Antu Ejima Anayitambiki!

ANAYITAMBIKI kudihi? Anayitambiki kwendela kasanji kamutayi kawaYinsahu jaYehova, katenañawu nawu Beteli. Tukweti jiBeteli 118 mumatuña ashiyashana. Enyi ayaña nakutala awa maluña, ahamekaña nankashi hakumona nyidimu yazatañawu haBeteli.

Hanyima yakumona ankoñi amavulu adikita amukalakelaña Yehova namuzañalu hakasanji kamutayi mwituña daMexico, kansi wumu, kadizi waBayibolu wazañaleli nankashi chakwila wenhwili nindi: “Nukwila ñahi kulonda nitweshi kushakama nikuzatila hanu?” Amulejeli nawu: “Chatachi, watela kupapatishewa. Kufumahu, chikuwaha neyi wikala payiniya, mukwakushimwina Wanta wampinji yejima.” Iwu mukwenzi welili mwejima mwamulejeluwu, chimwahitili yaaka yiyedi amutambikili kuya nakuzatila haBeteli mwituña daMexico, nawa nazatiluhu yaaka 20.

Indi Beteli hiChumanyi?

Mwidimi dachiHeberu, Izu dakwila nawu “Beteli” dalumbuluka nawu “Itala daNzambi.” (Kutach. 28:19, ftn.) Awa matala ekala hatusanji twanyitayi twashiyashana apulintilañamu nikutwala maBayibolu ninyikanda yashindamena haBayibolu nikukwasha yipompelu yakubadika ha 100,000 yawaYinsahu jaYehova kuspiritu mukaayi kejima. Kwakwihi nawankoñi ahaBeteli 20,000, amayala niambanda afuma kuyisemwa niyitachi yashiyashana, adihana kukalakela Yehova niamana kwawu niahela akuspiritu mpinji yejima. Amana kwetu niahela anazati yaaka yayivulu muniwu mudimu wawakwaKristu azatilaña hamu nawatwansi achidi nañovu. Nampinji yamelela nikunsa yamulungu, amana kwetu amuchisaka chaBeteli adiluñishaña kudikunda nayipompelu yawaYinsahu jaYehova yekala kwakwihi nikukalakala mumudimu wawakwaKristu. Azatishaña cheñi mpinji yawu kudiza Bayibolu, kuhema, nikuzata nyidimu yawu.

Amana kwetu amuchisaka chaBeteli atambulaña kadisheleñi kantesha hakakweji. Adyaña yakudya yayiwahi nawa ashakamaña mutupeka twatuwahi twawunyonji. Nyikala yaBeteli bayi neyi yekala neyi matala amapumwinu asweja wuseyaku. Ilaña, himatala amawahi nankashi. Enyi hiyahizumukaña hohu nalubanji lwamatala nilubanza ninzatilu yayiwahuku, ilaña ahizumukaña nayililu yayiwahi nikutiyañana kwekala haBeteli. Muntu wejima wazataña nañovu, nawa ejima ekala nachisambu. MuBeteli antu hiyakweti chaambu chanyuza hela kudinyamuna muloña wamudimu wazatañawuku. Nyidimu yejima yalema, hela himudimu wawunyonji, hela wakuzatila hanji, kuteleka, hela kuzatila mukapeka mwapulintilañawu nyikanda  hela mukasanji. AkaBeteli, neyi chayitenañawu ankoñi ahaBeteli, azatilaña hamu nakutwala hambidi mudimu wakushimwina wawaYinsahu jaYehova.—Kol. 3:23.

