“Hinyi Weluka Mwatoñojokañayi Yehova?”

“Hinyi weluka mwatoñojokañayi Yehova, mwaka amuleji maana? Ilaña etu tukweti yitoñojoka yaKristu.”—1 KOR. 2:16.

1, 2. (a) Kukalanyi kwamonañawu antu amavulu? (b) Chumanyi chitwatela kwanukaña kutalisha hayitoñojoka yetu nayitoñojoka Yehova?

 KOMANA chayikalilaña kwiluka chinakutoñojokayi muntu mukwawu? Hadaha muneñili mumaluwi chakatataka, nawa munakumona nenu chinakuyikalila kwiluka chinakutoñojokayi mwinikwenu. Eñañi, amayala niambanda atoñojokaña nikuhosha munjila jashiyashana. Muyisemwa yikwawu, amayala niambanda ahoshaña idimi dodimu munjila jashiyashana. Kubombelahu, hamuloña wayisemwa yashiyashana nimadimi antu ekala nayitoñojoka niyililu yashiyashana. Hela chochu, chimwasweja kuyiluka antu, chikuyikwasha kwiluka chatoñojokañawu.

² Dichi, bayi chituhayamishaku hakwiluka netu yitoñojoka yetu yambuka nayitoñojoka yaYehova. Kuhitila mudi kaprofwetu kindi Isaya, Yehova walejeli aIsarela nindi: “Muloña yitoñojoka yami hiyoyitoñojoka yenuku, nimumwelañenu hidimu nelañamuku.” Hakulumbulula ichi chikuma, Yehova watwalekeluhu nindi: “Muloña chajindama mawulu hewulu damaseki, dichi nimunelañami mwabadika mumwelañenu, niyitoñojoka yami yabadika yitoñojoka yenu.”—Isa. 55:8, 9.

3. Njilanyi jiyedi mutwatela kufwila ‘kuya hampuña naYehova’?

³ Komana chumichi chinatalishi mukwila nawu hitwatela kufwila kwiluka mwatoñojokañayi Yehovaku? Inehi. Hela chakwila hitukutwesha kwiluka chikupu mwatoñojokañayi Yehova mwejimaku, ilaña, Bayibolu yatukoleshaña kuya ‘hampuña naYehova.’ (Tañenu Masamu 25:14; Yishimu 3:32.) Njila yimu mutwatelela kukundama kwakwihi naYehova yidi yakulemesha nikusha muchima kunyidimu yindi yashimunawu Mwizu dindi, Bayibolu. (Mas. 28:5) Njila yikwawu yidi yakwiluka “yitoñojoka yaKristu,” “wamufwana chikupu Nzambi.” (1 Kor. 2:16; Kol. 1:15) Kuhitila mukwikala nampinji yakudiza nikutoñojoka hansañu yamuBayibolu, tunateli kwiluka chekalayi Yehova nimwatoñojokañayi.

Babalenu Mubuli Kwikala Nachaaku Chatama

4, 5. (a) Chaakwinyi chaheña chitwatela kutondolwela? Lumbululenu. (b) Yitoñojokanyi yaheña yadiña mudi aIsarela?

⁴ Chitukutoñojokaña hanyidimu yaYehova, twatela kutondolwela chaaku chakumutwika Nzambi muloña kwesekeja nayitoñojoka yetu. Ichi chaaku achilumbulula mumazu ahosheliyi Yehova muMasamu 50:21 nawu: “Eyi watoñojokeli neyi ami nekala chochiwekala eyi aweni.” Awa mazu anesekani nachahosheliyi kadizi waBayibolu yaaka 175 yinahituhu nindi: “Antu ekala nachaaku chakumutwika Nzambi muloña kwesekeja nayitoñojoka yawu, nawa atoñojokaña nawu Nzambi walondelaña nshimbi neyi jalondelañawu antu.”

