Komana Mwatachikilañahu Kulemesha Akwenu Akakwitiya?

“Keñañanenu nawana kwenu nawushona; itejenu mwinenu abadiki kulema.”—ROM. 12:10.

1, 2. (a) Indi Pawulu wakonkomweneni nindidi mumukanda wasonekeleliyi Aroma? (b) Malwihwinyi itukuhanjekahu?

 MUMUKANDA windi wasonekeleliyi aRoma, kapostolu Pawulu wakonkomweneni chichalemena etu akwaKristu kumwekesha kukeña muchipompelu. Watulejeli nindi kukeña kwetu “kubuli wufwikiji.” Wahosheli cheñi ‘hakukeñañana nawana kwetu’ nawa iku kukeña twatela kukumwekesha munjila ‘yawushona.’—Rom. 12:9, 10a.

² Eñañi, kukeña ana kwetu kwabadika kumwekesha kukeña kwahakanwa. Twatela kumwekesha kukeña kuhitila muyuma yitwelaña. Kwosi muntu wunateli kwiluka kukeña kwetu, chiña neyi tukumwekesha muyuma yitwelaña. Dichi, Pawulu watwalekeluhu nakukonkomwena nindi: “Itejenu mwinenu abadiki kulema.” (Rom. 12:10b) Chumanyi chakeñekaña hakumwekesha kalemesha? Muloñadi chichalemena kutachikilahu kulemesha akwetu akakwitiya? Tunateli kwila ñahi mwenimu?

Kumwekesha Kalemesha Kwatalisha Mudihi?

3. Indi izu dakwila nawu “kulema” datalisha mudihi mumadimi atachi amuBayibolu?

³ Izu dadeni dachiHeberu dabalumunawu nawu “kulema” datalisha mukumona muntu nawu walema. Muntu alemeshawu amumonaña nawu wabadika hela walema. Izu dodimu dachiHeberu davula kubalumunawu muNsona nawu “mpuhu,” damwekeshaña cheñi kusweja kwakama muntu alemeshawu. (Kutach. 45:13) Izu dachiGriki dabalumuna nawu “kulema” muBayibolu datalisha mukutumbakesha, mpuhu, nikulemesha chikupu. (Luka 14:10) Eñañi, antu itwalemesha, twayikeña nankashi.

4, 5. Indi kulemesha antu amakwawu kwatalisha mudihi? Lumbululenu.

⁴ Indi kulemesha antu amakwawu kwatalisha mudihi? Kulemesha ana kwetu hikwatalisha hohu mukumwekesha nawu twayilemeshaku. Hela chakwila kalemesha twakimwekeshaña munjila yitwashakaminañamu nawantu amakwawu, katachikaña nachitwamonaña hela chitwatoñojokaña hadi amana kwetu.

⁵ MukwaKristu nateli kulemesha ñahi chikupu akwawu akakwitiya neyi kalemesha hikanakufuma hamuchimaku? (3 Yow. 9, 10) Neyi chochatenkumaña nkenu nikutwalekahu kumena chiwahi neyi nyiji yijiyama heseki, kalemesha kanateli kwikala kalala nawa kanateli kutwalekahu neyi kafumaña hamuchima. Neyi tukañanyaña kulemesha antu amakwawu chakufuma hamuchima, mumpinji yantesha kalemesha kamanaña neyi chomaña nkenu yinatumbuwu hamaseki oma. Dihafumini Pawulu hakukonkomwena chikupu hakulema nindi: “Kukeña kwenu kubuli wufwikiji.”—Rom. 12:9; tañenu 1 Petulu 1:22.

Lemeshenu Antu Aleñawu ‘Muchifwanisha chaNzambi’

6, 7. Muloñadi chitwatela kulemeshela antu amakwawu?

⁶ Chineli chakeñekaña kwikala nakalemesha  kakeni hakwila nawu tulemeshi antu chakufuma hamuchima, bayi tuleka kulondela chahosha Nsona kutalisha hakulemesha ana kwetu ejimaku. Ichi dinu, tushinshikenu hayuma yiyedi yahoshawu muNsona.

⁷ Kwambukaku nayileñaleña yikwawu yahamaseki, antu ayileñeli ‘muchifwanisha chaNzambi.’ (Yak. 3:9) Dichi, tukweti yililu yekala naNzambi yidi neyi kukeña, maana niwuñanji. Talenu chuma chikwawu chatwinkawu kudi Nleñi yetu. Ñimbi yamasamu wahosheli nindi: “Eyi Yehova, . . . , Yeyi wunashi lubanji lweyi hewulu damawulu. . . . Wunamwili [muntu] wakukuminamu chanti hadi añelu, wunamuvwiki chibañula nichakulema.” (Mas. 8:1, 4, 5; 104:1) * Kumwinka muntu kalemesha kamutelela hinjila yakulemeshelamu Yehova, nsulu yakalemesha nawa walemesha antu ejima. Dichi, neyi tulemesha muntu, dikwila nawu tunakulemesha Yehova walemeshaña antu. Chineli Nsona yatukoleshaña kulemesha antu ejima, komana twatela kulemesha chikupu akwetu akakwitiya.—Yow. 3:16; Ŋal. 6:10.

