Ifutu Danyiloña Chidatupulwishaña
Ifutu Danyiloña Chidatupulwishaña
“Muntu wukukuhwelela Mwana wukweti wumi wahaya nyaka; hakwila muntu wabulaña kwovwahila Mwana hakamona wumuku, kuzuwa kwaNzambi kwashakama hadi yena.”—YOW. 3:36.
1, 2. Muloñanyi wumu wasonekeleluwu magazini yaZion’s Watch Tower?
“NEYI muntu yadizaña Bayibolu chikupu, wukumona kulema kwakufwa kwaKristu,” ichi dichi chahosheli chibaaba chamuchiwana chamagazini yakunyima yamuOctober 1879. Ichi chibaaba chakunkulwili chikupu nawu: “Twatela kutondolwela chuma chidi chejima chatela kumwekesha nawu kufwa kwaKristu himulambu hela hiifutu danyiloñaku.”—Tañenu 1 Yowanu 2:1, 2.
2 Chuma chimu hakachi kayuma yasonekeleluwu magazini yaZion’s Watch Tower yatachikili kusonekawu muJuly 1879, chadiña chakuhakwilaku ntañishilu yamuBayibolu yahosha hefutu danyiloña. Nsañu yasonekeluwu muniyi magazini yadiña ‘yakudya yahampinji yatelela,’ muloña kukukuma kwayaaka 1800, antu amavulu aditeneneña nawu hiyakwaKristu atachikili kujinooka nawu kufwa kwaYesu hikunateli kutukuula kunshiduku. (Mat. 24:45) Hayina mpinji, antu amavulu atachikili kukuhwelela muntañishilu yakwila nawu yuma yadileñeli yayeni, ntañishilu yeniyi yaditadikishaña nansañu yalala yakwila nawu muntu wakañanya kutwalekahu kwikala wawanina. Antu akuhwelela nawu yuma yadileñeli yayeni atañishaña nawu muntu wayilañaku hambidi yomweni nawa hakeñekaña ifutu danyiloñaku. Dihafumini kapostolu Pawulu kumufumba Timotewu nindi: “Hembaku lushiiku lwakushiikiluwu; futalelaku kubobola kwakadi kujila, nintadi jamaana, ijina damaana dakutwamba; amakwawu anetejumu anasenuki mukwitiya kwakukuhwelela.”—1 Tim. 6:20, 21.
3. Malwihwinyi itukuhanjekahu?
3 Chakadi nikujina, munakufwila nenu ‘mubuli kusenuka mukwitiya kwakukuhwelela.’ Dichi hakwila nawu mukolesha chikuhwelelu chenu, mwatela kutoñojoka hanawa malwihu: Muloñadi chinakukeñela ifutu danyiloña? Indi Yehova niYesu adihanini ñahi hakuhana ifutu danyiloña? Nateli kuhetelamu ñahi muniwu mulambu walema wunateli kumpulwisha kukuzuwa kwaNzambi?
Anateli Kutupulwisha Kukuzuwa kwaNzambi
4, 5. Chumanyi chinakumwekesha nawu kuzuwa kwaNzambi kuchidi hakanu kaayi katama?
4 Bayibolu ninsañu yanyaka yawantu yamwekeshaña nawu kufuma tuhu havulumwiniyi Adama, kuzuwa kwaNzambi ‘kuchidi’ hadi antu. (Yow. 3:36) Chumichi chamwekenaña munjila yakwila nawu antu ejima afwaña. Chiyuulu chaSatana chazuñishaña chinakañanyi chikupu kukiña antu kuyihuñu yinakutwalekahu, nawa kwosi nfulumendi yawantu yinatweshi kwinka antu ejima yuma yakankilañawu. (1 Yow. 5:19) Dichi antu anatwelekuhu kuyanda nanjita, wubanji ninzala yakapwelendendi.