⁵ Twatela kushaku kashinshi kulonda tubuleña kumumona Yehova kwesekeja nanshimbi niyitoñojoka yetu yawuntu. Muloñadi? Muloña chitukudizaña Nsona, kwesekeja nayitoñojoka yetu yabula kuwanina tukukañanyaña kwiluka mwelañayi Yehova. A Isarela akushankulu niwena atoñojokeleña munjila yoyimu nawa atoñojokeleña mwaluwa nawu mwelileñayi Yehova mwaheña. Talenu chayilejeliyi Yehova nindi:  “Hakwinza enu mudi nakwila nenu, Mwelañayi Mwanta [Yehova] himwesekanaku. Enu akwamutaña waIsarela, tiyenu dinu, komana munelañami himwesekanaku? Mwabula kwesekana himwomu mumwelañenuku?”—Ezek. 18:25.

6. Chumanyi chadiziliyi Yoba, nawa twatela kudizilaku chumanyi?

⁶ Chuma chimu chikutukwasha kutondolwela kumutwika Yehova muloña kwesekeja nayitoñojoka yetu chidi chakwiluka netu yitoñojoka yetu hiyawaninaku nawa mpinji jikwawu twatoñojokaña mwaheña chikupu. Ichi dichuma chateleleli kudizayi Yoba. Hampinji yamweniyi yihuñu, Yoba waneñeli chikupu nawa watachikili kudiyiñisha yomweni. Wakañenyi kwiluka kwafumineña kukala kwamweneñayi. Ilaña Yehova wamukwashili kwiluka yuma yejima. Kuhitila mukumwihula Yoba malwihu ashiyashana 70, nawa Yoba wakañenyi kuyakula, Yehova wamwekesheli nindi yitoñojoka yaYoba yakuminamu chikupu. Yoba wadizozeli nawa wahimpili yitoñojoka yindi.—Tañenu Yoba 42:1-6.

Chitwatela Kwikala ‘naYitoñojoka yaKristu’

7. Neyi tutoñojoka chikupu hanyidimu yaYesu, chatukwashaña ñahi kwiluka mwatoñojokañayi Yehova?

⁷ Yesu wembujoleli chikupu Tata yindi muyuma yejima yahosheleñayi niyakoñeleñayi. (Yow. 14:9) Dichi, kutoñojoka chikupu hanyidimu yakoñeliyi Yesu chatukwashaña kwiluka mwatoñojokañayi Yehova. (Rom. 15:5; Fwi. 2:5) Ichi dinu, tushinshikenu hayibalu yiyedi yaNsañu Yayiwahi.

8, 9. Kwesekeja nachasonekawu haYowanu 6:1-5, chumanyi chaleñeleli Yesu yamwihuli Fwilipi, nawa muloñadi Yesu chelililiyi mwenimu?

⁸ Fwikijenu chumichi. Henohu kunashali dehi kwakwihi naPaseka yamu 32 C.E. Apostolu aYesu adiña momukushika kufuma halwendu lwakuÑaliliya kwayiluwu nakushimwina. Chineli azeyeli chikupu hamuloña wakuzata iwu mudimu, Yesu wayitwalili kwiluña kwakankawawu kukabeta kaluwunda kuchikumu chaKaluñalwiji kaÑaliliya. Hela chochu, antu amavulu ayilondeleli. Yesu chokiliyi iwu mukanka wawantu nikuyitañisha yuma yayivulu, akañenyi kuwana yakudya yakwinka antu. Indi awa antu ejima yakudya adi kuyiwana kudihi chineli adiña kwiluña kwakankawawu? Yesu chelukiliyi nindi akeñelaña yakudya, wamwihwili Fwilipu, wafumini kudina iluña nindi: “Kudya tukupawila kudihi kulonda antu awa adyi?”—Yow. 6:1-5.

