Enu Atwansi, Kaanenu Ikakeja Dawakwenu

“Kuhosha kwenu kwikali . . . kwakutoweja namuñwa mafuku ejima, kulonda mwiluki mwakwakwila antu ejima.”—KOL. 4:6.

1, 2. Indi atwansi amavulu atiyaña ñahi hakwikala ambukaku nawakwawu nawa muloñadi?

 CHAKADI nikujina, mwatiyahu dehi izu dakwila nawu “ikakeja dawakwenu,” ilaña ninenu ayikakejahu dehi. Mpinji yimu, hekwawu mukwenu wayilejeli kwila chuma chimwelukili nenu chatama. Mwatiyaña ñahi neyi ayikakeja kwila chuma chatama? Christopher wayaaka 14 wahosheli nindi: “Mpinji yikwawu natoñojokaña nami nijimañani hohu, hela nikali neyi chidiwu akwetu akashikola kulonda abuleña kunkabisha.”

² Komana akwenu akweti ñovu yakuyiluwañesha? Neyi akweti, muloñadi? Hadaha munakukeña mwikali hamukanka wawu? Yitoñojoka yamuchidiwu yatama wanyi. Akulumpi niwena akeñaña kwikala hamu nawamabwambu jawu. Antu ejima, atwansi niakulumpi, kwosi watiyaña kuwaha kumukaana kudi akwawu. Kuhosha hohu mwalala, antu amakwawu anateli kukuhoshola neyi wukaana kwila yuma yatama. Yesu niyena dichamukoñeluwu. Hela chochu, Yesu welileña yuma yayiwahi mpinji yejima. Hela chakwila, amakwawu adiña nakumulonda, nawa ekalili atumbanji twindi, amakwawu niwena amudiwili Mwana kaNzambi nawa ‘hiyamumweni kulemaku.’—Isa. 53:3.

Indi Ikakeja Dakulondeja Mwelaña Akwenu Daluwañeshaña Ñahi?

3. Muloñadi chitukuhoshela netu mukuluwañesha neyi mulondela munakwila akwenu atwansi?

³ Mpinji yikwawu munateli kuholokela mukweseka kwakukeña kulondela mwelañawu akwenu nenu ayikeñi. Mukuluwañesha nankashi. AkwaKristu hiyatela kwikala neyi ‘atwansi akubankañila niniku niniku, nakulelujoka nampepelaku.’ (Efwes. 4:14) Atwansi avula kuyiluwañesha kudi akwawu atwansi. Chineli mudi atwansi, munakukula. Dichi, neyi muneluki nenu nshimbi jaYehova jikuyikwasha,  mwatela kukakela chikupu kuyuma yimuneluki nenu yalala. (Kuhit. 10:12, 13) Neyi mukañanya kujilondela munakudijahilamu. Neyi mutiyilila munakuyikakejawu akwenu, mukwikala nduñu yawu.—Tañenu 2 Petulu 2:19.

4, 5. (a) Indi Aroni wafwili ñahi mumuhetu wekakeja, nawa chumanyi chimukudizilaku? (b) Njilanyi jinateli kuzatishawu akwenu kulonda akulawuli?

⁴ Mpinji yimu, mana kwaMosi, Aroni, wafwili mumuhetu wekakeja dawakwawu. Chelili aIsarela amukakeji nawu yayilili mukishi, wetejeli. Aroni hadiña sawomaku. Kunyima, Aroni wayili hamu naMosi nakwimana kumesu aFwaro, iyala waswejeli ñovu muEjipitu. Aroni wahosheli chakadi woma nakumuleja mazu ayilejeluwu kudi Nzambi. Ilaña chamukakejeluwu kudi akwawu aIsarela, Aroni wetejeli. Komana amabwambu akweti ñovu yakuluwañesha muntu! Aroni watwesheli kudikaaña namwanta wamuEjipitu ilaña akwawu amufuñunwini.—Kwid. 7:1, 2; 32:1-4.

