‘Spiritu Yashinshikaña Yuma yaNzambi Yakunama’

‘Spiritu yashinshikaña yuma yonsu, chalala yuma yaNzambi yakunama.’—1 KOR. 2:10.

1. Mudimwinyi wazataña spiritu yajila washimwiniyi Pawulu ha 1 Akorinda 2:10, nawa malwihwinyi ehulañawu antu?

 WENOWU muzañalu wutwatiyaña hakwiluka chazatikaña spiritu yajila yaYehova! Nsona jashimunaña nawu spiritu hinkwashi, hichamukunkulu, himukwakushimuna wunsahu, nawa yatulembelelañaku. (Yow. 14:16; Yil. 2:38; Rom. 8:16, 26, 27) Kapostolu Pawulu washimwini mudimu wukwawu walema wazataña spiritu yajila nindi: ‘Spiritu yashinshikaña yuma yonsu, chalala yuma yaNzambi yakunama.’ (1 Kor. 2:10) Eñañi Yehova wazatishaña spiritu yindi yajila hakumwekesha nsañu yalala yakuspiritu yakunama. Chakadi spiritu yindi yajila, mutenowu hitwadi kwilukahu chuma nichimu chafuukulayi Yehovaku. (Tañenu 1 Akorinda 2:9-12.) Hela chochu, antu ehulaña malwihu amavulu nawu: Indi ‘spiritu yashinshikaña ñahi muyuma yaNzambi yakunama’? Indi mumwaka wakusambila C.E. Yehova walumbulwili iyi yuma yakunama kuhitila mudi anyi? Indi makonu spiritu yashinshikaña ñahi muyuma yakunama nawa kuhitila mudi anyi?

2. Munjilanyi jiyedi mwazatikilaña spiritu?

² Yesu washimwini njila jiyedi mwazatikilaña spiritu. Henohu kunashali mafuku antesha nakufwa, walejeli apostolu indi nindi: ‘Nkwashi,  diyi spiritu yajila, akatemeshawu kudi Tata mwijina dami, diyi wakayileja yuma yejima, wakayanukisha yinayileji yejima.’ (Yow. 14:26) Dichi spiritu yajila yazatikaña neyi ntañishi nawa neyi ñanukishu. Chineli yatutañishaña, spiritu yakwashaña akwaKristu kwiluka yuma yabulili kwilukawu kunyima. Chineli yatwanukishaña, yakwashaña akwaKristu kwanuka nikuzatisha chachiwahi yuma yinalumbululiwu.

Muyaaka Nkulakaji yaKusambila

3. Mazwinyi ahosheliyi Yesu amwekeshaña nawu ‘yuma yaNzambi yakunama’ akayimwekeshaña chovu-chovu?

³ Yesu wayidizishili atumbanji twindi nsañu yayivulu yalala yabulili kwilukawu. Hela chochu, kudi yuma yayivulu yakeñekeleña kudizawu. Yesu walejeli apostolu nindi: ‘Nichidi nayuma yayivulu yakuyileja, ilaña katataka himukuyitweshaku. Ilaña chakenza spiritu yansañu yalala, yakayileja mwahita nsañu yalala yejima.’ (Yow. 16:12, 13) Dichi Yesu washimwini nindi kuhitila muspiritu yajila, yuma yakunama yakuspiritu akayimwekeshaña chovu-chovu.

4. Indi spiritu yajila yazatikili ñahi neyi ntañishi niñanukishu hefuku daPentekosta 33 C.E.?

⁴ Hefuku daPentekosta 33 C.E., ‘spiritu yansañu yalala’ yenjili, ayichilili hadi akwaKristu 120 apompeleli muYerusalema. Kwadiña yinjikijilu yamwekeni niipumba datiyakeni yamwekesheli nawu spiritu yenjili. (Yil. 1:4, 5, 15; 2:1-4) Atumbanji ahosheleli mumadimi amboka-mboka nakutena “nyidimu yaNzambi yañovu.” (Yil. 2:5-11) Mpinji yashikili yakumwekesha yuma yayiha. Kaprofwetu Yoweli washimwineñahu dehi chakechilawu spiritu yajila. (Yoweli 2:28-32) Akwakutala amweni kushikijewa kweniku munjila yabuliluwu kukuhwelelawu, nawa kapostolu Petulu walumbulwili chuma chamwekeni. (Tañenu Yililu 2:14-18.) Dichi spiritu yajila yazatikili neyi ntañishi nakumulumbulwila Petulu nawu yuma yamweniwu atumbanji yashikijili wuprofwetu wakunyaka. Cheñi spiritu yazatikili neyi ñanukishu, muloña Petulu hashimwini hohu mazu aYoweliku ilaña nimasamu ayedi aDavidi. (Mas. 16:8-11; 110:1; Yil. 2:25-28, 34, 35) Yuma yamweni nikutiya antu ejima apompeli mwalala yadiña yuma yaNzambi yakunama.

