“Aka kaMukanda Kankwashaña Kushika Hanyichima Yawantu”

MUSUMBA waPorto ALEGRE, wekala kukabeta kambwela ketuña daBrazil, kuyaaka yakunyima mwapompeleli akamutayi watalaña hansañu janyuza. Antu amavulu kufuma kumatuña 135 enjili kuniyi mitiñi. Hampinji yakunooka, izanvu dawaYinsahu afumini muchipompelu chekala muPorto Alegre ashimwinini izaza dawantu nsañu yamuBayibolu yaWanta. Hanu dinu ayishimwinini ñahi chineli hiyelukili idimi dawuku?

Payiniya wejina daElizabete wahosheli nindi, “Twazatishili kamukanda kaGood News for People of All Nations.” Wabombeleluhu nindi: “Antu amavulu enjili adiña kanda atiyeñahu dehi nsañu yayiwahi yaWanta, ilaña etejeli nsañu yitwayishimwinini. Twashimwinini antu akwituña daBolivia, China, France, India, Israel, niNigeria. Antu amakwawu enjili, twadiña nanyikanda yashindamena haBayibolu yamwidimi dawu, nawa azañaleli hakutambula iyi nyikanda.”

Payiniya wamwituña daMexico wejina daRaúl niyena wazatishaña aka kamukanda nawa mwafumaña yuma yayiwahi. Mpinji yakunyima, wasolomokeli iyala kaArab wayaaka yakuvwalika 80 wafwishili ñodindi. Iwu iyala chamanishiliyi kutaña hefu hekala nsañu yaWanta mwidimi daArabic munaka kamukanda, waholweli madilu amuzañalu. Muloñadi? Chikaninu chaNzambi chakufumishahu kufwa, chasonekawu haChimwekeshu 21:3, 4, chamushikili hamuchima nankashi chelili yatañi mwidimi dindi. Mpinji yikwawu, chashimwineñayi wunsahu wamumpanji, Raúl wabulakeni iyala wahosheleña idimi daPortuguese. Iwu iyala niyena wafwishili mwanindi weyala. Raúl wamulejeli nindi yatañi hefu hasonekawu idimi daPortuguese munaka kamukanda. Chatañiliyi, iwu iyala wamulejeli nindi wakeñeleña kudiza nsañu yikwawu yamuBayibolu nawa wetejeli kutachika kudiza Bayibolu.

Raúl wazatishaña kamukanda kaGood News for People of All Nations hakushimwina antu ahoshaña idimi daArmenian, Chinese, English, French, German, Hindi, Korean, Mixe, Persian, Russian niZapotec. Wahosheli nindi: “Namoni kulema kwakuzatisha ichi chitwa mumudimu wami wakushimwina. Chakwashaña kushika hanyichima yawantu hela chakwila hinahoshaña idimi dawuku.”

Chineli antu amavulu endaña nawa ayaña nakushakama kumaluña acheñi, tukweti kukooleka kweneni kwakuhosha nawantu ahoshaña idimi dacheñi. Tunateli kuyishimwina nsañu yayiwahi yaWanta kuhitila mukuzatisha kamukanda kaGood News for People of All Nations. Komana mwasendaña aka kamukanda?

[Nyevulu yidi hefu 32]

Raúl nakwati kamukanda kamukwashaña kushika hanyichima yawantu akumatuña acheñi