⁵ Chakutalilahu chaAroni chamwekeshaña nawu, atwansi bayi neyi diwu amonaña ikakeja hohuku, hela antu akoñaña yuma yatama hidiwu hohu amonaña iku kukalaku. Niantu afwilaña kwila mwaloña niwena aholokelaña mukukala kwamuchidiwu, kubombelahu ninenu. Amabwambu jenu anateli kuyikanjikija nawu mwileña yuma yatama kuhitila mukuyichinisha, kuyitwika nyiloña hela kuyituka. Ikakeja dejima dekala datama nawa dakala kutondolwela. Hakwila nawu mushindi idi ikakeja mwatela kusambila kukolesha chikuhwelelu chenu muyuma yimwakuhwelela.

“Dishinshikenu”

6, 7. (a) Indi kwiluka chikupu yuma yimwakuhwelela kwalemenadi nawa munateli kwikala ñahi nanichi chililu? (b) Malwihwinyi imwatela kudihula kulonda musweji kwiluka yuma yimwakuhwelelamu?

⁶ Hakwila nawu mushindi ikakeja dawakwenu, chiña musambila kwiluka chikupu nenu yuma yimwakuhwelela ninshimbi jimwalondelaña jaloña. (Tañenu 2 Akorinda 13:5.) Kwiluka chikupu yuma yimwakuhwelela kukuyikwasha kwikala ahamuka hela chakwila mwekala nansonyi. (2 Tim. 1:7, 8) Hela chakwila muntu wahamuka, chinateli kumukalila kuhakwilaku chuma chabula kukuhwelelayi chikupu. Komana kwila mudimwekesha hatooka nenu yuma yinayidizishuwu muBayibolu yalala chikupu nehi? Tachikenu nayuma yalema. Chakutalilahu, mwamukuhwelela Nzambi nawa mwatiyaña chahoshañawu antu hayuma yayileñela kumukuhwelela Nzambi nawu wekala kwoku. Dihulenu nenu, ‘Yumanyi yanleñela nikuhweleli  chikupu nami Nzambi wekala kwoku?’ Mwatela kudihula ilu lwihu kulonda mukoleshi chikuhwelelu chenu bayi neyi mutachiki kujinookaku. Munjila yoyimu, dihulenu nenu, ‘Neluka ñahi nami Nsona ajonena kudi Nzambi?’ (2 Tim. 3:16) ‘Chumanyi chinanleñeli nikuhweleli nami anu ‘himafuku akukuminina’?’ (2 Tim. 3:1-5) ‘Chumanyi chinaleteshi ami kukuhwelela nami nshimbi jaYehova jinateli kunkwasha?’—Isa. 48:17, 18.

⁷ Hadaha mukushintajala hakudihula awa malwihu, nakuchina nenu himukuwana ñakwiluku. Chidi neyi munakushintajala kutala hachipimu chamanji amotoka yenu, muloña chipimu chinakumwekesha nawu manji “Anamani” mumotoka. Neyi mutanki mwosi manji, mwatela kuya hanwishilañawu manji amunyotoka. Chochimu, chikuwaha neyi mukwiluka yuma yimuchidi kujinooka kulonda muzatiluhu.—Yil. 17:11.

8. Lumbululenu chimwatela kukolesha chikuhwelelu chenu mulushimbi lwaNzambi lwakuleka wuvumbi.

⁸ Talenu ichi chakutalilahu. Bayibolu yayikonkomwenaña nawu “temukenu wuvumbi.” Dihulenu nenu, ‘Muloñadi ilu lushimbi chilwawahila?’ Toñojokenu hayuma yaleñelaña akwenu kudiñija muyililu yamuchidiwu. Toñojokenu cheñi hayuma yamboka-mboka yaleñelaña muntu welaña wuvumbi ‘yatamisheña mujimba windi yomweni.’ (1 Kor. 6:18) Hanu dinu toñojokenu hayuma yaleñelaña, nawa dihulenu nenu: ‘Njila yidihi yinatela kulondela? Wulokwinyi wunukuwaninamu neyi nidiñija muwuvumbi?’ Toñojokenuhu chikupu haniyi nsañu, nawa dihulenu nenu, ‘Nikutiya ñahi neyi nitachika kwila wuvumbi?’ Hakutachika, akwenu akuyikeña nankashi, ilaña mukutiya ñahi neyi mudi hamu nawanvwali niakwenu akwaKristu Hetala daWanta? Hakulomba kudi Nzambi mukutiya ñahi? Komana mwalala munakukeña kumbila wubwambu wenu naNzambi mumenji hamuloña wakukeña hohu kuzañalesha akwenu akashikola?

