Enu Atwansi—Itejenu Izu daNzambi Diyilomboleña

“Hetaku maana, hetaku kashinshi.”—YISH. 4:5.

1, 2. (a) Chumanyi chamukwashili kapostolu Pawulu kuumika nakukala kwalwishileñayi naku? (b) Munateli kuheta ñahi maana nikashinshi?

 “NEYI nakeñi kwila chachiwahi, komana kutama kudi kwoku.” Mweluka wahosheli awa mazu? Kapostolu Pawulu diyi. Hela chakwila Pawulu wamukeñeli Yehova, mpinji yikwawu walwishileña hakwila nindi yeli chuma chachiwahi. Watiyileña ñahi nakukala kwamweneñayi? Wasonekeli nindi: “Ami nshona!” (Rom. 7:21-24) Komana munateli kwiluka chatiyileñayi Pawulu? Komana ninenu mpinji yikwawu chayikalilaña kwila yuma yayiwahi? Komana mwaneñaña neyi chaneñeliyi Pawulu? Neyi mwaneñaña, bayi mutiya kutamaku. Pawulu watwesheli kuumika kukala kwamweneñayi, ninenu munateli kuumika.

² Pawulu watwesheli muloña wetejeli “mazu akukolesha” amulomboleña. (2 Tim. 1:13, 14) Chafuminumu, waheteli maana nikashinshi kakwiluka chakuumika kukala nikufuukulahu chachiwahi. Yehova Nzambi nateli kuyikwasha kwikala namaana nikashinshi. (Yish. 4:5) Watwinka nshimbi jajiwahi chikupu Mwizu dindi, Bayibolu. (Tañenu 2 Timotewu 3:16, 17.) Toñojokenu chimwatela kuhetela munshimbi jekala muNsona hakutiyilila anvwali jenu, hakuzatisha mali hela neyi mudi nkawenu.

Muchisaka

3, 4. Muloñadi chichinateli kuyikalila kwovwahila nshimbi jawanvwali jenu, ilaña muloñadi anvwali chayinkelañawu nshimbi?

³ Komana chayikalilaña kwovwahila nshimbi jawanvwali jenu? Chumanyi chaleñelaña? Hadaha mwakeñaña kudimena. Muntu wejima dichakeñañayi. Dikwila nawu munakukula. Neyi muchidi kushakama nawanvwali jenu, mwatela kuyovwahila.—Efwes. 6:1-3.

⁴ Neyi mwiluka chaleñelaña anvwali jenu ayinkeña nshimbi jimwatela kulondela chikuyikwashaku kujilondela. Eñañi, mpinji yikwawu munateli kutoñojoka neyi chatoñojokeleñayi Brielle wayaaka 18, * wahosheli hadi anvwali jindi nindi: “Anavulameni chikupu nawu niwena adiña atwansi. Hiyakeñaña ami kuhosha mwinakutoñojoka nikufuukulahuku.” Kufwana Brielle, munateli kutoñojoka nenu anvwali jenu ayikañeshaña kwila yuma yimwakeñaña kwila. Ilaña, anvwali jenu ayinkaña nshimbi jakulondela muloña ayakamenaña. Cheñi, anvwali akwaKristu eluka nawu akalumbulula kumesu aYehova neyi akañanya kuyihemba chachiwahi.—1 Tim. 5:8.

5. Munateli kuhetelamu ñahi neyi mwovwahilaña anvwali jenu?

⁵ Eñañi, kwovwahila nshimbi jawanvwali jenu kudi neyi kufweta mukudi wumwasondamini kunyabawulu—neyi mushaku muchima wakufweta, kunyabawulu nikwena akuyisondamishaña mali. Anenu nawa, mudi namukudi wakulemesha nikwovwahila anvwali jenu. (Tañenu Yishimu 1:8.) Chimwasweja kuyovwahila, niwena akuyiteja mwileña yuma yimunakukeña. (Luka 16:10) Ilaña, neyi mutwalekahu nakudikaña, bayi chiyihayamisha neyi anvwali aleka kuyinka yuma yimwakeñañaku.