5, 6. (a) Hanyima yaPentekosta 33 C.E., malwihwinyi alema kutalisha hachitiyañenu chachiha akeñekeleña kwakulawu? (b) Iyi nsañu ayitwalili, nawa afuukwiluhu ñahi?

⁵ Hela chochu kudi yuma yayivulu yakeñekeleña kuyilumbulwila akwaKristu amuyaaka nkulakaji yatachi. Chakutalilahu, kwadiña malwihu ehwileñawu kutalisha hachitiyañenu chachiha chatachikili kuzatika hefuku daPentekosta. Komana chitiyañenu chachiha chadiña hohu chawaYudeya niantu abalumukili nakwikala aYudeya? Komana aJentili niwena ayitejeli kwikala munichi chitiyañenu nikuyiwayisha naspiritu yajila? (Yil. 10:45) Komana aJentili awamayala akeñekeleña kusambila kuyalamisha nikuhemba nshimbi jaMosi? (Yil. 15:1, 5) Awa adiña malwihu alema nankashi. Spiritu yaYehova yakeñekeleña hakushinshika haniyi yuma yakunama. Hanu dinu, yakeñekeleña kuzatikila mudinyi?

⁶ Malwihu ejima ayakwili kuhitila mudi amana kwetu ashindamenewa. Petulu, Pawulu, niBaranaba abulakeni hamu nezanvu dalombweleña nakulumbulula njila yazatilileñamu Yehova nawaJentili abulili kwalama. (Yil. 15:7-12) Hanyima yakushinshika haniwu wunsahu hamu niyuma yahosheluwu muNsona jachiHeberu niwukwashu waspiritu yajila, izaza dalombweleña dafuukwiluhu haniyi nsañu. Kuhiñahu alejeli yipompelu kuhitila mukuyisonekela nyikanda hayuma yafuukwiluwu.—Tañenu Yililu 15:25-30; 16:4, 5; Efwes. 3:5, 6.

7. Indi nsañu yalala yakunama ayimwekesheli munjilanyi?

⁷ Nsañu yikwawu yayivulu yalema ayilumbulwili kuhitila munyikanda yonenewa yasonekeluwu kudi Yowanu, Petulu, Yakoba, niPawulu. Ilaña mukuhita kwampinji hanyima yakumanisha kusoneka nyikanda yawakwaKristu, yawaana yakuprofweta nikwiluka kwamuchihayamisha yamanini. (1 Kor. 13:8) Komana spiritu yatwalekeluhu kuzatika neyi ntañishi nawa ñanukishu? Komana yatwalekeluhu kukwasha akwaKristu kushinshika muyuma yaNzambi yakunama?  Wuprofwetu wamwekeshaña nawu yatwalekeluhu.

Mumpinji Yakukuminina

8, 9. Anyi “akatoñeka” nakwiluka kwakuspiritu mumpinji yakukuminina?

⁸ Kutalisha kumpinji yakukuminina, kañelu washimwineñahu dehi nindi: “Akwamaana akatoñeka neyi chatoñekaña iwulu; akondolaña akwawu amavulu ayi mukuloña akatoñeka neyi tutumbwa haya nyaka nanyaka. . . . Akavulisha kwiluka [kwalala].” (Dan. 12:3, 4) Anyi akavulisha kwiluka nawa anyi akatoñeka? Yesu washimwini muchishimu chindi chatidiku namatahu chakavulishawu kwiluka nichakatoñekawu. Kutalisha “hamba kakuma nyaka yinu;” wahosheli nindi: “Aloña akatoñeka muwanta waTata yawu neyi itañwa.” (Mat. 13:39, 43) Mukulumbulula kwindi, Yesu washimwini nindi “aloña” diwu “anyana kawanta,” dikwila nawu akwaKristu awayishewa.—Mat. 13:38.

