Muloñadi Chitwatela Kuhembela Mpinji

KUHEMBA mpinji, hela kushika mumpinji, kwakala. Yuma yaleñelaña kuhemba mpinji kwikaleña kwakala hikwenda maluña amalehi, kuhita munyikwakwa munadichinyi nyotoka, ninyidimu yayivulu. Ilaña, kubula kulaba kwalema nankashi. Chakutalilahu, muntu wahembaña mpinji kumudimu amukuhwelelaña nawa amumonaña nawu wadikita. Ilaña, sakulaba waluwañeshaña nyidimu yawakwawu ninzatilu ninyidimu. Kulaba kunateli kuleñela mukashikola kushalahu yuma yikwawu yinakudizawu nawa kunateli kumukañesha kuyilaku hambidi. Neyi mulaba hakuya kuchipatela hela hakuya nakudimona nandotolu watalaña jamazewu chikuyileñela kubula kuyuuka chachiwahi.

Hela chochu, kumaluña amakwawu, kuhemba mpinji hiyakulemeshaku. Dichi mumaluña amuchidiwu, tunateli kwikala nachaaka chakulaba. Neyi chidi muniyi njila, twatela kufwila kushikaña mumpinji. Kwiluka kulema kwakushika mumpinji chikutukwasha kuhemba mpinji. Yumanyi yikutuleñela kuhembaña mpinji? Hanu dinu, tukutwesha ñahi kushikaña mumpinji? Tunateli kuhetelamu ñahi neyi tushikaña mumpinji?

Yehova hiNzambi Wahembaña Mpinji

Kwimbujola Nzambi itwadifukulaña dichuma chabadika chikutuleñelaña tuhembeña mpinji. (Efwes. 5:1) Yehova wemika chakutalilahu chachiwahi chakuhemba mpinji. Yena halabañaku. Yehova walondelaña chikupu ndandanda yindi hakuzata yuma yafuukulayi. Chakutalilahu,  hampinji yafuukwiliyi kukisañanayi kaayi katama nadibaji, Yehova wamulejeli Nowa nindi: “Katuñi watu wamapalanga anyingofu.” Chelili mpinji hiyikuswila kwakwihi, Yehova wamulejeli Nowa kwiñila muwatu nawa wamulejeli nindi: “Muloña kunashali mafuku atanu nayedi, nakanokesha nvula hamaseki mafuku makumi awana nimwaana niwufuku; yuma yayumi yejima yineli nakayijilumuna hewulu damaseki ji-i.” Mpinji chiyashikili, “chimwahitili mafuku atanu nayedi meji adibaji enza nikwinza hamaseki.” (Kutach. 6:14; 7:4, 10) Toñojokenu chuma chadi kumumwekena Nowa nichisaka chindi neyi chakwila alabili kwiñila muwatu. Kufwana Nzambi wadifukulañawu, ateleleli kuhemba mpinji.

Chimwahitili yaaka 450 kufuma haDibaji, Yehova wamulejeli nkakulula Abarahama nindi wakekala namwana mwakavwalikila Lubutu lwakaninuwu. (Kutach. 17:15-17) Nzambi wahosheli nindi Isaka wakavwalika “mwaka wakenzaku kafwampi hakakweji kokenoku.” Komana chumichi chamwekeni? Nsona jatulejaña nawu: “Sara wabaabili ivumu, wamuvweleli Abarahama mwanindi weyala hawushinakaji windi, hakakweji kamutenenenuwu kudi Nzambi.”—Kutach. 17:21; 21:2.

 MuBayibolu mwekala yakutalilahu yayivulu yamwekeshaña nawu Nzambi wahembaña mpinji. (Yere. 25:11-13; Dan. 4:20-25; 9:25) Bayibolu yatulejaña nawu tutalileña ifuku dawunsompeshi waYehova didi kumbidi. Hela chakwila dinakumwekana ‘kulaba’ kwesekeja nachamonañawu antu, etu tweluka chikupu netu ‘hidakalabaku.’—Hab. 2:3.

Kuhemba Mpinji Kwalema Mukudifukula Kwetu

Amayala ejima amuIsarela ayilejeli kuya nikushika mumpinji kwiluña dayilejeluwu kulonda kwanakana “yawija yaYehova yakutiyañana.” (Lev. 23: 2, 4) Cheñi Nzambi washimwini mpinji yateleluwu kulambulañawu nyilambu. (Kwid. 29:38, 39; Lev. 23:37, 38) Komana ichi hichinakumwekesha nawu Nzambi wakeñaña nindi ambuñindi ahembeña mpinji mukudifukula kwawuku?

Muyaaka nkulakaji yakusambila kapostolu Pawulu walejeli Akorinda chatela kulombolañawu kupompa kwawakwaKristu, wayilejeli nindi: “Chiña yuma yejima ayili chakutela nakuloña.” (1 Kor. 14:40) Dichi kupompa kwawakwaKristu kwateleleli kutachikaña hampinji yatoñweluwu. Kutalisha hakuhemba mpinji Yehova habalumukaku. (Mal. 3:6) Hanu dinu, chumanyi chitwatela kwila kulonda tubuleña kulaba kukupompa kwawakwaKristu?

