‘Mwatela Kwikala Antu Amuchidinyi!’
‘Mwatela Kwikala Antu Amuchidinyi!’
‘Ochu chineli yumiyi yejima yakasuñunuka chochichi, mwatela kwikala antu amuchidinyi munshakaminu yakujila nimunyidimu yakumwakama Nzambi!’—2 PET. 3:11, NW.
1. Muloñadi mukanda waPetulu wamuchiyedi chiwadiña wakukolesha chikupu kudi akwaKristu amumafuku indi?
HAMPINJI yasonekeliyi kapostolu Petulu mukanda windi wamuchiyedi wonenewa, chipompelu chawakwaKristu chadiña chomika dehi kuyandishewa kwasweja, ilaña chipompelu hichafuntili hanyimaku. Dichi Diyabolu wazatishili njila yikwawu, yazatikahu dehi mapampa kakavulu. Kwesekeja nachashimwiniyi Petulu, Satana wesekaña kuluwañesha antu jaNzambi kuhitila mudi ankuluñaña akutwamba “akweti mesu asweja wuvumbi” nawa “akweti nyichima yenjilila lwisu.” (2 Pet. 2:1-3, 14; Yuda 4) Mwalala, mukanda waPetulu wamuchiyedi watukoleshaña chikupu kutwalekahu kwikala ashinshika kudi Nzambi.
2. Indi mukanda wamuchiyedi waPetulu kapetulu 3 wahoshaña hayumanyi, nawa malwihwinyi itwatela kudihula?
2 Petulu wasonekeli nindi: “Natoñojoki nami chachiwahi kuyihizumwisha nakuyanukisha hinichidi mwitenti idi; muloña neluki nami keña nifumi swayi mwitenti dami idi, . . . Eña, nukudikwatisha, kulonda chinakafumahu mwakatweshi kwanuka yumiyi mafuku ejima.” (2 Pet. 1:13-15) Eñañi, Petulu welukili nindi kufwa kwindi kwadiña mukamwihi, dichi wakeñeleña nindi nshimbi jindi jatelela akajanukeña. Mwalala, nshimbi jeniji ajisonekeli muBayibolu nawa wejima wetu tunateli kujitaña makonu. Kapetulu 3 kamukanda wamuchiyedi waPetulu kakundama nankashi kudetu, muloña kahoshaña “hamafuku akukuminina” akaayi kamakonu nihakujilumuka kwamawulu achifwikija niiseki. (2 Pet. 3:3, 7, 10) Kufumbanyi kwatulejañayi Petulu? Indi kulondela kufumba kwindi kukutukwasha ñahi kwikala nawuselewa waYehova?
3, 4. (a) Mazwinyi akusañumuna ahosheliyi Petulu, nawa wasoñamishili nindidi? (b) Yikumanyi yisatu yitukuhanjekahu?
3 Chakumishiliyi kuhosha hakujilumuka kwakaayi kaSatana, Petulu wahosheli nindi: ‘Mwatela kwikala antu amuchidinyi munshakaminu yakujila nimunyidimu yakumwakama Nzambi!’ (2 Pet. 3:11, NW) Mwalala, Petulu hadiña nakwihula lwihuku, ilaña washimwineña mukuku wamazu wakusañumuna. Petulu welukili nindi antu elaña mwaya kukeña kwaYehova nikumwekesha yililu yamuzañaleshaña akayipulwisha ‘hefuku dakutenda.’ (Isa. 61:2) Mwalala, kapostolu watwalekeluhu nindi: “Dichi enu akwetu twakeña, chimuneli mweluka dehi, babalenu mubuli kuhuñumuka nakuluwañesha kwawantu atama [antañishi akutwamba], mubuli kufuma mukukola kwenwenu aweni.”—2 Pet. 3:17.
