Kilukenu muyi hansañu yimunakukeña

Kilukenu muyi hachipapilu chayuma yidimu

Tukwendaña Mukashinshi Ketu!

Tukwendaña Mukashinshi Ketu!

Tukwendaña Mukashinshi Ketu!

‘Hakwila ami kwami nukwenda mukashinshi hohu.’—MAS. 26:11.

1, 2. Indi Yoba wahosheli nindidi hakashinshi kindi, nawa muYoba kapetulu 31 amushimuna nawudi?

 KUSHANKULU, kakavulu yuma ayipezelesheleña hapezu neyi chapezeleshañawu makonu. Chuma chapezelesheleñawu achishileña hacheña nawa mbadi yikwawu ashileñaku chuma chalema. Antu jaNzambi ateleleli kuzatisha pezu yata chikupu nichuma chalema chashikila.—Yish. 11:1.

2 Yoba muntu wamwakamineña Nzambi chamweniyi yihuñu hampinji yamulukukiluwu kudi Satana, wahosheli nindi: ‘[Yehova] ampezeleshi tuhu napezu yesekana kulonda Nzambi yeluki kashinshi kami.’ (Yoba 31:6) Yoba, washimwini yuma yayivulu yatela kweseka kashinshi kamuntu. Ilaña Yoba chamwesekeluwu hafumpili kashinshi kinduku, neyi chitunamoni mumazwindi asonekawu haYoba kapetulu 31. Chuma chachiwahi cheliliyi chinateli kutusañumuna ninetu munjila yoyimu nikuhosha chikupu neyi chahosheli ñimbi yamasamu Davidi nindi: ‘Hakwila ami kwami, nukwenda mukashinshi hohu.’—Mas. 26:11.

3. Muloñadi chichalemena kwikala ashinshika kudi Nzambi muyuma yamaneni niyanyanya?

3 Hela chakwila Yoba amwesekeli chikupu, watwalekeluhu washinshika kudi Nzambi. Antu amakwawu anateli kuhosha nawu Yoba wemika chakutalilahu chachiwahi muloña waholokeleli mukweseka kweneni nawa wamwekesheli kashinshi kabadika chikupu. Etu hitunakuyanda neyi chayandiliyi Yobaku. Hela chochu, twatela kwikala ashinshika kudi Nzambi muyuma yamaneni niyanyanya hakwila tumwekeshi chikupu netu twekala ashinshika nawa twahakwilañaku chiyuulu chindi.—Tañenu Luka 16:10.

Twatela Kwikala Ashinshika Muyililu

4, 5. Chineli Yoba wadiña muntu washinshika, yililu yamuchidinyi yadiña nakutondolwelayi?

4 Hakwila nawu twikali ashinshika kudi Yehova, twatela kukakela kunshimbi jindi jahosha hayililu yayiwahi, neyi cheliliyi Yoba. Wahosheli nindi: “Natiyañana dehi namesu ami; indi chañadima nukumutala ñahi? . . . Neyi muchima wami anawudimbi kudi mumbanda, hela neyi nabatamini kuchisu chamukwetu natuña nindi; komana iñodami akatwili muntu wacheñi, akekali wawacheñi.”—Yoba 31:1, 9, 10.

5 Hamuloña wakufwila kwikala washinshika kumesu aNzambi, Yoba hazanzileña mesu akufwila mumbandaku. Chineli wadiña wasumbula, hakenkamineña namumbanda wamujiki hela kufwila iñondambalaku. Mumpanji Yahampidi, Yesu wahosheli nankashi hansañu yawuvumbi, chuma chatela kwanukañawu antu ashinshika.—Tañenu Matewu 5:27, 28.

Bayi Mwenda Munjila Jaheñaku

6, 7. (a) Nzambi wazatishaña yumanyi hakupezelesha kashinshi ketu neyi chapezelesheliyi kaYoba? (b) Muloñadi chitwatela kutondolwela njila jaheña nijakudimbana?