⁹ Muloñadi Yesu chamwihwililiyi Fwilipi ilu lwihu? Komana Yesu wakañenyi mwakwilila ntahindi? Inehi. Yumanyi yatoñojokeleñayi? Kapostolu Yowanu, wadiñaku walumbulula nindi: ‘Yesu wachihosheli nindi amutompi nachu; muloña yomweni welukili chakeñeleña kwilayi.’ (Yow. 6:6) Yesu wayesekeli atumbanji twindi kulonda yamoni chikuhwelelu chawu. Kuhitila mukuyihula ilu lwihu, atumbanji twindi ashiluku maana nawa wayinkeli mpinji yakumwekesha chikuhwelelu chawu muchuma chakeñeli kwilayi. Ilaña akañenyi kumwekesha chikuhwelelu nawa amwekesheli nawu yitoñojoka yawu yadiña yakuminamu. (Tañenu Yowanu 6:7-9.) Dichi Yesu wakoñeli chuma chabulili kukuhwelelawu. Wadyishili antu amavulu adiña nanzala muchihayamisha.—Yow. 6:10-13.

10-12. (a) Muloñadi Yesu chabulililiyi kumukwasha mumbanda kaHeleni hohenohu? Lumbululenu. (b) Yumanyi yitukuhanjekahu?

¹⁰ Iyi nsañu yikutukwasha kwiluka Yesu chatoñojokeleñayi mpinji yikwawu. Hanyima yakudyisha idi izaza dawantu, Yesu niapostolu indi ayili kukabeta kaluwunda, kubadika muñinza yaIsarela, kwakwihi naTira niZidoni. Chashikiluwu kwenoku, adibulakeni namumbanda kaHeleni wamulembeleli Yesu nindi amukili mwanindi wamumbanda. Hakusambila, Yesu wamudiwili ona mumbanda. Ilaña chelili yatwalekuhu nakumulembelela, Yesu wamulejeli nindi: “Yileki anyana asambili kwikuta; hichinawahi kunona mankendi awanyana nakunatila tutuwaku.”—Maku 7:24-27.

¹¹ Muloñadi Yesu chakaniniyi kumukwasha  ona mumbanda hakusambila? Komana Yesu wadiña nakumweseka, neyi chamwililiyi Fwilipi, kulonda yamoni chikwilayi, nakumwinka mpinji yakumwekesha chikuhwelelu chindi? Izu dindi chidatiyakeni, hichamuneñesheli ona mumbandaku, hela chakwila hiyasoneka munsonaku. Njila yahoshelelumu mazu akwesekeja antu janona mumbanda ‘natutuwa’ yaleñeleli yabuli kutiya kutama. Hadaha Yesu wahosheleña neyi nvwali wunakukeña kwinka mwana chuma chinalombiyi ilaña hanakukeña kumwekesha nindi wukumwinkaku, kulonda yamoni neyi mwalala mwana nakuchikeña chikupu. Hichikweti muloña namwatoñojokeleñayuku, ona mumbanda chamwekesheliyi chikuhwelelu chindi, Yesu wakoñeli namuchima wumu mwalombeliyi.—Tañenu Maku 7:28-30.

¹² Iyi yibalu yiyedi yaNsañu Yayiwahi yinatukwashi kwiluka chikupu ‘yitoñojoka yaKristu.’ Ichi dinu tushinshikenu haniyi nsañu kulonda twiluki chiyatela kutukwasha kwiluka chachiwahi mwatoñojokañayi Yehova.

Njila Yahanjekelelumu Yehova naMosi

13. Indi kwiluka mwatoñojokañayi Yesu kwatukwashaña ñahi?

¹³ Kwiluka yitoñojoka yaYesu chikutukwasha kutiyisha nsañu yasonekawu muNsona yinateli kutukalila. Chakutalilahu, talenu mazu ahosheliyi Yehova kudi Mosi chelili aIsarela anatuñi dehi mwana kañombi wawuru kulonda adifukuleñaku. Nzambi wahosheli nindi: “Awa antu nayimoni dehi komana hiyantu achinchika; ichi dinu nleki kwami kuzuwa kwami kuyitatili neyi kesi, niyinoñeshi kwami, nikuvulishi eyi wili muza weneni.”—Kwid. 32:9, 10.

