Kwashenu Atwansi Kulonda Eluki Kuloñesha kwaYehova

ANYANA akeñaña kudiza. Toñojokenu hamalwihu enhwileñawu anyana anyanya awaIsarela muEjipitu hawufuku waPaseka yatachi nawu: ‘Muloñadi chajahilawu mwana kamukoku?’ ‘Muloñadi Atata chinakushilawu mashi hachipamba chahewulu dachinsu?’ ‘Tunakuya kudihi?’ Yuma yalejeliyi Yehova atata jawantu amuIsarela diyi yamwekeshaña nawu wakwili awa malwihu. Yehova wayilejeli kutalisha hakwanakana yidika yaPaseka yakumbidi nindi: “Chakayilawu anyanenu nawu, Indi chimukwila mudimu iwu munatwali mudihi? enu kwenu mwakeli nenu, Tukuketula chimuna chapaseka yaYehova, wawutaminini hamatala awanyana kaIsarela muEjipitu, hatapiliyi aEjipitu, hapulwishiliyi mataletu.” (Kwid. 12:24-27) Kuhiñahu, Yehova wayanukishili anvwali amuIsarela hakulema kwakwakula malwihu enhwileñawu anyanawu kutalisha ‘hanshimbi, niwuñaji,’ wayilejeliyi Yehova.—Kuhit. 6:20-25.

 Chakadi nikujina, Yehova wakeñeleña nindi anyana awaneña ñakwilu yayiwahi yamalwihu awu kutalisha hakudifukula kwalala, ñakwilu yayisañumwineña kumukeña Yehova Nzambi yawu nawa Chamwinu chawu. Makonu, Yehova wakeñaña nindi anyana eleña mwomumu. Njila yimu mwatela anvwali kulejela anyanawu kumukeña Nzambi namuchima wejima niantu jindi, yidi yakuyikwasha kulonda eluki kuloñesha kwaYehova nikwiluka chitwahetelaña muniku kuloñesha. Ichi dinu tushinshikenu njila jikwawu jakukwashilamu atwansi kulonda eluki yuma yayivulu kutalisha hakuloñesha kwaNzambi.

Chipompelu Chamwiluña Denu

Atwansi atela kwiluka chipompelu mwapompelaña chisaka chenu. Hakwila nawu mukoñi mwenimu, enu anvwali mwatela kuyaña nawanyanenu kukupompa kwejima kwawakwaKristu. Neyi mwila mwenimu, mukulondelaña chakutalilahu chemikililiyi Yehova aIsarela, wayilejeli nindi: “Wakapompeshaña antu ejima, niamayala, niambanda, niatwansi . . . , kulonda akatiyi, akadizi, akatiyi Yehova Nzambi yenu woma, akashuku muchima wakwila mazu ejima anshimbiji; nianyanawu abulili kwiluka akatiyi, akadizi kumutiya Yehova Nzambi yenu woma.”—Kuhit. 31:12, 13.

Anyana anateli kutachika kudiza Izu daYehova, kufuma tuhu kuwansi. Kapostolu Pawulu wahosheli hadi Timotewu nindi: “Kufumisha kuwansi wuneluki nyikanda yajila.” (2 Tim. 3:15) Hakupompa Mwitala daWanta, anyana anyanya niwena atachikaña kwiluka nsañu yinakutañishawu nikwiluka tumina twaWanta. Nawa adizaña chakuzatisha nikulemesha Bayibolu ninyikanda yashindamena haBayibolu. Kubombelahu, hakupompa kwetu atachikaña kwiluka chililu  chelukilañawu atumbanji alala aKristu, chililu chakukeña kwalala. Yesu wahosheli nindi: “Tiyenu, nukuyileja lushimbi lwalwiha nami, Mukeñañani. Chinayikeñami, ninenu nawa keñañanenu. Neyi mukukeñañana, dihu hakayilukilawu antu ejima nawu mudi atumbanji twami.” (Yow. 13:34, 35) Kukeña kwalala nikukiñewa kwekala Hetala daWanta kunateli kukokola anyana nawa kukuyikwasha kuyaña kukupompa kwawakwaKristu mpinji yejima muchihandilu chawu.