6. Anvwali anateli kukwasha ñahi anyana kwikala ovwahila?

⁶ Njila yimu mwatela anvwali kukwashilawu anyanawu kwovwahila nshimbi, yidi  yakuyimikila chakutalilahu chachiwahi. Neyi anvwali ekala namuchima wakwovwahila mwakeñañayi Yehova akumwekesha nawu nshimbi jaNzambi jajiwahi. Chumichi chikukwasha anyana kumona nshimbi jawanvwali jawu nawu jajiwahi. (1 Yow. 5:3) Kubombelahu, Bayibolu yashimunaña mpinji yetejeliyi Yehova ambuñindi kushimuna mwatoñojokeleñawu muyuma yikwawu. (Kutach. 18:22-32; 1 Anya. 22:19-22) Komana kwatela kwikalahu mpinji yatela anvwali kwitejawu anyanawu kuhosha hansañu jashiyashana?

7, 8. (a) Kukalanyi kwamonañawu anyana amakwawu? (b) Chumanyi chimwatela kwiluka chikuyikwasha kuhetela muyuma yayifumbañawu?

⁷ Mpinji yikwawu anyana anateli kutoñojoka nawu anvwali jawu anakukalisha chikupu. Mpinji yikwawu, mwatela mwatoñojokaña neyi chatoñojokeli mukwenzi wejina daCraig, wahosheli nindi, “Amama amwekeneña neyi ashayidi—mpinji yejima akeñeleña yiluwa mudami.”

⁸ Kakavulu kufumba hela kubabesha kwenjilaña munjila yakukutwika nyiloña. Bayibolu yeteja nawu kufumba, hela kwikali kwakuwahi ñahi, kwayeñaña kumuchima. (Heb. 12:11) Chumanyi chinateli kuyikwasha hakwila muheteli mwayifumbañawu? Chikuma chalema chimwatela kwanuka chidi chakwila nawu anvwali jenu ayifumbaña muloña ayikeña. (Yish. 3:12) Afwilaña kuyikiña kulonda mubuli kudiñija muyililu yatama nikuyikwasha mwikali nayililu yayiwahi. Anvwali jenu atela eluka nawu neyi akañanya kuyifumba, dikwila nawu ayihela! (Tañenu Yishimu 13:24.) Mwatela kwiluka cheñi nenu kuluwañesha kwaleñelaña kudiza. Dichi neyi anayifumbi, mwatela kudizilaku maana kuyuma yinahoshuwu. “[Maana] kuyilandulula yiwukudiilamu yikubadika yiwadyaña hakulandulula siliva, yiwukumwenamu yikubadika wuru wawuwahi.”—Yish. 3:13, 14.

9. Chatela atoñojokeña nawu anvwali anakuluwañesha, chumanyi chatela kwilawu anyana?

⁹ Hela chochu, anvwali niwena aluwañeshaña. (Yak. 3:2) Neyi anakuyifumba, mpinji yikwawu anvwali atubokaña. (Yish. 12:18) Chumanyi chaleñelaña anvwali kutuboka? Hadaha ananeñi, indi kwiji anakutoñojoka nawu munakuluwañesha muloña anakañanyi kuyifumba. Chatela mutoñojokeña nenu anvwali anakuluwañesha, komana kwila muyihameka hanyidimu yinakudikitawu yakufwila kuyikwasha nehi? Kwiteja mwayifumbañawu kukayikwasha chimukakula.

