Keñakeñenu Chikupu Nkisu jaYehova

“[Nzambi] wasomonaña antu amukeñakeñaña.”—HEB. 11:6.

1, 2. (a) Indi antu amavulu akeñakeñaña ñahi nkisu yaNzambi? (b) Muloñadi chitwakeñelaña nankashi kutambwila nkisu yaYehova?

 MUMATUÑA amakwawu, neyi muntu yachihula antu akadi nikwiluka avulaña kuhosha nawu “Nzambi yakukiswili!” Akulumpi jansakililu jashiyashana akiswilaña antu, anyama, niyuma yabulaña kwona. Akakwenda ayaña kumaluña kwadifukwilañawu akansakililu nawu ayikiswili. Akwansañu jamatuña nachiyuulu mpinji yejima alombaña nawu Nzambi yakiswili ituña dawu. Mwatoñojokaña nenu kulomba kwawu kwalala? Komana kulomba kwamuchidiwu kwatelela? Hinyi watambwilaña nkisu yaNzambi, nawa muloñadi?

² Yehova washimwineñahu dehi nindi mumafuku akukuminina, wakekala nawantu awunyonji nawa awunda akunyunza yejima, akashimwinaña nsañu yayiwahi yaWanta kushika kwakumina iseki hela chakwila anakuyihela nikuyikañesha. (Isa. 2:2-4; Mat. 24:14; Chim. 7:9, 14) Etu ejima tuneteji iwu mudimu twatela kwikala hakachi kanawa antu anakukeña nikufwila nkisu yaNzambi, muloña chitwabula nkisu Yindi hitukutwesha kukalakala iwu mudimuku. (Mas. 127:1) Hanu dinu tunateli kutambwila ñahi nkisu yaNzambi?

Nkisu Jalondelaña Nakuwana Antu Ovwahila

3. Neyi chakwila aIsarela ovwahilili, chumanyi chadi kufumamu?

³ Tañenu Yishimu 10:6, 7. Henohu kunashali mafuku antesha nakwiñila Mwituña daChikaninu, Yehova wayilejeli aIsarela nindi akaheta nankashi nawa wakayikiña neyi ovwahila izu dindi. (Kuhit. 28:1, 2) Nkisu yaYehova hiyatela kwinza hohu hadi antu jaNzambuku, ilaña ‘jalondelaña  nakuyiwana.’ Antu ovwahila akayikiswilaña chikupu.

4. Indi kwovwahila kwalala kwabombelamu chumanyi?

⁴ Yililu yamuchidinyi yateleleli kwikala nawaIsarela hakwila nawu ekali ovwahila? Nshimbi yaNzambi yashimwini nawu Nzambi wadi kutiya kutama neyi antu jindi akañenyi kumukalakela “namuzañalu nikutiya kuwaha mumuchima.” (Tañenu Kuhituluka 28:45-47.) Twatela kumwovwahila Yehova nankashi kubadika kulondela hohu nshimbi jindi, muloña nianyama hela andemoni ovwahilaña nshimbi jamuchidiwu. (Maku 1:27; Yak. 3:3) Kumwovwahila chikupu Nzambi hinjila yakumwekeshelamu kukeña. Kwabombelamu muzañalu wafumaña mukukuhwelela netu nshimbi jaYehova hijakalaku nawa “wasomonaña antu amukeñakeñaña.”—Heb. 11:6; 1 Yow. 5:3.

