Natwalekañahu Nakudikita Mukuloñesha kwaYehova

Washimwini Vernon Zubko

NAKULILI hamukala wadiña kwakwihi naStenen, mukabeta kaSaskatchewan, mwituña daCanada. Anvwali jami, aFred naAdella, azatileña nañovu hakwila atukwashi kuspiritu nikumujimba etu anyanawu, muhelami wamukulumpi, Aurellia, ninami kushilahu nianyiki jami, Alvin, Allegra, niDaryl. Kushika nikulelu, twayisakililaña anvwali jetu hakutudizisha chalala.

Atata, mukwaKristu wawayishewa, ashimwinineña chakadi woma. Azatileña nañovu hakwila atukeñeli yuma yakumujimba, nawa akeñeleña muntu wejima yeluki nindi adiña aChinsahu. Mpinji yejima ahosheleña hansañu yalala. Kakavulu nanukaña chakutalilahu chawu chakwikala wadikita nawa wakadi woma. Avulileña kunleja nawu, “Twalekakuhu nakudikita mukuloñesha kwaYehova, nawa wukutondolwelaña kukala kwakuvulu.”

Kakavulu, twashimwinineña mumukwakwa wamuStenen nimunyikala yamuchituñilu. Ami chankalilileña chikupu. Mumbaka yidi yejima mwadiña akwakukabisha, enjileña kudi etu atwansi nakutuvuloka. Mpinji yimu hinadiña nayaaka yitanu nayisatu, nemeni hafumba yamukwakwa iku nakwati Kaposhi Kakutalila niAwake! anyeñumukili kudi izanvu dawatwansi. Ansompweli itepa dami dadiha dadiña kumutu nakudihachika kuchishimi chadiña kwakwihi. Kukoleka, kwadiña mana kwetu wachikulumpi wadiña nakumona jadiña nakuzatika. Chenjiliyi wehwili nindi, “Vern, kukalanyi kunamwekani?” Anyana awamayala atemañeni. Hela chakwila chuma chamwekeni chanhilishili, nadizili nami hakushimwina mumukwakwa, chiña wendaña bayi kwimana hamu neyi chishinjiku. Yuma yinadizili hampinji yinachidiña kansi yankwashili cheñi kwikala wahamuka hakuya nakushimwina kwitala nikwitala.

Ami niAlvin atupapatishili muMay 1951. Nadiña nayaaka yakusemuka 13. Nichidi kwanuka Mana kwetu Jack Nathan, wahanini mpanji yachipapatishu, watukolesheli nindi bayi muhita kakweji chakadi kuhosha hadi Yehovaku. * Muchisaka chetu, mudimu wawupayiniya diwutwalemesheli nankashi. Dichi mu 1958, hanyima yakumanisha shikola, nayili kuWinnipeg, Manitoba, nakuzatilaku wupayiniya. Hela chakwila Atata azañaleli kuzata nawu mudimu wachisaka wakupula mapulanga, Atata naMama akolesheli chikupu kutachika mudimu wakushimwina wampinji yejima nawa añitejeli kubuukila kwiluña daWinnipeg nakuzata mudimu wawupayiniya.

Iluña Dadiha niMukwetu Wakuzata nindi Wamuha

Mu 1959 kasanji kamutayi katambikili wudi wejima wadihanini kubuukila kuQuebec, kwadiña kukankila kwawakwakushimwina. Nayili nakuzatila wupayiniya kuMontreal. Chihandilu  chahimpikili chikupu! Nawa natachikili chihandilu chachiha, muloña nadizileña idimi dadiha daFrench nichisemwa chacheñi. Nkoñi wamuñinza yetu wanlejeli nindi, “Bayi wuhosha neyi, ‘Ichi dichitwazatileña kumukala wetuku.’” Iku kwadina kufumba kwakuwahi nankashi.—1 Kor. 9:22, 23.

Hampinji yinayili kuQuebec, nadiña nkawami. Hela chochu, muhela wakansi wejina daShirley Turcotte, inadibulakeni nindi hakusambila muWinnipeg, wekalili mukwetu wakuzata nindi chitwadisumbwili muFebruary 1961. Niyena wafumini muchisaka chamukeña Yehova. Hela chakwila haniyi mpinji nelukili wanyi nami kuyaaka yakumbidi diyi wakankoleshaña.

