‘Nyidimu Yakoñeliyi Yinamulondeli’

THEODORE JARACZ, membala waMwizaza Dalombolaña dawaYinsahu jaYehova, wakumishili mudimu windi waheseki hachisatu nantetemena, haJune 9, 2010. Wadiña nayaaka yakuvwalika 84 nawa nashiyi ñodindi Melita, washakaminiyi nindi mumaluwi hadi yaaka 53. Nashiyi cheñi muhelindi wumu nimwihwindi wumu weyala niawambanda ayedi.

Mana kwetu Theodore Jaracz, wavwalikili haSeptember 28, 1925, mumusumba waPike County, Kentucky, U.S.A., nawa wadiheni kudi Yehova haAugust 10, 1941 henohu wudi nayaaka 15 yakuvwalika. Chimwahitili yaaka yiyedi, iku wudi nayaaka 17, watachikili mudimu wawupayiniya wampinji yejima, mudimu wunadikitiyi yaaka yayivulu kwakwihi nayaaka 67 mumudimu wampinji yejima.

Chashikijiliyi yaaka 20 mu 1946, Mana kwetu Jaracz wahitili mushikola yamuchitanu nachiyedi yaWatchtower Bible School of Gilead. Chakumishiliyi, Mana kwetu Jaracz amwinkeli mudimu wakwikala nkoñi wendaña muCleveland, Ohio, iluña damuUnited States. Mu 1951, amutemesheli kuya nakukalakela hamutayi mwituña daAustralia, halombweleñayi nyidimu yahamutayi. Yearbook yawaYinsahu jaYehova yamu 1983, yalumbulwili nawu Mana kwetu Jaracz “wakolesheli chikupu amana kwetu mwituña dejima kuhitila mukwikala neyena dakutanjika chachiwahi nyidimu yateokalatiki nikulombola mudimu wamwiha.”

Chafuntiliyi kuUnited States, Mana kwetu Jaracz wasumbwili Melita Lasko haDecember 10, 1956. Atachikili maluwi awu mumudimu wakwenda, nakudikita nankashi mujiñinza nimujinkambi nawa akalakeleli iluña deneni muUnited States. Kukumana kwachaaka cha 1974, Mana kwetu Jaracz amutambikili nakumuleja nawu wukwikala membala waMwizaza Dalombolaña dawaYinsahu jaYehova.

Mana kwetu Jaracz twakamwanukaña muloña wadiña kambuña aYehova wadihana nawa washinshika, wakalakeleña nyidimu yejima yateokalatiki namuchima wumu. Wadiña iyala wenzala kukeña nawa wakameneneña, cheñi nawa muntu wawuspiritu wadiña nakwakamena akwawu nankashi. (1 Kor. 13:4, 5) Wamwekesheleña kukeña kuhitila mukuyakamena nankashi nindi antu ejima atela kuyila kakawahi nawa munjila yaluwi. Kubombelahu, waswejeli kukeña antu nikuyakamena kuhitila mukudikita nankashi mumudimu wakushimwina.

Hela chakwila tudi nawushona nankashi muloña wakujimbesha membala wamuchisaka chaBeteli wadikita nawa wakeñewa kudi amana kwetu amukaayi kejima, tunazañalali hanyidimu yinadikitiyi Mana kwetu Jaracz kumesu aYehova hadi yaaka yayivulu. Tunakuhweleli netu ‘wadiña washinshika ndo nikukufwa nawa natambuli chibaaba chawumi.’ (Chim. 2:10) Tuneluki cheñi netu ‘nyidimu yakoñeliyi yinamulondeli.’—Chim. 14:13.