Yesu Chatuumbakeshañayi Kuloña kwaNzambi

“Yenowu Nzambi wamutoñweli yena [Kristu] kwikala itanda daluwi namashi indi hakukuhwelela, kulonda kumwekesha kuloña kwindi.”—ROM. 3:25.

1, 2. (a) Indi Bayibolu yatudizishaña chumanyi kutalisha hachihandilu chawantu? (b) Malwihwinyi itukuhanjekahu munichi chibaaba?

 NSAÑU yamuBayibolu yahosha hakudikaña kwamwitempa daEdeni twayiluka nankashi. Wonsu wetu twamonaña ihuñu hamuloña wanshidi yaAdama neyi chalumbululawu munawa mazu akwila nawu: “Kudi iyala wumu nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.” (Rom. 5:12) Hela tuhu tukuzata nañovu netu kulonda tukoñeña yuma yaloña, twaluwañeshaña, dichi twakeñaña netu Nzambi yatwanakeneña. Kapostolu Pawulu niyena wahosheli nindi: “Kuwaha kunakeña kwila hinelañaku, ilaña kutama kunabula kukeña kwila, diku nelaña. Ami nshona!”—Rom. 7:19, 24.

² Chineli wonsu wetu twekala akwanshidi, twatela kudihula netu: Indi Yesu wakuNazareta wavwalikili ñahi chakadi nshidi, nawa muloñadi chamupapatishililuwu? Indi chihandilu chaYesu chatuumbakesheli ñahi kuloña kwaYehova? Chumanyi chasweja kulema, chafumini mukufwa kwaKristu?

Kuloña kwaNzambi Akwijinookeli

3. Indi Satana wamudimbili ñahi Evu?

³ Anvwali jetu atachi, Adama naEvu, akaanini chiyuulu chaNzambi muloña wakukeña kuyiyula kudi “kapela mukulu atenañawu nawu Diyabolu, diyi Satana.” (Chim. 12:9) Talenu chuma chamwekeni. Satana wajinookeli njila yaloña yayulilañamu Yehova Nzambi. Welili mwenimu kuhitila mukumwihula Evu nindi: “Chalala Nzambi nahoshi nindi, Nyitondu yejima yamwitempa bayi mwakayidyaku tahindi?” Evu wahosheli cheñi mwayilejeluwu kudi Nzambi nawu kumutondu wumu hiyateleleli kukwata kwoku, mukunkulwayi akenda kafwa. Dichi Satana wamutwikili Nzambi muloña nindi hisakutwamba. Diyabolu wahosheli nindi: “Chalala, himwakafwaku.” Watwalekeluhu nakumudimba Evu kulonda yeteji nindi Nzambi wayiswekeleña yuma yayiwahi nawa kuhitila mukudya kumukabu, wukwikala neyi chekalayi Nzambi, nikudifuukwila yamweni yuma yayiwahi nayatama.—Kutach. 3:1-5.

4. Indi antu atachikili ñahi kuyiyula kudi Satana?

⁴ Dichi, Satana watwalili mukwila nindi antu anateli kwikala amuzañalu neyi ekala adimena chakadi kulondela nshimbi jaNzambi. Adama niyena chatela yakakeli kuchiyuulu chaNzambi chaloña, watiyilili mwizu dañodindi nawa wejima wawu adyili kumukabu wayikanishiluwu. Dichi, Adama wamanishili wubwambu windi wawanina naYehova nawa watwiñijili muwuduñu wanshidi nikufwa. Chuma chikwawu chafumini muchuma chakoñeliyi Adama, antu atachikili kuyiyula kudi Satana, “nzambi yampata yamakonu.”—2 Kor. 4:4; Rom. 7:14.

5. (a) Indi Yehova washikijili ñahi mwahosheliyi? (b) Kuchiñejanyi kwenkeliyi Nzambi anyana kaAdama naEvu?

