Indi Yehova Wamonaña—Ñahi Antu Aleyaleyaña?

IYALA wahosheli nindi: “Mumbanda wanyinkeli kushakama nindi diyi wanyinkahu wena mutondu owu, hinukudya.” Kuchinka mumbanda nindi: “Kapela diyi wandimba dichi nadya.” Awa diwu mazu ahosheluwu anvwali jetu atachi Adama naEvu kudi Nzambi, nawa dihatachikili muchidi wawantu chaaku chakuleyaleya.—Kutach. 3:12, 13.

Yehova chayisompesheliyi Adama naEvu hakubula kwovwahila kwawu mumushikila chamwekesheli nawu hetejeli kuleyaleya kwawuku. (Kutach. 3:16-19) Komana twatela kukunkulula netu, Yehova wakaanaña kuleyaleya kwejima? Indi kwiji wetejaña kuleyaleya kukwawu? Neyi dimu, tunateli kwiluka ñahi chaambu chiduhu? Hakwila twakuli awa malwihu, tusambilenu kushinshika chalumbululawu izu dakuleyaleya.

Kuleyaleya himazu ashimunañawu hakulumbulula chaleñela chuma achili, abuli kuchila, hela akabuli kuchila. Kuleyaleya hikulumbulula chuma chalala chaleñela kuluwañesha nawa kunateli kubombelamu kudanakena chikupu kwaleñelaña muntu amwanakeni. Hela chochu, neyi chichamwekeni kudi Adama naEvu, kuleyaleya kunateli cheñi kwikala kudibaaba, wunsahu wakutwamba wakukeña kubuta hachiluwa. Chineli kuleyaleya kwekalaña muniyi njila, kakavulu akujinookaña.

Hakuleyaleya, sweje-e neyi kunakundami kumudimu waNzambi, twatela kubabala kulonda tubuli ‘kudidimba etu aweni.’ (Yak. 1:22) Dichi, tushinshikenu hayakutalilahu yamuBayibolu ninshimbi yikutukwasha ‘muyuma yayiwahi niyaloña yetejewa mudi Mwanta.’—Efwes. 5:10.

Yuma Yakeñañayi Nzambi Nindi Twili

Mwizu daNzambi twawanañamu nshimbi jitwatela kwovwahila etu antu jaYehova. Chakutalilahu, mudimu waheniyi Kristu nindi “yenu mwakelishi atumbanji munyuza yejima,” hilushimbi lwatela kwovwahila atumbanji alala aKristu ejima. (Mat. 28:19, 20) Eñañi, kwovwahila ilu lushimbi kwalema nankashi nawa kapostolu Pawulu wahosheli nindi: “O yihuñu yinukumonami neyi nukubula kushimuna nsañu yayiwahi!”—1 Kor. 9:16.

Hela chochu, antu amakwawu itunadizi nawu Bayibolu hadi mpinji yayilehi achidi kutiya nsonyi yakushimwina nsañu yayiwahi yaWanta waNzambi. (Mat. 24:14) Amakwawu niwena adiña nakushimwina aleka. Indi antu aleka mudimu wakushimwina, mpinji yikwawu ahoshaña nawudi? Yehova wayilili ñahi antu ajinokeleña kwovwahila nshimbi jindi mpinji yakunyima?

Kuleyaleya Kwakaanañayi Nzambi

“Himudimu wakala nankashi.” Sweje-e antu ekala nansonyi, anateli kumona nawu mudimu wakushimwina wakala nankashi. Hela chochu, talenu chuma chitwadizilaña kuchakutalilahu chaYona. Amwinkeli mudimu wamweniyi nindi wakala nankashi, Yehova wamulejeli kuya nakushimuna nsañu yakujilumuna musumba waNineve. Ichi dichuma chamuleñeleli Yona kutiya woma wakuzata iwu mudimu. Nineve wadiña muchima wetuña daAshuri, nawa antu amuAshuri ayilukili nawu adiña atama chikupu. Dichi Yona watela watoñojokeli nindi: ‘Nakahanda ñahi nanawa antu? Chumanyi chakañilawu?’ Neyi hana hitwanukila, watemukili. Hela chochu, Yehova hetejeli kuleyaleya kwaYonaku. Ilaña, Yehova  wamutemesheli cheñi kuya nakushimwina kudi aNineve. Haniyi mpinji, chakadi kutiya woma Yona wayili nakuzata mudimu windi, nawa Yehova wamukiswilili.—Yona 1:1-3; 3:3, 4, 10.