4 Petulu welukili nindi mumafuku akukuminina, akwaKristu atela kwikala asoñama chikupu hakuhemba kashinshi kawu, muloña wadiña hakachi kawantu ‘eluka dehi.’ Chimwahitili mpinji, kapostolu Yowanu walumbulwili chikupu muloña wateleleluwu kwikala asoñama. Wamweneñahu dehi Satana chamutemwinuwu mwiwulu nawa wudi “nandombu yayeni” yakuzuñisha “awa achidi kuhemba mwanayilejuwu kudi Nzambi, achidi kukakela kushimuna nsañu yaYesu.” (Chim. 12:9, 12, 17) Ambuña aNzambi ashinshika awayishewa hamu nawana kwawu ashinshika “anyikoku acheñi” akashinda chikupu. (Yow. 10:16) Indi etu hamuntu hamuntu? Komana tukutwalekahu kuhemba kashinshi ketu? Akutukwashaku kwila mwenimu neyi tufwilaña (1) kwikala nayililu yayiwahi, (2) kutwalekahu akadi ihuji nikubula hakutwinkela muloña muyililu nikuspiritu (3) kweteja kweseka kutukolesheña. Tuhanjekenu haniyi yikuma.
Ikalenu naYililu Yayiwahi
5, 6. Yililwinyi yitwatela kufwila kwikala nayu, nawa muloñadi chichakeñekaña ‘kudikwatisha nankashi’?
5 Hakutachika mumukanda windi wamuchiyedi, Petulu wasonekeli nindi: “Dikwatishenu nankashi hansañu yeniyi; mukukuhwelela kwenu vulishilenumu kashinshi kakeni; mukashinshi vulishilenumu kwiluka; mukwiluka vulishilenumu kudihemba; mukudihemba vulishilenumu kutatakena; mukutatakena vulishilenumu kwakama Nzambi; mukwakama Nzambi vulishilenumu kukeñañana; mukukeñañana vulishilenumu kukeña kwakweni. Dichi neyi yumiyi yikwikala mudenu nakuvulilamu, yikuyilekesha kwikala ankopi, hela akwakubula kusoña nyikabu, mushiki mukumwiluka Mwanta wetu Yesu Kristu.”—2 Pet. 1:5-8.
6 Eñañi, chakeñekaña ‘kudikwatisha nakashinshi’ hakuzata nyidimu yatukwashaña kwikala nayililu yayiwahi. Chakutalilahu, chakeñekaña kuzata nañovu hakwila nawu muyeña kukupompa kwawakwaKristu kwejima, kutaña Bayibolu ifuku niifuku, nikutwalekahu naprogiramu yayiwahi yakudiza halwenu. Nawa chakeñekaña kuzata nañovu nikufuukulahu chachiwahi kulonda mwikaleña naKudifukula kwaChisaka kwamelela mpinji yejima, kwakuwahi nawa kwakudiluñisha. Nawa chitwenjilila, iyi yililu yayiwahi yekalaña yaswayi kulondela—sweje-e neyi tumona kuwaha kwafumañamu.
7, 8. (a) Yumanyi yahoshañawu antu amakwawu kutalisha haKudifukula kwaChisaka? (b) Munakuhetelamu ñahi mukudifukula kwenu kwachisaka?
7 Kutalisha hakudifukula kwachisaka, muhela wumu wahosheli nindi: “Kwatukwashaña kudiza hayuma yayivulu.” Muhela mukwawu wahosheli nindi: “Chakadi kuhita mumbadi, hinakeñeleña nami kudiza kwamukanda kumanuku. Dikupompa kunaswejeli kukeña. Ilaña ichi, chineli tunakwikalaña naKudifukula kwaChisaka kwamelela, neluki nami Yehova weluka yuma yitwakeñaña nimpinji yitwayikeñaña.” Mutu wachisaka wahosheli nindi: “Kudifukula kwachisaka kwatukwashaña nankashi. Kwikala nakupompa kwaloñeshawu kulonda kutukwasha muyuma yitwatela kwila hamu neyi adisumbula kwatukwashaña chikupu! Wejima wetu tuneluki netu tunakuyilaku hambidi mukumwekesha mukabu waspiritu yajila, nawa tunakwikala namuzañalu chikupu hakuzata mumudimu wakushimwina kubadika mpinji yakunyima.” Mutu wachisaka mukwawu wahosheli nindi: “Anyana anakusandujolaña nsañu aweni nikudiza jajivulu—nawa anakudiluñisha chikupu. Iyi progiramu yinakutuleñela kukuhwelela chikupu netu Yehova weluka yuma yitwakeñaña nawa wakulaña kulomba kwetu.” Komana ninenu dichimwatiyaña haniku kuloñesha kwakuwahi kwakufuma kudi Nzambi?