9, 10. Indi kukolela kuyuma yimwakuhwelela kukuyikwasha ñahi kubula woma neyi mudi nawakwenu?

⁹ Neyi mwashika dehi hawukwenzi nihawunkaña, munashiki hampinji yakwikala ‘nañovu yakutoñojoka’ chikupu. (Tañenu Aroma 12:1, 2.) Zatishenu iyi mpinji nakutoñojoka nankashi kulonda mwiluki chichalemena kwikala Chinsahu chaYehova. Kutoñojoka muniyi njila kukuyikwasha kukolela chikupu kuyuma yimwakuhwelela. Mpinji yikayikakejawu kudi akwenu, mwakanyakala kukaana nawa chakadi woma. Mukatoñojokaña neyi chatoñojokañayi muhela wakansi mukwaKristu, nindi: “Neyi nikaana kwila yuma yankanjikijañawu akwetu, nakeñaña eluki yuma yinakuhwelelamu chikupu. Bayi neyi nsakililu diyaleteshaña nikaleña nayitoñojoka yamuchidiwuku. Ilaña dichekala yitoñojoka yami, yikonkwanyi, yililu yayiwahi nichihandilu chami chejima.”

¹⁰ Eñañi, mwatela kudishaku chikupu hakwila mukoleli kuyuma yimweluka nenu yalala. (Luka 13:24) Hadaha mukujinookaña nenu himunateli kufuma yuma yayiwahuku. Anukenu nenu: Neyi mumwekesha neyi munaluwañeshi hela neyi yuma yimwakuhwelela yayitiyishaña nsonyi, akwenu akwiluka, nawa akusweja kuyikakeja. Ilaña neyi mukuhosha chakadi kuhita mumbadi, akwenu akuleka kuyikakeja.—Esekejenu Luka 4:12, 13.

‘Toñojokenu Chachiwahi Mwakwakwila’

11. Wulokwinyi wafumaña mukudiloñeshela chadimu henohu kanda mumoni ikakeja dawakwenu?

¹¹ Njila yikwawu yalema yatela kuyikwasha kutondolwela ikakeja dawakwenu yidi yakudiloñesha. (Tañenu Yishimu 15:28.) Kudiloñesha kwatalisha mukutoñojokela chadimu hayuma yinateli kumwekana. Mpinji yikwawu neyi mutoñojokela chadimu yuma yinateli kuyimwekena chikuyikwashaku kubula kuholokela mukukala kweneni. Chakutalilahu, neyi munamoni izanvu dawakwenu akashikola adi kumbidi anakunwa makanya. Komana munakutoñojoka nenu akubula kuyinka ikanya  nawu munwiku? Chumanyi chimwatela kwila, neyi mutoñojoka nenu hakumwekana kukala? Mukanda waYishimu 22:3 wahosha nawu: “Muntu wadihoñeshaña mumuchima wamonaña katama, hakubatama.” Neyi mukubaaluka nakuzatisha njila yacheñi, munateli kutondolwela kukala. Bayi neyi munafwi mutentuku, ilaña muneli mwamaana.

