‘Twalekenuhu Kusha Muchima Kukutañisha’
‘Twalekenuhu Kusha Muchima Kukutañisha’
“ENU mwañilaña nenu, Eyi Nkuluñaña; cheñi nawa nenu, Eyi Mwanta. Mwelaña chachiwahi, muloña dichi chinidi.” (Yow. 13:13) Hakuhosha awa mazu kudi atumbanji twindi, Yesu washimwini mudimu windi wawuntañishi. Kuhiñahu, henohu Yesu kanda yayi mwiwulu, walejeli atumbanji twindi nindi: “Dichi yenu mwakelishi atumbanji munyuza yejima, . . . Mwakayileji kuhemba yuma yejima yinayilejenu.” (Mat. 28:19, 20) Chimwahitili mpinji, kapostolu Pawulu niyena wakonkomweneni hakulema kwakwikala antañishi Ezu daNzambi. Wamukonkomweneni Timotewu eluda mukwaKristu nindi: ‘Shaku muchima kukutañila amakwawu nikukukonkomwena, nikukutañisha. Dikwatishi muyumiyi, wudinkumu chikupu, kulonda chiwukuyaña kumbidi chimwekanaña kudi antu ejima.’—1 Tim. 4:13-15.
Makonu, kufwana mpinji yakunyima, kutañisha himbadi yalema yamumudimu wetu wakushimwina nihakupompa kwawakwaKristu. Tunateli kutwalekahu ñahi kusha muchima kukutañisha, nawa kunateli kutukwasha ñahi kuyilaku hambidi, neyi antañishi Ezu daNzambi?
Imbujolenu Ntañishi Muneni
Ntañishilu yaYesu yashikili hanyichima yawantu amavulu adiña nakumutiyilila. Talenu chuma chafumini mumazu ahosheliyi kudi antu apompeli mushikola yamuNazareta. Nsoneki waNsañu Yayiwahi Luka wasonekeli nindi: “Antu ejima hiyakumwiteja, hiyakuhayama mazu amawahi afumini kukanwa kindi.” (Luka 4:22) Atumbanji twaYesu embujolileña chakutalilahu chaNkuluñaña yawu mumudimu wawu wakushimwina. Eñañi, kapostolu Pawulu wakolesheli akwawu akwaKristu nindi: “Ikalenu akwakuñimbujola ami, neyi chinelaña ami nawa nembujolaña Kristu.” (1 Kor. 11:1) Hamuloña wakwimbujola ntañishilu yaYesu, Pawulu welukishili chikupu ‘kutañisha hatooka kwitala nikwitala.’—Yil. 20:20.
Kutañisha Antu ‘Kuwulandilu’
Hamukanda waYililu kapetulu 17 twawanañahu chakutalilahu chachiwahi chaPawulu chakutañisha hatooka. Twatañañahu nsañu yahosha hampinji yayiliyi kuAtenisi, nikuHeleni. Hadi hejima hatalileñayi Pawulu mumusumba, munyikwakwa, nimumaluña mwadiña antu, wamweneña kwankishi. Dichamuleñeleli Pawulu kutiya chikela chikupu! Hela chakwila watiyili chikela habadishili nzovu iyoñaku. Ilaña, ‘watachikili kuhanjeka mushikola nikuwulandilu nawantu akudimonayi nawu, hefuku hefuku.’ (Yil. 17:16, 17) Ichi hichakutalilahu chachiwahi chitwatela kwimbujola! Kuhitila mukuhosha nawantu akuyisemwa yejima, munjila yakadi kuyisompesha, ilaña nakalemesha, tunateli kukolesha amakwawu kutiyilila nawa mukuhita kwamafuku anateli kufuma muwuduñu wansakililu yakutwamba.—Yil. 10:34, 35; Chim. 18:4.
Antu amavulu ashimwininiyi Pawulu muchisankanu adiña nakukaana nsañu yindi. Hakachi kawantu amutiyilileña hadiña akwakukeñakeña maana adiña nayitoñojoka yambuka nachalala chashimwineñayi. Antu amutiyilileña Pawulu chatachikiluwu kutaadika, watiyilili kumazu ahosheleñawu. Amakwawu amuteneneña muchiGriki, nawu “mukwakusakula mbutu” nhoshelu yankinji yakutena “sakubobola.” Amakwawu ahosheleña nawu: “Kwiji hakushimuna akishi akwituña dacheñi.”—Yil. 17:18.