8 Bayi muleka tuyuma twabula kulema tukañesheña kudifukula kwachisakaku. Eyala namumbanda adisumbula ahosheli nawu, “Hanyilungu yiwana yinahituhu hefuku daChiwana nawufuku, kudi chuma chamwekanaña muchisaka chetu chakeñaña kukañesha kudiza kwetu, ilaña hitwalekaña chitukañeshuku.” Ilaña, mpinji yikwawu mwatela kuhimpa ndandanda yenu. Hela chochu, shenuku kanshinshi kulonda mubuli kuleka Kudifukula kwaChisaka kwamelela hela tuhu hadi mulungu wumu!
9. Indi Yehova wamuhembeli ñahi Yeremiya, nawa chumanyi chitwatela kudizilaku chakutalilahu chindi?
9 Kaprofwetu Yeremiya watwimikila chakutalilahu chachiwahi. Wakeñeleña yakudya yakuspiritu yatambwileñayi kudi Yehova nawa wahamekeli nankashi. Iyi yakudya yakuspiritu yamukwashili kuumika hakushimwina antu adiña nakukaana. Wahosheli nindi: ‘Izu daYehova . . . hidikwikala neyi kesi kadi nakuñocha kanjikiluwu mumafwahami.’ (Yere. 20:8, 9) Yamukwashili cheñi kuumika mumpinji yakukala yashikili kukujilumuka kwaYerusalema. Makonu, tukweti Izu daNzambi damukuma dasonekawu. Neyi tudizaña chikupu nikumonaña yuma neyi chayimonañayi Nzambi, kufwana Yeremiya, tukuumikaña chachiwahi mumudimu wakushimwina, nikwikala ashinshika hakuhita mukweseka, nikwikala akadi majilu muyililu nikuspiritu.—Yak. 5:10.
Twalekenuhu Kushakama “Chakadi Ihuji, Nakubula Hakuyinkela Muloña”
10, 11. Muloñadi wutwatela kudikwatisha nankashi kulonda kutwalekahu ‘chakadi ihuji, nakubula hakutwinkela muloña,’ nawa chumanyi chitwatela kwila?
10 Hakwikala akwaKristu, tuneluki netu tunakushakama mumafuku akukuminina. Dichi, hitwahayamañaku hakumona kaayi kanakudiñija muyuma yahelayi Yehova, yidi neyi lwisu, wuvumbi, nindombu. Tunateli kuhosha hatukwosu twaSatana netu: ‘Neyi ambuña aNzambi akañanya kuyitiyisha woma, hadaha anateli kuyihuñumuna.’ (Chim. 2:13, 14) Dichi, twatela kutiyilila kufumba kwakuwahi kwaPetulu kwakwila nawu: “Dikwatishenu kulonda akayiwani [kudi Nzambi] munashakami chachiwahi zo-o, chakadi ihuji, nakubula hakuyinkela muloña kumesu indi.”—2 Pet. 3:14.
11 Nhoshelu yakwila nawu “dikwatishenu” yadifwana nezu datachi dakukolesha dahosheliyi Petulu nindi, “dikwatishenu nankashi.” Mwalala, Yehova wamoneneni Petulu kusoneka awa mazu, weluka nindi twatela kudinkaku chikupu kulonda kutwalekahu ‘chakadi ihuji, nakubula hakutwinkela muloña,’ akadi majilu mukaayi kaSatana. Kudikwatisha nankashi kwabombelamu kuhemba muchima wetu kulonda wubuli kuheñuka nakufwila kwatama. (Tañenu Yishimu 4:23; Yakoba 1:14, 15.) Kwabombelamu cheñi kwimana chakola nakutondolwela antu ahayamaña hachihandilu chetu chachiwahi chawakwaKristu nawa ‘atutenaña chatama.’—1 Pet. 4:4.
12. Kukananyi kutwawanaña haLuka 11:13?
12 Hamuloña wakubula kuwanina, chatukalilaña kwila yuma yaloña. (Rom. 7:21-25) Tunateli kutwesha kwila yuma yaloña chiña hohu neyi tushindamena hadi Yehova, wenkaña spiritu yindi yajila kudi antu amulombaña namuchima wumu. (Luka 11:13) Kuhiñahu, spiritu yasoñaña mudetu yililu yatuleñelaña kwikala nawuselewa waNzambi nawa yatukwashaña kuumika kweseka bayi kwamuchihandilu hohuku, ilaña nikweseka kukwawu, kunateli kuswejelaku chineli ifuku daYehova dinakuswila kwakwihi.