⁵ Yehova walejeli Adama naEvu nindi mwakafwaña kwesekeja namazu alala ahosheliyi. (Kutach. 3:16-19) Ilaña hichatalishili mukwila nawu Nzambi wakañenyi kwila mwafuukwiliyuku. Hidimuku! Hampinji yashimwiniyi yihuñu yakamonawu Adama naEvu, Yehova waheni kuchiñeja kwakuwahi kudi anyanawu akahiñahu. Welili mwenimu kuhitila mukushimuna kufuukula  kwindi kwakuleta ‘lubutu’ lwakachikayi Satana kukatutu. Hela chochu, chilonda chakamuchikawu Lubutu lwakaninuwu chakakusuka nawa ‘wakamuchika Satana kumutu.’ (Kutach. 3:15) Bayibolu yalumbulula iyi nsañu kuhitila mukuhosha hadi Yesu Kristu nawu: “Dichi chamumwekesheleluwu Mwana kaNzambi, kulonda akisañani nyidimu yadiyabolu.” (1 Yow. 3:8) Indi yililu yaYesu nikufwa kwindi kwatuumbakesheli ñahi kuloña kwaNzambi?

Chalumbuluka Chipapatishu chaYesu

6. Tweluka ñahi netu Yesu haswanini nshidi kudi Adamaku?

⁶ Yesu chapaminiyi, wesekeni chikupu nachadiñayi Adama henohu kanda yavulumuni. (Rom. 5:14; 1 Kor. 15:45) Ichi chatalishili mukwila nawu Yesu wateleli kuvwalika wawanina. Hanu dinu wadi kuvwalika ñahi wawanina? Kañelu Gabireli walumbulwili jiika kudi Mariya mama yaYesu nindi: ‘Spiritu yajila yakenza hadeyi; ñovu jaMukwakubadika Mwiwulu jakakuzeñamina; dichi chuma chiwakavwala akachitena nawu chajila, hiMwana kaNzambi weyala.’ (Luka 1:35) Hakutachika kwachihandilu chaYesu, hadaha Mariya wamulumbulwilili Yesu yuma yamwekeni hakuvwalika kwindi. Dichi, mpinji yimu Mariya nitata yaYesu wakuwanamu, Yosefu, amuwanini Yesu wudi mutembeli yaNzambi, wayihwili nindi: “Munabulilidi kwiluka nenu ami chiña niikalaña mwitala daTata yami?” (Luka 2:49) Mwalala kufuma tuhu kuwansi, Yesu welukili nindi wadiña Mwana kaNzambi. Dichi kutumbakesha kuloña kwaNzambi dichuma chaswejeli kulemeshayi.

7. Mahetanyi alema adiña naYesu?

⁷ Yesu wamwekesheli kusha maana kuyuma yakuspiritu kuhitila mukuyaña nakupompa mpinji yejima. Chineli wadiña nayitoñojoka yawanina, watela wadizili yuma yejima yatiyili niyatañileñayi muNsona jachiHeberu. (Luka 4:16) Wadiña cheñi neheta dikwawu dalema—mujimba wawanina wakulambula hanyijimba yawantu. Hampinji yamupapatishiluwu, Yesu wadiña nakulomba nawa watela watoñojokeleña hamazu awuprofwetu ekala haMasamu 40:6-8.—Luka 3:21; tañenu Aheberu 10:5-10. *

8. Muloñadi Yowanu Mpapatishu chesekeliyi kumukañesha Yesu nindi yabuli kupapatishewa?

⁸ Yowanu Mpapatishu hakusambila wakeñeleña kumukañesha Yesu yabuli kupapatishewa. Muloñadi? Muloña Yowanu wadiña nakujimika aYudeya mumenji, chinjikijilu chakumwekesha nawu abalumukili munyichima nakuleka nshidi yakufumpa Nshimbi. Chineli Yowanu wadiña ntaña yindi,  watela welukili nindi Yesu wadiña waloña nawa hateleleli kubalumuka mumuchimaku. Yesu wamulejeli chikupu Yowanu nindi wateleli kumupapatisha. Yesu walumbulwili nindi: “Muloña dichi chinatuteleli, kulonda kuwanisha kuloña kwejima.”—Mat. 3:15.