Neyi mutoñojoka nenu mudimu wakushimwina wayikalila chikupu, anukenu nenu “yuma yejima yinatwesheki kudi Nzambi.” (Maku 10:27) Mwatela kukuhwelela nenu Yehova wukuyikolesha neyi mutwalekahu kulomba wukwashi windi nenu yayikiswili mubula woma wakukalakala mudimu wakushimwina.—Luka 11:9-13.

“Inakukeña wanyi.” Mwatela kwila ñahi neyi himudi nampwila yakuzata mudimu wenu wawakwaKristu wakushimwinaku? Mwatela kwiluka nenu, Yehova nateli kuyisañumuna kulonda mwikali nampwila yakuzata. Pawulu wahosheli nindi: “Nzambi diyi wakoñaña mudenu nimuchima wakukeña kwila, nikwila kwakweni, mwakutiyayi yena kuwaha.” (Fwi. 2:13) Dichi, mwatela kumulomba Yehova yayinki muchima wakukeña kwila kukeña kwindi. Mwanta Davidi dicheliliyi. Wamulembeleli Yehova nindi: ‘Nlomboli mwaya nsañu yeyi yalala.’ (Mas. 25:4, 5) Ninenu munateli kwila mwomumu kuhitila mukulomba chikupu nenu Yehova yayinki muchima wakukeña kwila yuma yikumuzañalesha.

Eñañi, neyi tunazeyi hela anatuneñeshi, mpinji yikwawu twatela kudikanjikija kuya nakupompa Kwiitala daWanta hela mumudimu wakushimwina. Neyi chikala mwenimu, komana twatela kutoñojoka netu hitwamukeña Yehovaku? Inehi. Ambuña aNzambi ashinshika kumpinji yakunyima niwena adiña nakutatala chikupu hakwila mwaya kukeña kwaNzambi. Chakutalilahu, Pawulu wahosheli nindi ‘wafumbili mujimba windi,’ kulonda yovwahili nshimbi jaNzambi. (1 Kor. 9:26, 27) Dichi neyi tudinkaku chikupu kulonda tukalakali mudimu wakushimwina, tunateli kukuhwelela netu Yehova wukutukiswila. Muloñadi? Muloña kumukeña Yehova dikwatuleñelaña tudinkeñaku nakwila kukeña kwaNzambi. Kuhitila mukwila mwenimu, twamwakulaña Satana wahoshaña nindi ambuña Nzambi anateli kumukaana neyi aholokela mukweseka.—Yoba 2:4.

“Nidana mpinji.” Neyi mwakañanyaña kuya mumudimu wakushimwina muloña mwatoñojokaña nenu mudana mpinji, chidi chalema chikupu kushinshika cheñi hayuma yimwatwamijañaku. Yesu wahosheli nindi: “Ilaña sambilenu kukeña wanta windi.” (Mat. 6:33) Hakwila nawu mulondeli ilu lushimbi lwalema, mwatela kwikala nachihandilu chapela hela kuhimpa mpinji yakuhema yikali mpinji yakuya nakushimwina. Hela chochu, kuhema niyuma yikwawu yakeñañayi muntu yikweti mpinji yayu, ilaña bayi tuleyelañamu nakudiwula mudimu wakushimwinaku. Kambuña Nzambi watela kutwamijaku yuma yaWanta muchihandilu chindi.

“Nashikilamu wanyi.” Hadaha munateli kutoñojoka nenu himwatelela kwikala mukwakushimuna nsañu yayiwahiku. Ambuña aYehova amakwawu ashinshika akushankulu atoñojokeleña  nawu hiyashikila mukukalakala nyidimu yayinkeleñayi Yehovaku. Talenu chakutalilahu chaMosi. Chamwinkeluwu mudimu kudi Yehova, Mosi wahosheli nindi: “Ala Mwanta wami! Ami neluka kuhosha wanyi! Kanda dehi niilukañahu dehi kuhoshaku, hela ichi chiwunahoshi nanami kambuñeyi hineluki kuhoshaku, ami kwami nalemendenda mukanwa, idimi dami dalema.” Hela chakwila Yehova wamukolesheli, Mosi wakwili nindi: “Ala Mwanta wami! Atemeshi mwani, yowu wunatemeshi yowu.” (Kwid. 4:10-13) Indi Yehova welili ñahi?