Itejenu Kweseka Kuyikoleshi
13. Neyi tumona kweseka muchihandilu chetu, chumanyi chikutukwasha kuumika?
13 Hampinji yituchidi kushakama mukanu kaayi katama, mpinji yejima tukumonaña kweseka kwamboka-mboka. Ilaña chatela muswejeña kuneña, komana kwila mumona iku kweseka neyi hinjila yakumwekeshelamu chimwamukeña Nzambi nikukolesha chikuhwelelu chenu mudi yena niMwizu dindi nehi? Kambanji Yakoba wasonekeli nindi: “Enu ana kwami, tiyenu kuwaha nankashi chimukushika mukweseka kweñi nakweñi; muloña muneluki kutompa kwatompañawu kukuhwelela kwenu kukuleta kutatakena.” (Yak. 1:2-4) Ilukenu cheñi nenu, “Yehova weluka kupulwisha akwakumwakama mukweseka.”—2 Pet. 2:9.
14. Indi chakutalilahu chaYosefu chayikoleshaña ñahi?
14 Talenu chakutalilahu chamwana kaYakoba Yosefu, alandishiluwu muwuduñu kudi ana kwindi. (Kutach. 37:23-28; 42:21) Komana Yosefu wajimbesheli chikuhwelelu chindi hamuloña wachuma chasweja kutama chamukoñeluwu ana kwindi? Komana wamuhililili Nzambi hakwiteja chuma chatama chimumwekeni? Izu daNzambi dashimuna chikupu nawu helili mwenimuku. Kubombelahu, kweseka kwamweniyi Yosefu bayi neyi kwakuminini hohenahaku. Chimwahitili mpinji, amutwambilili nawu wakeñeleña kwila wuvumbi nañodambala nawa amukasili mukaleya. Hela chochu, watwalekeluhu kumwakama Nzambi. (Kutach. 39:9-21) Dichi, wetejeli kweseka kumukoleshi, nawa amukiswilili nankashi.
15. Chumanyi chitwatela kudizila kuchakutalilahu chaNyawomi?
15 Eñañi, kweseka kunateli kutuneñesha nankashi. Hadaha dichatiyileñayi Yosefu mpinji jikwawu. Ambuña Nzambi amakwawu ashinshika dichatiyileñawu. Toñojokenu hadi Nyawomi wafwishili fumwindi nianyanindi awamayala ayedi. Wahosheli nindi, “Bayi muntenaña cheñi daNyawomuku, muntenaña daMara; muloña Chinaweji nanmweshi kalula.” (Luti 1:20, 21) Nyawomi hakuhosha awa mazu haluwañesheluku nawa dichatiyañawu antu ejima. Kufwana Yosefu, hajimbesheli chikuhwelelu chindi niwubwambu windi naNzambi hela kufumpa kashinshi kinduku. Chafuminumu, Yehova wamukiswilili iwu mumbanda washinshika. (Luti 4:13-17, 22) Chuma chabadika, muParadisa yahamaseki yidi kumbidi, Nzambi wakafumishahu kutama kwejima kwaletaña Satana nikaayi kindi katama. “Yuma yakusambila hiyakayanuka nawaku, hiyakenza nikumuchimaku.”—Isa. 65:17.
16. Indi kulomba twatela kukwimona ñahi, nawa muloñadi?
16 Hichidi namuloña nakweseka kwatela kutumwekanaku, kukeña kwaNzambi kwatukwashaña. (Tañenu Aroma 8:35-39.) Hela chakwila Satana hamba kaleka kutuneñeshaku, nateli kukañanya neyi tutwalekahu ‘kuwundisha mumesu’ nikwikala ‘ababala kulonda tulombi.’ (1 Pet. 4:7) Yesu wahosheli nindi: “Tonenuña kwenu hayilaaka yejima nakulembelela, kulonda mwakemiki mushindu, mwakapuluki kuyuma yejimiyi, mwakemani kumesu aMwana kamuntu.” (Luka 21:36) Talenu chazatishili Yesu izu dakwila nindi ‘kulembelela,’ iku kwekala kulomba kwakufuma hamuchima chikupu. Kuhitila mukutuleja nindi tulembeleleña, Yesu wakonkomweneni nindi yinu diyi mpinji yakwikala nejina dadiwahi nayena niTata yindi. Antu adi nejina dadiwahi hohu diwu akweti kuchiñeja kwakupuluka hefuku daYehova.
