Munakwanuka?

Komana mwadiluñishili kutaña yibaaba yakatataka yamuKaposhi Kakutalila? Esekenu kwakula awa malwihu adi heshina:

• Muloñadi kusweja kunwa walwa chikwafwanina, hela chakwila muntu hanateli kushetaku?

Bayibolu yatulejaña chikupu nawu kusweja kunwa walwa kwatela kukisañana wubwambu wetu naNzambi. (Yish. 23:20; Isa. 5:11, 12) Yesu wesekejeli kusweja kunwa walwa nakukañanya kwiluka kukala kwampinji yitunashikumu. (Luka 21:34, 35)—7/1, ifu 6.

• Komana Yishimu 6:30 yeteja kwiya?

Inehi. Iyi vasi yamwekeshaña nawu Nzambi wakasompesha ikombi hanyiloña yindi. Hela chakwila ikombi weyaña hamuloña wanzala hiyanateli kumusachika muloña wudi neyi watela kwinkamu muntu weyaña hamuloña walwisu hela wakukeña kukatisha mwini chumaku, hela chochu, wudi namuloña ‘watela kufuta,’ hela kufuntisha. Antu afwilaña kwikala nawuselewa waNzambi bayi atiyakanaña ivumba dawukombiku. (Yish. 6:31)—7/1, ifu 13.

• Indi kwiluka netu Yehova ‘watalaña chekala muchima’ kunateli kutukwasha ñahi? (1 Sam. 16:7)

Kwiluka netu muchima—wuntu wetu wamukachi, yitoñojoka yamuntu, yililu, nichitwatiyaña—diyuma yalema kudi Yehova, kwatela kutuleñela kwikala nayililu yinateli kutuleñela twikali antu amawahi kumeswindi.—7/1, ifu 17.

• Indi mama yawantu kaYudeya wukweti kashinshi wazatishileña ñahi chachiwahi mpinji yashakamineñayi nawanyanindi?

Mama yawantu washinshika nateli kuzatisha mpinji yakwenda munjila hakuya nihakufuma kuchisankanu kulonda kukwasha anyanindi kwiluka nikuzatisha nshimbi jamuNsona. (Kuhit. 6:6, 7) Nateli nikuhanjeka nawanyanindi awambanda nshimbi yinateli kuyikwasha kubula kukisañana mali hakulanda yuma. (Yish. 31:14, 18)—7/1, ifu 19.

• Nshimbinyi jamuBayibolu jinateli kukwasha antu adisumbula kushakama chiwahi nawatuwuku?

Bayibolu yahosha hadi iyala wasumbula nawu ‘wakashiya nitata yindi nimama yindi nakumukakela iñodindi; niwena akela mujimba wumu.’ (Kutach. 2:24) “Mutu wamumbanda diyi iyala”—dikwila nawu, nfumwindi. (1 Kor. 11:3)—7/1, ifu 28

• Komana afu anateli kukwasha amomi?

Bayibolu yalumbulula munjila yapela, yaswayi kutiya nawu afu hiyanateli kukwasha amomiku, muloña “hiyeluka chumaku.” Eñañi, hiyeluka nichumaku, hiyanateli kukwasha muntuku. (Mukwa. 9:5, 6, 10)—7/1, ifu 21.

• Indi Bayibolu yayisoñamisha ñahi anfwila niantuluwa kutalisha hakudambula?

Hela chakwila chatama wanyi kwikala nampinji yakushakama nkaweyi, Yishimu 18:1 yatusoñamishaña nawu: “Wadambulaña hakanka windi nafwili mwakeñayi yena hohu.” Ilaña, anfwila niantuluwa akeñaña wukwashu wawantaña niamabwambu ayakamenaña. Chipompelu chawakwaKristu chakwashanaña chikupu munsañu yamuchidiyi. (Isa. 32:1, 2)—7/1, ifu 30.