⁹ Komana akwaKristu awayishewa ejima “akatoñeka”? Eña, muloña akwaKristu ejima azataña mudimu wakushimwina, nikwilisha atumbanji, nikukolesha amakwawu hampinji yakupompa. Nawa awayishewa emika chakutalilahu chachiwahi. (Zek. 8:23) Kubombelahu, yuma yakunama atela kuyimwekesha mumpinji yakukuminina. Wuprofwetu waDanyeli wasonekawu ‘awulamikili’ ndo nikumpinji yakukuminina.  (Dan. 12:9) Munjilanyi nawa kuhitila mudinyi mwashinshikilaña spiritu muyuma yakunama?

10. (a) Munanu mafuku akukuminina spiritu yamwekeshaña nsañu yalala yakunama kuhitila mudanyi? (b) Shimunenu chalumbulwiluwu chalala kutalisha hatembeli yaYehova yeneni yakuspiritu.

¹⁰ Munanu mafuku etu neyi mpinji yishika yakulumbulula nsañu yakuspiritu, spiritu yajila yakwashaña añimenu ashindamenewa ‘aNduñu wamaana niKashinshi’ ekala hachishina chamukaayi kwiluka nsañu yalala yakunama yitwabulili kwiluka kunyima. (Mat. 24:45; 1 Kor. 2:13) Izaza Dalombolaña dejima didatalaña hakwolola kulumbulula kwansañu. (Yil. 15:6) Yuma yelukañawu, ayisonekaña kulonda kukwasha antu ejima. (Mat. 10:27) Mukuhita kwampinji, kulumbulula kukwawu kwakeñekaña, nawa nsañu yeniyi ayilumbulula chakadi kuhita mumbadi.—Talenu chikasha chinakwila nawu, “Spiritu Chiyalumbulwili Mwatalisha Tembeli yakuSpiritu.”

Chitwahetelañamu muMudimu Wazataña Spiritu Makonu

11. Indi akwaKristu ejima makonu ahetelañamu ñahi mumudimu wazataña spiritu yajila hakumwekesha yuma yaNzambi yakunama?

¹¹ AkwaKristu ejima ashinshika ahetelañamu mumudimu wazataña spiritu yajila hakumwekesha yuma yaNzambi yakunama. Kufwana akwaKristu amuyaaka nkulakaji yatachi, etu makonu twadizaña nawa chimwahita mpinji twanuka nikuzatisha nsañu yitwadizaña kuhitila muwukwashu waspiritu yajila. (Luka 12:11, 12) Hitwatela kutaña shikola yeneni yakumujimba hakwila nawu tutiyishi chalala chakuspiritu chakunama chasonekañawuku. (Yil. 4:13) Hanu dinu tunateli kuyilaku ñahi hambidi mukutiyisha yuma yaNzambi yakunama? Talenu njila jantesha jimwatela kulondela.

12. Mpinjinyi yitwatela kulomba spiritu yajila?

¹² Lombenu spiritu yajila. Neyi hitukukeña kudiza nsañu yamuNsona, twatela kusambila kulomba spiritu yajila kulonda yitulomboli. Ichi chakwashanaña hela tudi nkawetu chili neyi mpinji yinakehi. Kulomba kwamuchidiwu kwakudizoza kunateli kuzañalesha Tata yetu wamwiwulu. Kwesekeja nachahosheliyi Yesu, Yehova nateli kutwinka spiritu yindi yajila neyi tumulomba namuchima wumu.—Luka 11:13.

13, 14. Indi kuloñesha nsañu yakudiza hakupompa kwatukwashaña ñahi kwiluka yuma yaNzambi yakunama?

¹³ Loñeshenu nsañu yimukudiza hakupompa. Twatambwilaña ‘yakudya yahampinji yatelela’ kuhitila mwizanvu danduñu. “Nduñu” wazataña mudimu windi kuhitila mukutwinka nsañu yashindamena haBayibolu nikuloñesha maprogiramu akudiza nikupompa. Kwekalaña kutoñojokahu chachiwahi chikupu hakwila nawu aleji ‘ana kwetu ejima’ ashi maana kunsañu yinasonekuwu. (1 Pet. 2:17; Kol. 4:16; Yuda 3) Twatiyililaña wunlomboli waspiritu yajila neyi tuzata nañovu nakulondela mwatulejañawu.—Chim. 2:29.