5 Eñañi, Yehova hanakukiswila kanu kaayi katamaku. Pawulu wahosheli nindi, “Kuzuwa kwaNzambi kunamwekani kwiwulu, kwakuzuwila kasekesha kakusekesha Nzambi kejima.” (Rom. 1:18-20) Dichi, antu atwalekañahu kwila yuma yamuneñeshaña Nzambi chakadi kubalumuka mumuchima, akamona ikezeñi. Makonu, kuzuwa kwaNzambi anakukwishimuna munsañu yawunsompeshi yinakusukwilawu hakaayi kaSatana neyi yipupu, nawa nsañu yeniyi ayisonekaña munyikanda yashindamena haBayibolu.—Chim. 16:1.
6, 7. Mudimwinyi wunakulombolawu akwaKristu awayishewa, nawa kukooleka kwamuchidinyi kuchidi kwenzunuka kudi antu amukaayi kaSatana?
6 Komana chinatalishi mukwila nawu antu hiyanateli kufuma kuchiyuulu chaSatana nakufunta kudi Nzambuku? Inehi, muloña chisu chakufunta kudi Yehova chichidi chenzunuka. AkwaKristu awayishewa, ‘atuñanda twaKristu,’ anakulombola mudimu wakushimwina kudi antu ejima nawa antu akunyuza yejima anayitambiki ‘kufunta kudi Nzambi.’—2 Kor. 5:20, 21.
7 Kapostolu Pawulu wahosheli nindi, Yesu “watupulwishaña kukuzuwa kwamba kenza.” (1 Tesa. 1:10) Yehova chamba kazuwayi kakukumishaku, wakajilumuna haya nyaka akwanshidi abulaña kubalumuka mumuchima. (2 Tesa. 1:6-9) Hanu dinu anyi akapuluka? Bayibolu yahosha nawu: “Muntu wukukuhwelela Mwana wukweti wumi wahaya nyaka; hakwila muntu wabulaña kwovwahila Mwana hakamona wumuku, kuzuwa kwaNzambi kwashakama hadi yena.” (Yow. 3:36) Eñani, antu ejima amomi nawa anakukuhwelela mudi Yesu nimwifutu danyiloña, hampinji yakakuma kanu kaayi, hiyakayijilumuna hefuku dakuzuwa kwaNzambi kwakukumishakuku.
Mudimu Wazataña Ifutu daNyiloña
8. (a) Yumanyi yayiwahi yadi kudiluñishawu Adama naEvu kumbidi? (b) Indi Yehova wamwekesheli ñahi nindi hiNzambi wawuñaji waloña?
8 Adama naEvu ayileñeli awanina. Neyi atwalekeluhu kumwovwahila Nzambi, mutenowu chiña iseki denzala nawanyanawu amuzañalu, anakushakama nawu hamu muParadisa. Chawushona, anvwali jetu atachi afumpili nshimbi jaNzambi mumushikila. Chafuminumu, ayilejeli nawu mwakafwa haya nyaka nawa ayihañili muParadisa yatachi. Hampinji yavwaliluwu Adama naEvu anyana, nshidi yadiña dehi mudi antu, nawa nkumininaku iyala watachi nimumbanda ashinakajili nawa afwili. Ichi chamwekeshaña nawu Yehova washikijaña mwahoshañayi. Kubombelahu, hiNzambi wawuñanji waloña. Yehova wamulejeli Adama nindi neyi wudya kumukabu wunakanisha wakafwa—nawa mwalala wafwili.
9, 10. (a) Muloñadi chafwilañawu anyana kaAdama? (b) Munjilanyi mutwatela kupulukila kufwa kwahaya nyaka?
9 Hakwikala anyana kaAdama, twaswana nyijimba yakadi kuwanina yavulumunaña nawa yafwaña. Hampinji yavulumwiniyi Adama, twadiña mwivumu dindi. Dimuloña wutwafwilaña. Neyi Yehova yafumishahu kufwa chakadi kuhana mulambu, hanateli kushikija mwahoshañayiku. Dichi, Pawulu watuhosheleluku wonsu wetu nindi: “Tweluka netu nshimbi jineli jawuspiritu, ilaña ami nindi wachisemwa chaheseki, alanda dehi kuwunduñu wanshidi. Ami nshona! O kukala kunamonaña! Wukuñamwina kumujimbiwu wakufwa, hinyi?”—Rom. 7:14, 24.