Tudi Antu Evumu Dimu

8, 9. Muloñanyi washimunayi Pawulu watuleñelaña kulemesha akwetu akakwitiya?

⁸ Chuma chikwawu chatuleñelaña kudilemesha wumu namukwawu achishimuna kudi Pawulu. Henohu kanda yakonkomweni hakumwekesha kalemesha, wahosheli nindi: “Keñañanenu nawana kwenu nawushona.” Izu dachiGriki dabalumunawu nawu “nawushona” datalisha kumpanda yakola yanuñaña chisaka chakeñañana nawa chazatilaña hamu. Dichi, kuhitila mukuzatisha idi izu, Pawulu wakonkomweneni nindi antu amuchipompelu atela kudikeña chikupu neyi chochadikeñaña chisaka chanuñañana. (Rom. 12:5) Kubombelahu, ilukenu nenu Pawulu wasonekeleli awa mazu akwaKristu awayishewa, wejima wawu ekala dehi anyana kaTata yawu wumu, Yehova. Dichi awayishewa, adiña muchisaka chanuñañana munjila yalema nankashi. Dichi, akwaKristu awayishewa mumafuku aPawulu elukili nsañu yalema chikupu yayileñeleleña kudilemesha wumu namukwawu. Chochimu niakwaKristu awayishewa makonu.

⁹ Indi “anyikoku acheñi”? (Yow. 10:16) Hela chakwila kanda ekali anyana kaNzambi, anateli kuditena wumu namukwawu nawu mana kwami nimuhela muloña ekala muchisaka chanuñañana chawakwaKristu chamukaayi kejima. (1 Pet. 2:17; 5:9) Dichi, neyi anyikoku acheñi eluka chikupu muloña waditambikilañawu wumu namukwawu nawu “mana kwami” hela “muhela,” dikwila nawu niwena akweti muloña walema chikupu wakulemesha akwawu akakwitiya chakufuma hamuchima.—Tañenu 1 Petulu 3:8.

Muloñadi Kulemesha Akwetu Chikwalemena?

10, 11. Muloñadi kumwekesha kukeña kwakufuma hamuchima chikwalemena?

¹⁰ Muloñadi kulemesha akwetu chakufuma hamuchima chikwalemena chikupu? Muloña: Kuhitila mukulemesha amana kwetu niahela, twaleñelaña chipompelu chamukaayi kejima kwikala chakola nawa chanuñañana.

¹¹ Hela chochu, tweluka netu kwikala nawubwambu wakola naYehova nikutambwila wukwashu waspiritu yindi diyi nsulu yabadika kutwatambwilaña ñovu yitukweti etu akwaKristu alala. (Mas. 36:7; Yow. 14:26) Chochimu, neyi akwetu akwakwitiya atulemesha, twakoleshewaña. (Yish. 25:11) Twazañalalaña neyi muntu yatuhameka chakufuma hamuchima nikutulemesha. Chatuleñelaña kutwalekahu kwikala amuzañalu nikufwila kwenda munjila yaya kuwumi. Hadaha mwatiyahu dehi muzañalu wamuchidiwu.

12. Wejima wetu tunateli kuleta ñahi kukeñañana muchipompelu?

¹² Chineli Yehova weluka nindi twakeñaña  kutulemesha, kuhitila Mwizu dindi watukonkomwenaña nindi “itejenu mwinenu abadiki kulema.” (Rom. 12:10; tañenu Matewu 7:12.) AkwaKristu ejima alondelaña iku kufumba kwakuwahi aletaña kukeñañana hakachi kawamana kwetu akwaKristu. Dichi, twatela kudihula netu, ‘Mpinjinyi yinamwekesheli kalemesha kakufuma hamuchima mumazu nimunzatilu kudi mana kwami hela muhela muchipompelu?’—Rom. 13:8.

Wonsu Wetu Twatela Kutachikilahu Kulemesha Akwetu

13. (a) Hinyi watela kutachikilahu kuhana kalemesha? (b) Mazu asonekeliyi Pawulu ekala haAroma 1:7 amwekeshañadi?