Neyi mwikala nachaaku chakunyakalaña kushika Hetala daWanta nikushimbulahu chantesha hanyima yakupompa, anyanenu akwikala nampinji yakukwata amabwambu. Chatela mulekeña anyanenu ahanjekeña hohu nawakwawu atwansi, komana kwila muyileja ahanjekeña nawamana kwetu niahela ejima nehi? Neyi adiluka nawakulumpi, anyanenu akwiluka nawu akulumpi akela nayakutalilahu yayiwahi yayivulu nimaana. Neyi chochamukwashiluwu kansi wanyanya Uziya, mwanta wawaYudeya, kudi Zekariya wakushankulu, ‘mukwakudizisha mwaya kwakama Nzambi,’ antu anamukalakeli Yehova nakashinshi makonu hadi yaaka yayivulu akwashaña chikupu atwansi. (2 Kushi. 26:1, 4, 5) Hampinji yimudi Mwitala daWanta, munateli kumulumbulwila mwanenu mudimu walayibulali, mbañu hashañawu nsañu, niyuma yikwawu.

Kuloñesha kwaMukaayi Kejima

Anyana atela kwiluka nawu chipompelu chamwiluña denu chekala hayipompelu yakubadika ha 100,000 yamukuloñesha kwamukaayi kejima. Lumbululenu yuma yekala muniku kuloñesha, chikwazatikaña, nimudimu wukweti anyana wakukwasha nyidimu yamukuloñesha. Yilejenu muloña wumwatalilaña kupompa kwañinza, kupompa kwankambi, nikuhempula kwankoñi wañinza.—Talenu chikasha chinakwila nawu “Nsañu Yimwatela Kuhanjekahu Hakudifukula kwaChisaka,” hefu 28.

Neyi mudi nampinji, tambikenu ankoñi endaña, amishonali, antu amuchisaka chaBeteli, niankoñi amakwawu ekala mumudimu wampinji yejima kwitala denu nakudya nawu. Bayi mutoñojoka nenu hiyakweti mpinji yakuhanjika nawatwansuku. Awa ankoñi adi mumudimu wampinji yejima afwilaña kwimbujola Yesu, wetejeleña anyana anyanya nikuhosha nawu. (Maku 10:13-16) Anyanenu anateli kwimika chikonkwanyi chakuzata mudimu wampinji yejima, neyi atiya ambuña aYehova anakushimuna yakutalilahu.

Yumanyi yikwawu yimwatela kwila hamu neyi chisaka kulonda mukwashi anyanenu elukishi kuloñesha kwaYehova? Iyi diyi njila yikwawu yimwatela kulondela: Imikenu chikonkwanyi chachisaka chakudizaña mukanda waJehovah’s Witnesses—Proclaimers of God’s Kingdom. Konkomwenenu hadi ambuña aYehova chamwekesheleñawu kudihana, kudizoza, nikushinshika. Yilejenu chayizatishiliyi Yehova hakushimwina nsañu yayiwahi iseki dejima. Zatishenu mavidiyo atuñañawu mukuloñesha kwaYehova kulonda muyidizishi yuma yalema yitwadizilaña kuyuma yakunyima nimakonu. Neyi chinatwesheki, mwatela kwendela kasanji kamutayi nimukala waBeteli mwituña denu hela mumatuña amakwawu. Kuhempula awa maluña kunateli kuleñela anyanenu kwiluka kuloñesha kwaYehova kwaheseki kwalombolañawu kudi izanvu danduñu washinshika chikunakuzata hakuloñesha yakudya yakuspiritu nikuhana wunlomboli kudi amana kwetu mukaayi kejima, neyi chelileñawu muyaaka nkulakaji yatachi C.E.—Mat. 24:45-47; Yil. 15:22-31.