10 Yehova Nzambi hohu diyi wateleli kuhana nshimbi yakwanakena nshidi jetu nikutukuula kukufwa kwahaya nyaka. Wakoñeli mwenimu kuhitila mukuhana Mwanindi akeñayi kufuma mwiwulu nakwinza nakuvwalika neyi muntu wawanina, nikuhana wumi windi neyi ifutu danyiloña yetu. Kwambukaku naAdama, Yesu watwalekeluhu kwikala wawanina. Mwalala “havulumwinuku.” (1 Pet. 2:22) Yesu wadiña nañovu yakwikala nachisaka chawantu awanina. Ilaña wetejeli ayilumbu jaNzambi amujahi kulonda yakatambuli anyana kaAdama abula kuwanina nakukwasha amukuhwelela akatambwili wumi wahaya nyaka. Nsona yalumbulula nawu: “Kwekala Nzambi wumu, niihaku wumu mukachi kaNzambi nawantu, yena himuntu, yowu Kristu Yesu, wadiheni wakukuula nachu antu ejima.”—1 Tim. 2:5, 6.
11. (a) Tunateli kulumbulula ñahi kulema kwefutu danyiloña? (b) Indi ifutu danyiloña datuheteshaña ñahi?
11 Mudimu wazataña ifutu danyiloña twatela kuwulumbulula kuhitila muchakutalilahu chamuntu wunadyiluwu mali kudi muntu wenkeliyi kuhemba. Muntu wahembeleña mali anamukwati nakumukasa mukaleya. Chumanyi chikumwekana kudi mwini mali? Hamuloña wakwila anamushiyi muwuzweñi, hakutwesha kumanisha kukala kwinduku chiña neyi muntu waheta waluwi yamukwashaku nakumufuntishila malindi ejima. Munjila yoyimu, Yehova Nzambi niMwanindi wakeñayi alandili anyana kaAdama nakufuta mukudi wawu wanshidi kushindamena hamashi aYesu apwekeli. Dihafumini Yowanu Mpapatishu kuhosha hadi Yesu nindi: “Talenu Mwana kamukoku waNzambi, mukwakufumisha nshidi yawantu ampata yamunu mwishina.” (Yow. 1:29) Bayi neyi antu amukaayi amomi diwu afumishawu hohu kunshidiku, ilaña niafu.
Yehova niYesu Adihanini Hakuhana Ifutu daNyiloña
12, 13. Chumanyi chitukudizila kudi Abarahama wadihanini kulambula mwanindi Isaka?
12 Chatukalilaña kwiluka chikupu chadihaniniyi Tata yetu wamwiwulu niMwanindi wakeñayi hakuhana ifutu danyiloña. Ilaña Bayibolu yashimunaña yakutalilahu yinateli kutukwasha kutoñojoka chikupu haniyi nsañu. Chakutalilahu, toñojokenu chatiyiliyi Abarahama chendeliyi lwendu lwamafuku asatu nakuya kwituña daMoriya kulonda kwovwahila mwamulejeluwu kudi Nzambi nindi: “Tambulaku mwaneyi, weyi wumu hohu wakeña, yowu Isaka, wuyi mwituña dakuMoriya, kwenoku kudi mpidi yimu yinakakuleja, wakamulambuli Nzambi akeli mulambu wakushita.”—Kutach. 22:2-4.
