‘Tuhanenu Mulambu Kudi Yehova’

NEYI muntu yayilila chuma chachiwahi, mwasakililaña ñahi? Talenu akulumpi jawamashidika muIsarela chiyamwekesheluwu kusakilila hanyima yakulwa nawaMidiyani. Alwili njita chelili aIsarela avulumuni naBayali wakuPeyori. Nzambi wayikwashili antu jindi kushinda, nawa yuma yapupiluwu ayanzañeneni amashidika 12,000 niaIsarela ejima. Kwesekeja nachashimwiniyi Yehova, amashidika anoneluhu chibalu chayuma yayinkeluwu nakuhana kudi atupristu, aIsarela amakwawu niwena ayinkeli Alevi.—Kuch. 31:1-5, 25-30.

Hela chochu, akulumpi jawamashidika akeñeli kuwejelahu yuma yikwawu. Amulejeli Mosi nawu: “Etu ambuñeyi tunachindi dehi akwanjita twayili nawu kunjita hitunabuli iyala niwumuku.” Afuukwiluhu kumulambula Yehova mulambu wawuru niyijiñu yashiyashana. Kulema kwayuma yawuru yejima kwabadikili 190 kg.—Kuch. 31:49-54.

Makonu, antu amavulu amwekeshaña kusakilila  hayuma yayivulu yinakuyililayi Yehova. Kubombelahu, bayi neyi ambuña aNzambi adihana diwu ekala nanyichima yakusakilila hohuku. Talenu chakutalilahu chañendeshi wabasi watutileña izanvu dawamana kwetu ayileña nakupompa kwibulu kwadiña kupompa kwankambi kwamatuña mumusumba waBologna, mwituña daItaly mu 2009. Chineli wadiña ñendeshi wamuwahi wawunda, antu akandamineña basi yindi amusonekeleli mukanda wakumuhameka nikumwinka chawana chamali akumusakilila hanyidimu yindi hamu nimukanda waChumanyi Chacheni Chatañishaña Bayibolu? Dichi ñendeshi wakwili nindi: “Nazañalali hakutambwila kaadi nimukanda, ilaña nafuntishi mali muloña nakeñi kuhana chawana kulonda mutwalekuhu namudimu wumunakuzata. Hela hinidi Chinsahu chaYehovaku, nakukeña kuhana ichi chawaana muloña namoni nami yuma yimwelaña mwayilaña mukukeña.”

Neyi muchima wenu wuyisañumuna kumuhameka Yehova hayuma yinakuyikoñelayi, mwatela kusakilila kuhitila mukuhana yawana yakukwasha mudimu wawaYinsahu jaYehova wamukaayi kejima. (Mat. 24:14) Ichi chikasha chidi heshina chinakumwekesha njila jikwawu mwahaninañawu antu yawaana.

[Chikasha chidi hefu 20]

NJILA MWAHANINAÑAWU AMAKWAWU

YAWAANA YAKUKWASHA MUDIMU WAMUKAAYI KEJIMA

Antu amavulu ahembaña, hela afuukulaña, mali ashañawu muchikasha mwakusha yawaana hakusoneka nawu “Mudimu waMukaayi Kejima.”

Kakweji nikakweji, yipompelu yatemeshaña awa mali kukasanji kawaYinsahu jaYehova kamwituña dawu. Yawaana yamali akuhana mukudikeñela mwatela cheñi kuyitemesha enu aweni kuWatch Tower Society, Attention Treasurer, P. O. Box 33459, Lusaka 10101, hela kukasanji kamutayi kawaYinsahu jaYehova kamwituña denu. (Yawana yakuhana mukudikeñela yinashimuniwu heshina niyena mwatela kuyitemesha kukasanji kamutayi kawaYinsahu jaYehova kamwituña denu.) Macheki imukutemesha kuzatisha keyala yidi hewulu atela kuyifweta kudi “aWatch Tower Society.” Yingelingeli hela yuma yikwawu yawuseya niyena mwatela kuhana. Mwatela kusoneka mukanda wawihi mumukulumbulula nenu munahani iyi yawaana.

NJILA YAKUHANINAMU MALI AKUSONDAMISHA

Mwatela kuhana mali kudi aWatch Tower Bible and Tract Society of Pennsylvania kulonda ayizatishi kumudimu wamukaayi kejima. Hela chochu, neyi himukukeña mali enu akuyifuntishila.

KUFUUKWILA CHADIMU KUHANA WUKWASHU

Kubombela hayawaana yamali imwatela kuhana, kudi njila jikwawu mutwatela kukwashila mudimu waWanta wamukaayi kejima. Njila jikwawu dijeniji:

Inshuwalansi: Mwatela kusoneka nenu aWatch Tower Bible and Tract Society of Pennsylvania diwu atela kutambula mali akukiñilamu wumi wenu hela apeshoni.

Mali Akunyambawulu: Mali akunyambawulu, yipapilu yimwaswekejelañahu mali, hela mali apeshoni mwatela kuyihana kudi aWatch Tower Bible and Tract Society of Pennsylvania neyi enu mwiluña mwosi, kwesekeja nanshimbi yanyambawulu yamwituña denu.

Mali Asompokañamu: Antu amakwawu ekela namakampani nawa mali asompokañamu ayihanaña chawaana kuWatch Tower Bible and Tract Society of Pennsylvania hela anateli kusoneka nawu neyi wena mwiluña mwosi aWatch Tower Bible and Tract Society of Pennsylvania diwu akatambula mali.

Mpata Hela Matala: Mwatela kuhana itala hela mpata yatela kulandishawu neyi chawaana, neyi mudi netala, mwatela kusonekesha nenu mukashila aWatch Tower Society of Pennsylvania, enu aweni mukutwalekahu nakushakamamu.

Chawaana Chahachaaka: Iyi hinjila yimu yakuhaninamu mali hela njila yikwawu yakuhembelamu mali kumutayi wazatishañawu aYinsahu jaYehova. Mukwakuhana niyena hela muntu mukwawu anenkuwu iwu mudimu kudi mukwakuhana, wukutambulaña nfwetu hachaaka hachaaka muchihandilu chindi.

Mawilu niYikumba: Yikumba hela mali mwatela kusonekesha nenu yikashali mumakasa aWatch Tower Bible and Tract Society of Pennsylvania kuhitila mukusoneka wilu, munateli kusoneka nenu aWatch Tower Bible and Tract Society of Pennsylvania diwu akatambula yikumba. Neyi muhana yikumba yenu kulonda yikwasheña mutayi wansakililu yikuyileñela mubuleña kufweta nyisoku.

Kwesekeja namwatalisha mazu akwila nawu “kufuukwila chadimu kuhana wukwashu,” iyi yawaana yakeñekaña wunakuhana kufuukwila chadimu. Ihulenu kasanji kamutayi kamwituña denu henohu kanda musonekeshi nenu diwu wumwakashila neyi munafwi hela njila yikwawu yaCharitable Planning Arrangements.