Swejenu Kudikita muMudimu Weneni waKumuna wakuSpiritu

‘Swejenu kukalakala mumudimu wamwanta.’—1 KOR.15:58.

1. Mudimwinyi wayinkeliyi Yesu atumbanji twindi?

 HAMPINJI yendujokeleñayi mumukala waSamariya kukumana kwachaaka cha 30 C.E., Yesu washakamini kapinji kantesha nakunooka heshima dadiñi kwakwihi namukala waSika. Hakuyila atumbanji twindi nindi: “Fumbulenu mesu mutali mumaha, chimwatookashana dehi to-o, ashika dehi hakumuna.” (Yow. 4:35) Yesu wateneneña bayi neyi kumuna kwakwenuku, ilaña wahosheleña hakupompesha kwakuspiritu kwawantu anyichima yayiwahi adi kwikala atumbanji twindi. Dikwila nawu wayinkeli atumbanji twindi mudimu wakumuna. Kwadiña nyidimu yayivulu ilaña mpinji yakeheli.

2, 3. (a) Chumanyi chinakumwekesha nawu tunakushakama hachilaaka chakumuna? (b) Indi chinu chibaaba chikuhosha hayumanyi?

² Mazu ahosheliyi Yesu kutalisha hakumuna anakundami nikudetu makonu? Tunakushakama mumpinji yitwatela kukwasha antu mukaayi adi neyi iha ‘dinatookashani dashika dehi hakumuna.’ Hachaaka nichaaka, yihita yawantu yatambwilaña nyitambi yakwiluka chalala chaletaña wumi, niantu amavulu hakachi kawatumbanji amaha anakupapatishewa. Anetu tukweti kukooleka kwakudikita muniwu mudimu weneni nankashi wakumuna, wunakulombolawu kudi Mwanta wakumuna, Yehova Nzambi. Komana ‘munakusweja kukalakala’ muniwu mudimu wakumuna?—1 Kor. 15:58.

³ Hampinji yazatiliyi hadi yaaka yisatu nachikunku mumudimu waheseki wakushimwina, Yesu walejeli atumbanji twindi mudimu wawu nindi hiyakwakumuna. Chinu chibaaba chikuhosha hayuma yisatu yidi hakachi kayuma yayivulu yalema yalejeliyi Yesu atumbanji twindi. Yuma yejima yitukudizilaku yikuhosha hachililu chasweja kulema kudetu hampinji yitunakufwila kudikita mumudimu wamakonu wakupompesha atumbanji. Tushinshikenu haniyi yililu.

Kudizoza Kwalema

4. Indi Yesu walumbulwili ñahi kulema kwakudizoza?

⁴ Fwikijenu ichi chimwenu: Atumbanji anafumi tuhu hakudibobwesha nawu hinyi watela kwikala mukulumpi? Iku achidi kubwakata munyichima yawu muloña wakuzuwa nikudihela. Yesu watambikili mwana wanyanya nakumwimika mukachi kawu. Iku nakutala hadi mwana wanyanya, wahosheli nindi: “Chiña mubalumuka, mwikali neyi anyana anyanya, mukunkulwayi himwakatwesha kwiñila muwanta wamwiwuluku.” (Tañenu Matewu 18:1-4.) Chatela atoñojokeña neyi antu amukaayi, amonaña kulema kwamuntu kuhitila muñovu, maheta, nichifulu chikwetiyi, atumbanji twaYesu ateleleli kwiluka nawu kulema kwawu kwashindameneni hakudikehesha kumesu awantu. Dichi Yehova wateleli kuyikiswila nikuyizatisha chiña hohu neyi amwekesha kudizoza chikupu.

5, 6. Muloñadi chitwatela kwikala adizoza kulonda tutweshi kudikita chikupu muniwu mudimu wakumuna? Hanenu chakutalilahu.