5. Indi kukuhwelela kukana kwaYehova kwakwashileña ñahi muntu kwovwahila lushimbi lwekala haKuhituluka 15:7, 8?

⁵ Shinshikenu kwovwahila kwalala chakumwekesheluwu kuhitila mukulondela lushimbi lwasonekawu haKuhituluka 15:7, 8. (Tañenu.) Kwovwahila ilu lushimbi chakadi kukankajala mwatela mwafumineña yuma yayiwahi yakwashileña kazweñi, komana kwaleñeleleña antu jaNzambi kwikala nawubwambu wawuwahi? Chuma chabadika kulema, komana kwamwekesheleña nawu antu akukuhweleleli muñovu jaYehova jakukwasha ambuñindi nikumwekesha kusakilila hakwikala nakukooleka kwakwimbujola yena wahanaña? Inehi! Nzambi wamweneña mumuchima wamuntu wahanineña nawa wamukanineña kumukiswila hanyidimu yindi yejima nimuyuma yejima yakwatileña makasindi. (Kuhit. 15:10) Kukuhwelela iku kukana kwaleñeleleña muntu kukwasha mukwawu nawa mwafumineña nkisu jajivulu.—Yish. 28:20.

6. Nsona yaAheberu 11:6 yatela kutuleñela kukuhwelela chumanyi?

⁶ Kubombela hakumukuhwelela Yehova netu Wasomonaña, Aheberu 11:6 yalumbulula chililu chikwawu chitwatela kumwekesha hakwila nawu Nzambi yatukiswili. Ilukenu nenu Yehova wasomonaña antu “amukeñakeñaña.” Mwidimi datachi idi izu dinazatishuwu datalisha mukuzata nañovu nikushaku maana chikupu. Chumichi chatela kutukolesha nankashi kukuhwelela nkisu yitunateli kutambwila! Muloña Nzambi walala “wabula kutwesha kutwamba,” diyi wahanaña iyi nkisu. (Tit. 1:2) Hadi yaaka yayivulu yinahituhu Nzambi wamwekeshaña nindi washikijaña mwakanañayi. Izu dindi hidakañanyañaku; mpinji yejima dashikijewaña. (Isa. 55:11) Dichi tunateli kukuhwelela netu neyi tumukuhwelela chikupu, Wakatusomwena.

7. Tunateli kutambwila ñahi nkisu kuhitila ‘mulubutu’ lwaAbarahama?

⁷ Yesu Kristu diyi wekalili ‘lubutu’ lwatachi lwaAbarahama. AkwaKristu awayishewa diwu ahiñiluhu ekalili ‘lubutu’ lwakaninuwu. Ayinka mudimu ‘wakutiyakesha kashinshi kakeni kayena wayitambikili nindi mufumi mumwidima, mwiñili muchejeji chindi chakuhayama.’ (Ŋal. 3:7-9, 14, 16, 26-29; 1 Pet. 2:9) Neyi tudiwula antu anenkiyi Yesu mudimu wakwakamena yuma yindi, hitunateli kwikala nawubwambu wawuwahi naYehovaku. Chakadi wunlomboli ‘wanduñu wamaana nikashinshi’ hitunateli kutiyisha chikupu nsañu yitwatañaña Mwizu daNzambi hela kwiluka chakuyizatishaku. (Mat. 24:45-47) Kuhitila mukuzatisha yuma yitwadizaña muNsona, tunateli kukuhwelela kutambwila nkisu yaNzambi.

Shenu Muchima Hakwila Mwaya Kukeña kwaNzambi

8, 9. Indi nkakulula Yakoba wazatili ñahi nañovu kwesekeja namwalombeliyi?

⁸ Chikuma chakwila nawu twatela kuzataña nañovu hakwila atukiswili kudi Nzambi, chinateli kutwanukisha nkakulula Yakoba. Welukili wanyi chikaninu chaNzambi chamukaniniyi Abarahama chichakashikijewa, ilaña wakuhweleleli nindi Yehova wakavulisha nankashi anyana kankanka yindi, nawa anyanindi akekala muza weneni. Dichi, mu 1781 B.C.E., Yakoba wayili kuHarana nakukeña mumbanda. Hakeñeleña hohu kuwana muntu watela kwikala ibwambu dindi wamuwahuku; ilaña wakeñeleña  mumbanda wawuspiritu wadifukulaña kudi Yehova nawa wakekala mama yawanyanindi wamuwahi.