Yehova hamulekesheli Mosi kuzata iwu mudimuku. Hela chochu, Yehova watondeli Aroni nindi yekali nkwashi yaMosi hakuzata iwu mudimu. (Kwi. 4:14-17) Ilaña, yaaka yahiñiluhu, Yehova wamukwashili Mosi nawa wamwinkeli yuma yakeñeleñayi hakwila yatweshi kuzata mudimu wamwinkeliyi Nzambi. Makonu, munateli kukuhwelela nenu Yehova nateli kusañumuna akwenu akakwitiya apama kulonda ayikwashi ninenu kuzata mudimu wenu wakushimwina. Sweje-e dinu, Izu daNzambi datukonkomwenaña nawu Yehova nateli kutwinka ñovu yakuzata mudimu watwinkayi.—2 Kor. 3:5; talenu chikasha chinakwila nawu “Yaaka Yinazañaleli Nankashi Muchihandilu Chami.”

“Kudi waneñesheli.” Antu amakwawu alekaña kushimwina hela kuya nakupompa kuchipompelu hamuloña wakuyineñesha, atoñojokaña nawu Yehova wukwiteja kuleya kwamuchidiwu kwakuleka kuzata mudimu wawu wawakwaKristu. Hela chakwila twahilaña neyi muntu yatuneñesha, komana mwalala twatela kuyimona neyi hinjila yakulekelamu kuzata nyidimu yawakwaKristu? Pawulu nimukwawu mukwakwitiya Baranaba atela  aneñeli hama hanyima yakubula kutiyañana ‘kwavulumwini ntadi yayeni.’ (Yil. 15:39) Komana wonsu wawu alekeli kuzata mudimu wakushimwina hamuloña wantadi yavulumukili? Hiyalekeluku!

Chochimu, neyi anayineñeshi kudi mukwenu mukwakwitiya, mwatela kwiluka nenu Satana, wakeñaña kuyiluwañesha diyi chilumbu chenu bayi mana kwenu mukwaKristu wabula kuwaninaku. Neyi ‘mudikaña nindi, nakukola mukukuhwelela kwenu mbe,’ Diyabolu hakutwesha kuyiluwañeshaku. (1 Pet. 5:8, 9; Ŋal. 5:15) Eñañi neyi mwikala nachikuhwelelu chakola, ‘himukatiya nsonyuku.’—Rom. 9:33.

Chumanyi Chitwatela Kwila Neyi Kudi Yuma Yinakutukañesha?

Haniyi yakutalilahu yantesha yakuleyaleya, chinamwekani chikupu nawu kwosi kuleyaleya kwamuNsona kwetejawu kwatela kutuleñela tukaani kwovwahila nshimbi jaYehova, kushilahu nimudimu wakushimwina nsañu yayiwahi. Kubombelahu, kudi yuma yinateli kutuleñela tubuleña kuzata chikupu mudimu wetu wakushimwina. Nyidimu yikwawu yakuspiritu yinateli kutuleñela tukañanyeña kwikala nampinji yeneni yitwemika yakuzata mumudimu wakushimwina. Cheñi, mpinji yikwawu tunateli kuzeya nankashi hela kuholokela mukankati nawa hitunateli kuzata nakushika hakumina ñovu jetu mumudimu waYehovaku. Dichi, Izu daNzambi datulejaña nawu Yehova weluka mpwila yetu nawa welukaña yuma yatukañeshaña.—Mas. 103:14; 2 Kor. 8:12.