10. Munateli kulondela ñahi chachiwahi nshimbi jawanvwali jenu nimwayifumbañawu?

¹⁰ Komana munakukeña chiyipeleleñaku kwiteja nikuhetela munshimbi nikufumba kwawanvwali jenu? Neyi dichimunakukeña, mwatela kwiluka njila yayiwahi yakuhanjekelamu nawanvwali jenu. Munateli kwila ñahi mwenimu? Njila yatachi yidi yakutiyilila. Bayibolu yahosha nawu: “Antu ejima anyakali kutiya, alabi kuhosha, alabi kuzuwa.” (Yak. 1:19) Chatela munyakaleña kudiyiñisha, esekenu kuwundisha ndulu yenu nakutiyilila munakuhosha anvwali jenu. Shenu muchima hamazu akuhoshawu, bayi mwakuyihoshelawuku. Kuhiñahu, hoshenu munahoshuwu mumazu enu nawa mazu wowamu yihoshenu kudi anvwali jenu nakalemesha. Ichi chikuleñela anvwali eluki nawu munatiyi munahoshiwu. Indi neyi munakukeña kulumbulula mumwahosha hela yuma yimuneli? Kakavulu, mwatela ‘kukaanda nyivumbu yenu’ sampu munalondeli munakukeña anvwali jenu. (Yish. 10:19) Anvwali jenu chamonawu nawu munayitiyilili, niwena akutiyililaña chikupu mumukuhoshaña. Neyi muzatisha iyi njila yayiwahi dikwila nawu muneteji Izu daNzambi diyilomboleña.

Kwiluka Chakuzatisha Mali

11, 12. (a) Indi Izu daNzambi datukoleshaña kuzatisha mali munjilanyi, nawa muloñadi? (b) Anvwali jenu anateli kuyikwasha ñahi kwiluka chakuzatisha mali?

¹¹ Bayibolu yahosha nawu: “Mali hichuma chakudihemba nachu.” Nawa vasi yoyimu yahosha  cheñi nawu maana alema chikupu kubadika mali. (Mukwa. 7:12) Izu daNzambi datulejaña nawu twiluki netu mali alema, bayi neyi kuyifwilaku. Muloñadi chimwatela kutondolwela yililu yakufwila mali? Talenu ichi chakutalilahu: Mukwakuteleka wakuluka yitembi wazatishaña chachiwahi mpoku yawambuka. Ilaña mpoku yoyimu neyi ayizatisha kudi muntu wabula kwiluka chakukwata mpoku yikumutapa. Mali niwena neyi muyizatisha chachiwahi, anateli kuyikwasha. Ilaña antu “akukeña nawu aheti,” kakavulu aluwañeshaña wubwambu wawu nawakwawu, nayisaka yawu ninaNzambi. Chafumañamu, adipwikaña “yihuñu yayivulu.”—Tañenu 1 Timotewu 6:9, 10.

¹² Munateli kwiluka ñahi chakuzatisha mali chachiwahi? Komana kwila mwihula anvwali jenu kulonda ayileji mwakuhembela mali nehi? Solomoni wasonekeli nindi: ‘Kulonda mukwamaana atiyi, asweji kudiza; nimukwakashinshi akashiki mukwiluka kwamaana amawahi.’ (Yish. 1:5) Kansi wamumbanda wejina daAnna walombeli nindi anvwali jindi amuleji njila yayiwahi. Wahosheli nindi, “Atata anlejeli chakuzatisha mali, nawa anlejeli chinatela kwikala nakashinshi kakuzatisha nikuhemba mali ami.” Amama yindi niwena amulejeli yuma yatela kumukwashaku. Anna wahosheli nindi, “Amama anlejeli kuwaha kwekala mukwesekeja wuseya henohu kanda nilandi chuma.” Hanu dinu Anna wahetelamu ñahi? Wahosheli nindi: “Ichi neluki chakuzatisha mali. Hinalandaña chinlandilaku, ichi hinakamenañaku muloña hinikweti nyikudiku.”