⁹ Tweluka netu Yakoba waweni ntaña yindi Racheli. Wamukeñeli Racheli nawa wadihanini kumuzatila tata yaRacheli, Labani, hadi yaaka yitanu nayiyedi kulonda amwinki ñodindi. Ichi chuma chakoñeliyi Yakoba bayi neyi hinsañu yakukeña yakwanukaña hohuku. Yakoba welukili chikupu chikaninu chamukaninuwu nkanka yindi Abarahama kudi Nzambi Chinaweji nichamukaninuwu cheñi tata yindi, Isaka. (Kutach. 18:18; 22:17, 18; 26:3-5, 24, 25) Isaka niyena wamulejeli mwanindi Yakoba nindi: “Nzambi Chinaweji akakukiswili nkisu, akakukwilishi nsemi, akakuvulishi, wakeli mukanka waweni wanyichidi yawantu. Akakukiswili nkisu yaAbarahama, akakwinkichu nineyi nianyaneyi hamu, kulonda wakaswani ituña diwashakama, damwinkeluwu Abarahama kudi Nzambi.” (Kutach. 28:3, 4) Dichi Yakoba chazatiliyi nañovu kulonda yawani mumbanda watelela nikwikala nachisaka, chamwekesheli nawu wakuhweleleli mwahosheliyi Yehova.

10. Muloñadi Yehova chatiyiliyi kuwaha nakumukiswila Yakoba?

¹⁰ Yakoba hakeñeleña maheta hakwila nawu yahembi chisaka chinduku. Washili muchima hachikaninu chaYehova chakaniniyi ankakulula jindi. Washili muchima hakushikijewa kwayikaninu yaYehova. Yakoba wafwilileña kuzata nañovu kulonda yatambwili nkisu jaNzambi hela chakwila wamweneña kukala. Watwalekeluhu nayililu yamuchidiwu nimuwushinakaji windi, nawa Yehova wamukiswilili.—Tañenu Kutachika 32:24-29.

11. Chumanyi chitwatela kwila chikwendela hamu nankeñelu yaNzambi yinamwekeshuwu?

¹¹ Kufwana Yakoba, ninetu hitweluka yuma yejima yazatañayi Yehova hakushikija nkeñelu yinduku. Ilaña, kuhitila mukudiza Izu daNzambi, twelukaña yuma yejima yamba kamwekana ‘hefuku daYehova.’ (2 Pet. 3:10, 17) Chakutalilahu, hitweluka mpinji yayeni yamba kenza ifuku daYehovaku, ilaña tweluka netu didi kwakwihi. Twakuhwelela Izu daNzambi chidahosha nawu kuhitila mukushimwina chikupu muyinu mpinji yantesha yinashaluku, tukudamwina etu aweni niantu akututiya.—1 Tim. 4:16.

12. Yumanyi yitunateli kukuhwelela?

¹² Tuneluki netu kukuma kukwinza kala mpinji, Yehova hanateli kutalila nindi antu ejima  hamaseki chiña ayishimwinuku. (Mat. 10:23) Kubombelahu, twatambwilaña wunlomboli watukwashaña kushimwina chachiwahi. Hamuloña wakwikala nachikuhwelelu, twakalakalaña iwu mudimu nañovu jetu jejima, nikuzatisha yozelu yejima yitukweti. Komana tukushimwinaña mpinji yonsu mumaluña mwetejañawu nankashi antu chalala? Hanu dinu, tunateli kwilukila ñahi chadimu? (Tañenu Mukwakutaŋisha 11:5, 6.) Etu mudimu wetu wakushimwina, nikukuhwelela netu Yehova wukatukiswila. (1 Kor. 3:6, 7) Tunateli kukuhwelela netu wamonaña chitwadikitaña, nawa kuhitila muspiritu yindi yajila wakatuleja njila yejima yitunakukeña.—Mas. 32:8.

Lombenuña Spiritu Yajila

13, 14. Indi ñovu yaspiritu yaNzambi yajila yakwashaña ñahi ambuñindi kuzata nyidimu yinakumwekana?

