Kwikala Asoñama Kwasoñaña Nyikabu Yayiwahi
Kwikala Asoñama Kwasoñaña Nyikabu Yayiwahi
KOMANA mwekala asoñama kuzatisha mpinji yidi yejima kulonda kushimwina mwiluña dachipompelu chenu? Amana kwetu akwaKristu amumusumba waya mpuhu waTurku, muFinland, kwiluña kwashikenaña mbopolu adiña asoñama, nawa mukusoñama kwawu mwafumini yuma yayiwahi.
Kumpinji yakunyima, amana kwetu amuTurku amweni izanvu dawamayala akuAsia enjili mumukala wawu nakumanisha mudimu wakutuña mbopolu yeneni yakuzatisha hampinji yakunooka yatuñilileñawu heluña datuñilañawu jimbopolu. Nkumininaku, mana kwetu welukili matala amapumwinu kwashikenenuwu akanyidimu afumini kwituña dacheñi. Welukili cheñi nindi nabudidi yayeni, awa akanyidimu ayisendeleña namabasi kufuma kwakamineñawu nakuyitwala kuchikumu kwazatilileñawu. Chakadi kumba mpinji, mana kwetu walejeli anakwetu amuchipompelu chazatishaña idimi daWundeli chekala muTurku.
Aeluda amunichi chipompelu elukili nawu kwinza kwawantu amavulu akumatuña acheñi kwayinkeli mpinji yabulili kukuhwelelawu kulonda ayishimwini nsañu yaWanta, nawa mukunyakala aloñesheli njila yakushimwinamu awa antu. Hefuku daMulungu dawowuna mulungu, akwakushimwina ikumi emeni kwakwihi nachitesheni chabasi nampinji ya 07:00 koloku yabudidi. Chashikiluwu, kwosi akanyidimu amwenuwu. Anakwetu atachikili kudihujola nawu, ‘Tunalabi tahindi?’ ‘Indi kwiji afunta dehi kwawu?’ Iku achidi kuhosha, amweni mukanyidimu wumu se-e, navwali chikowelu chanyidimu. Halondela nimukwawu, niamakwawu ashika nikushika. Chihashimbwili chantesha, chitesheni chabasi chejima chenzeli nawakanyidimu. Hohenohu akwakushimwina niwena atachika nikuyishimwina kuzatisha nyikanda yaWundeli. Oku, kukooleka, mwahitili kwakwihi naora yimu hakwila nawu mabasi enzali, nawa chaleñeleli amana kwetu kuhosha nawakanyidimu amavulu. Chelili mabasi nawu akanyamukeña, akanyidimu asendeli nyikanda yanyanya 126 nimagazini 329!
Hamuloña wayuma yayiwahi yafuminumu, amana kwetu enjili cheñi nakushimwina mulungu walondeleluhu, hampinji yayendeleluwu kudi nkoñi wañinza. Hefuku damuzowa, nampinji ya 06:30 yabudidi, nkoñi wañinza walombweli hakubulakana kwakuya mumudimu wamwiha, nawa akwakushimwina 24 ayili kuchitesheni chabasi. Hanidi ifuku, asendeli ninyikanda yamwidimi daTagalog muloña elukili nawu amavulu hakachi kawu afumi kwituña daPhilippines. Hayina ntentemena, chelili mabasi nawu anyamukeña nakuya kuchikumu kwazatilileñawu, akanyidimu asendeli nyikanda 7, nyikanda yanyanya 69, nimagazini 479. Wenowu muzañalu watiyiluwu amana kwetu niahela azatiluku iwu mudimu wakushimwina!
Henohu akanyidimu kanda afunti kumatuña kwafuminuwu, amana kwetu ayili nakuhempula akanyidimu amavulu kumatalawu amapumwinu kwashakamineñawu nikulumbulula chikupu nsañu yaWanta. Akanyidimu amakwawu ahosheli nawu ahanjekahu dehi nawaYinsahu kumatuña acheñi. Akanyidimu ayihamekeli amana kwetu hakumwekesha mpwila yakuhosha nawu hampinji yadiñuwu muFinland.
Komana ninenu mudi asoñama kulonda kushimwina mpinji yidi yejima mwiluña dachipompelu chenu? Komana mwafwilaña kushimwina antu akumaluña acheñi? Neyi dichi mwelaña, anenu nawa mwakahetelamu neyi chahetelelumu amana kwetu amumusumba waTurku.
[Mapu/Mwevulu wudi hefu 32]
(Neyi munakukeña kumona ntanjikilu yejima talenu mumukanda)
FINLAND
HELSINKI
Turku