Yehova Diyi Mwanta Wetu Mukwakubadika!

‘Yehova Mukwakubadika Kwiwulu . . .  hiMwanta weseki dejima.’—MAS. 47:2.

1. Chumanyi chateneneñayi Pawulu hamazu asonekeliyi ha 1 Akorinda 7:31?

 KAPOSTOLU Pawulu wahosheli nindi: “Muloña yuma yampata yinu chiyidichi, yahitaña.” (1 Kor. 7:31) Chakadi nikujina wafwanishili mpata yinu nebulu, hadi anhemi amawahi niatama adi muchimwenu nichikuhimpika yibalu yachimwenu.

2, 3. (a) Indi chiyuulu chaYehova chinajinookuwu tunateli kuchesekeja nachumanyi? (b) Malwihwinyi itukuhanjekahu?

² Makonu, kudi chuma chitwatela kufwanisha kuchimwenu chinakumwekana—nawa ninenu mudi mwomu! Sweje-e dinu chinashindameni hakuyiñisha chiyuulu chaYehova Nzambi. Tunateli kulumbulula ichi chimwenu kuhitila mukushimuna chuma chinakumwekana mwituña dacheñi. Mudi nfulumendi yamwituña yinakuyuula. Hanu kudi cheñi, izanvu dawayiluwañimbi, chiyuulu chawu chamakudi, chamadombu nikujahañana. Izanvu dawayiluwañimbi dazuñañeshaña chiyuulu chacheni nawa daluwañeshaña antu ejima kulonda adikañeña nanfulumendi yawu.

³ Ichi dichuma chinakumwekana mukuleña kwejima. Kudi nfulumendi yetejewa munshimbi ‘yaYehova Mwanta Mukwakubadika Kwiwulu.’ (Mas. 47:2) Ilaña antu anakuyichinisha kudi izanvu dawayiluwañimbi dinakulombolawu kudi “watama.” (1 Yow. 5:19) Dinakulukuka nfulumendi yaNzambi yetejewa munshimbi nawa dinakuzuñañesha antu ejima kulonda adikaañi nachiyuulu chindi. Indi iku kukala kwatachikili ñahi? Muloñadi Nzambi chakwitejelayi? Chumanyi chitwatela kwila naniku kukala hamuntu hamuntu?

Yuma Yekala Muchimwenu

4. Muchimwenu chinakumwekana chamukuleña kwejima mudi nyiloñanyi yiyedi yadifwana?

⁴ Munichi chimwenu chinakumwekana chamukuleña kwejima mudi nyiloña yiyedi yadifwana: Chiyuulu chaYehova nikashinshi kawantu. Munsona Yehova avula kumutena nawu “Mukwakubadika Kwiwulu.” Chakutalilahu, ñimbi yamasamu wembili nakumwekesha chikuhwelelu mudi yena nindi: ‘Yehova Mukwakubadika Kwiwulu . . . hiMwanta weseki dejima.’ (Mas. 47:2) Ichi chiyuulu chasweja ñovu. Mwanta wekalaña nañovu yeneni yakuyuula. Kudi yuma yayivulu yikutuleñela kwiluka netu Yehova  Nzambi hiMukwakubadika Mwiwulu.—Dan. 7:22.

5. Muloñadi chitwatela kwikala namuchima wakulemesha chiyulu chaYehova?

⁵ Hakwikala Nleñi, Yehova Nzambi hiMwanta weseki dejima niyuma yejima yaleñawu. (Tañenu Chimwekeshu 4:11.) Yehova cheñi diyi Nsompeshi yetu, Mukwakutwinka Nshimbi nawa diyi Mwanta. (Isa. 33:22) Chineli Nzambi diyi watwinka wumi nawa twashindamena hadi yena, twatela kwiluka netu diyi Mukwakubadika Kwiwulu. Tukwikala namuchima wakulemesha chifulu chindi chabadika neyi tutoñojokaña netu “Yehova nakoleshi itanda dindi dawanta mumawulu; wanta windi wayulaña antu ejima.”—Mas. 103:19; Yil. 4:24.

6. Indi kashinshi hichumanyi?

⁶ Hakwila nawu tuhakwiluku chiyuulu chaYehova, twatela kwikala ashinshika kumesu indi. “Kashinshi” katalisha mukwikala nayililu yayiwahi chikupu. Muntu wukweti kashinshi wekalaña woloka nawa walala chikupu. Ichi dichadiñayi nkakulula Yoba.—Yoba 1:1.

Chatachikili Chimwenu

7, 8. Indi Satana wajinookeli ñahi chiyuulu chaYehova chaloña?