14. Indi Mosi welili ñahi chatiyili mazu ahosheliyi Yehova?

¹⁴ Iyi nsañu yatwalekahu nakuhosha nawu: “Mosi walembeli kumesu aYehova Nzambi yindi, nindi, Eyi Yehova, antu eyi iwafumishili mwituña daEjipitu nañovu yeneni, nachikasa chañovu hohu, wuyizuwili nankashi mwejimomu? Indi aEjipitu akahosha nawudi? Akahosha nawu, Chayifumishiliyi mwituña komana walondeli kuyikoña chatama, komana walondeli kuyijahila kumapidi, kulonda ayinoñeshi ji-i hewulu deseki. Lekaku kuzuwa kweyi kunasweji, wubalumuki mumuchima wuleki kuyifuukwila antu eyi mwenimu mwatama. Anukaku Abarahama, naIsaka, naIsarela, ambuñeyi, wasanyikilili chakudisanyika eyi aweni, wayilili neyi, Nakavulisha anyanenu neyi chikwatutumbwa twamwiwulu, niituña idi dejima dinateni nakadinka anyanenu, mwakadiswana dakekala denu dahaya nyaka. Yehova wabalumukili mumuchima, walekeli omu mwatama mwahosheliyi nindi nukuyikoña antu ami.”—Kwid. 32:11-14. *

15, 16. (a) Mosi wekalili nakukoolekanyi hamuloña wamazu ahosheli Yehova? (b) Munjilanyi Yehova ‘mwabalumukililiyi mumuchima’?

¹⁵ Komana Mosi mwalala wateleli kwolola  yitoñojoka yaYehova? Chinjila! Hela chakwila Yehova washimwini chuma chakeñeleña kukoñayi, iku hikwadiña kufuukula kwindi kwakukumishakuku. Ilaña, Yehova wamwesekeleña Mosi, neyi chochamwesekeliyi Yesu Fwilipi nimumbanda kaHeleni. Mosi amwinkeli mpinji yakumwekesha mwatoñojokeleñayi. * Yehova wamutondeli Mosi yekali ihaku wawaIsarela niYomwenindi, nawa Yehova walemesheli iwu mudimu wamwinkeliyi Mosi. Komana Mosi wadi kuleka chikela chimuluwañeshi? Indi kwiji wateleleli kumukolesha Yehova kulonda yajimbaluku muza waIsarela nakukwata muza wañovu kufuma kudi ankakulula jaMosi?

¹⁶ Mosi chakwiliyi chamwekesheli nawu wakuhweleleli muwuñaji waYehova. Chuma chakoñeliyi, chamwekesheli nawu wakameneni ijina daYehova, bayi chuma chakeñeleñayi yenaku. Hakeñeleña ijina daYehova adihoshi chatamaku. Dichi Mosi wamwekesheli nindi welukili “mwatoñojokañayi Yehova” kutalisha haniyi nsañu. (1 Kor. 2:16) Chumanyi chafuminimu? Muloña wakwila Yehova hashindameneni hohu hakwila mwafuukwiliyuku, nsañu yonenewa yashimunaña nawu “wabalumukili mumuchima.” MuchiHeberu, awa mazu anateli kutalisha mukwila nawu Yehova haleteli kuzuwa kwindi neyi chashimwiniyi nindi wakeñeleña kuleta kuzuwa kwindi hamuza wejimaku.

Njila Yahanjekelelumu Yehova naAbarahama

17. Yehova wamwekesheli ñahi kudiwunjika chikupu hakutiyilila mwahosheliyi Abarahama?

¹⁷ Chakutalilahu chikwawu chamwekeshaña nawu Yehova wetejaña ambuñindi kumwekesha chikuhwelelu chawu chamwekenaña mukulemba kwaAbarahama kutalisha haSodoma. Muniyi nsañu, Yehova wamwekesheli kudiwunjika chikupu hakumwiteja Abarahama yehuli malwihu amboka-mboka. Mpinji yimu, Abarahama wahosheli mazu akufuma hamuchima akulemba nindi: “Chinjila eyi kwila mwenomu, aloña wuyijahili hamu nawatama, aloña eseki hamu nawatama. Chenochu kudeyi chinjila. Mukwakusompesha iseki dejima abuli kwila mwaloña?”—Kutach. 18:22-33.