13. Munateli kwikala ñahi nakashinshi hakuzatisha mali?

¹³ Mpinji yikwawu munateli kudiñija munyikudi neyi mulusukila kulanda yuma hela kuzatisha mali muloña wakukeña kuzañalesha amabwambu jenu. Chumanyi chatela kuyikwasha kubula kukisañana mali muniyi njila? Hakuzatisha mali, mwatela kwikala nakashinshi. Ichi dichelañayi Ellena, wudi muyaaka yakusemuka yamuma 20. Wahosheli nindi, “Neyi niya nakuhema nawakwetu, nafuukulaña nikuchindila chadimu mali inukuzatisha. . . . Cheñi natiyaña kuwaha kuya nakulanda yuma nawamabwambu jami azatishaña mali awu chachiwahi nawa anateli kunleja nawu twesekeji wuseya bayi kulusukila kulanda chuma chinukusambila kumonaku.”

14. Muloñadi chimwatela kwikala asoñama kutalisha ‘hakudimbana kwamaheta’?

¹⁴ Kukeña mwakuwanina mali nikuyizatisha chachiwahi hichuma chalema muchihandilu. Ilaña, Yesu wahosheli nindi “atuzweñi muspiritu” diwu ekalaña namuzañalu walala. (Mat. 5:3) Wasoñamishili nindi ‘kudimbana kwamaheta’ kunateli kuvumbisha mpwila yamuntu yakukeña yuma yakuspiritu. (Maku 4:19) Komana, mwatela kwiteja Izu daNzambi diyilomboleña nikubula kukeñesha mali!

Neyi Mudi Nkawenu

15. Mpinjinyi yinateli kwikala kashinshi kenu kudi Nzambi mukweseka chikupu?

¹⁵ Indi kashinshi kenu kudi Nzambi kekalaña mukweseka chikupu mpinjinyi—neyi mudi nawakwenu ntahindi neyi mudi nkawenu? Neyi mudi hashikola hela kumudimu, hadaha mwakiñaña chikupu wuspiritu wenu. Mwekalaña asoñama chikupu kuyuma yatela kuluwañesha wuspiritu wenu. Hampinji yimunakunooka yimwahumbulaña kuyuma yinateli kuluwañesha wuspiritu wenu, diyi mpinji yimunateli kuholokela mukweseka kukuluwañesha yililu yenu yayiwahi.

16. Muloñadi chimwatela kumwovwahila Yehova hela neyi mudi nkawenu?

 ¹⁶ Muloñadi chimukukeñela kumwovwahila Yehova hela chakwila mudi nkawenu? Anukenu nenu: Munateli kumuneñesha Yehova hela kumuzañalesha. (Kutach. 6:5, 6; Yish. 27:11) Yuma yimwelaña yamuneñeshaña hela yamuzañaleshaña Yehova muloña “yena wayihembaña.” (1 Pet. 5:7) Wakeñaña nindi mumutiyilileña kulonda muhetelumu. (Isa. 48:17, 18) Ambuña aYehova amakwawu amuIsarela wakushankulu chadiwiluwu kufumba kwindi, amuneñesheli nankashi. (Mas. 78:40, 41) Cheñi nawa, Yehova wamukeñeli chikupu kaprofwetu Danyeli, nawa kañelu wamuteneni nindi “muntu wasweja kukeñewa.” (Dan. 10:11) Muloñadi? Muloña Danyeli wadiña washinshika kudi Nzambi bayi neyi hamesu awantu hohuku, ilaña nimpinji yadizileñayi nkawindi.—Tañenu Danyeli 6:10.

17. Malwihwinyi imwatela kudihula hakusakula yisela?

¹⁷ Hakwila nawu mutwalekuhu ashinshika kudi Nzambi neyi mudi nkawenu, mwatela ‘kufumba yitoñojoka yenu, . . . yakwambula yayiwahi nayatama’ nawa dizishenu yitoñojoka yeniyi ‘muyinjilishi’ kuhitila mukwila yuma yimuneluki nenu yayiwahi. (Heb. 5:14) Chakutalilahu, hakusakula tumina tumwatiyaña, nyivwimbimbi yimwatalaña, hela nsañu yahaIntaneti, awa malwihu adi heshina akuyikwashaku kusakula yuma yayiwahi nikutondolwela yuma yatama. Dihulenu awa malwihu nenu: ‘Komana iyi nsañu yikunkwasha nikali nawushona tahindi yikuleñela ami nizañalali ‘nakukala kunamoniyi mukwetu’?’ (Yish. 17:5) ‘Yikunkwasha ‘kukeña yayiwahi’ tahindi yikuleñela chinkalili ‘kuhela yatama’?’ (Amosa 5:15) Yuma yimwelaña neyi mudi nkawenu yamwekeshaña yuma yimwalemesha nankashi.—Luka 6:45.