⁵ Nikulelu, antu amavulu mukaayi ahanaña wumi wawu nakufwila mpuhu, maheta nichifulu. Chafumañamu, akañanyaña kuwana mpinji hela ekalaña nakapinji kantesha kakudiza hadi  Nzambi nikumukalakela. (Mat. 13:22) Kwambukaku, antu jaYehova azañalalaña kwikala ‘adizoza’ kumesu awantu kulonda atambwili nkisu niwuselewa waMwanta wawu wakumuna.—Mat. 6:24; 2 Kor. 11:7; Fwi. 3:8.

⁶ Talenu chakutalilahu chaFrancisco, wakalakalaña neyi eluda kuSouth America. Hadiñayi mukwenzi, walekeli shikola yamuñoñi kulonda kuzata mudimu wawupayiniya. Wahosheli nindi, “Chinenhwili mumbanda wakusumbula, nateleleli kwiñila mudimu wadi kuletesha twikali namali amavulu nankashi nañodami. Ilaña, twafuukwiluhu kupelesha chihandilu chetu nikutwalekahu mumudimu wampinji yejima. Chimwahitili mpinji, twatachikili kuvwala anyana nawa kukala nikwena kwavulililuku. Hela chochu, Yehova watukwashili kukolela kukufuukula kwetu kwakwikala nachihandilu chapela.” Francisco wakunkulwili nindi: “Kubadika hadi yaaka 30, nadiluñishi chikupu kukooleka kwakukalakala neyi eluda, kubombela hanyidimu yikwawu yadimena yinazataña. Nawa hitwaditoñeshaña hela chanti hakwikala nachihandilu chapelaku.”

7. Komana mwesekahu dehi kuzatisha kufumba kwekala haAroma 12:16?

⁷ Neyi mukaana ‘yuma yamukunkulwayi’ yamukanu kaayi nakubula ‘kudikunda nawantu abula kulema,’ anenu mukutambwila nkisu jajivulu nikwikala nakukooleka kwakukalakala mumudimu wakumuna.—Rom. 12:16; Efwes. 4:2; Mat. 4:19, 20; Luka 18:28-30.

Mukuzata naÑovu Mwafumaña Wuloku

8, 9. (a) Shimunenu mukwihihisha chishimu chaYesu chantalenta? (b) Indi ichi chishimu chinateli kukolesha nankashi antu amuchidinyi?

⁸ Kuzata nañovu dichililu chikwawu chikutukwashaku kudikita nankashi mumudimu wakumuna. Yesu wamwekesheli chumichi muchishimu chantalenta. * Ichi chishimu chahoshaña hadi muntu waheneni maheta kudi anduñu jindi asatu henohu kanda yayi kwituña dacheñi. Nduñu watachi watambwili ntalenta jitanu, wamuchiyedi watambwili jiyedi, wamuchisatu watambwili yimu. Chelili nkaka yawu nayi dehi, nduñu watachi niwamuchiyedi azatili nañovu hohenohu ‘hiyakuya nakujilandujola.’ Ilaña nduñu wamuchisatu wadiña “wakatala.” Wavumbikili ntalenta yindi hamaseki. Chafuntiliyi mwanta wawu, wayifweteli kuhitila mukuyinka ‘wanta wayuma yayivulu.’ Nduñu wamuchisatu wamutambwili ntalenta yamwinkeluwu nikumuhaña mwitala dindi.—Mat. 25:14-30.

⁹ Chakadi nikujina munakufwila kwimbujola anduñu adikita amuchishimu chaYesu nawa munakukeña kwikala adikita chikupu mumudimu wakwilisha  atumbanji. Chumanyi chimwatela kwila neyi mudi nakukala kweneni kunakuyikañesha kuzata nañovu? Hadaha kukala kwamali kunayileñeli kuzataña mpinji yeneni kulonda mutweshi kwakamena chisaka chenu. Hekwawu ñovu mumujimba jinayimani dehi nawa munakuyekela nayikatu. Neyi mudi mukukala kwamuchidiwu, chishimu chantalenta chikweti nsañu yatela kuyikolesha.