Hela chochu, Pawulu haneñeli nanhoshelu yatama yafumineña mutunwa twawantiyilili induku. Ilaña, chamwihwiluwu nawu yalumbululi ntañishilu yindi, Pawulu wazatishili iyi mpinji nakuhana mpanji yatiyakana yamwekesheli Yil. 17:19-22; 1 Pet. 3:15) Tushinshikenu chikupu hampanji yindi yahaniniyi kulonda tudizi yuma yatela kutukwasha kuyilaku hambidi muntañishilu yetu.
nawu wadiña weluka kutañisha. (Hoshenu Nsañu Yatela Kuzañalesha Antiyilili
Pawulu wahosheli nindi: “Enu akwetu amayala akwaAtenisi, namoni mwasweja kukeña kupeshapesha. Muloña chinadiñi . . . [na]kumona yuma yimwapeshaña; hinukuwana nawa kameña kakusoneka nawu, Kameña kaNzambi wakadi kwilukewa. Dichi yeniwu mwapeshaña chakuyamba, diyi nukuyishimwina.”—Yil. 17:22, 23.
Pawulu washili maana kuyuma yejima yadiña mudina iluña. Yuma yamweniyi, yamukwashili kwiluka yuma yayivulu hadi antu atañishileñayi. Anetu tunateli kwiluka mwiniitala itunakutañisha neyi tushinshikisha chashakamayi. Chakutalilahu, tuyuma twakuhemesha tudi hanji hela yinjikijilu yakukudika hepitu yinateli kushimuna chihandilu chindi. Neyi twiluka chihandilu chamuntu, tunateli kwiluka mazu akuhosha nichitwatela kuyihosha.—Kol. 4:6.
Pawulu hahosheleña munjila yakusompeshaku. Welukili nindi akwaTenisi ‘apesheleña Nzambi’ wakadi kwiluka. Pawulu wayilejeli chikupu chiyateleli kudifukula kudi Nzambi walala. (1 Kor. 14:8) Dichi twatela kushimunaña nsañu yayiwahi yaWanta munjila yatiyakana nawa yayiwahi!
Akamenenu Kadizi Wenu Nawa Bayi Mwikala naChaambuku
Pawulu watwalekeluhu nindi: “Yowu Nzambi waleñeli mpata yamunu mwishina niyuma yejima yidumu, diyi Mwanta wamwiwulu niweseki. Hashakamaña kwindi mumatembeli akutuña namakasa awantuku; hela kumukalakela hiyamukalakelaña namakasa awantu, mwaka eli nindi nakeñi chumaku. Muloña yena diyi wenkaña antu wumi nimuuya niyuma yejima.”—Yil. 17:24, 25.
Pawulu wahosheli hadi Yehova nindi Diyi Wenkaña antu wumi, wahosheli mwenimu munjila yayiwahi kuhitila mukutena nindi “Mwanta wamwiwulu niweseki.” Owu muzañalu wutwatiyaña hakukwasha antu anyichima yayiwahi amunsakililu yamboka-mboka niyisemwa kwiluka nawu Yehova Nzambi diyi kaseloki kawumi!—Mas. 36:9.
Kuhiñahu, Pawulu wahosheli nindi: “Wafumishili kudi muntu wumu nyuza yawantu ejima, . . . Hakuyitoñwela yilaaka yawu, niñinza jawu mwakushakaminawu. Nindi akakeñakeñi Nzambi, hamwaha akamupapata, akamuwana; kutoña yena hekala kwakulehi nanetu ejimaku.”—Yil. 17:26, 27.
Njila yitwatañishilañamu, yinateli kumwekesha kudi antu amakwawu chekalayi Nzambi itwalombaña. Yehova wetejaña chakadi chaambu antu akunyunza yejima ‘amupapati, amuwani.’ Chochimu, twashimwinaña antu ejima itwawanaña chakadi chaambu. Twesekaña kukwasha antu akuhwelela mudi Nleñi kulonda akundami kwakwihi nayena hakwila nawu akatambwili nkisu yahaya nyaka. (Yak. 4:8) Hanu dinu tunateli kukwasha ñahi antu ajinookaña nawu Nzambi hekala kwoku? Twalondelaña chakutalilahu chaPawulu. Talenu mazu anahiñuhu ahosheliyi.