Mwana Wejima Mulumbulwilenu Nsañu Yatela Kutiyishayi

Hakudizisha anyanenu, mwatela kulondela njila yatañishilileñamu Yesu apostolu indi. Mpinji yimu wayilejeli nindi: “Nichidi nayuma yayivulu yakuyileja, ilaña katataka himukuyitweshaku.” (Yow. 16:12) Yesu hayilejeli  atumbanji twindi nsañu yayivulu hampinji yoyimuku. Ilaña, wayidizishileña chovu-chovu nsañu yalala yalema kulonda ayitiyishi chachiwahi. Munjila yoyimu, bayi musweja kuyileja anyanenu nsañu yayivulu hampinji yimuku. Kuhitila mukuyidizisha mpinji yejima nawa chovu-chovu nsañu yamukuloñesha, mukutwalekahu nakusañumuna mpwila yawu. Chikukulañawu anyanenu, munateli kufuntishahu nsañu yadiziluwu nikukonkomwenahu.

Chipompelu chawakwaKristu chinateli kuyikwasha chikupu hakwila mwikali nawubwambu wakola naNzambi, nawa atwansi adikitaña chikupu muniyi nyidimu ekalaña nañovu yakushinda kuluwañesha kwamukaayi kaSatana. (Rom. 12:2) Tunakuhweleli netu mukwikala namuzañalu wakukwasha anyanenu kulonda eluki chikupu kuloñesha kwaYehova. Nankisu yindi, tunakulomba netu atwalekuhu kukolela chikupu kukuloñesha kwindi nikudi Nzambi wakukeña itwakalakelaña.

[Chikasha/Mwevulu wudi hefu 28]

Nsañu Yimwatela Kuhanjekahu Hakudifukula kwaChisaka

Iyi diyi nsañu yinakundami kukuloñesha kwaYehova yimwatela kuhanjekahu haKudifukula kwaChisaka kwamelela.

▪ Shinshikenu chatachikili chipompelu chamwiluña denu. Chatachikili mwakanyi nawa chatachikili ñahi? Kudihu Matala aWanta amakwawu azatishileña chipompelu? Hakuhanjeka haniyi nsañu, komana kwila mutambika muntu wunashimbuli muchipompelu kulonda yaakuli malwihu awanyanenu nehi?

▪ Lumbululenu muloña wutwekalilaña nakupompa kwachipompelu kwambo-mboka nikwamaneni, nianyana chiyatela kuhetelamu.

▪ Hoshenu hamudimu wazataña mashikola amboka-mboka ekala mukuloñesha kwaYehova. Yilejenu yakutalilahu yamwekeshaña nyikabu yayiwahi yasoñaña antu ahita munawa mashikola.

▪ Kwashenu atwansi eluki kulema kwakwikala mukwakushimwina nsañu yayiwahi wampinji yejima. Yilejenu chiyatela kubombelawu kulipoti yamukaayi kejima yasonekañawu muYearbook of Jehovah’s Witnesses.

▪ Hoshenu hanyidimu yampinji yejima yashiyashana yatela kuzata atwansi mukuloñesha kwaYehova. Kapetulu 10 kamukanda waOrganized to Do Jehovah’s Will dimumwatela kuwana nsañu yayiwahi yamuchidiwu.

▪ Kwashenu atwansi eluki muloña wutwalondelaña njila jatanjikawu muchipompelu. Yilumbulwilenu eluki chiyatela kubulila kwilawu yuma nkankawawu mukuloñesha kwaYehova, hela mutuyuma twanyanya. Yilejenu chiyatelawu kuleta kunuñañana muchipompelu kuhitila mukulondela wunlomboli wawaeluda.

[Mwevulu]

Anyanenu akuhetelamu neyi akwata wubwambu nawankoñi anakalakali hadi yaaka yayivulu

[Nyevulu yidi hefu 26]

Neyi chichadiña muIsarela wakushankulu, anvwali makonu afwilaña kwakula chachiwahi neyi ayihula hakuloñesha kwaYehova