10. Indi nkaka yawantu wamuchishimu chantalenta wamwekesheli ñahi kashinshi, nawa chumichi chinayikoleshi ñahi?

¹⁰ Nkaka yawantu washimunawu munichi chishimu welukili nindi anduñu jindi adiñi nawuswa wamboka-mboka. Wamwekesheli chumichi hampinji yayinkeliyi ntalenta “mwomwesekela ñovu jawu.” (Mat. 25:15) Neyi chatoñojokeleñayi, nduñu watachi wasompwesheluhu chikupu kubadika nduñu wamuchiyedi. Hela chochu, nkaka yawantu wayihamekeli nikulemesha awa anduñu ayedi nakuyila nindi ‘muyanduñu amawahi nawa ashinshika’ nawa wayinkeli wufwetu wowumu. (Mat. 25:21, 23) Munjila yoyimu, Mwanta wakumuna, Yehova Nzambi, weluka nindi kukala kumukweti kwayikañeshaña kuzata nañovu mumudimu windi. Wakanuka nyidimu yenu yimwazataña nañovu nawa wakayinka wuloku.—Maku 14:3-9; tañenu Luka 21:1-4.

11. Shimunenu chakutalilahu chinakumwekesha kuzata nañovu mumpinji yakukala chikwaletaña nkisu jajivulu.

¹¹ Chakutalilahu chaSelmira, muhela mukwaKristu washakamaña muBrazil, chamwekeshaña nawu kuzata nañovu mumudimu waNzambi hikwashindamena hakwikala nachihandilu chachiwahuku. Yaaka makumi ayedi yinahituhu, mfumwa Selmira amulozeli kudi amakombi, nawa nfumwindi wamushili nawanyana anyanya asatu. Mudimu windi wazatileñayi wawuñamba wazatileña maora amavulu nawa wazeyeleña muloña wakwenda munyotoka yamumbaka yakushakama nakudichinya. Hela chakwila wamweneña kukala, waloñesheleña chachiwahi nzatilu yindi kulonda kuzata wupayiniya wampinji yejima. Nkumininaku anyanindi ayedi niwena atachikili kuzata mudimu wawupayiniya. Wahosheli nindi: “Hayaaka yinahituhu, nadizi Bayibolu nawantu akubadika ha 20 nawa anekali ‘antaña jami.’” Watwalekeluhu nindi, “Kushika niyinu mpinji ankeña nankashi nawa twatiyañanaña. Hichuma chachiwahi chakubula kulanda namali.” Mwalala Mwanta wakumuna nakiswili nyidimu yadikitañayi Selmira!

12. Tunateli kumwekesha ñahi netu twadikitaña mumudimu wakushimwina?

¹² Neyi kukala kumukweti kunakuyikañesha kuzata nañovu mumudimu wakushimwina, esekenu kuzata chikupu mumudimu wakumuna kuhitila mukuzata nañovu. Neyi mukuzatishaña chachiwahi njila jashimunañawu haKupompa kwaMudimu mulungu nimulungu, mukusweja kwiluka njila jakushimwina nikuzatisha njila jajiha jakushimwinamu. (2 Tim. 2:15) Neyi chinatwesheki cheñi, munateli kuhimpa nzatilu yenu hela kuleka nyidimu yabula kulema kulonda muzateñaku mudimu wakushimwina watanjikawu muchipompelu.—Kol. 4:5.

13. Chumanyi chalema chikuyileñela kutwalekahu kuzata nañovu?

¹³ Mwatela kwiluka nenu kumusakilila Nzambi nikumukeña dikwaleñelaña muntu kuzata nañovu. (Mas. 40:8) Nduñu wamuchisatu washimunawu muchishimu chaYesu wamutiyili nkaka yindi woma, nindi wakalisha nawa himuntu watama. Chafuminimu, iwu iyala wavumbikili ntalenta jindi chatela yayilandujoli kulonda kuvulisha maheta ankaka yindi. Twatela kwikala nawubwambu wawuwahi naMwanta wakumuna, Yehova, hakwila nawu tutondolweli yililu yamuchidiwu yawukata. Ikalenu nampinji yakudiza nikutoñojokahu chikupu hayililu yindi yayiwahi yidi neyi kukeña, kudiwunjika, niluwi. Neyi mukwila mwenimu, mukwikala namuchima wakuzata nañovu mumudimu windi.—Luka 6:45; Fwi. 1:9-11.

