Malwihu Kufuma Kudi Antañi

Muloñadi Yesu chamulejeleliyi mumbanda elukiluwu nawu mukwanshidi nindi nyiloña yeyi anakwanakeniyi?—Luka 7:37, 48.

Hampinji yashakaminiyi Yesu nakudya mwitala dakaFwarisi wejina daShimona, mumbanda ‘wemeni kunyendu yaYesu kunyima.’ Wazowesheli nyendu yaYesu namadilu indi, nawa wakombweli madilu nansuki jakumutu windi. Kuhiñahu wapwepujoleli kunyendu yindi nakuwayishaku malasha. Nsañu Yayiwahi yahosha nawu, iwu mumbanda ‘amwilukili nawu wadiña mukwanshidi.’ Hela chochu, muntu wejima wabula kuwanina himukwanshidi, ilaña Nsona yavula kuzatisha idi izu hakutena muntu elukawu nawu wakoñaña yuma yatama hela wukweti chaaku chakuvulumuna. Chakadi nikujina iwu mumbanda wadiña chivumbi. Dichi Yesu wahosheli kudi mumbanda yeniwu nindi: “Nyiloña yeyi anakwanakeniyi.” (Luka 7:36-38, 48) Indi Yesu watalishili mudihi hakuhosha awa mazu? Chineli ifutu danyiloña dadiña kanda adihani, indi nyiloña yindi adi kuyanakena ñahi?

Chelili mumbanda naweleshi dehi nyendu yaYesu nikuyiwayisha, iku kanda amwanakeni, Yesu wazatishili chishimu kulonda kulumbulula chikuma chalema kudi muntu wamutambwilili wejina daShimona. Hakwesekeja nshidi namukudi weneni wakukañanya kufweta, Yesu wamulejeli Shimona nindi: “Kwadiñi akwanyikudi ayedi adiili yambala yamukwakusondamisha wumu; iwu wadiili mukudi wamakulakaji amali atanu, mukwawu wamakumi atanu. Mwayedi wawu chanakañanyuwu jakufuta, hakuyanakena tuhu kwindi. Wukubadika kumukeña nankashi wumwodihi?” Shimona wakwili nindi: “Natoñojoki nami owu aanakeneniyi yayivulu.” Yesu hakumwakula nindi: “Wunahoshi mwalala.” (Luka 7:41-43) Wonsu wetu tukweti mukudi wakumwovwahila Nzambi, dichi neyi tubula kumwovwahila nawa tukoña nshidi, dikwila nawu tunakañanyi kumufweta Nzambi yuma yatelela. Dichi twekalaña nanyikudi yayivulu. Hela chochu, Yehova wudi neyi mukwakusondamisha wanakenaña akañanyaña kufweta nyikudi. Dimuloña waleñeleli Yesu kukolesha atumbanji twindi kulomba kudi Nzambi nawu: “Twanakeni nyikudi yetu, neyi chitunaanakeni akweti nyikudi nanetu.” (Mat. 6:12) HaLuka 11:4 iyi nyikudi ayilumbulula nawu hinshidi.

Indi kumpinji yakunyima Nzambi wadiña nakwanakena nshidi kuhitila mudinyi? Kwesekeja nawuñanji windi waloña muntu wukuvulumuna chiña amujaha. Dichi, Adama wajimbesheli wumi windi hamuloña wakuvulumuna. Hela chochu, muNshimbi yaNzambi yalejeluwu munza waIsarela, mukwanshidi adiña nakumwanakena kuhitila mukulambula kanyama kudi Yehova. Kapostolu Pawulu wasonekeli nindi: “Mwaya nshimbi hanashali hanti nakutookesha yuma yejima namashi. Chakadi kupwekesha mashi kwosi kwanakenaku.” (Heb. 9:22) Kwosi njila yikwawu yelukiluwu aYudeya yakutambwilamu kwanakena kufuma kudi Nzambi. Komana, dichaleñeleli antu amumafuku aYesu kukaana mazu ahosheliyi kudi ona mumbanda. Antu ashakamini nakudya naYesu hamesa atachikili kuhosha munyichima yawu nawu: “Iwu muntu wukwanakena antu nyiloña, diyinyi?” (Luka 7:49) Indi nshidi janiwu mumbanda mukwanshidi, atela kujanakena kuhitila mudinyi?