¹³ Chumanyi chitunateli kwila neyi tutoñojoka netu hitukutwesha kuzata mudimu wunatwinkuwu hela kuya mumudimu wakushimwinaku? Twatela kumulomba Yehova kulonda yatwinki spiritu yindi yajila yitukwashi kuyilaku hambidi mukukalakala mumudimu windi. (Tañenu Luka 11:13.) Spiritu yaNzambi yinateli kuleñela antu kwikala atelela kuzata mudimu hichikweti muloña nakukala kwamweneñawu mpinji yakunyima hela yuma yayimwekeneniku. Chakutalilahu, chelili anediki dehi muEjipitu, spiritu yaNzambi yakwashili atubiña nianduñu kushinda ayilumbu jawu munjita hela chakwila hiyadiña akuluka yitembi mukwasa njitaku. (Kwid. 17:8-13) Chimwahitili mpinji, spiritu yoyimu yamukwashili Bezaleli niOholiyabi kuzata mudimu wawutotombu, ayoneneni kudi Nzambi kulonda atweshi kutoñojoka chachiwahi muwililu wanyidimu yamutabanaka.—Kwid. 31:2-6; 35:30-35.

¹⁴ Iyi spiritu yañovu yinakwashi ambuña aNzambi makonu kuzata nyidimu yakeñekaña mukuloñesha hampinji yatachikiluwu mudimu wawu wakupulinta nyikanda. Mukanda wasonekeli Mana kwetu R. J. Martin, wadiña nkoñi wafakitoli, walumbulwili mudimu wakoñeluwu mu 1927. “Hampinji yatelela, Mwanta wenzunwini chisu; twalandili ikina deneni datenañawu nawu rotary dakupulinta nachu nyikanda, hela chakwila twadilandili hitwelukili chadituñiluwu nichakudizatishaku. Ilaña Mwanta weluka chakukwasha antu amukalakelaña namuchima wumu kutoñojoka chikupu. . . . Munyilungu yantesha hohu, twelukili chakuzatisha idi ikina chachiwahi; nikulelu dinakuzata, dinakuzata mudimu wabuliluwu aweni adituñili kwiluka nawu dinateli kuzata.” Yehova natwalekuhu kukiswila nyidimu yamuchidiwu nikulelu.

15. Indi mukanda waAroma 8:11 wunateli kukolesha ñahi antu adi mukweseka?

¹⁵ Spiritu yaYehova yazatikaña munjila jajivulu.  Ambuña aNzambi ejima anateli kuyinka iyi spiritu, nawa yayikwashaña kushinda kukala kweneni. Indi neyi tunaneñi hamuloña wakweseka kunatuholokeli? Mazu ahosheliyi Pawulu hamukanda waAroma 7:21, 25 ni 8:11 anateli kutukolesha. Eñañi, ‘spiritu yayenowu wasañwili Yesu mudi afu’ yinateli kutukwasha, nakutwinka ñovu yakukañesha yuma yachisemwa yitwafwilaña. Iyi nsañu ayisonekeleli akwaKristu awayishewa, nawa lushimbi lwenilu lwakundama nikudi ambuña aNzambi ejima. Wonsu wetu twahetaña wumi kuhitila mukukuhwelela Kristu, kuhitila kudishaku chikupu kulonda tuleki kufwila yuma yatama, nikulondeja mwatulombolaña spiritu.

16. Chumanyi chitwatela kwila kulonda tutambwili spiritu yaNzambi yajila?

¹⁶ Komana tunateli kukuhwelela netu Nzambi nateli kutwinka hohu ñovu yindi yazatikaña chakadi kuzata nañovu? Inehi. Kubombelahu hakulomba spiritu, twatela kudizaña chikupu Izu daNzambi donenawu. (Yish. 2:1-6) Cheñi, spiritu yaNzambi yekalaña muchipompelu chawakwaKristu. Kupompaña mpinji yejima kwamwekeshaña mpwila yetu yakukeña ‘kutiya mwahoshaña spiritu kuyipompelu.’ (Chim. 3:6) Hela chochu, mukudizoza twatela kuzatisha yuma yitwadizaña. Mukanda waYishimu 1:23 watufumbaña nawu: “Chinukuyihoshola ichi balumukenu mutiyaña, nukwichila spiritu yami hadenu.” Eñañi, Nzambi wahanaña spiritu yindi yajila ‘kudi akwakumwovwahila.’—Yil. 5:32.