9. Indi chipapatishu chaYesu chadiña nakwimenaku chumanyi?

⁹ Hakwikala muntu waloña, Yesu watela welukili nindi, kufwana Adama, wadiña nañovu yakwikala tata yamuza wawantu awanina. Ilaña, Yesu hakeñeleña chihandilu chamuchidiwuku, muloña hidimu mwamufuukwilili Yehovaku. Nzambi wamutemesheli Yesu kwinza hamaseki kulonda kuzata mudimu waLubutu lwakaninuwu, hela Mesiya. Ichi chakeñekeleña nawu Yesu yahani wumi windi wawanina. (Tañenu Isaya 53:5, 6, 12.) Dichi, chipapatishu chaYesu hichatalisha mwomumu nachipapatishu chetuku. Chipapatishu chindi hichadiña chakudihana kudi Yehovaku, muloña Yesu wadiña dehi mumunza wawaIsarela wadiña wadihana dehi kudi Nzambi. Ilaña, chipapatishu chaYesu chadiña nakwimenaku kudihana kwindi kwakwila kukeña kwaNzambi neyi chalumbululawu muNsona yahosha hadi Mesiya.

10. Mudimwinyi wamufuukwililuwu Mesiya kudi Nzambi, nawa Yesu watiyili ñahi hamudimu wamwinkeluwu?

¹⁰ Yehova wamufuukwilili Yesu mudimu wakushimwina nsañu yayiwahi yaWanta waNzambi, kwilisha atumbanji, nikuyidizisha mudimu wakwilisha atumbanji kumpinji yakumbidi. Kudihana kwaYesu kwabombelelumu kwiteja kuumika makabisha nikufwa munjila yatama kulonda kuhakwilaku chiyuulu chaYehova Nzambi chaloña. Hamuloña wakwila Yesu wamukeñeli Tata yindi nankashi, wadiheni kwila kukeña kwaNzambi nawa wadikeñeleli chikupu kuhana mujimba windi neyi mulambu. (Yow. 14:31) Chamuzañalesheli cheñi hakwiluka nindi kulema kwawumi windi wawanina anateli kuwuhana kudi Nzambi neyi mulambu kulonda kutukuula kuwunduñu wanshidi nikukufwa. Komana Nzambi wetejeli chadihaniniyi Yesu nindi yakalakali iyi nyidimu yamaneni? Mwalala wetejeli!

11. Indi Yehova wamwekesheli ñahi nindi wamwitejeli Yesu neyi Mesiya wakaninuwu hela Kristu?

¹¹ Ansoneki aNsañu Yayiwahi ejima awana ashimuna chikupu nawu Yehova Nzambi wamwitejeli Yesu hampinji yafuminiyi mumenji Mukaloña kaYodana. Yowanu Mpapatishu washimwini nindi: ‘Namweni spiritu yinakusuluka mwiwulu neyi katela, hakushakama hadi yena Yesu. . . . Ami namoni namesu, hinukwikala chinsahu nami, Diyi Mwana kaNzambi.’ (Yow. 1:32-34) Kubombelahu, hayoyina mpinji Yehova wahosheli nindi: “Diyi Mwanami nakeña, natiyaña kuwaha nankashi mudi yena.”—Mat. 3:17; Maku 1:11; Luka 3:22.

Yesu Washinshikili Kushika niKukufwa

12. Mudimwinyi wakoñeliyi Yesu hadi yaaka yisatu nachikunku hanyima yakumupapatisha?

¹² Hadi yaaka yisatu nachikunku, Yesu wakalakeli chikupu mudimu wakutañisha antu hadi Tata yindi nihakuloña kwachiyuulu chaNzambi. Kwendujola Mwituña daChikaninu mwejima hamaseki kwamuzeyesheli nankashi, ilaña kwosi chuma chamukañesheli kushimwina chikupu wunsahu walala. (Yow. 4:6, 34; 18:37) Yesu watañishileña antu haWanta waNzambi. Kuhitila mukuuka akata muchihayamisha, kudyisha mazaza awantu adiña nanzala, nikusañula afu, wamwekesheli chuma chikayikoñelawu antu kudi Wanta.—Mat. 11:4, 5.