¹⁴ Hakuloñesha nsañu yakudiza hakupompa kwawakwaKristu, twatela kutañaña Nsona jinashimunuwu nikweseka kwiluka nsona yejima chiyinakundami kunsañu yimunakudiza. Mukuhita kwampinji chaaku chenichi chikutuleñela kutiyisha chikupu nsañu yamuBayibolu. (Yil. 17:11, 12) Kutaña Nsona kwatuleñela kwiluka netu spiritu yajila yinateli kutukwasha kwanuka  yuma yitwadizaña. Kubombelahu, neyi tumona muBayibolu hefu hadi nsañu, tunateli kuhemba muyitoñojoka nsañu yinateli kutukwasha kuwana hitwayimweni hampinji yitukakeña kuyizatisha.

15. Muloñadi chitwatela kutañaña nsañu yasonekañawu munyikanda mpinji yejima, nawa enu mwelaña ñahi mwenimu?

¹⁵ Dizenuña mpinji yejima nyikanda yimwatambwilaña. Nyikanda yikwawu yasonekañawu hitwayitañaña hakupompaku, ilaña ayisonekaña nawu yitukwasheña. Nimagazini itwahanaña kudi antu ayisonekaña nawu ninetu tuheteleñamu. Mukanu kaayi mwasweja jakwila, kwekalaña mpinji yitwahembelelaña muntu hela chuma. Neyi tusenda mukanda wutwabula kutaña hela wutwabula kumanisha kutaña, tunateli kuzatisha iyi mpinji kulonda kutañaku chibaaba. Antu amakwawu atañaña mpinji yejima kuhitila mukutiyilila kunyikanda yakwatilawu mazu hatepu iku anakwenda hela anakwendesha motoka. Hakusoneka iyi nsañu asandujolaña chachiwahi nawa ayisonekaña kulonda antu ejima ahetelumu, nsañu yejimiyi yatuleñelaña tuswejeña kuhameka yuma yakuspiritu.—Hab. 2:2.

16. Twahetelañamu ñahi mukusoneka nikufwila kwiluka malwihu itwatoñojokañahu?

¹⁶ Toñojokenu hayuma yimunatañi. Neyi mutaña Bayibolu hela munyikanda yashindamena haBayibolu, mwatela kutoñojoka hayuma yimunatañi. Chimukulondelaña chachiwahi yuma yimunakutaña, muyitoñojoka yenu mukwikala malwihu. Munateli kusoneka malwihu imunakutoñojoka nakuyakula mpinji yacheñi. Kakavulu hampinji yitwakeñakeñaña nsañu yatuzañalesheli dihu hitwadizaña yuma yakunama chikupu. Kutiyisha nsañu didu iheta ditwawanañamu kwesekeja nachitwakeñaña.—Mat. 13:52.

17. Progiramu yamuchidinyi yimwalondelaña hakudiza kwachisaka hela hakudiza halwenu?

¹⁷ Ikalenu nampinji yakudifukula kwachisaka. Izaza Dalombolaña dinakutukolesha wejima wetu kufuukula mpinji yamelela hela mpinji yidi yejima mulungu nimulungu yakudiza kwahalwetu hela kwachisaka. Chineli ndandanda yetu yakupompa ayihimpa chikutukwashaku kuzatisha iku kufumba. Yumanyi yimwadizaña hampinji yaKudifukula kwaChisaka kwamelela? Amakwawu atañaña Bayibolu, kusandujola hajivasi jabulaña kutiyishawu nikusoneka tumazu twantesha twakulumbulula muBayibolu yawu. Yisaka yayivulu ekalaña nampinji yakutoñojoka chakuzatisha nsañu yinadizuwu muchisaka. Nyitu yayisaka yikwawu yatondaña nsañu yatela kudiza chisaka hela nsañu yinakundami kumalwihu anakukeña chisaka nawu adizi. Chakadi kujina mukutoñojokaña hansañu yikwawu yimwatela kudiza mukuhita kwampinji. *

18. Muloñadi chitwatela kubulila kuleka kudiza yuma yekala Mwizu daNzambi yakunama?

¹⁸ Yesu wahosheli nindi spiritu yakekala neyi nkwashi. Dichi bayi tuleka kudiza yuma yakunama yaMwizu daNzambuku. Chalala chamuchidiwu ‘hikwiluka Nzambi,’ kwalema chikupu nawa anatuleji kusandujola chikupu munichi chalala. (Tañenu Yishimu 2:1-5.) Spiritu yamwekeshaña yuma yayivulu ‘Nzambi yaloñeshelayi dehi antu amukeña.’ Chitukuzataña nañovu kulonda kudiza yuma yayivulu yekala Mwizu daYehova, spiritu yajila yikutukwasha, muloña ‘spiritu yashinshikaña yuma yonsu, chalala yuma yaNzambi yakunama.’—1 Kor. 2:9, 10.