17. Indi nkisu yatukiswilañayi Nzambi hamuloña wakuzata nañovu tunateli kuyesekeja nachumanyi?

¹⁷ Hela chakwila twatela kuzata nañovu hakutambwila nkisu yaNzambi, twatela kwiluka netu kuzata nañovu hohu hikunateli kutuleñela kutambwila yuma yayivulu yayiwahi yenkañayi Yehova antu jinduku. Tunateli kwesekeja nyijimba yetu chiyahetelaña muyakudya yayiwahi nakuwaha kwafumaña munkisu yaNzambi yakiswilañayi nyidimu yetu. Nzambi waleña nyijimba yetu munjila yakwila tutiyeña wuyombu-yombu hakudya yakudya nawa yakwashaña nyijimba yetu. Watwinkaña niyakudya. Ilaña hitweluka chikupu yakudya yetu chiyawanaña yuma yakulishaña mujimbaku, nawa hitukutwesha kulumbulula chiyawanaña nyijimba yetu ñovu muyakudya yitwadyañaku. Tweluka hohu netu iyi njila yazatikaña nawa twatalaña hohu hakudya. Nyijimba yetu yaswejaña kulamba neyi tudyaña yakudya yayiwahi. Munjila yoyimu, Yehova washimuna yuma yitwatela kuwanisha kulonda twakaheti wumi wahaya nyaka, nawa watwinkaña wukwashu wutwafwilaña hakwila tuwanishi yumiyi. Chakadi nikujina, Yehova watukwashaña nankashi nawa twatela kumuhameka. Hela chochu, twatela kuzatila hamu, nikulondela mwaya nkeñelu yaNzambi kulonda twakatambwili nkisu.—Hag. 2:18, 19.

18. Chumanyi chimunafuukuluhu kwila, nawa muloñadi?

¹⁸ Dichi fwilenu kuzata nañovu kulonda mukalakali nyidimu yejima yinayinkuwu nakushika hakumina ñovu yenu. Mpinji yejima, mulombenu Yehova yoyikwashuku. (Maku 11:23, 24) Chimukudikitaña, kuhwelelenu nenu “muntu wukukeñakeña wukuwana.” (Mat. 7:8) Antu awayishewa naspiritu akatambula “chibaaba chawumi” mwiwulu. (Yak. 1:12) “Anyikoku acheñi” aKristu, anakudikita nawu akatambuli nkisu kuhitila mulubutu lwaAbarahama, akazañalala hakutiya chakahoshayi nindi: “Inzenu enu anakoolekeshuwu kudi Tata yami, swanenu wanta wenu wayiloñesheleluwu kufumisha haaliluwu chikuku champata yamunu mwishina.” (Yow. 10:16; Mat. 25:34) Eñañi, “antu anakiswiliyi [Nzambi] nkisu akaswana ituña, . . . akashakamamu haya nyaka.”—Mas. 37:22, 29.

Munateli Kulumbulula?

• Yumanyi yekala mukwovwahila kwalala?

• Yumanyi yitwatela kwila kulonda tutambuli nkisu yaNzambi?

• Tunateli kutambula ñahi spiritu yaNzambi yajila, nawa yinateli kutukwasha ñahi?

[Malwihu aKuzatisha haKudiza]

[Nyevulu yidi hefu 9]

Yakoba wamukwatishili kañelu kulonda yatambuli nkisu yaYehova.

Anenu nawa mwadikitaña chikupu?

[Mwevulu wudi hefu 10]

Spiritu yaNzambi yajila yakwashili aBezaleli niOholiyabi mukukalakala nyidimu chachiwahi