“Dijilikenu”

14. Chumanyi chalema chatela kwilawu antu anakukeña kwikala akwakumuna?

¹⁴ Kuzatisha mazu amuNsona jachiHeberu, kapostolu Petulu washimwini kufuukula kwaNzambi kutalisha kudi ambuñindi ahamaseki,  wahosheli nindi: “Hakwila chelayi yena wayitambikili wajila, enu nawa ikalenu ajila mumwelilaña mwejima; muloña anasoneki nawu, Dijilikenu mwikali ajila, muloña ami najila.” (1 Pet. 1:15, 16; Lev. 19:2; Kuhit. 18:13) Awa mazu anakumwekesha nawu akwakumuna atela kwikala akadi majilu muyililu nikuspiritu. Muchifwikija, tunateli kwila mwenimu kuhitila mukulondela njila jinateli kutuleñela atutookeshi. Anateli kututookesha ñahi? Kuhitila muwukwashu wezu daNzambi dalala.

15. Chalala chezu daNzambi chikweti ñovu yakukoña chumanyi kudetu?

¹⁵ Izu daNzambi dalala anadesekeji namenji atookeshaña. Chakutalilahu, kapostolu Pawulu wasonekeli nindi chipompelu chawakwaKristu awayishewa chekala chakadi majilu kumesu aNzambi, kufwana nsumbuki waKristu wabula kubajama, wachitookesheli “nakuchiwelesha nameji amazu . . . , chiikali chajila, chakadi hakuchinkela muloña.” (Efwes. 5:25-27) Hakusambila, Yesu wahosheli hañovu yezu daNzambi datookeshaña, dashimwinineñayi. Hampinji yahosheleñayi kudi atumbanji twindi, Yesu wahosheli nindi: “Enu munatooki dehi namazu inahoshi nanenu.” (Yow. 15:3) Dichi, chalala chamwizu daNzambi chikweti ñovu yakutookesha muyililu nikuspiritu. Nzambi nateli kwiteja hohu kudifuukula kwetu neyi twiteja chalala chezu daNzambi chitutookeshi.

16. Tunateli kutwalekahu ñahi kwikala atooka kuspiritu nimuyililu?

¹⁶ Dichi, hakwila nawu twikali akwakumuna aNzambi, twatela kusambila kuleka yililu yejima yamonañayi Nzambi nindi yamajilu muchihandilu chetu. Hakwila nawu tutwalekuhu kuzata iwu mudimu, twatela kwimika chakutalilahu chachiwahi chakulondela nshimbi yaYehova yakwikala nayililu yayiwahi yakumujimba niyakuspiritu. (Tañenu 1 Petulu 1:14-16.) Neyi chochitwahembaña mujimba wetu wakadi majilu, twatela kwovwahila chikupu chalala chaMwizu daNzambi chatookeshaña mpinji yejima. Chumichi chabombelamu kutaña Bayibolu nikuya kukupompa kwawakwaKristu. Chakeñekaña cheñi kuzata chikupu nañovu kulonda tuzatisheña nshimbi jaNzambi muchihandilu chetu. Neyi twila mwenimu chikutukwashaku kufwila kutondolwela yaaku yetu yakubula kuwanina nikukaana yuma yaluwañeshaña yamukanu kaayi. (Mas. 119:9; Yak. 1:21-25) Eñañi, chatukundejaña chikupu hakwiluka netu kuhitila muwukwashu wezu daNzambi dalala, anateli ‘kutuwelesha’ hela tuhu kunshidi yasweja!—1 Kor. 6:9-11.