Dichi, twatela kushaku kashinshi kulonda tubuleña kudisompesha hela kusompesha chikupu antu amakwawu. Kapostolu Pawulu wasonekeli nindi: ‘Eyi wukusompesha ñamba yambala, yeyinyi? Hela nemani hela nadimbuki, hinsañu yaMwanta windi yomweni.’ (Rom. 14:4) Chatela tudesekejeña nawantu amakwawu, twatela kwiluka netu “wejima wetu twamba kalumbulula kudi Nzambi mutwelaña hamuntu hamuntu.” (Rom. 14:12; Ŋal. 6:4, 5) Neyi tulomba kudi Yehova nawa tumuleja kuleyaleya kwetu, wejima wetu twatela kwila mwenimu ‘nachinleji chamuchima chachiwahi.’—Heb. 13:18.

Kumukalakela Yehova Chikwatuzañaleshelaña

Wonsu wetu twatela kumukalakela Yehova namuzañalu, hichikweti muloña nachidi chihandilu chetuku, mpinji yejima nshimbi jindi jekala jaloña nawa hijakalaku. Muloñadi chitunahosheli muniyi njila?

Izu daNzambi dahosha nawu: “Antu atela kuyilila mwamuwahi hiwuchidi nañovu yakuyilila, bayi wuleka mwoku.” (Yish. 3:27) Chumanyi chimunadizi munichi chishimu chinakuhosha hanshimbi jaNzambi? Yehova hanakuyileja nindi mwatela kufwila kwesekeja ñovu jenu najawamana kwenuku, ilaña mwatela kumukalakela ‘himuchidi nañovu yakuyilila.’ Eñañi, wonsu wetu twatela kumukalakela Yehova namuchima wetu wejima, chili tudana ñovu hela tudi nañovu chikupu.—Luka 10:27; Kol. 3:23.

[Chikasha/Mwevulu wudi hefu 14]

“Yaaka Yinazañaleli Nankashi Muchihandilu Chami”

Hela chakwila tukweti kukala kweneni kwakumujimba hela muyitoñojoka, bayi tunyakala kukunkulula netu yumiyi yinateli kutukañesha kukalakala chikupu mumudimu wakushimwinaku. Chakutalilahu, talenu chuma chamwekeni kudi Ernest, mana kwetu mukwaKristu wamwituña daCanada.

Ernest wadiña nawufwayi wamukañesheleña kuhosha chachiwahi nawa wadiña nansonyi chikupu. Chadisenwiniyi nyima, walekeli mudimu windi wakutuña-tuña. Hela chakwila wekalili chifwayi, chihandilu chindi chamukañesheleña kuzata mpinji yeneni mumudimu wakushimwina. Kukolesha kwatiyileñayi hakupompa kwachipompelu kwakuzataku wupayiniya wakukwasha kwamusañumwini chikupu. Hela chochu, wadimweni nindi hanateleli kuzata iwu mudimu wakushimwinaku.

Hakwila yeluki nindi hanateli kuzata mudimu wawupayiniya wakukwashaku, wasonekesheli kuzataku hadi kakweji kamu. Chamuhayamishili, muloña wakalakeli iwu mudimu chachiwahi. Dichi watoñojokeli nindi, ‘ichi dinu kunahu hinakatwesha cheñuku.’ Hakwila nindi yeluki neyi mwalala, wasonekesheli kakweji kakwawu, nawa wazatili chachiwahi.

Ernest wazatili wupayiniya wakukwasha hadi chaaka chimu, ilaña wahosheli nindi, “Neluki nami hinateli kwikala payiniya wampinji yejimaku.” Cheñi hakwila yeluki nindi mwalala, wasonekesheli mudimu wawupayiniya wampinji yejima. Wahayamini chamanishiliyi chaaka chatachi chakuzata wupayiniya wampinji yejima. Wafuukwiluhu kutwalekahu nawa wadiña namuzañalu hakukalakala wupayiniya wampinji yejima hadi yaaka yiyedi, nichafwiliyi hamuloña wakusweja kwayikatu yindi. Hela chochu, henohu kanda yafwi, wavulileña kuleja enyi amuhempwileña iku nakudila nindi, “Yaaka yinamukalakeleli Yehova neyi payiniya diyi yaaka yinazañaleli nankashi muchihandilu chami.”

[Mwevulu wudi hefu 13]

Tunateli kushinda kukala kudi kwejima kunateli kutukañesha kuzata mudimu wakushimwina

[Mwevulu wudi hefu 15]

Yehova wazañalalaña neyi tumukalakela nawumi wetu wejima kwesekeja nahanakumini ñovu jetu