6 Neyi tunakukeña kwikala hakachi kawantu ashinshika, bayi twendaña munjila jaheñaku. (Tañenu Yishimu 3:31-33.) Yoba wahosheli nindi: ‘Neyi nendi mwamukunkulwayi, ninyendu yami yinanyakeli kuya kuyuma yamakasu; [Yehova] ampezeleshi tuhu napezu yesekana kulonda Nzambi yeluki kashinshi kami.’ (Yoba 31:5, 6) Yehova wapezeleshaña antu ejima “napezu yesekana.” Neyi chochamupezelesheluwu Yoba, Nzambi wazatishaña wuñanji windi waloña hakupezelesha kashinshi kawambuñindi adihana.

7 Neyi tutachika kwenda munjila jaheña hela jakudimbana, hitunateli kwikala ashinshika kudi Nzambuku. Antu ashinshika ‘aleka dehi yuma yansonyi yakujinda, hiyendaña nakudimbanaku.’ (2 Kor. 4:1, 2) Indi neyi nhoshelu yetu hela yililu yaheña, nawa yinaleñeli mukwetu mukwakwitiya kulomba wukwashu kudi Nzambi? Tukamwenamu jakala! Ñimbi yamasamu wembili nindi: “Chinamweni kukala natambikili Yehova, wañitiyili. Eyi Yehova, mpulwishi kunyivumbu yatwambaña nikwidimi dadimbanaña.” (Mas. 120:1, 2) Twatela kwanukaña netu Nzambi nateli kushinshika mukachi kanyichima yetu, ‘wesekaña nyichima yawantu ninshiya.’—Mas. 7:8, 9.

Ikalenu Nachakutalilahu Chachiwah Hakwakamena Akwenu

8. Indi Yoba wadiña nakwakamena ñahi akwawu?

8 Hakwila nawu tuhembi kashinshi ketu, twatela kufwana Yoba, wadiña waloña, wadizoza, nawa wakameneneña akwawu. Wahosheli nindi: “Neyi ñamba yami weyala, hela ñamba yami wamumbanda, wenjili nakukonkojola nanami, ami hinukudiwula nsañu yindi; indi chakanyamukayi Nzambi nakela ñahi? Chakanhempulayi nakamwakula namidi? Wantuñili mwivumu damama hidiyi wamutuñili yenaku? Watuloñesheli mumavumu awamama jetu hiyowumuku, tahindi?”—Yoba 31:13-15.

9. Yililu yamuchidinyi yamwekesheliyi Yoba kudi añamba jindi, ninetu twatela kwila ñahi?

9 Mumpinji yaYoba, hekwawu hikwadiña njila jakala jakusompelamu nyiloñaku. Nyiloña ayisompeleña munjila yayiwahi, nianduñu ayitwalileña muyota. Yoba wadiña nakutiyila añamba jindi luwi niwushona. Hakwila nawu twendi mukashinshi ketu, twatela kumwekesha yililu yamuchidiwu, sweje-e neyi tudi aeluda muchipompelu chawakwaKristu.

Ikalenu Akwakuhana, Bayi Kwikala Nalwisuku

10, 11. (a) Tuneluki ñahi netu Yoba wahanineña nikukwasha antu? (b) Mukanda waYoba 31:16-25 watwanukishaña kufumba kwamuchidinyi kukwawu kwamuNsona?

10 Yoba wadiña nakuhana nikukwasha antu, hadiña nechima nilwisuku. Wahosheli nindi: “Neyi . . . namwiyilishi ntuluwa mesu, indi kwiji nadyi kakudya kami kanka wami, anshona kudyaku nehi . . . Neyi antu anafwi kufwa kwakubula yuma yakuvwala, . . . Neyi namunyamwinini nshona chikasa chami, nanichi chinamoni nkwashi yami muchisu champwembu; komana chikasa chami, chizemuki kuchipeha chami chikasa chami chikotoki chizokokuku.” Yoba hadi kutwesha kuhemba kashinshi kinduku neyi wamwilili wuru nindi: “Chikuhwelela chami yeyi.”—Yoba 31:16-25.