Twalekenuhu Kudikita muMudimu waYehova
17. Neyi iluña denu dakushimwina dakala, munateli kudizilaku ñahi kuchakutalilahu chawatuprofwetu akunyima?
17 Kuzata nyidimu yakuspiritu kwatukoleshaña. Ichi chatwanukishaña mazu asonekeliyi Petulu nindi: ‘Mwatela kwikala antu amuchidinyi munshakaminu yakujila nimunyidimu yakumwakama Nzambi!’ (2 Pet. 3:11) Mudimu wakushimwina nsañu yayiwahi diwabadika hanyidimu yejimiyi. (Mat. 24:14) Eñañi, mumaluña amakwawu mudimu wakushimwina wunateli kukala, hadaha muloña wakadiwu hela ikañesha indi kwiji muloña antu asweja kuta maana kuyuma yamuchihandilu yefuku nifuku. Ambuña aYehova akunyima niwena amweneña kukala kwokumu. Ilaña hiyazeyeluku, atwalekeluhu ‘kufuntila ifuku nifuku’ nakushimuna nsañu yayilejeluwu kudi Nzambi. (Tañenu 2 Kushindulula 36:15, 16; Yere. 7:24-26) Chumanyi chayikwashili kuumika? Amweneña mudimu wawu neyi chawumweneñayi Yehova, bayi neyi chawumweneñawu antu mukaayuku. Cheñi, amweni nawu kutiyakesha ijina daNzambi hikukooleka kweneni.—Yere. 15:16.
18. Indi mudimu waWanta wakushimwina wukaleñela ñahi ijina daNzambi kudilemesha kumpinji yakumbidi?
18 Ninetu nawa tukweti mudimu weneni wakutiyakesha ijina daYehova nikufuukula kwindi. Toñojokenu hachumichi: Muloña wakwila twashimwinaña hatooka, ayilumbu jaNzambi hiyakatwesha kuhosha nawu hiyatulejeli hadi Nzambi hela hakufuukula kwinduku, hampinji yakaletayi wunsompeshi windi hadi wena. Eñañi, kufwana Fwaro wakushankulu, akeluka nawu Yehova diyi wunakuyisompesha. (Kwid. 8:1, 20; 14:25) Hampinji yoyimu, Yehova wakalemesha ambuñindi ashinshika kuhitila mukumwekesha chikupu nindi mwalala, adiña añimenu indi.—Tañenu Ezekeli 2:5; 33:33.
19. Tunateli kumwekesha ñahi netu twakeñaña kuzatisha chachiwahi iyi mpinji yinabuli kuzuwayi Yehova swayi?
19 Kukamwihi nakumana kwamukanda windi wamuchiyedi, Petulu wasonekeleli akwawu akakwitiya nindi: “Toñojokenu nenu chakubulayi Mwanta kuzuwa swayi hiwamwinu.” (2 Pet. 3:15) Eñañi, tutwalekuhu kuzatisha chachiwahi iyi mpinji yinabuli kuzuwayi Yehova swayi. Munjilanyi? Kuhitila mukwikala nayililu yamuzañaleshaña, kutwalekahu kushakama ‘chakadi ihuji, nakubula hakutwinkela muloña,’ kuhitila mukwiteja kweseka kuyikolesheña, nikudikita chikupu mumudimu waWanta. Neyi twila mwenimu, tukatambwila nkisu jahaya nyaka jakekala ‘mumawulu amaha niiseki dadiha.’—2 Pet. 3:13.
Munakwanuka?
• Tunateli kwikala ñahi nayililu yamuzañaleshaña Nzambi?
• Tunateli kutwalekahu ñahi kushakama ‘chakadi ihuji, nakubula hakutwinkela muloña’?
• Yumanyi yitunateli kudizila kudi Yosefu niNyawomi?
• Muloñadi kuzata mumudimu wakushimwina chikwalemena chikupu?
[Malwihu aKuzatisha haKudiza]
[Mwevulu wudi hefu 9]
Yumanyi yinateli kukwasha nyitu yayisaka niyisaka yenu kwikala nayililu yamuzañaleshaña Nzambi?
[Nyevulu yidi hefu 10]
Chumanyi chitunateli kudizila kudi Yosefu chomikiliyi kweseka?