Wuprofwetu watachi washimwinuwu hanyima yakudikaña kwawantu adisumbula atachi, wahosha hakufuukula kwaYehova kwakuleta ‘lubutu’ lwakachikawu kukatutu kudi Satana ‘nilubutu’ lwindi. (Kutach. 3:15) Yesu amuchikili kukatutu hampinji yamujahiluwu kudi ayilumbu jaNzambi. (Ŋal. 3:13, 16) Mashi aKristu apwekesheluwu diwu mulambu wahaninuwu wakukuula antu kunshidi nikukufwa. Chineli kwosi chuma chatela kumukañesha Yehova kushikija kufuukula kwindi, hampinji yahosheluwu mazu ekala haKutachika 3:15, kwesekeja nachamonañayi Nzambi chochimu nakwila nawu mulambu waYesu wadiña awuhana dehi. Dichi watwesheli kwanakena antu akuhweleli muyikaninu yindi.

 Kumpinji yakunyima henohu kanda kwikali akwaKristu, Yehova wateneni antu antesha nindi aloña. Hakachi kanawa antu hadiña Enoki, Nowa, Abarahama, Rahaba, niYoba. Achiñejeli kushikijewa kwayikaninu yaNzambi hamuloña wachikuhwelelu. Kambanji Yakoba wasonekeli nindi: “Abarahama wamwitiyili Nzambi, amufuukwililichu nawu hikuloña.” Kutalisha kudi Rahaba, Yakoba wahosheli nindi: “Mwomumu nichivumbi Rahaba nawa waloñeli nanyidimu.”—Yak. 2:21-25.

Mwanta Davidi wamuIsarela wakushankulu wavulumwini nshidi jamaneni, ilaña wadiña nachikuhwelelu chakola mudi Nzambi walala nawa wamwekesheli chikupu kubalumuka mumuchima mpinji yejima yavulumwiniyi. Kubombelahu, Nsona yahosha nawu: “Yenowu Nzambi wamutoñweli yena [Yesu] kwikala itanda daluwi namashi indi hakukuhwelela, kulonda kumwekesha kuloña kwindi, chadiwiliyi Nzambi nyiloña yavulumwinuwu dehi chachikulu, nawushona windi; amwekeshi kuloña kwindi hamafuku anu; kulonda yomweni ekali waloña, ekali nawa mukwakubalumuna muntu wukukuhwelela Yesu kwikala waloña.” (Rom. 3:25, 26) Kushindamena hamulambu wefutu danyiloña daYesu wadiña kanda awuhani, Yehova wanakeneni nshidi yaDavidi chakadi kuheñesha wuñanji Windi.

Eñañi, ichi chinesekani nachuma chamumwekeneni mumbanda wawayishili nyendu yaYesu. Wadiña chiluwañimbi, ilaña wabalumukili mumuchima. Welukili kulema kwakumukuula kunshidi nawa muyililu yindi wamwekesheli nindi wahamekeli chikupu muntu wahaniniyi Yehova kulonda amukuuli. Hela chakwila mulambu adiña kanda awuhani, wuna mulambu wadiña walala chikupu nawa kulema kwaniwu mulambu adiña atachika dehi kuwuzatisha kudi antu adi neyi ona mumbanda. Dichi, Yesu wamulejeli nindi: “Nyiloña yeyi anakwanakeniyi.”

Neyi chinamwekeshi chikupu iyi nsañu, Yesu hadiña nakuhaña akwanshidiku. Wayilileña kakawahi. Kubombelahu, Yehova wakeñaña kwanakena akwanshidi abalumukaña mumuchima. Chumichi chatuzañaleshaña nikutukolesha chikupu etu antu abula kuwanina!

[Mwevulu wudi hefu 7]

Ayiteneni nawu aloña