18. Mwatela kwila ñahi neyi mwadiña nakukoña mukuswamujoka yuma yatama, nawa muloñadi?

¹⁸ Mwatela kwila ñahi neyi mwadiña nakukoña mukuswamujoka yuma yimuneluki nenu yatama? Anukenu nenu, “muntu wabutaña nyiloña yindi hakamona kuwahaku; ilaña muntu wukwitija nindi navulumunaña, hakuyileka, wakamona kwanakena.” (Yish. 28:13) Mukuluwañesha nankashi neyi mutwalekahu kwila yuma yatama ‘nakuneñesha spiritu yaNzambi yajila.’ (Efwes. 4:30) Mwatela kudanakena kudi Nzambi, nikudi anvwali jenu nikudanakena enu aweni hachiluwa chimunakoñi. Muniyi njila, “akulumpi achipompelu” anateli kuyikwasha chikupu. Kambanji Yakoba wahosheli nindi: “Amulombeli [mukwakuvulumuna], amuwayishi manji mwijina daMwanta [Yehova]. Kulomba kwakukuhwelela kukuhandisha wakata, niMwanta wukumukolesha; neyi navulumuni akumwanakena.” (Yak. 5:14, 15) Chakadi nikujina, neyi mushimuna chiluwa munateli kutiya nsonyi nawa hadaha mukufuma yuma yinateli kuyineñesha. Ilaña neyi mukulomba wukwashu chakadi kutiya woma, mukudamwina kuyuma yatama nawa mukwikala akasunuka muloña wakwikala nachilenji chachiwahi.—Mas. 32:1-5.

 Zañaleshenu Muchima waYehova

19, 20. Chumanyi chinakukeñayi Yehova nindi mwili, nawa mwatela kwiladi?

¹⁹ Yehova ‘hiNzambi wamuzañalu,’ nawa nakukeña ninenu mwikali amuzañalu. (1 Tim. 1:11) Wayakamenaña nankashi. Hela neyi kwosi muntu wamonaña chimwadinkañaku nakwila yuma yaloña, Nzambi wamonaña. Yuma yejima yidi nzekesi kumesu aYehova. Chimwafwilaña kwila yuma yayiwahi, Nzambi watalaña kulonda yayikwashi, bayi neyi wakeñaña yiluwaku. “Mesu [aNzambi] adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.”—2 Kushi. 16:9.

²⁰ Dichi, itejenu Izu daNzambi diyilomboleña, nikuzatisha kufumba kwekalamu. Neyi mulondela iku kufumba mukuheta maana nikashinshi kakuyikwashaku kushinda kukala kweneni nikufuukulahu hayuma yakala muchihandilu. Himukuzañalesha anvwali jenu niYehova hohuku, ilaña mukwikala namuzañalu waweni muchihandilu.

[Tumazu twaheshina]

Mukwakula Nenudi?

• Indi anyana anateli kwiteja nikuhetelamu ñahi munshimbi nikufumba kwawanvwali jawu?

• Muloñadi chichalemena kwiluka chakuzatisha mali chachiwahi?

• Munateli kwikala ñahi ashinshika kudi Yehova hela chakwila mudi nkawenu?

[Malwihu aKuzatisha haKudiza]

[Mwevulu wudi hefu 6]

Komana mukwikalaña ashinshika kudi Nzambi neyi mudi nkawenu?