12. Njilanyi yayiwahi yakwakwilamu neyi muntu nakuyisupisha?

¹² Mukwiladi neyi mukañanya kutondolwela kukala kutunashimuni hewulu? Indi neyi mukwenu yayihula lwihu lwakuyijinooka nindi, “Kanda wukaameñahu dehi namuntu weyala hela nawamumbanda?” Mwatela kulondela kufumba kudi haAkolose 4:6 nawu: “Kuhosha kwenu kwikali naluwi, kwakutoweja namuñwa mafuku ejima, kulonda mwiluki mwakwakwila antu ejima.” Neyi chinashimuni iyi nsona, mukwakula ilu lwihu kwesekeja nayuma chiyidi. Bayi mutachika kulumbulula nsañu yayivulu yamuBayiboluku. Hadaha, munateli kwakula chakadi kuhita mumbadi nawa munjila yapela. Chakutalilahu, hakwakula lwihu lunayihuliwu hansañu yakukaama namuntu weyala hela wamumbanda, munateli kwakula hohu nenu, “Kanda dehi,” hela nenu, “Hijinakutaluku.”

13. Indi kashinshi kanateli kuyikwasha ñahi kumwakula mukwenu wunayihuli lwihu lwakusupisha?

¹³ Yesu wavulileña kwakula namazu antesha muloña welukili nindi hela chakwila wukulumbulula chamuchidinyi antu akutiya wanyi. Mpinji yamwihujoleleñawu kudi Herodi, Yesu wakuminini dakumwena. (Luka 23:8, 9) Kakavulu kumwenahu hinjila yayiwahi yakwakwilamu malwihu abula kushikilamu. (Yish. 26:4; Mukwa. 3:1, 7) Mpinji jikwawu, munateli kumona nenu owu muntu wudi namuchima wakukeña kwiluka muloña nahayami hayuma yimwakuhwelela kutalisha hawuvumbi hela chakwila wasambila kuyihoshola. (1 Pet. 4:4) Muniyi njila, mwatela kulumbulula chikupu nsañu yimwakuhwelela yashindamena haBayibolu. Nawa bayi mufwa mutentuku. Mpinji yejima ‘diloñeshenu kulonda mutweshi kwakula.’—1 Pet. 3:15.

14. Munateli kufwomona ñahi mukubabala muntu wunakuyikakeja nindi mwili yuma yaheña?

¹⁴ Mpinji yikwawu, ninenu munateli kuhosha yuma yikumuleñela mukwenu yatoñojoki hayuma yinakuyikakejayi. Hela chochu, mwatela kubabala. Chakutalilahu, neyi mukwenu mukwashikola nakuyikanjikija nindi mutambuli ikanya, munateli kuhosha nenu, “Inehi yaleyi” kuhiñahu hoshenu nenu, “Natoñojokaña nami eyi hiwunateli kunwa makanyaku!” Munamoni chimunamuleñeli yatachiki kutoñojoka hayuma yinakuyikakejayi? Chatela mumulumbulwili chimwabulilaña kunwa makanya, mukuleñela ibwambu denu yatachiki kutoñojoka chanwinañayi makanya.

15. Chumanyi chikuyileñela mufumi hadi amabwambu jenu anakuyikakeja kwila yuma yatama, nawa muloñadi?

¹⁵ Chumanyi chimukwila neyi muneseki kukaana  nañovu yenu yejima, ilaña chayikakejayi? Chikuwaha neyi mukunyamukahu. Ilaña neyi mukushakama, mukudiñija mukukala. Dichi, mwatela kufumahu. Bayi mutoñojoka nenu munakañanyiku, ilaña munamufuñununi. Himunakukeña akwenu ayikwati wuduñuku, ilaña munatiyishi muchima waYehova kuwaha.—Yish. 27:11.

‘Toñojokenu Hayuma Yinateli Kuyikwasha’