13 Nkumininaku, Abarahama washikili kwiluña damulejeluwu. Toñojokenu chichamukatili kumuchima hakumukasa Isaka kumakasa nikunyendu nikumukaamika hakameña katuñiliyi Abarahama yomweni. Chatela chamukatili Abarahama kumuchima chikupu hakunyamuna mpoku yakeñeleñayi nindi yamujahi nachu mwanindi! Toñojokenu chatiyiliyi Isaka chakaminiyi hakameña, nakuhembelela nindi amuketuli hanshiñu kulonda yafwi. Kañelu kaYehova kamulekesheli Abarahama cheliliyi nindi yamujahi. Chuma chakoñeliyi Abarahama niIsaka hayina mpinji, chatukwashaña kwiluka chatiyiliyi Yehova hakwiteja Mwanindi amujahi kudi antu jaSatana. Kwovwahila kwaIsaka kudi Abarahama kwamwekeshaña Yesu chadihaniniyi mukudikeñela kulonda kwinza nakukabakana nikutufwila.—Heb. 11:17-19.
14. Chumanyi chamwekeni muchihandilu chaYakoba chatukwashaña kwiluka chatiyiliyi Nzambi niYesu hakuhana ifutu danyiloña?
14 Chatiyiliyi Nzambi niMwanindi hakuhana ifutu danyiloña anachilumbululi cheñi kuhitila muchuma chamwekeni muchihandilu chaYakoba. Hadi anyanindi ejima, Yakoba waswejeli kukeña Yosefu. Chawushona, amana kwaYosefu amutiyilili ichima nawa amuheleli. Ilaña, Yosefu wetejeli kumutuma kudi tata yindi kulonda kuya nakutala chahandileñawu amana kwindi. Haniyi mpinji, abiñileña nyikoku yaYakoba nawa kufuma kumukala wawu wakukabeta kaluwunda kuHeberoni nakuya kwadiñawu hadiña makilomita 100. Toñojokenu chatiyiliyi Yakoba chamweniyi anyanindi anafunti nachikovwelu chaYosefu chakuputa mumashi. Wahosheli nindi, “Dichi chikovwelu chamwanami! Chisuma namudyi! Yosefu chalala amutabola dehi!” Chumichi chamuneñesheli Yakoba, nawa wamudilili Yosefu hadi mafuku amavulu. (Kutach. 37:33, 34) Yehova hakoñaña yuma neyi chelañawu antu abula kuwaninaku. Ilaña, kutoñojoka hayuma yamwekeni muchihandilu chaYakoba yikutukwasha kwiluka chatiyiliyi Nzambi chelili Mwanindi akeñayi amuyandishi nikumujaha munjila yatama hampinji yadiñayi hanu hamaseki.
Chitwahetelaña Mwifutu daNyiloña
15, 16. (a) Indi Yehova wamwekesheli ñahi nindi wetejeli mulambu wefutu danyiloña? (b) Munahetelumu ñahi mumulambu wefutu danyiloña?
15 Yehova Nzambi wamusañwili Mwanindi washinshika namujimba wakuspiritu. (1 Pet. 3:18) Yesu asañwiluwu wamwekeni kudi atumbanji twindi hadi mafuku 40, nawa wayikolesheli nikuyileja mudimu weneni wadiña hambidi yawu. Kuhiñahu, wayili mwiwulu. Mwiwulu waheni kudi Nzambi mulambu wamashi indi apwekeli, akakuulawu nachu atumbanji twindi alala, akuhwelela mumulambu wefutu danyiloña. Yehova Nzambi wetejeli mulambu waKristu kuhitila mukumwinka Yesu mudimu wakwichila spiritu yajila hadi atumbanji twindi apompeleli muYerusalema hefuku daPentakosta 33 C.E.—Yil. 2:33.
16 Awa atumbanji twaKristu awayishewa hohenahana atachikili kusoñamisha akwawu kulonda apuluki kuzuwa kwaNzambi kuhitila mukupapatishewa mwijina daYesu Kristu kulonda ayanakeni nshidi jawu. (Tañenu Yililu 2:38-40.) Kufuma tuhu hadina ifuku, yihita yawantu akunyunza yejima anakwati wubwambu naYehova kuhitila mukukuhwelela mumulambu wefutu danyiloña daYesu. (Yow. 6:44) Chayinu mpinji, twatela kushinshika hamalwihu amakwawu ayedi akwila nawu: Komana atwinka kuchiñeja kwawumi wahaya nyaka hamuloña wanyidimu yetu yayiwahi? Chineli twatambwila iku kuchiñeja kwakuwahi, muloñadi wutwatela kukwata iku kuchiñeja namakasa ayedi?