11 Iji nkumbu jinateli kutwanukisha mazu ahosheli kambanji Yakoba nindi: “Yijila yamonañayi Nzambi Tata yetu nindi yalala yayiwahi, yoyakuhempula anshona abula atata jawu, niambanda anfwila hamonañawu lukadi, nakudihemba abuli kusampukila kuyuma yampata yamunu mwishina.” (Yak. 1:27) Tunateli cheñi kwanuka mazu akusoñamisha ahosheliyi Yesu nindi: “Babalenu, dihembenu muleki lwisu lwejima, muloña wumi wamuntu hiwekalaña kukuvula kwamahetinduku.” Kuhiñahu Yesu watili chishimu chamuntu waheta mukwalwisu wafwili ‘chakadi maheta kumesu aNzambi.’ (Luka 12:15-21) Hakwila tuhembi kashinshi ketu, bayi tufwa mumuhetu walwisu nichimaku. Lwisu hikupesha muloña yuma yafwilañayi muntu walwisu yamuheñulaña kudi Yehova nawa watachikaña kuyipesha. (Kol. 3:5) Kashinshi nilwisu hiyendelaña hamuku!

Kakelenu Kukudifukula Kwalala

12, 13. Yoba wemikili chakutalilahwinyi chakutondolwela kupesha?

12 Antu akweti kashinshi hiyafumaña mukudifukula kwalalaku. Yoba haheñukiluku, muloña wahosheli nindi: “Neyi namweni mwaana wunachi, nikakweji hakwenda nakutoñeka to-o, muchima wami hiwukundimbila kumbadi, nikanwa kami hikakupwepula chikasa chami; hela chumichi nawa chadi kwikala kuluwa kwatela kubabeshewa kudi ansompeshi; muloña natwambi dehi kumesu aNzambi wekala mwiwulu.”—Yoba 31:26-28.

13 Yoba hadifuukwileña kudi ankishuku. Neyi muchima windi wamudimbili kumbadi hakumona yuma yamumawulu, yidi neyi kakweji, ‘nikanwa kindi hikakupwepula chikasa chindi,’ hekwawu nakupwepujola nachikasa chindi munjila yakupesha, wadi kwikala mukwakupesha nakumukaana Nzambi. (Kuhit. 4:15, 19) Neyi tunakukeña kwikala ashinshika kumesu aNzambi, twatela kuleka nyichidi yejima yakupesha.—Tañenu 1 Yowanu 5:21.

Bayi Mutendana Hela Kwikala Anfwikijiku

14. Muloñadi chitukuhoshela netu Yoba hadiña muntu watamaku?

14 Yoba hadiña muntu watama hela wawukatuku. Welukili nindi yililu yamuchidiwu yadi kumwekesha nawu hakweti kashinshiku, muloña wahosheli nindi: “Neyi nazañaleli hajilumukili wanheleli; neyi nadinyamwini kwiwulu hamweniyi yatama. . . , hinetijili kanwa kami kuvulumuna chakulomba wumi windi nakumushiñaku.”—Yoba 31:29, 30.

15. Muloñadi chichatamina kuzañalala neyi muntu watuhela yaholokela mukukala?

15 Yoba muntu woloka hazañaleleña neyi muntu wamuhela yaholokela mukukalaku. Chishimu chikwawu chatusoñamishaña nawu: “Neyi chilumbu cheyi nadimbuki bayi wuzañalalaku; hakamudimbwishawu heseki bayi wakatiya kuwaha mumuchima weyuku; Yehova wakenza kachimona, hakatiya nikutama, hakafumisha ndombu yindi kudi yena.” (Yish. 24:17, 18) Chineli Yehova wamonaña munyichima, welukaña neyi kumbadi twazañalalaña nakukala kunaholokeli mukwetu nawa wahela yililu yamuchidiwu. (Yish. 17:5) Nzambi yomweni nateli kutubabesha, muloña wahosha nindi: “Nikutenda, yami; nikufweta, yami.”—Kuhit. 32:35.