13. Yumanyi yadizishiliyi Yesu kutalisha hakulomba?

¹³ Chatela yadihameki hamudimu windi wakutañisha nikuuka, Yesu wemikili chakutalilahu kuhitila mukudizoza nikumuhameka Yehova. (Yow. 5:19; 11:41-44) Cheñi nawa Yesu washimwini yuma yasweja kulema yitwatela kulombela. Twatela kulombaña netu ijina daNzambi, Yehova, “dijili” nawa chiyuulu chaNzambi chaloña chifumishuhu chiyuulu chaSatana  chatama kulonda ‘muchima Windi awili hamaseki neyi chawilañawu mwiwulu.’ (Mat. 6:9, 10) Yesu watukolesheli cheñi kwila mutwalombaña kuhitila ‘mukusambila kukeña wanta nikuloña kwaNzambi.’—Mat. 6:33.

14. Hela chakwila Yesu wadiña wawanina, muloñadi chateleleliyi kuzata nañovu hakwila nawu yatweshi mudimu windi wamufuukwililiyi Nzambi?

¹⁴ Mpinji yakufwa kwindi kwamulambu chiyashikili kwakwihi, Yesu watachikili kutoñojoka nankashi hamudimu weneni wadiñayi nawu. Kufuukula kwaTata yindi nijina dindi dadiwahi kwashindameneni hadi Yesu hakuumika kweseka kwatama nikufwa munjila yatama. Chikwashalili mafuku atanu nakufwa kwindi, Yesu walombeli nindi: “Ichi dinu muchima wami hiwukukaba. Nukuhosha namidi? Nili nami, Eyi Tata, mpulwishi kumpinji iyi, tahindi? Dichi nenjilili, nalondeli mpinji yoyeniyi.” Hanyima yakuhosha mazu wenawa neyi chatela kuhosha muntu wudi wejima, Yesu washili muchima windi hansañu yabadika kulema nawa walombeli nindi: “Tata, alemeshi ijina deyi.” Yehova wanyakeli kwakula nindi: “Nadilemeshi dehi, nakadilemesha nawa cheñi.” (Yow. 12:27, 28) Eñañi, Yesu wadihanini kuhita mukweseka kwasweja kwakashinshi kindi kwabulahu dehi kumona muntu wudi wejima. Ilaña, chakadi nikujina chatiyiliyi mazu ahosheliyi Tata yindi wamwiwulu, Yesu wakoleli nankashi nakwiluka nindi wukatwesha kutuumbakesha nikuyiñisha chiyuulu chaYehova. Nawa mwalala watwesheli!

Yuma Yawanishili Kufwa kwaYesu

15. Henohu kanda yafwi, muloñadi Yesu chahosheleliyi nindi: “Chinamani”?

¹⁵ Yesu chamupopeleluwu hamutondu wakuyandishila, henohu kunashali dehi kwantesha nakufwa, wahosheli nindi: “Chinamani.” (Yow. 19:30) Kuhitila muwukwashu waNzambi, Yesu wakalakeli nyidimu yamaneni chikupu hadi yaaka yisatu nachikunku kufuma hamupapatishiluwu nakushika nikukufwa kwindi! Yesu chafwiliyi, kwakunkili mutentashi wañovu chikupu, nawa mukulumpi wawamashidika awaRoma watalileña mudimu wakujahana wahosheli nindi: “Chalala iwu wadiñi Mwana kaNzambi!” (Mat. 27:54) Iwu mukulumpi wawamashidika wamweneña chamuyandishileñawu Yesu hamuloña wakuditena nindi hiMwana kaNzambi. Hela chakwila wakabakeni chikupu, Yesu wahembeli kanshinshi kindi nawa wamwekesheli nindi Satana hisakutwamba chikupu. Kutalisha kudi antu ejima ahakwilañaku chiyuulu chaNzambi, Satana wahosheli nindi: “Muntu wukuhana yuma yakwetiyi yejima nawumi windi.” (Yoba 2:4) Kuhitila mukuhemba kashinshi kindi, Yesu wamwekesheli nindi Adama naEvu adi kutwesha kutwalekahu kwikala ashinshika mukweseka kwawu kwadiña kwapela. Chuma chabadika kulema, wumi waYesu nikufwa kwindi kwalemesheli nikutuumbakesha kuloña kwachiyuulu chaYehova. (Tañenu Yishimu 27:11.) Kudihu yuma yikwawu yawanisha kufwa kwaYesu? Eñañi yidikoku!