⁷ Yaaka 6,000 yinahituhu, chileñaleña chakuspiritu chajinookeli chiyuulu chaYehova chaloña. Mazu ahosheliyi mukwakudikaña niyililu yindi yalwisu amwekesheli nawu wakeñeleña antu adifukuleña kudi yena. Waleñeleli antu atachi ayedi, Adama naEvu kudikaña nachiyuulu chaNzambi nawa watamishili ijina daYehova kuhitila mukushimuna nindi Nzambi watwambili. (Tañenu Kutachika 3:1-5.) Iwu mukwakudikaña wekalili Chilumbu muneni, Satana, (Mukwakudimbulula), Diyabolu (Sakutwamba), kapela (mukwakutwamba), chanzañombi (himudyi).—Chim. 12:9.

⁸ Satana wadimwekesheli yomweni kwikala nyuli mukwakuzuñañesha. Indi Yehova Mukwakubadika Kwiwulu welilidi nakukala kwamwekeni? Wadi kushikena kujilumuna akwakudikaña asatu, Satana, Adama naEvu? Yehova wadiña nañovu yakuyijilumuna, nawa chumichi chadi kumwekesha nawu Yehova wukweti ñovu jabadika. Chadi kumwekesha cheñi nawu Yehova wahosheli mwalala kutalisha hayuma yatama yakafuma mukufumpa nshimbi jindi. Hanu dinu, muloñadi Nzambi chabuliliyi kuyijilumunayi?

9. Yumanyi yajinookeliyi Satana?

⁹ Satana wajinookeli chuma chakeñañayi Yehova kudi antu nindi amwovwahileña kuhitila mukutwamba nikuleñela Adama naEvu kumufutalela Nzambi. Kubombelahu, kuhitila mukudimba antu atachi ayedi nindi adikañi naNzambi, Satana wajinookeli cheñi kashinshi kayileñaleña yejima yikweti maana. Neyi chichamwekeni kudi Yoba, wovwahilileña chiyuulu chaYehova, Satana wahosheli nindi nateli kuhuñumuna antu ejima nakumufutalela Nzambi.—Yoba 2:1-5.

10. Chumanyi chinetejiyi Nzambi kuhitila mukutwala hambidi mpinji yakuyiñishilamu chiyuulu chindi?

¹⁰ Kuhitila mukutwala hambidi mpinji yakuyiñishilamu chiyuulu chindi, Yehova namwinki Satana mpinji yakumwekeshelamu neyi chakwila nateli kuyuula munjila yayiwahi. Nzambi nayinki cheñi antu mpinji yakumwekesha kashinshi kuchiyuulu chindi. Hanu dinu chumanyi chinamwekani muniyi yaaka yejima yinahituhu? Satana natuñi izanvu deneni dawayiluwañimbi. Nkumininaku, Yehova wakadijilumwina hamu naDiyabolu, nakumwekesha chikupu nawu Nzambi hohu diyi watela kuyuula. Yehova Nzambi welukili chikupu nindi mwakafuma chuma chachiwahi chashimwiniyi hampinji yakudikaña muEdeni.—Kutach. 3:15.

11. Chumanyi chinakoñuwu antu amavulu kutalisha kuchiyuulu chaYehova?

¹¹ Antu amavulu anamwekeshi chikuhwelelu nawa anahembi kashinshi kawu muloña wakufwila kulemesha chiyuulu chaYehova nikujilika ijina dindi. Hakachi kawu hadi Abeli, Enoki, Nowa, Abarahama, Sara, Mosi, Luti, Davidi, Yesu, atumbanji twaKristu akusambila niyihita yawantu akweti kashinshi makonu. Awa antu anakuhakwilaku chiyuulu chaNzambi niwena amufwishaña Satana namuloña nawu hisakutwamba nawa afumishaña kasawuntu  kanapuchikiyi Diyabolu hejina daYehova kuhitila mukudeta hebwambu nindi nateli kubalumuna antu ejima nakuyifumisha kudi Nzambi.—Yish. 27:11.

Tuneluki Chakamana Ichi Chimwenu

12. Tuneluki ñahi netu Nzambi haketeja yuma yatama kutwalekahuku?

¹² Tunakuhweleli chikupu netu Yehova keña yayiñishi chiyuulu chindi. Haketeja yuma yatama kutwalekahuku nawa tuneluki netu tunakushakama mumafuku akukuminina. Yehova wajilumwini antu atama hampinji yaDibaji. Wajilumwini musumba waSodoma naGomora, Fwaro niamashidika indi. Sisera niamashidika indi niSenakeribi nimukanka windi wawa mashidika awaAshuri ayibabesheli kudi Mukwakubadika Kwiwulu. (Kutach. 7:1, 23; 19:24, 25; Kwid. 14:30, 31; Ansomp. 4:15, 16; 2 Anya. 19:35, 36) Dichi tunakuhweleli chikupu netu Yehova Nzambi hakaleka antu kutwalekahu nakusawula ijina dindi nikuyandisha aYinsahu jindi haya nyakaku. Cheñi nawa, tunamoni chinjikijilu chakumwekana kwaYesu nichakukuma kwadinu ituña datama.—Mat. 24:3.