[Footnote]

Mukwakula Nenudi?

• Munjilanyi jiyedi mwatukwashilaña spiritu kushinshika ‘muyuma yaNzambi yakunama’?

• Muyaaka nkulakaji yatachi spiritu yajila yamwekesheli nsañu yalala yakunama kuhitila mudi anyi?

• Indi spiritu yajila yazatikaña ñahi hakulumbulula nsañu makonu?

• Chumanyi chimwatela kwila kulonda muheteli mumudimu wazataña spiritu?

[Malwihu aKuzatisha haKudiza]

[Chikasha chidi hefu 22]

Spiritu Chiyalumbulwili Mwatalisha Tembeli yakuSpiritu

Hakachi ‘kayuma yaNzambi yakunama’ yamwekesheluwu muyaaka nkulakaji yatachi yadiña yakwila nawu tabanaka nitembeli yemeneneñaku yuma yalala yakuspiritu yabadika. Pawulu wateneni iyi yuma yalala nindi ‘tabanaka yalala yalemenuwu kudi Mwanta bayi kudi muntuku.’ (Heb. 8:2) Yadiña tembeli yeneni yakuspiritu, njila yakutiyañenamu naNzambi yenzulwiluwu kuhitila mumulambu nimuwupristu waYesu Kristu.

‘Tabanaka yalala’ yatachikili mu 29 C.E. hampinji yamupapatishiluwu Yesu nawa Yehova wetejeli nindi yekali mulambu wawanina. (Heb. 10:5-10) Chafwiliyi nichasañukiliyi, Yesu weñilili Mwamweni Mwajila mutembeli yakuspiritu nawa waheni mulambu windi “kumesu aNzambi.”—Heb. 9:11, 12, 24.

Cheñi, kapostolu Pawulu wasonekeli kutalisha hadi akwaKristu awayishewa nindi adi “[na]kwenda kukula kulonda kwikali tembeli yamudi Mwanta yajila.” (Efwes. 2:20-22) Komana iyi tembeli yadiña chochimu ‘natabanaka yalala’ yalumbulwiliyi mumukanda wasonekeleliyi aHeberu? Ambuña aYehova hadi yaaka yayivulu atoñojokeleña nawu yadiña yoyimu. Chidi neyi akwaKristu awayishewa hampinji yadiñawu hamaseki ayitondeli kulonda akekali “malola” mutembeli yamwiwulu yaYehova.—1 Pet. 2:5.

Hela chochu, kukamwihi nachaaka cha 1971, antu atelela amwizanvu danduñu atachikili kwiluka nawu tembeli yateneniyi Pawulu muEfwesesa hiyinateli kwikala tembeli yeneni yaYehova yakuspirituku. Neyi chakwila ‘tabanaka yalala’ yatuñewa nawakwaKristu awayishewa asañwiluwu, dikwila nawu yikatachika kuzatika hanyima yakwila kusañuka kwawu kunatachiki dehi mumpinji ‘yakenzayi Mwanta.’ (1 Tesa. 4:15-17) Ilaña hakutena tabanaka, Pawulu wasonekeli nindi: ‘Iyi tabanaka hichishimu chinakumwekesha mpinji yatoñweluwu dehi yamakonu.’—Heb. 9:9.

Kuhitila mukwesekeja iji nsona nansona jikwawu, chalumbulukili chikupu nawu tembeli yakuspiritu bayi neyi anakuyituñaku nawa akwaKristu awayishewa bayi neyi ‘himalola’ anakutuñawu hamaseki kulonda kuyibombelamuku. Ilaña, akwaKristu awayishewa azataña muchipañu niMwajila mutembeli yakuspiritu, nawa ifuku nifuku amulambulaña Nzambi “mulambu wakumuhameka.”—Heb. 13:15.

[Mwevulu wudi hefu 23]

Tunateli kuyilaku ñahi hambidi mukwiluka ‘yuma yaNzambi yakunama’?