Yuma Yatela Kutukwasha Kuhemba Mpinji

Amakwawu achimona neyi kudiloñesha chadimu, kwayikwashaña nankashi. (Yish. 21:5) Chakutalilahu, neyi kudi iluña kutunakukeña kuya nawa tunakukeña kushika hampinji yitunatoñoli, komana chikuwaha neyi twikala hohu nampinji yantesha yakwendelamu nakushika kutunakuya? Komana chikutama neyi tutachikaku henohu kuchidi mpinji kulonda tubuli kulaba, hela chakwila yuma yamwekanaña ‘mukululakena’ yinateli kutumwekena munjila? (Mukwa. 9:11) Mukwenzi weyala wahembaña mpinji wejina daJosé, wahosheli nindi: “Chuma chinateli kukwasha muntu wudi wejima kushikaña mumpinji, hikwiluka kuleha kwampinji yimwatela kwenda.” *

Antu amakwawu, chakeñekaña kudiloñesha chiwahi hakwila nawu anyakali kunyamuka kunyidimu kulonda kushika kukupompa kwawakwaKristu mumpinji. Ichi dichi chelili Chinsahu wumu wakwituña daEthiopia chelukiliyi nindi wukulaba kukupompa kwawakwaKristu najiminiti 45 hamuloña wakuhimpa kwandandanda yamudimu wazatañayi. Watiyañeni namukwawu mukwanyidimu nindi yanyakaleña kwinza kunyidimu kulonda kumwamunaku hamafuku akupompa. Nawa Chinsahu wetejeli kumuzatilañaku mukwawu mukwanyidimu maora atanu nayedi.

Neyi tukweti anyana achidi anyanya, kushika mumpinji kukupompa kwakalaña chikupu. Mama yawantu diyi wukweti mudimu wakuwelesha anyana, ilaña antu amuchisaka niwena atela kumukwashaku. Mama yawantu wakwituña daMexico wejina daEsperanza nahembi anyana atanu nasatu nkawindi. Anyana wenawa adi nayaaka yakufuma ha 5 nakushika ku 23. Esperanza walumbulwili chisaka chindi chichatweshaña kuhemba mpinji nindi: “Anyanami awambanda akula dehi, ankwashañaku kuwelesha anyiki jawu. Ichi chankwashañaku kumanisha nyidimu yahetala nikudiloñesha ami aweni kulonda kuya nakupompa hampinji yatanjikawu.” Ichi chisaka chatanjika mpinji yatela kutachikawu kuya nakupompa, nawa wejima wawu azatilaña hamu.

Hetelenumu Mukuhemba Mpinji Mukudifukula Kwenu

Kutoñojoka hankisu jitwahetelañamu hamuloña wakushika mumpinji kukupompa kwawakwaKristu, kunateli kutukolesha nikutuleñela kufwila kuzata nañovu kulonda kuhemba mpinji. Kankaña wamumbanda wejina daSandra, wekala nachaaku chakushikaña mumpinji kukupompa, wahosheli nindi: “Chuma chinakeña nankashi neyi nishika iku kuchidi mpinji, nekalaña nampinji yakwimusha amana kwetu niahela, nikuhosha nawu nikuyiluka chikupu.” Neyi tushikaña Hetala daWanta iku kuchidi mpinji, tunateli kuhetelamu chikupu hakutiya antu amakwawu mwizaza chinomikuwu ninyidimu yinazatuwu nakashinshi. Kuhitila mukuya nakupompa  nikuhosha mazu akukolesha, tunateli kukolesha amana kwetu niahela, ‘nakusañumuna akwetu kukeñañana nakwila nyidimu yayiwahi.’—Heb. 10:24, 25.

Kupompa kwawakwaKristu kwatachikaña nakamina nikulomba nawa yumiyi yekala yalema nankashi mukudifukula kwetu. (Mas. 149:1) Twamuhamekaña Yehova kuhitila mukwimba tumina, nawa tumina twatwanukishaña yililu yitwatela kwikala nayu, nikutukolesha kudikita chikupu namuzañalu mumudimu wakushimwina. Indi kulomba kwakutachika nachu? Kushankulu, Yehova wateneni tembeli yindi nindi “itala dakulombela.” (Isa. 56:7) Makonu, twapompaña hamu kulonda kulomba kudi Nzambi. Kulomba kwakutachikilahu bayi neyi kwekala kwakulomba hohu wunlomboli waYehova nispiritu yindi yajilaku, ilaña kwatukwashaña kuwahisha yitoñojoka yetu ninyichima kulonda kutambwila nsañu yitukudiza. Dichi, twatela kufwilaña kushika mumpinji kukupompa kwetu kulonda kwimbila hamu kamina katachi nikulomba.

Chamwihwiluwu muloña washikilañayi kukupompa swañu, Helen wayaaka 23 wahosheli nindi: “Natoñojokaña nami diyi njila yakumwekeshelamu kumukeña Yehova, chineli watuloñeshelaña nsañu yejima yatañishañawu, kushilahu nitumina nikulomba kwakutachikilahu.” Komana ninetu kwila twikala nayililu yamuchidiwu nehi? Eñañi, twatela kwikala nayililu yamuchidiwu. Dichi tufwilenu kwikala nachaaku chakubulaña kulaba munyidimu yetu yejima, sweje-e munyidimu yakundama kukudifukula kudi Nzambi walala.

[Tumazu twaheshina]

[Mwevulu wudi hefu 26]

Mwatela kudiloñeshela chadimu

[Mwevulu wudi hefu 26]

Shiyenuku mpinji yayuma yamwekanaña ‘mukululakena’

[Nyevulu yidi hefu 26]

Hetelenumu munkisu yafumaña mukushika swañu kukupompa