Tiyenu Chahosheli akaBeteli Amakwawu

Tusambilenu kutiya chahosheluwu akaBeteli amakwawu ekala munichi chisaka chamukaayi kejima. Chumanyi chayisañumwini ekali nampwila yakuzatila haBeteli? Tiyenu chahosheliyi Mario. Hampinji yekaliliyi Chinsahu chaYehova, Mario wazatileña mudimu wamali amavulu nankashi hakampani yeneni chikupu yakuGerman yatuñaña nyotoka nawa wadiñi nakukooleka kwakwikala ihandu. Hashimbwili wanyi kufuma hamupapatishiluwu, Mario wadiheni kuya nakuzatila haBeteli yamwituña dindi hadi mulungu wumu. Amwinkeli mudimu wakuzatila mwapulintilañawu nyikanda. Mario wamweni chaambu cheneni hadi ankoñi ahaBeteli azatileñayi nawu nawakwawu ahakampani kwazatileñayi. Dichi wasonekeli mukanda nakwihula mudimu wampinji yejima wahaBeteli. Hela chakwila antaña jindi nialundanindi amuseheli hachuma chafuukwiliyi, chayinu mpinji Mario wudi namuzañalu wakuzatila haBeteli muGermany.

Antu amavulu ayaña nakuzatila haBeteli hiyataña shikola yahewulu hela kudiza nyidimuku. Ichi dichadiyi Abel wunazati haBeteli muMexico hadi yaaka 15. Wahosheli nindi, “Beteli yinandizishi yuma yayivulu nankashi. Nadizi nankashi kuzatisha makina akupulintilaku nyikanda anakutuñawu makonu nawa akala. Neluki nami nadizi yuma yayivulu, neyi nifuma haBeteli, nateli kukwataña mali amavulu, ilaña hinateli kwikala nayuma yinikweti chayinu mpinjiku yuma yidi neyi kuwunda, chihandilu chachiwahi chakadi kwakamena nikudibecha kudi munyidimu yayivulu yakuselujola. Neluki chikupu nami anandizishi shikola yayiwahi nankashi, shikola yinankwashi kupama kuspiritu nikwikala namaana. Neyi nayili kushikola yabadika yamuñoñi nadi kufuntaku makasa munshiñu chakadi yumiyi.”

Neyi Mwendela haBeteli Mwakahetelamu Nankashi

Neyi muntu yendela haBeteli wubwambu windi naNzambi wunateli kukolelaku. Dichuma chazatikili kudi Omar, wakwituña daMexico. Amama yindi amudizishili chalala  chamuBayibolu. Ilaña chashikijiliyi yaaka 17, Omar walekeli kuyaña kukupompa kwawakwaKristu nikushimwina. Wadiñijili muyuma yatama nikufwila maheta. Mukuhita kwampinji, chazatilileñayi hakampani yajinshiña, Omar wadiñi hakachi kawantu atemesheluwu kuBeteli muMexico kulonda kuyidizisha chakuzatisha yozelu. Omar wahosheli nindi: “Chitwamanishili mudimu wejima to-o, amayala atutambikili atuhitañeshelumu nakutala mukala wejima. Yuma yinamweni nichanlemesheleñawu chanletesheli kushakama hamaseki nakutoñojoka hachihandilu chami, chakumufutalela Yehova. Neyi mukulabula kwadisu, natachikili cheñi kupompa nikudiza Bayibolu. Chimwahitili tukweji tutanu nakamu kufuma hinayili kuBeteli, napapatisheweli. Namusakililaña Yehova muloña hampinji yinendeleli haBeteli chankolesheli nankashi.”

Masahiko, wakuJapan, niyena wakulilili muchisaka chawaYinsahu. Ilaña, watachikili kutoñojoka nindi chihandilu chawakwaKristu chakala nankashi. Dichi weñijili mutu nankashi muyisela yakushikola nawa walekeli kupompa nikuya mumudimu wakushimwina. Masahiko wahosheli nindi: “Ifuku dimu chisaka chetu nialunda netu antesha akwaKristu afuukwiluhu kwendela haBeteli. Anami nawa nayili muloña chisaka chami chankanjikijili. Chelili tunamoni dehi yuma yejima haBeteli, nazañaleli nankashi. Muzañalu wunatiyili hakuhanjeka nawakwaKristu chitwayili kuBeteli kanda niwutiyeñahu dehi hakudikunda nawakwetu akwituña. Mpwila yakukeña chihandilu chachiwahi chawakwaKristu yatandili mudami nawa nafuukwiluhu kutachika kudiza Bayibolu.” Chayinu mpinji, Masahiko hinkoñi wampinji yejima muchipompelu mwekalayi.

