Malwihu Kufuma Kudi Antañi

Yesu walejeli antiyilili indi nindi: “Mwatela kwikala awanina neyi chadiyi Tata yenu wamwiwulu wawanina.” Antu anateli “kwikala awanina” ñahi makonu?—Mat. 5:48, NW.

Hakwila nawu twakuli ilu lwihu twatela kwiluka chazatishawu mazu akwila nawu “kuwanina” “nikuloña” muBayibolu. Bayi neyi yuma yejima yashimunawu muNsona nawu ‘yawanina’ dikwila nawu yawanina chikupuku. Ilaña, Yehova waloña chikupu. Antu hela yuma yinateli kwikala yawanina chantesha hohu. Mazu amuBayibolu achiHeberu nichiGriki abalumunawu nawu “kuwanina” kakavulu alumbuluka nawu “chuma chamukuma,” “kupama,” hela “kubula muloña” kwesekeja nanshimbi jatuñawu kudi akwanshimbi.

Adama naEvu ayileñeli awanina muyililu, kuspiritu, nikumujimba. Adiña awanina kwesekeja nachakeñeleñayi Nleñi yawu. Muloña wakubula kwovwahila, akañenyi kushika hanichi chipimu nawa ajimbesheli kuwanina kwawu nikwawanyanawu. Dichi nshidi, kubula kuwanina nikufwa kweñilili nakushikena antu kuhitila mudi Adama.—Rom. 5:12.

Neyi chalumbulwiliyi Yesu muMpanji yindi yaHampidi, niantu abula kuwanina anateli kwikala awanina chantesha. Muyina mpanji, waheni chakutalilahu chakukeña kwalala chikupu. Hikukeña kudi neyi kuna kwakeñeliyi Nzambi muchidi wamuntu. Yesu wahosheli nindi: “Keñenu ayilumbu jenu, ninawa ayikabishaña, yilombelenu; kulonda mwikali anyana kaTata yenu wudi mwiwulu, muloña yena watuntwishaña itañwa dindi nihadi atama nihadi amawahi, wanokeshaña nvula nihadi aloña nihadi aheña.” (Mat. 5:44, 45) Neyi amwekesha kukeña kwamuchidiwu, atumbanji twaYesu adi kwimbujola chakutalilahu chaNzambi chawanina.

Makonu, aYinsahu jaYehova mukaayi kejima afwilaña kukeña akwawu nankashi. Akeñaña kukwasha antu akweti yitachi yashiyashana yejima, akunyunza, ninsakililu kulonda eluki chikupu chalala chamuBayibolu. Mumatuña 236, aYinsahu anakudizisha antu akweti mpwila yakudiza Bayibolu kubadika ha 7,000,000.

Yesu wenhwili nindi: “Neyi mukukeña antu ayikeñaña hohu, mwakadiila mwodi? Hidimu mwelaña ansonkeshuku? Neyi mukwimwisha ana kwenu hohu munabadikili akwenu hadihi?” (Mat. 5:46, 47) AkwaKristu alala hiyakweti chaambu nawantu ataña hela akumunza wacheñuku; nawa hiyakeñaña hohu antu atela kuyikeñaku. Ilaña, akwashaña atuzweñi niakata, atwansi niakulumpi. Munjila jamuchidiwu, akwaKristu anateli kwimbujola kukeña kwaYehova nakwikala awanina chantesha.

Komana kwamba kekalahu mpinji yitwakekala aloña, kuloña kwajimbesheliyi Adama? Eña, neyi tukuhwelela mwifutu damulambu waYesu, antu ovwahila akekala awanina muChiyuulu chaKristu Chayaaka Ikombakaji, hampinji ‘yakakisañanayi Mwana kaNzambi nyidimu yaDiyabolu.’—1 Yow. 3:8.