¹³ Hinyi watela kutachikilahu kuhana kalemesha? Mumukanda wasonekeleliyi aHeberu, Pawulu wateneni aeluda akwaKristu nindi “anlomboli jenu.” (Heb. 13:17) Eñañi, aeluda alombolaña munyidimu yashiyashana. Hela chochu, hakwikala atubiña twawanyikoku, atela kutachikilahu kulemesha akwawu akakwitiya, kushilahu niakwawu aeluda. Chakutalilahu, neyi aeluda abulakana hamu nakuhanjeka hayuma yakuspiritu yinakukeñeka muchipompelu, adilemeshaña wumu namukwawu kuhitila mukutiyilila mazu anakuhosha mukwawu eluda. Cheñi, adilemeshaña kuhitila mukushinshika hayitoñojoka nimazu anahoshi aeluda ejima hakufuukulahu. (Yil. 15:6-15) Twatela kwiluka netu, mukanda wasonekeliyi Pawulu kudi Aroma hasonekeleli hohu aeludaku, ilaña wasonekeleli chipompelu chejima. (Rom. 1:7) Dichi, awa mazu akonkomwena nawu tutachikileñahu kulemesha, anakundami kudi wejima wetu makonu.

14. (a) Lumbululenu chaambu chidi hakumwekesha kalemesha nikutachikilahu kuhana kalemesha. (b) Lwihwinyi lutwatela kudihula?

¹⁴ Talenu cheñi chuma chikwawu chashimwini Pawulu mukufumba kwindi. Walejeli akwawu akakwitiya muRoma kubula kumwekeshaña hohu kalemesha ilaña kutachikilahu kumwekesha kalemesha. Komana hadi chaambu? Toñojokenu hanichi chakutalilahu. Komana ntañishi nateli kukanjikija izanvu danyana yashikola yeluka kutaña nindi eluki kutaña? Inehi. Muloña eluka dehi kutaña. Ilaña, ntañishi watela kuyikwasha anyana ashikola kulonda elukishi kutaña. Chochimu, kukeñañana wumu namukwawu, kwatuleñelaña kumwekesha kalemesha, dichinjikijilu chakwilukilaku akwaKristu alala. (Yow. 13:35) Dichi, neyi chochatela atudizi eluka kutaña kuyilaku hambidi kuhitila mukwilukisha kutaña, ninetu tunateli kuyilaku hambidi kuhitila mukutachikilahu kumwekesha kalemesha.  (1 Tesa. 4:9, 10) Wonsu wetu atwinka iwu mudimu. Twatela kudihula netu, ‘Komana natachikilañahu kulemesha amakwawu muchipompelu?’

Lemeshenu ‘Atuzweñi’

15, 16. (a) Hakumwekesha kalemesha, hinyi itwatela kubula kudiwula, nawa muloñadi? (b) Chumanyi chatela kumwekesha nawu twalemeshaña amana kwetu niahela ejima chakufuma hamuchima?

¹⁵ Hakumwekesha kalemesha, hinyi itwatela kubula kudiwula muchipompelu? Izu daNzambi datulejaña nawu: “Muntu wamutiyilaña kazweñi luwi wudi nakusondamisha Yehova, yena wakamufweta cheñi nachuma chachiwahi chaneliyi.” (Yish. 19:17) Lushimbi ludi hanawa mazu lwatela kutukwasha ñahi chitukufwilaña kutachikilahu kumwekesha kalemesha?

¹⁶ Munateli kwiteja nenu antu amavulu akeñaña kulemesha antu ekala hayifulu yahewulu, ilaña antu wowamu alemeshañawu ayidiwulaña nawa hiyayilemeshañaku. Ilaña, Yehova helaña mwenimuku. Wahosha nindi: “Akunlemesha diwu nukulemesha.” (1 Sam. 2:30; Mas. 113:5-7) Yehova walemeshaña antu ejima amukalakelaña nikumulemesha. Hadiwulaña ‘kazweñiku.’ (Tañenu 1 Samweli 2:8; 2 Kushi. 16:9) Eñañi, twafwilaña kumwimbujola Yehova. Dichi hakwila nawu twiluki neyi twamwekeshaña kalemesha kakeni, twatela kudihula netu, ‘Indi antu abula yifulu muchipompelu nayimonaña ñahi?’ (Yow. 13:14, 15) Ñakwilu yanilu lwihu yikumwekesha chitwalemeshaña amakwawu chakufuma hamuchima.—Tañenu Afwilipi 2:3, 4.