17. Hakwila nawu tutwalekuhu kwikala atooka, kufumbanyi kwamuBayibolu kutwatela kulondela?

¹⁷ Komana mwetejaña chalala chaMwizu daNzambi chiyitookeshi muchihandilu chenu? Chakutalilahu, mwatiyaña ñahi neyi ayisoñamisha hawubanji wekala muyisela yatama yamunu mukaayi? (Mas. 101:3) Komana mwatondolwelaña kudikunda nawakwenu akashikola niakwanyidimu abula kukuhwelela yuma yimwakuhwelela? (1 Kor. 15:33) Komana munakuzata nañovu chikupu kulonda mushindi yililu yatama yayimakena yikuleñela mubuli kwikala nawuselewa kumesu aYehova? (Kol. 3:5) Komana mwadiñijaña munsañu jamatuña nachiyuulu nikwikala nachaambu hakachi kanyunza chinatandi muyisela yakubecha?—Yak. 4:4.

18. Indi kwikala atooka muyililu nikuspiritu kwatukwashaña ñahi kwikala akwakudikita chikupu mumudimu wakumuna?

¹⁸ Neyi mukwovwahila chikupu munsañu jamuchidiwu mwakafuma yuma yayiwahi. Hakwesekeja atumbanji twindi awayishewa nanyitayi yanyivinyu, Yesu wahosheli nindi: ‘Nyitayi yejima yamudami yabulaña kusoña nyikabu, [Tata yami] wayikunkulañaku; niyejima yasoñaña nyikabu wayitookeshaña, kulonda yisoñi  nyikabu yayivulu.’ (Yow. 15:2) Chimukwovwahila menji atookeshaña achalala chamuBayibolu, mukusoña nyikabu yayivulu.

Nkisu Yitukutambwila Makonu niKumbidi

19. Indi atumbanji twaYesu ayikiswilili ñahi hakudikita chikupu mumudimu wakumuna?

¹⁹ Atumbanji ashinshika azatishili kufumba kwaYesu ayichilili spiritu yajila haPentekosta 33 C.E. nakwikala ayinsahu “nikwakumina maseki.” (Yil. 1:8) Atwalekeluhu kukalakala neyi izaza dalombolaña, amishonali, aeluda endaña nawa azatili mudimu weneni wakushimwina nsañu yayiwahi “mwahita kuleña kwejima kwekala mwishina dewulu.” (Kol. 1:23) Mwalala, ahetelelumu chikupu nawa antu amakwawu niwena ahetelelumu nankashi.

20. (a) Nkiswinyi jimunatambwili hamuloña wakudikita chikupu mumudimu wakumuna wakuspiritu? (b) Chumanyi chimunakufwila kwila?

²⁰ Eñañi, neyi tukwikala adizoza, adikita chikupu, nikwikala nayililu yinesekani nanshimbi jaMwizu daNzambi, tukutwalekahu kudiluñisha muniwu mudimu wabadika wakumuna kuspiritu wunakukalakalawu makonu. Hela chakwila antu amavulu anakumona ikezeñi mukanu kaayi mwenzala antu akeñesha yuma yakumujimba nikukeña kuhema, etu twazañalalaña nikutiya kuwaha nayuma yitukweti. (Mas. 126:6) Sweje-e dinu, ‘kukalakala kwetu kutwakabakanaña mudi Mwanta hikwamukunkulwayuku.’ (1 Kor. 15:58) Mwanta wakumuna, Yehova Nzambi, wakatukiswila haya nyaka muloña ‘wamudimu wetu nikukeña kutwakeña ijina dindi.’—Heb. 6:10-12.

[Tumazu twaheshina]

Munakwanuka?

Hampinji yimunakufwila kudikita chikupu mumudimu wakumuna . . .

• Muloñadi chichalemena kwikala adizoza?

• Munateli kutwalekahu ñahi kwikala adikita muniwu mudimu?

• Muloñadi chichalemena kwikala atooka muyililu nikuspiritu?

[Malwihu aKuzatisha haKudiza]

[Mwevulu wudi hefu 17]

Kudizoza kunateli kutuleñela kwikala nachihandilu chapela chashindamena hakutiyakesha Wanta