Kwendela Iluña daGaspe

Chimwahitili yaaka yiyedi hanyima yakudisumbula, atutondeli kwikala apayiniya adimena muRimouski, Quebec. Muchilaaka chahiñiluhu, kasanji kamutayi katulejeli kwendela iluña daGaspe Peninsula dejima nakushimwina, kumbadi yamusela yamukulishi wakaluñalwiji kamwituña daCanada. Mudimu wetu wadiña wakutumba chikupu nsañu yalala. (Mukwa. 11:6) Twaloñejeli mumotaka wetu magazini akubadika 1,000 ninyikanda yakushika ku 400, kushilahu yakudya niyakuvwala, nakutachika lwendu lwakuya nakushimwina hadi kakweji kamu. Twazatili chachiwahi munyikala yejima yanyanya yamuGaspé. Chikunzulemba chamunidi iluña chasoñamishili nawu aYinsahu anakwinza nawa chalejeli antu nawu bayi atambula nyikanda yetuku. Ilaña, antu amavulu atiyili maluwa nawa atoñojokeli nawu chikunzulemba chadiña nakubidika nyikanda yetu, dichi antu adiña nakutambula nyikanda yetu.

Haniyi yaaka, mumaluña amakwawu amuQuebec kushimwina kwadiña kwakala, nawa kakavulu akapokola emikileña antu. Chumichi chamwekeni mumusumba wumu hampinji yitwahanineña nyikanda kwitala nikwitala. Mukulumpi wawakapokola watulejeli nindi tuyi nindi kukapokola, nawa twayili. Chitwashikili atulejeli nawu ihaku wamumusumba nahani nshimbi yakwila nawu atulekeshi kushimwina. Chineli mukulumpi wawatupokola mukwawu wafuminuhu, nahanini mukanda kudi ihaku wakufwachika chachiwahi wafumini kukasanji kamutayi kamwituña daToronto walumbulwili wuswa wetu wakushimwina. Chatañiliyi mukanda, ihaku washikeneni dakuhosha nindi: “Talenuña dimu, ami kwami hinakukeña yikonkojolaku. Kapristu wamuchaachi diyi waleja nindi niyilekeshi.” Chineli twakeñeleña antu amwiluña dakushimwina eluka nawu mudimu wetu hiyawukanishiluku, twanyakeli kufunta kwiluña kwatulekesheleluwu kudi atupokola nakutwalekahu kushimwina.

Chikwachili, twafuntili nakudimona namukulumpi wawatupokola, nawa wahilili hama hakutiya nawu atulekesheli kushimwina. Neyi mwadiñakoku chiña mwatiyili chinamuzuwilili hanshiña! Mukulumpi wawakapokola watulejeli nindi neyi kumwekana kukala, twatela kumutambika nawa wukumanisha kukala kudi kwejima. Hela chakwila twadiña enyi nawa idimi daFrench hitwadilukishiluku, antu adiña chachiwahi nawa achisambu. Ilaña twajinookeli netu, ‘Awa antu amba keluka chalala?’ Chimwahitili yaaka twelukili ñakwilu yanilu lwihu hampinji yitwafuntiluku nakutuña Matala aWanta mwiluña daGaspé. Twawanini antu amavulu itwashimwinini ekala dehi amana kwetu. Eñañi, Yehova diyi wakulishaña.—1 Kor. 3:6, 7.