Chinsahu wakwituña daFrance wayili nakuzatila kwituña daMoscow. Chashikiliyi kuna, walekeli kudikunda nawantu jaYehova nawa wazeyeli kuspiritu. Watachikili kuluwalala nawa mukuhita kwampinji wasumbukili namuntu wabula kwikala Chinsahu. Muhela wumu Chinsahu wenjili kufuma kuFrance nakumutala, nawa ayili hamu kuSt. Petersburg, Russia, nakutala haBeteli. Wasonekeli nindi: “Chitwashikili haBeteli atutambwilili chachiwahi, nawa chumichi chanhizumwishili. Hiiluña dawunda nankashi. Spiritu yaYehova yatentamini mumuchima wami. Chumanyi chaletesheli nawu nifumi mukuloñesha kwaYehova? Hanyima yakwendela haBeteli, nalombeli kudi Yehova nami yankwashuku nawa natachikili kudizisha anyanami Bayibolu nampwila yayeni.” Kubombela hawukwashu wakuspiritu watambwililiyi iwu wadiñi Chinsahu wazeya, wahetelelumu nankashi mukwendela haBeteli nawa wapamininuku chikupu kuspiritu.

Indi antu abula kwiluka aYinsahu jaYehova niwena atiyaña ñahi neyi endela haBeteli? Mu 1988, Alberto, wadiñijili chikupu munsañu japolitiki, wayili nakutala haBeteli mwituña daBrazil. Wunyonji nintanjikilu yayiwahi, sweje-e dinu nyidimu yazatileñawu hatooka yamutiyishili kuwaha nankashi. Henohu kanda yendeli haBeteli, Alberto wayili kushikola kwazatilaña ishaku dindi weyala mudimu wawukapristu. Alberto wamweni nindi hadiña chaambu cheneni. Alberto wahosheli nindi, “Yuma yejima yelileñawu haniyi shikola yadiña yakusweka-sweka hohu.” Hashimbwili wanyi kufuma hendeleliyi haBeteli, watachikili kudiza Bayibolu, walekeli jipolitiki, chayinu mpinji hieluda muchipompelu.

Mwakenzi Nakutala haBeteli!

Antu amavulu azataña nañovu kulonda kwendela kasanji kamutayi kamwituña dawu. Chakutalilahu, mwituña daBrazil, Paulo niEugenia ahembeli mali hadi yaaka yiwana akwendela hadi mafuku ayedi, lwendu lwajikilomita 3,000 nabasi kuya nakwendela haBeteli yamudina ituña. Ahosheli nawu: “Mali etu hiyayili mumenjuku. Ichi tuneluki chikupu chazatikaña kuloñesha kwaYehova. Neyi hitukulumbwilila atudizi etu aBayibolu mudimu wazatañawu haBeteli, mpinji jikwawu ehulaña nawu, ‘Enu mwayaku dehi?’ Ichi twetejaña netu twayaku dehi.”

Kwiji mwituña denu hela kumwashakamina kwekala kasanji kamutayi hela itala daBeteli? Mwani tunayitambiki netu mwakayi nakwendelahu. Akayitambwila chachiwahi nawa mwamba kahetelamu chikupu kuspiritu neyi mwendela haBeteli.

[Mwevulu wudi hefu 18]

Mario

[Mwevulu wudi hefu 18]

Abel

[Mwevulu wudi hefu 18]

Germany

[Mwevulu wudi hefu 18]

Japan

[Mwevulu wudi hefu 18]

Brazil