16, 17. (a) Muloñadi ayinsahu jaYehova adiñaku henohu kanda kwikala akwaKristu chatwesheluwu kwikala nawubwambu wawuwahi naYehova? (b) Indi Yehova wamusomweneni ñahi Mwanindi hakwikala washinshika, nawa Mwanta Yesu Kristu nakutwalekahu kwila chumanyi?

¹⁶ Kwadiña ambuña aYehova amavulu kunyima henohu Yesu kanda yenzi heseki. Adiña nawubwambu wawuwahi naNzambi nawa atambwilili kuchiñeja kwakusañuka. (Isa. 25:8; Dan. 12:13) Hanu dinu Nzambi waloña, Yehova, watwesheli ñahi kukiswila antu akwanshidi muniyi njila yayiwahi? Bayibolu yalumbulula nawu: “Yenowu Nzambi wamutoñweli yena [Yesu Kristu] kwikala itanda daluwi namashi indi hakukuhwelela, kulonda kumwekesha kuloña kwindi, chadiwiliyi Nzambi nyiloña yavulumwinuwu dehi chachikulu, nawushona windi; amwekeshi kuloña kwindi hamafuku anu;  kulonda yomweni ekali waloña, ekali nawa mukwakubalumuna muntu wukukuhwelela Yesu kwikala waloña.”—Rom. 3:25, 26. *

¹⁷ Yehova wamusomweneni Yesu kuhitila mukumusañula nakumwinka chifulu chabadika chadiñayi nachu henohu kanda yenzi hamaseki. Chayinu mpinji Yesu nakudiluñisha wumi wakadi kufwa neyi muntu walema wakuspiritu. (Heb. 1:3) Hakwikala kaPristu Muneni nawa Mwanta, Yesu Kristu nakutwalekahu kukwasha atumbanji twindi kutuumbakesha kuloña kwaNzambi. Tunakusakilila chikupu hakwiluka netu Tata yetu wamwiwulu, Yehova, diyi Walambulaña antu ejima amutuumbakeshaña nikumukalakela nakashinshi hakwimbujola Mwanindi!—Tañenu Masamu 34:3; Aheberu 11:6.

18. Indi chibaaba chinalondeluhu chikuhosha hansañwinyi?

¹⁸ Antu ejima ashinshika kufuma tuhu kudi Abeli adiluñishili wubwambu wawuwahi naYehova muloña akuhweleleli muLubutu lwakaninuwu. Yehova welukili nindi Mwanindi wakashinshika chikupu nawa kufwa kwindi kwakabuta chikupu “nshidi yawantu ampata yamunu mwishina.” (Yow. 1:29) Kufwa kwaYesu kwaheteshaña cheñi antu anakushakama makonu. (Rom. 3:26) Indi ifutu danyiloña daKristu dinateli kuyihetesha ñahi? Iyi diyi nsañu yitukuhanjekahu muchibaaba chinalondeluhu.

[Tumazu twaheshina]

Mukwakula Nenudi?

• Indi kuloña kwaNzambi akujinookeli ñahi?

• Indi chipapatishu chaYesu chadiña nakwimenaku chumanyi?

• Indi kufwa kwaYesu kwamanishilidi?

[Malwihu aKuzatisha haKudiza]

[Mwevulu wudi hefu 9]

Komana mweluka mwatalishili chipapatishu chaYesu?