16. Indi ikakeja dinateli kufuma ñahi kudi akwenu aditenaña nawu hiyakwaKristu?

¹⁶ Mpinji yikwawu ikakeja dakudiñija muyuma yatama dinateli kufuma kudi akwenu atwansi aditenaña nawu hiyambuña aYehova. Chakutalilahu, indi neyi muya kuchidika chinaloñeshuwu kudi muntu wamuchidiwu, kushika kuna kuwana hosi mukulumpi wunakuyitala? Indi neyi mukwenu kansi waditenaña nindi himukwaKristu naleti walwa hachidika ilaña enu niakwenu anenzi kuchidika kanda mushikiji yaaka yetejawu munshimbi yakunwa walwa? Kudi yuma yayivulu yinateli kumwekana yikuyileñela mulondeli mukuyileja chinleji chenu chadizishewa naBayibolu. Kansi wumu mukwaKristu walumbulwili nindi: “Ami nimuhelami twedikili mukapeka mwatalileñawu muvwimbimbi mwadiña antu ahosheleña mazu atama chikupu. Ilaña akwetu itwadiña nawu ashalili. Anvwali jetu atuhamekeli hachuma chitwelili. Ilaña, akwetu ashalili ahilili nankashi muloña chuma chitwelili chaleñeleli amwekani nawu atama.”

17. Neyi himukuya kuchidika, chumanyi chimwatela kwila kulonda mukakeli kunshimbi jaNzambi?

¹⁷ Neyi chinamwekeshi yakutalilahu yitunahanjekuhu, kulondela chinleji chenu chadizishewa naBayibolu kukuleñela akwenu kutachika kuyijinooka. Ilaña kakelenu chikupu kuyuma yimuneluki nenu yalala. Diloñeshenu. Neyi munakuya kuchidika, mwatela kufumahu neyi mumona nenu yuma yidi chiwahi wanyi. Anyana amakwawu atiyañanaña nawanvwali jawu nawu ayitemesheli nshiña neyi anakukeña nawu afunti swayi kwitala. (Mas. 26:4, 5) ‘Yitoñojoka yamuchidiwu yinateli kuyikwasha.’—Yish. 21:5.

“Zañalalaku Hawukwenzi Weyi”

18, 19. (a) Muloñadi chimukuhoshela nenu Yehova nakukeña nindi mwikaleña namuzañalu? (b) Indi Nzambi wamonaña ñahi antu adikañaña nekakeja dawakwawu?

¹⁸ Yehova wayileñeli nindi mudiluñisheña muchihandilu chenu, nawa nakukeña nindi mwikaleña amuzañalu. (Tañenu Mukwakutaŋisha 11:9.) Anukenu nenu yuma yinakudiluñishawu akwenu atwansi amavulu ‘yakampinji kantesha’ hohu. (Heb. 11:25) Nzambi walala nakukeña nindi mwakaheti chuma chabadika yuma yinakudiluñishawu akwenu. Nakukeña nindi mwakekali namuzañalu wahaya nyaka. Dichi, neyi muholokela mukweseka kwakwila yuma yimuneluki nenu yatama kumesu aNzambi, anukenu nenu yuma yakeñañayi Yehova nindi mwili hiyakalaku.

¹⁹ Chineli muchidi kukula, mwatela kwiluka nenu hela chakwila mukuzañalesha akwenu, chimwahita yaaka akwenu amavulu hadaha akajimbala niijina denu. Ilaña neyi mukaana ikakeja dawakwenu, Yehova nakumona nawa hakayijimbala hela kuvulamena kashinshi kenuku. Nzambi ‘wakayenzulwila njanina jamwiwulu, nakuyihuñunwina nkisu yayivulu yakukañanya nihakuyitambwila.’ (Mal. 3:10) Kubombelahu, wahanaña spiritu yindi yajila kulonda yiyikwashi mumwazeya-zeyaña. Eñañi, Yehova nateli kuyikwasha kulonda mutwesheña kudikaña nekakeja dawakwenu.

Munakwanuka?

• Indi ikakeja dawakwenu dikweti ñovu yamuchidinyi?

• Indi kwiluka chikupu yuma yimwakuhwelela kunateli kuyikwasha ñahi kukaana ikakeja dawakwenu?

• Munateli kudiloñesha ñahi kulonda mushindi ikakeja dawakwenu?

• Muneluki ñahi nenu Yehova walemesha kashinshi kenu?

[Malwihu aKuzatisha haKudiza]

[Mwevulu wudi hefu 8]

Muloñadi Aroni chetejeleliyi kutuña mwana kañombi wawuru?

[Mwevulu wudi hefu 10]

Diloñeshenu, fuukwilenu chadimu yuma yimwatela kuhosha