“Mudi yena dimu mutwahandilaña, dimu mutwendelaña, dimu mutwekalilaña. Mwomwaneluwu akwakusoneka enwenu aweni amakwawu nawu, Twafuma kudi yena. Ichi dinu chituneli twafuma kudi Nzambi, wuNzambi hitwadi kuwutoñojoka netu wudi neyi wuru Yil. 17:28, 29.
indi kwiji siliva, indi kwiji ilola[ku].”—Pawulu wazatishili mazu awakwakusoneka elukiluwu nikuyiteja kudi akaTenisi kulonda antiyilili indi eteji mazu ahosheleñayi. Ninetu twafwilaña kuhosha hansañu yatela kuzañalesha antu kuhitila mukuhanjeka hayuma yitweluka yatela kwiteja antiyilili etu. Chakutalilahu chazatishiliyi Pawulu mumukanda wasonekeleliyi aHeberu chazatikaña nimakonu wahosheli nindi: “Matala ejima akweti ayituñili; hakwinza watuñili yuma yejima diyi Nzambi.” (Heb. 3:4) Neyi tuyileja antu itwashimwinaña kutoñojoka hanichi chakutalilahu chinateli kuyikwasha kwiluka nawu mazu itwahoshaña alala. Talenu njila yikwawu yazatishiliyi Pawulu mumpanji yindi yakutañishilamu chachiwahi, njila yakusañumuna antu.
Konkomwenenu Hampinji Yitunashikimu
Pawulu wahosheli nindi: “Nzambi wadiwili oyu nyaka yakuyamba; hakwinza katataka naleji antu ejima kwejima kwejima, nindi abalumuki munyichima. Muloña nashumu dehi ifuku damba kasompeshayi matuña mwaloña, neyala anafuukuliyi dehi.”—Yil. 17:30, 31.
Chineli Nzambi neteji kutama kutwalekahu hadi mpinji yantesha, chinaleñeli wonsu wetu kwikala nampinji yakumwekesha yuma yekala munyichima yetu. Komana chalema kukonkomwena hampinji yitunashikimu nikushimuna chikupu nkisu yikaleta chiyuulu chaWanta, chidi kwakwihi chikupu.—2 Tim. 3:1-5.
Antu Amakwawu Etejaña Amakwawu Akaanaña
“Dichi wena chanatiyuwu nsañu yakusañuka mukufwa, amakwawu hiyakuseha; hakwila amakwawu nawu, Tunakeñi kutiya cheñi nsañu iyi. Dichi Pawulu hakufuma mukachi kwawu. Amayala amakwawu hiyakumukakela, hiyakwitiya.”—Yil. 17:32-34.
Antu amakwawu ashikenaña dakwiteja yuma yitwatañishaña; ilaña amakwawu chiña hahita mpinji hakwila eteji mutwashimunaña. Ilaña neyi tulumbulula chalala munjila yapela nawa yatiyakana nawa tukwasha muntu kumwiluka Yehova chikupu, twazañalalaña chikupu hakutuzatisha kudi Nzambi kulonda kukoka antu kudi Mwanindi!—Yow. 6:44.
Yuma Yitwatela Kudizilaku
Chitukutoñojokaña hampinji yaPawulu, tukudiza yuma yayivulu kutalisha hachitwatela kulumbulula chalala chamuBayibolu kudi antu. Neyi twikala nakukooleka kwakuhana mpanji yawantu amavulu muchipompelu, twatela kufwila kumwimbujola Pawulu kuhitila mukuzatisha mazu amawahi akukwasha antu amaha kwiluka nikwiteja chalala chamuBayibolu. Tunakukeña kushimuna chalala munjila yatiyakana, ilaña twatela kushaku kanshinshi kulonda tubuleña kuhiisha namuloña yuma yakuhwelela muntu wudi wejima wamuha wunenzi nakupompa. Cheñi nawa, mumudimu wetu wakushimwina hatooka, twafwilaña kushinjila nikuhosha munjila yayiwahi. Neyi twilaña mwenimu, dikwila nawu tunakulondela mwatufumbiliyi Pawulu nindi ‘twalekenuhu kusha muchima kukutañisha.’
[Mwevulu wudi hefu 30]
Ntañishilu yaPawulu yadiña yatiyakana, yapela, nawa yayiwahi
[Mwevulu wudi hefu 31]
Twamwimbujolaña Pawulu kuhitila mukwakamena antu itwashimwinaña