17. Mwatela kumona ñahi kukooleka kwakwikala ibwambu daNzambi?
17 Ifutu danyiloña hidatutelelaku. Ilaña kuhitila mukukuhwelela mwifutu, yihita yawantu makonu anakwati wubwambu naNzambi, nawa anakuchiñeja kutambwila wumi wahaya nyaka hamaseki muparadisa. Hela chochu, kwikala hohu ibwambu daYehova hikwatalisha mukwila nawu tunateli kutwalekahu kwikala nawubwambu nayenaku. Hakwila nawu tukapuluki mwifuku dakuzuwa kwaNzambi kudi kumbidi, chiña tutwalekahu kuhameka chikupu ‘kukuula kwahanini Kristu Yesu.’—Rom. 3:24; tañenu Afwilipi 2:12.
Twalekenuhu Kukuhwelela Mwifutu daNyiloña
18. Indi kukuhwelela ifutu danyiloña kwabombelamu yumanyi?
18 Nsona yamutu wachinu chibaaba, Yowanu 3:36, yinakumwekesha nawu kukuhwelela mudi Mwanta Yesu Kristu kwabombelamu kumwovwahila. Kuhameka ifutu danyiloña kwatela kutusañumuna kulondela ntañishilu yaYesu muchihandilu chetu, kushilahu niyuma yatañishiliyi kutalisha hakwikala nayililu yayiwahi. (Maku 7:21-23) ‘Kuzuwa kwaNzambi kunakwinza’ hadi antu ejima akoñaña wuvumbi, kuseñula, ‘niwuzondu wamumuchima wejima,’ kubombelahu niantu atwalekañahu kutala nyevulu yanzekesi.—Efwes. 5:3-6.
19. Munjilanyi jajiwahi mutwatela kumwekeshela chikuhwelelu mwifutu danyiloña?
19 Kuhameka ifutu danyiloña kwatela kutuleñela kudikita chikupu ‘nyidimu yakujila nakwakama Nzambi.’ (2 Pet. 3:11) Twikaleña nampinji yayiwahi yakulombaña chikupu mpinji yejima, kudizaña Bayibolu, kuyaña nakupompa, kwikalaña nakudifukula kwachisaka, nikudikita mumudimu wakushimwina Wanta. Hakwinza “kwila yuma yayiwahi nikudyañana bayi muchivulamenaku; muloña Nzambi watiyaña kuwaha nanyilambu yidi chochochu.”—Heb. 13:15, 16.
20. Antu ejima atwalekañahu kukuhwelela mwifutu danyiloña anateli kukuhwelela nkiswinyi yakumbidi?
20 Kuzuwa kwaYehova chikwakashikena hakanu kaayi katama, twakekala amuzañalu hakwiluka netu twakuhwelela mwifutu danyiloña nawa tunatwalekuhu kuhameka ifutu danyiloña! Mwituña daNzambi dadiha datukanayi, tukahamekaña idi ifutu danyiloña haya nyaka muloña datupulwisha kukuzuwa kwaNzambi.—Tañenu Yowanu 3:16; Chimwekeshu 7:9, 10, 13, 14.
Mukwakula Nenudi?
• Muloñadi chitwakeñelaña ifutu danyiloña?
• Indi Yehova niYesu atiyili ñahi hakuhana ifutu danyiloña?
• Yumanyi yitwahetelaña mwifutu danyiloña?
• Twamwekeshaña ñahi kukuhwelela mumulambu wefutu danyiloña daYesu?
[Malwihu aKuzatisha haKudiza]
[Mwevulu wudi hefu 13]
Chinsu chakufunta kudi Yehova chichidi chenzunuka
[Nyevulu yidi hefu15]
Kutoñojoka hayuma yamwekeneni Abarahama, Isaka, niYakoba kunateli kutukwasha kwiluka chikupu chatiyiliyi Yehova niYesu hakuhana ifutu danyiloña