowumu watwalekahu nawu, “Anyana akweti yitoñojoka yichidi yawansi afwilaña kudiza kutaña, neyi muvulaña kuhosha hayuma yalema, adizaña chikupu.”
Ilenu anyanenu ayitañili, nawa yikoleshenu ehuleña malwihu. Mwatela kwihula malwihu nikuyileja mwakwakwila. Neyi mwilaña mwenimu, anyana akwiluka nawu munyikanda dimwekala nsañu nawa mazu anakutañawu akweti muyatalisha. Iyi njila yayiwahi nankashi sweje-e neyi nsañu yimwatañaña yashindamena Hezu daNzambi, mukanda wabadika nyikanda yejima.—Heb. 4:12.
Hela chochu, mwatela kwiluka nenu kutaña himudimu weneni. Hakwila nawu muntu yeluki kutaña chiwahi chakeñekaña kudiza mpinji yejima nawa chasendaña mpinji. Dichi yikoleshenu anyana anyanya atwalekuhu kukeña kutaña kuhitila mukuyihameka. Kuyihameka anyanenu kukuyikolesha kwikala nampwila yakukeña kutaña.
Kutaña Kwalema Nawa Kwakuwahi
Kuleja anyanenu chakudiza chikuyileñela kwiluka kulema kwakutaña. Kudiza kwabombelamu kwiluka yikuma nichiyesekana nayikuma yikwawu. Chakeñekaña kwiluka chakuyiloñesha, kwanuka, nikuzatisha nsañu. Mwana chelukayi chakudiza nawa yeluka chikwatela kumukwasha, kudiza kunateli kwikala kwalema nawa kwakuwahi.—Mukwa. 10:10.
Yilejenu yuma yatela kuyikwasha kudiza. Kudifukula kwaChisaka kwamelela, kutañaña nsona yefuku, nikuhanjeka kwamuchidiwu kukuyileñela kwikala nampinji yayiwahi yakuleja anyanenu chakudiza. Kushakama
choloka nikusha maana kunsañu yimunakudiza hakampinji kantesha kukuyidizisha kushaku muchima, chumichi chalema hakudiza. Kubombelahu, munateli kumuleja mwanenu weyala kulonda yayileji yuma yinadiziyi chiyinesekani nayuma yelukayi. Ichi chikumukwasha kwiluka kwesekeja. Indi neyi mumwihula mwanenu wamumbanda kulonda yahoshi mukwihihisha mumazwindi yuma yinatañiyi? Ichi chikumukwashaku kwiluka munatalishi nsañu yinatañiyi nikuyanuka. Kuhitulukamu, dikwila nawu kushimuna yikuma yamaneni hanyima yakutaña chibaaba, diyi njila yikwawu yakwashaña kwanuka yimwatela kuyidizisha. Anyana anyanya niwena mwatela kuyileja kusoneka yikuma yayihi hampinji yakudiza hela hakupompa kwachipompelu. Ichi chatela kuyikwasha kushaku maana nankashi! Njila jeniji japela jinateli kuleñela kudiza kwikali kwakuwahi nawa kwalema kudenu nikudi anyanenu.Mwatela kwiluka nenu kwosi yuma yinakuluwañesha hakudiza. Kushakama heluña hanakuhita mpepela nawa hadi chejeji, nawa kwamwena nikushakama hachitwamu chachiwahi, kwaleñelaña kushaku muchima. Hela chochu, njila yamwenañamu anvwali kudiza yalema nankashi. Mama yawantu wumu wahosheli nindi: “Chalema nankashi kwikala nampinji yakutaña nikudiza mpinji yejima. Chakwashaña anyana kwiluka chakuzata nyidimu. Elukaña nyidimu yatelawu kuzata hampinji yimu.” Anvwali amavulu hiyeteja kuzata nyidimu yikwawu hampinji yakudizaku. Kwesekeja nachahosheli iyala wumu, iyi njila yalema chikupu hakuleja anyana njila jajiwahi jakudizilamu.
Hoshenu hakulema kwakudiza. Nkumininaku, kwashenu anyanenu kulonda eluki chatela kuzatishawu yuma yinadizuwu. Kuzatisha nsañu yinakudizawu kwamwekesha kulema kwakudiza. Mana kwetu wakansi wahosheli nindi: “Neyi nikañanya kumona kulema kwansañu yinakudiza, nafwilaña kuyidiza cheñi. Ilaña neyi nimona nami nateli kuyizatisha amaweni, nafwilaña nami niyitiyishi.” Neyi atwansi eluka nawu kudiza hinjila yakwilukilamu chuma chalema, ashañaku maana chikupu. Akukeñeshaña kudiza, neyi chakeñeleñawu kutaña.
Yuma Yasweja Kuwaha Yafumaña Mukutaña
Kudi yuma yayiwahi yayivulu chikupu yafumaña mukudizisha anyanenu ekali nampwila yakukeña kutaña. Kuzata chiwahi kushikola, kunyidimu, nikushakama chiwahi nawantu, nikwiluka yuma yamukaayi mutwashakama, niwubwambu wawuwahi wekalaña hakachi kawanvwali nawanyana diyuma yikwawu yafumañamu, kubombela hayuma yayiwahi yikwawu yafumaña mukutaña nikudiza.
Chuma chabadika, kukeña kudiza kunateli kukwasha anyanenu kwikala akwakudifukula aYehova. Kukeña kudiza diyi nsapi yakwenzununa yitoñojoka yawu ninyichima kulonda kwiluka “kutoha, nikuleha, nikuleha kwiwulu, nikukunama,” kwachalala chamuNsona. (Efwes. 3:18) Hela chochu, anvwali akwaKristu atela kudizisha anyanawu yuma yayivulu. Anvwali chazatishañawu mpinji yawu nikusha kashinshi kudi anyanawu nikuzata nañovu kulonda kukwasha anyana akuli chiwahi, akuhwelelaña nawu anyanawu akatondahu kwikala akwakudifukula aYehova. Kudizisha anyanenu njila jajiwahi jakudizilamu kwayikwashaña kutwalekahu kukolesha wubwambu wawuwahi naNzambi. Dichi, mukweti yuma yayivulu yikuyileñela kulomba nkisu yaYehova, hampinji yimukufwilaña kudizisha anyanenu kwikala nampwila yakukeña kutaña nikudiza.—Yish. 22:6.
[Chikasha/Nyevulu yidi hefu 26]
Kutaña . . .
• Yinkenu nyikanda yakutaña
• Tañenuña nezu datiyakana
• Yikoleshenu ahosheñahu
• Hanjekenu hayuma yimunatañi
• Ilenu anyanenu ayitañili
• Koleshenu anyanenu ehuleña malwihu
Kudiza . . .
• Imikilenu anyanenu chakutalilahu chachiwahi
• Dizishenu anyanenu . . .
○ kushaku muchima
○ kwesekeja yuma yinadizuwu
○ Kuhosha yuma yinadizuwu mukwihihisha
○ kuhitulukamu
○ kusoneka yikuma
• Mwatela kwiluka nenu kwosi yuma yinakuluwañesha hakudiza
• Hoshenu hakulema kwakudiza