Twatambwilili Wuswana

Muchaaka cha 1970 mwanetu wamumbanda Lisa wasemukili. Iwu wuswana wakufuma kudi Yehova watuzañalesheli nankashi muchihandilu chetu. Shirley niLisa azatili nanami munyidimu yayivulu yakutuña Matala aWanta. Lisa chamanishiliyi shikola, wahosheli nindi: “Amama naTata, chineli yami naleñeleli mufumi mumudimu wampinji yejima hadi mpinji yantesha, inakufwila kufuntisha mukudi wenu kuhitila mukwikala payiniya.” Chimwahitili yaaka 20, Lisa watwalekeluhu kuzata wupayiniya, ilaña ichi wazatilaña hamu nanfumwindi,  Sylvain. Wejima wawu, adiña nakukooleka kwakuzataku nyidimu yayivulu yakutuña mumatuña acheñi. Chikonkwanyi chetu neyi chisaka chidi chakupelesha chihandilu chetu nikudihana mumudimu waYehova. Mazu ahosheli Lisa hatachikiliyi mudimu wawupayiniya hinayijimbalaku. Eñañi, wansañumwini kutachika cheñi mudimu wampinji yejima mu 2001, nawa nihanu nichidi kuzata wupayiniya. Mudimu wawupayiniya wuchidi kundizisha kukuhwelela mudi Yehova muyuma yejima yinelaña nikwikala nachihandilu chapela nawa chamuzañalu.

Kuzata Mumudimu Wakutuña Kwakeñekaña Kwikala naYililu yaKukeña, niKashinshi

Yehova wandizisha nindi neyi tudihana nikwiteja mudimu wejima wukutwinkayi, tunateli kutambwila nkisu jajivulu. Mudimu wunalemesha nankashi wudi waKuzata Mukomiti Yakutuña kwaMukabeta nikukalakala nyidimu yakutuña hamu nawamana kwami niahela muQuebec mwejima nikumaluña amakwawu.

Hela chakwila amana kwetu amakwawu azataña mudimu wakudikeñela hiyanateli kuhana mpanji jajiwahi nankashuku, ilaña elukisha chikupu nyidimu yakutuña Matala aWanta. Awa amana kwetu azataña namuchima wejima, nawa amwekeshaña chawana chakwetuwu. Mpinji yejima chafumañamu, atuñaña itala dalubanji dakudifukwilamu kudi Yehova.

Antu añihulaña nawu, “Yililwinyi yasweja kulema yatela kwikala namuntu wunadihani kuzata mudimu wakutuña Itala daWanta?” Kwesekeja nachineluka, muntu watela kusambila kumukeña Yehova niMwanindi kubombelahu niamana kwetu. (1 Kor. 16:14) Chamuchiyedi, chakeñekaña kwikala washinshika. Neyi yuma kuzatika munjila yimunakeñi nehi, neyi chichamwekanaña, muntu washinshika walondelaña mwalombolaña kuloñesha. Kashinshi kakumuleñela kudihana kulonda yakazatuku nyidimu yidi kumbidi.

Namuhamekaña Yehova

Hela chakwila atata afwili muchaaka cha 1985, nanukaña mwanlejeluwu nawu nidikiteña mukuloñesha kwaYehova. Kufwana antu amakwawu atambwila nyidimu yamukuloñesha kwaYehova kwamwiwulu, niwena anakudikita chikupu. (Chim. 14:13) Amama adi dehi nayaaka 97. Hamuloña wakalepa, akañanyaña kuhosha chachiwahi neyi chahosheleñawu; hela chochu, Bayibolu yawu ayiluka. Munyikanda yasonekañawu ashimunaña nsona nikutukolesha nawu tutwalekuhu kumukalakela Yehova nakashinshi. Etu anyana wejima wetu twasakililaña hakwikala nawanvwali atukeña!

Nawa namusakililaña Yehova hakunyika Shirley, ñodami washinshika nawa mukwetu. Wanukaña chikupu mazu amulejeluwu amama yindi nawu, “Vern tunadikiti chikupu nakashinshi, nawa watela kumwinka mpinji yakuzatila antu amakwawu.” Kufuma hitwadisumbwili hanahiti dehi yaaka 49, twafukwiluhu kushinakajila hamu, kumukalakela Yehova, nawa neyi wonsu wetu tukahanda hakukuma kwakanu kaayi, wejima wetu twakekala nanyijimba yawansi nakutwalekahu kumukalakela haya nyaka. Eñañi, tunasweji “kukalakala mudimu waMwanta.” (1 Kor. 15:58) Yehova watwakamenaña chikupu nawa kanda tukadileñahu dehi chuma chachiwahi.

[Tumazu twaheshina]

[Mwevulu wudi hefu 31]

“Chisaka chejima twemika chikonkwanyi chakwikala nachihandilu chapela nikudihana mumudimu waYehova”