16. Hela chakwila twaheta wanyi, tunateli kutambwila ñahi enyi?

16 Yoba wadiña nakutambwila enyi. (Yoba 31:31, 32) Hela chakwila twaheta wanyi, tunateli kusha “muchima kukutambula enyi.” (Rom. 12:13) Tunateli kudyila hamu nawakwetu yakudya yejima yitukweti, nakwanuka netu ‘chachiwahi kudya namafu hadi kukeñañana kubadika kudya nañombi wanuna nakuhelañana.’ (Yish. 15:17) Tukudiluñisha chikupu nikukolelaku kuspiritu neyi tudyila hamu nakukeñañana yakudya yejima yitukweti namwinetu wukweti kashinshi.

17. Muloñadi chitukubulila kubuta nshidi jamaneni?

17 Antu atela adiluñishileña chikupu nikudikolesha kuspiritu chayitambwilileñawu kudi Yoba, muloña hadiña nfwikijiku. Hadiña neyi antu atama eñilili muchipompelu chamuyaaka nkulakaji yatachi nawa ‘alemesheleña antu kumesu kulonda kudiilaku yumaku.’ (Yuda 3, 4, 16) Cheñi Yoba habutileña yiluwa yindi hela ‘kusweka kuluwa kwindi muntulu yinduku,’ nakuchina nindi akwawu akumusawula neyi eluka. Wakeñeleña Nzambi yamupezeleshi, kulonda yashimuni kuluwa kwindi. (Yoba 31:33-37) Neyi tuvulumuna chikupu, bayi tusweka nshidi yetu kulonda ijina detu dibuli kutamaku. Tunateli kumwekesha ñahi netu tunakuhemba kashinshi ketu? Kuhitila mukwiteja netu tunavulumuni, kubalumuka mumuchima, kulomba wukwashu wakuspiritu, nikuzata nañovu kulonda tukabuli kufuntilamu.—Yish. 28:13; Yak. 5:13-15.

Yoba Wadiheni Amweseki Kulonda Yamwekeshi Kashinshi Kindi

18, 19. (a) Muloñadi chitukuhoshela netu Yoba hadiña nakudyila antu hamutuku? (b) Neyi chakwila amuwanini namuloña Yoba wadiheni kumwiladi?

18 Yoba wadiña muntu washinshika nawa wamuwahi. Dichi, wahosheli nindi: “Neyi ituña dami dikuntwila mukunyi, hela neyi nyihaña yikudilila madilu kumu; neyi nadyimu yakudya yakadi kufweta, hela neyi nakojeji akwanyihaña yawu kufwa; komana mumeni nyiña, bayi tidikuku, mumeni nzonzonzu, bayi baluku.” (Yoba 31:38-40) Yoba hatambwileña mpata yawakwawuku, nawa hadyilileña ankoñi jindi hanyituku. Kufwana Yoba, twatela kwikala ashinshika kudi Yehova muyuma yamaneni niyanyanya.

19 Yoba walejeli amabwambu jindi asatu nimukwenzi Elihu chahandileñayi. Yoba watambikili muntu wudi wejima wukweti muloña nayena kulonda yashimuni mwamuvulumwiniyi kutalisha hachihandilu chindi ‘chasonekeliyi ijina dindi.’ Neyi Yoba amuwanini namuloña, wetejeli nindi ateleleli kumubabesha. Dichi wahanini muloña windi nakuhembelela Nzambi yahakuli. ‘Dichakumini mazu aYoba.’—Yoba 31:35, 40.

Munateli Kuhemba Kashinshi Kenu

20, 21. (a) Muloñadi Yoba chatwesheleliyi kuhemba kashinshi? (b) Tunateli kumukeña ñahi Nzambi?