18. Chumanyi chitwadizilaña kunjila yahanjekeleleñamu Yehova naAbarahama?

¹⁸ Kuniyi nsañu, tunadiziluku chumanyi kutalisha mwatoñojokañayi Yehova? Komana Yehova wakeñeleña Abarahama yahanjeki nindi kulonda yafuukuluhu chachiwahi? Inehi. Eñañi, Yehova kachi washimwini hakusambila yuma yaleñeleli yafuukuluhu kwila mwakeñeleñayi. Ilaña hamuloña wanawa malwihu, Yehova wamwinkeli Abarahama mpinji yakwiteja mwafuukwiliyi nikwiluka Mwatoñojokeleñayi. Chamuleñeleli cheñi Abarahama kwiluka chikupu wushona waYehova niwuñaji windi. Eñañi, Yehova wahanjekeleña naAbarahama neyi ibwambu dindi.—Isa. 41:8; Yak. 2:23.

Yuma Yitukudizilaku

19. Tunateli kumwimbujola ñahi Yoba?

¹⁹ Tunadizi yumanyi kutalisha ‘hayitoñojoka yaYehova’? Twatela kwiteja Izu daNzambi ditukwasheña kwiluka chikupu mwatoñojokañayi Yehova. Bayi tusha kubula kuwanina kwetu hadi Yehova nikumusompesha kwesekeja  nayililu niyitoñojoka yetuku. Yoba wahosheli nindi: “[Nzambi] himuntu neyi chinidami mwaka nimoni kumwakulaku, mwaka tudiwani hamu nakudisompeshaku.” (Yoba 9:32) Kufwana Yoba, neyi tutachika kwiluka mwatoñojokañayi Yehova, chikutusañumunaña kuhosha netu: “Tiyenu, yumiyi hiyuma yakumpumpu yanjila jindi hohu; twamutiyaña kashawushawu kanti hohu. Chadidimaña nyidimu yindi yañovu mwatweshaña kwilukanyi?”—Yoba 26:14.

20. Chumanyi chitwatela kwila neyi tuwana nsañu yakola muNsona yitunabuli kutiyisha?

²⁰ Chitukutañaña Nsona, twatela kwila ñahi neyi tuwana nsañu yakala kutiyisha, sweje-e kutalisha mwatoñojokañayi Yehova? Neyi tusandujola hansañu ilaña tukañanya kuyitiya, chumichi twatela kuchimona netu hikweseka kwachikuhwelelu chetu mudi Yehova. Anukenu nenu, mpinji yikwawu nsañu yikwawu yatwinkaña mpinji yakumwekesha chitwakuhwelela yililu yaYehova. Tudizozenu nakwiteja netu hitwelukaña yuma yejima yelañayuku. (Mukwa. 11:5) Dichi chikutuleñela kwiteja mazu ahosheli kapostolu Pawulu nindi: “Maheta amaana nayuma yelukayi Nzambi, o chiyakunama! Wuñaji windi, o chiwakañanya kuwiluka! Njila jindi, o chijakañanya kujishinshika! Mwatoñojokayi Yehova welukamu hinyi? Hinyi nashakami nindi hampuña? Muntwinyi wasambilahu dehi kumwinka chuma, mwaka akamufuntishilichu? Muloña yuma yejima yafumaña kudiyena, ayilaña mudi yena, amwililaña yena. Kudi yena kwikali kulema haya nyaka. Amena.”—Rom. 11:33-36.

[Tumazu twaheshina]

Munakwanuka?

• Chumanyi chikutukwasha kutondolwela chaaku chakumusompesha Yehova kwesekeja nayililu yetu?

• Indi kwiluka nyidimu yaYesu kunateli kutukwasha ñahi kwikala ‘hampuña naYehova’?

• Yumanyi yimunadizili kukuhanjeka kwaYehova naMosi niAbarahama?

[Malwihu aKuzatisha haKudiza]

[Nyevulu yidi hefu 5]

Chumanyi chitwadizilaña kunjila yahanjekelelumu Yehova naMosi niAbarahama kutalisha mwatoñojokañayi Yehova?