Twalemeshaña Akwetu Kuhitila Mukwikala Nampinji Yakuyitiyilila

17. Njilanyi yayeni mutwatela kutachikilahu kumwekesha kalemesha, nawa muloñadi?

¹⁷ Njilanyi yayeni mutwatela kutachikilahu kuhana kalemesha kudi antu ejima muchipompelu? Kuhitila mukwikala nampinji yakutiyilila yuma yinakukeña kuhoshawu. Muloñadi? Hakwikala akwaKristu, hitwekalaña nampinjiku, nawa mpinji yeneni yamaninaña kukuzata nyidimu yayivulu yalema yamuchipompelu. Dimuloña wutwalemeshela chikupu mpinji. Dichi, tweluka netu, hitwatela kulwishaña netu amana kwetu niahela ekaleña nampinji yeneni yakutiyililaña kuyuma yitunakukeña kuhoshaku. Cheñi nawa, twahamekaña neyi amakwawu muchipompelu eluka nawu hiyatela kulwishaña neyi anakukeña nawu twikali nampinji yakutiyilila kuyuma yinakukeña kuhoshawu.

18. Neyi chinamwekeshuwu hamwevulu wudi hefu 18, tunateli kumwekesha ñahi kudihana kwetu kwakukeña kutiyilila akwetu akwakwitiya?

¹⁸ Kubombelahu, tweluka netu (sweje-e atubiña muchipompelu) kudihana kwetu kwakuleka nyidimu yetu nakutiyilila akwetu akakwitiya kwamwekeshaña nawu twayilemesha. Munjilanyi? Kuhitila mukuleka nyidimu yetu kulonda tutiyilili amana kwetu, dikwila nawu tunakuyileja netu, ‘Alema nankashi kudetu nawa chachiwahi kuwana mpinji yakwikala nawu hamu chatela nitwalekuhu namudimu wunakwila.’ (Maku 6:30-34) Neyi nehi tukumwekesha netu hitwayilemeshaku. Neyi tujinookaña hakuleka nyidimu yitunakwila kulonda twikaliku nakapinji kakutiyilila kudi mana kwetu, nateli kutoñojoka nindi hitwamulemeshaku. Hela chochu, mpinji yikwawu kwekalaña yuma yamwekanaña mukunyakashana yitwatela kubula kuluwañesha. Dichi, kudihana kwetu—hela kujinooka—hakuwana mpinji yakutiyilila kudi antu  amakwawu kwamwekeshaña neyi chakwila twalemesha chikupu amana kwetu niahela chakufuma hamuchima.—1 Kor. 10:24.

Fwilenu Kwikala Atachi Hakulemesha Akwenu

19. Kubombela hakuwana mpinji yakuhosha nawu, njilanyi yikwawu mutwatela kumwekeshela kalemesha kudi akwetu akakwitiya?

¹⁹ Kudi njila jikwawu jalema mutwatela kumwekeshela kalemesha kudi akwetu akakwitiya. Chakutalilahu, neyi tuwana mpinji yakuhosha nawu twatela kuyitiyilila. Yehova cheñi, wemika chakutalilahu chachiwahi. Davidi ñimbi yamasamu wahosheli nindi: “Mesu aYehova atalaña antu aloña, nimatu indi atiyililaña chakutambikawu.” (Mas. 34:15) Twafwilaña kumwimbujola Yehova kuhitila mukutiyilila chikupu amana kwetu, sweje-e anakukeña nawu tuyikwashi. Kuhitila mukwila mwenimu twayilemeshaña.

20. Yumanyi yitwatela kwanukaña kutalisha hakumwekesha kalemesha?

²⁰ Kwesekeja nayuma yitunadizi, twatela kwanukaña chikupu muloña wukutuleñelaña kumwekeshaña kalemesha kudi akwetu akakwitiya. Kubombelahu, twatela kuwana njila yakutachikilañahu kumwekesha kalemesha kudi antu ejima, kushilahu niatuzweñi. Kuhitila mukulondela njila jitunahanjekuhu, tukukoleshaña mpanda yakukeñañana nawamana kwetu nikunuñañana muchipompelu. Dichi, wonsu wetu tutwalekuhu kutachikilahu kumwekesha kalemesha kudi wumu namukwawu bayi kuhana kalemesha hohuku. Komana munafuukuluhu kwilaña mwenimu?

[Tumazu twaheshina]

Munakwanuka?

• Indi kulemesha amakwawu kwatalisha mudihi?

• Yumanyi yatuleñelaña kulemesha akwetu akakwitiya?

• Muloñadi chichalemena kudilemesha wumu namukwawu?

• Munjilanyi mutwatela kulemeshela akwetu akakwitiya?

[Malwihu aKuzatisha haKudiza]

[Mwevulu wudi hefu 18]

Tunateli kulemesha ñahi akwetu akakwitiya?