20 Yoba watwesheli kuhemba kashinshi kindi muloña wakumukeña Nzambi, Yehova niyena wamukeñeli nawa wamukwashili. Yoba wahosheli nindi: “Wanyinka wumi naluwi [kukeña kwalala], [Yehova] chiwantalaña chahemba spiritu yami.” (Yoba 10:12) Kubombelahu, Yoba wamwekesheleña kukeña kudi antu amakwawu, muloña welukili nindi neyi wukubula kumwekeshaña kukeña kwalala kudi antu dikwila nawu wunaleki kutiya Chinaweji woma. (Yoba 6:14) Antu ashinshika akeña Nzambi niantuñi nawu.—Mat. 22:37-40.

21 Tunateli kumukeña Nzambi kuhitila mukutaña Izu dindi ifuku niifuku nikutoñojoka chikupu hayuma yahoshaña hadi yena. Tunateli kumuhameka Yehova nikumusakilila hayuma yayiwahi yatukoñelayi kuhitila mukulomba. (Fwi. 4:6, 7) Tunateli kumwimbila Yehova tumina nikuhetelamu mukudikunda mpinji yejima nawantu jindi. (Heb. 10:23-25) Cheñi, tukusweja kumukeña Nzambi chitukuzataña mumudimu wakushimwina nikutiyakesha ‘nsañu yayiwahi yawamwinu windi.’ (Mas. 96:1-3) Neyi twila mwenimu, tunateli kuhemba kashinshi, neyi cheliliyi ñimbi yamasamu wembili nindi: “Chachiwahi kukundama kwakwihi naNzambi: namwila dehi Mwanta Yehova nami dimu mwami mwakubatamina.”—Mas. 73:28.

22, 23. Chineli twahakwilañaku chiyuulu chaYehova, nyidimu yitwakalakalaña yinesakani ñahi nayawantu ahembeli kashinshi amuyaaka nkulakaji yatachi?

22 Hayaaka yayivulu yinahituhu, Yehova wahanaña nyidimu yashiyashana kudi antu ahembaña kashinshi. Nowa watuñili watu nawa wadiña “mukwakushimuna kuloña.” (2 Pet. 2:5) Yoshuwa walombweli aIsarela nakuyiñija Mwituña Dachikaninu, watwesheli kuyiñija muloña watañileña “mukanda wanshimbi . . . nimwaana niwufuku” nikulondela nshimbi jatañileñayi. (Yosh. 1:7, 8) AkwaKristu amuyaaka nkulakaji yatachi elishili atumbanji nawa apompeleña mpinji yejima nakudiza Nsona.—Mat. 28:19, 20.

23 Twahakwilañaku chiyuulu chaYehova nikuhemba kashinshi ketu kuhitila mukushimwina nsañu yakuloña, kwilisha atumbanji, kulondela kufumba kwamuNsona, nikupompa hamu nawakwetu akwaKristu hachipompelu, kupompa kwanyanya nikwamaneni. Nyidimu yamuchidiwu yatukwashaña kwikala ahamuka, akola kuspiritu, nikutwesha kwila mwaya kukeña kwaNzambi. Iyi nyidimu hiyatukalilaña nankashiku muloña Tata yetu wamwiwulu niMwanindi atukwashañaku. (Kuhit. 30:11-14; 1 Anya. 8:57) Kubombelahu, atukwashaña kudi ‘ana kwetu ejima’ endaña mukashinshi nawa amulemeshaña Yehova nawu hiMwanta wawu.—1 Pet. 2:17.

Mukwakula Nenudi?

• Twatela kumonaña ñahi nshimbi jaYehova jahoshaña hayililu yayiwahi?

• Yililwinyi yamwekesheleñayi Yoba yayitiyishaña kuwaha?

• Indi Yoba wadihembeleña ñahi neyi chinashimuniwu haYoba 31:29-37?

• Muloñadi chitukuhoshela netu tunateli kuhemba kashinshi ketu kudi Nzambi?

[Malwihu aKuzatisha haKudiza]

[Mwevulu wudi hefu 29]

Yoba wahembeli kashinshi kindi kudi Yehova. Ninetu nawa tunateli!

[Mwevulu wudi hefu 32]

Tunateli kuhemba kashinshi ketu!