13. Tunateli kupuluka ñahi kulonda akabuli kutujilumwina hamu nawayilumbu jaYehova?

¹³ Hakwila nawu akabuli kutujilumwina hamu nawayilumbu jaNzambi, twatela kukakela nankashi kuchiyuulu chaYehova. Tunateli kukakela ñahi kuchiyuulu chindi? Twatela kudambula kuchiyuulu Satana chiluwañimbi nikubula kufwa mutentu wazalishañawu antu jindi. (Isa. 52:11; Yow. 17:16; Yil. 5:29) Neyi tudambula chikupu kuchiyuulu chaSatana, tukuhakwilaku chiyuulu chaTata yetu wamwiwulu nawa tunateli kukuhwelela netu tukapuluka hampinji yikayiñishayi Yehova ijina dindi dinatamishuwu nakumwekesha nindi yena hohu diyi Mwanta Wakuleña Kwejima.

14. Yumanyi yashimunawu muyibalu yashiyashana yamuBayibolu?

¹⁴ Nsañu yahosha hadi antu nihachiyuulu chaYehova ayishimuna munyikanda yejima yamuBayibolu. Tupetulu tusatu twakutachikilahu twahosha hansañu yakuleña nichavulumwiniyi muntu, ilaña tupetulu twakukumishaku tusatu twahosha hachihandilu chachiwahi chakekala nawantu. Ilaña mafu adi hakachi ashimunaña njila jazatishayi Yehova Mukwakubadika Kwiwulu kulonda yeli mwaya kufuukula kwindi kutalisha kudantu, iseki niyuma yejima. Mukanda waKutachika washimuna chenjili Satana mukaayi nichatachikili kutama, yibalu yakukumishaku yamuChimwekeshu yashimunaña chiyakafumishahu kutama, chakamujilumunawu Diyabolu nawa kukeña kwaNzambi akakwila hamaseki neyi chakwilañawu mwiwulu. Eñañi, Bayibolu yalumbulula chatachikili nshidi nikufwa nawa yashimuna chakayifumishawu hamaseki nawa antu akweti kashinshi akayinka wumi wahaya nyaka nawa akazañalala hama.

15. Chumanyi chitwatela kwila neyi tunakukeña kuhetelamu hamuntu hamuntu mukumana kwachimwenu chinakuhosha hachiyuulu?

¹⁵ Yuma yamukanu kaayi katataka yihimpiki chikupu. Chimwenu chinakuhosha hachiyuulu  keña chimani. Satana hakekala cheñi nawuswa wakuyuulaku nawa akamujilumuna, kufuukula kwaNzambi kwakemika mushindu. Dichi neyi tunakukeña kuhetelamu, nikudiluñisha nkisu jajivulu jashimunawu Mwiizu daNzambi, twatela kukakela chikupu kuchiyuulu chaYehova yoyinu mpinji. Bayi tujiila-jilaku. Hakwila nawu tuhoshi netu: “Yehova wadikuma nanami,” twatela kwikala kukabadi kindi.—Mas. 118:6, 7.

Tunateli Kuhemba Kashinshi Ketu!

16. Tuneluki ñahi netu antu anateli kwikala ashinshika kumesu aNzambi?

¹⁶ Tunateli kukakela kuchiyuulu chaYehova nikwikala ashinshika, muloña kapostolu Pawulu wasonekeli nindi: “Hikunayiwani kweseka kwabulaña kutweshawu antu ejimaku; ilaña Nzambi washinshika, hakwiteja kuyeseka chabadika muñovu jenuku; chakuyesekawu wukubuzilaku njila yakupulukila, kulonda mutweshi kukakela.” (1 Kor. 10:13) Indi kweseka kwashimwiniyi Pawulu kwafumaña kudihi nawa Nzambi watubuzilaña ñahi njila?

17-19. (a) Indi aIsarela aholokeleli mukweseka kwamuchidinyi hampinji yadiñawu muchinkalampata? (b) Muloñadi chitukuhoshela netu tunateli kwikala ashinshika kumesu aYehova?

¹⁷ Neyi chinamwekeshi chakutalilahu chawaIsarela hadiñawu muchinkalampata, “kweseka” kwenjilaña muyuma yinateli kutuleñela kufumpa nshimbi jaNzambi. (Tañenu 1 Akorinda 10:6-10.) A Isarela kachi hiyadi kuholokela mukwesekaku, ilaña adiña nakufwila “yuma yatama” henohu muchihayamisha Yehova wayinkeleña tuñumbi hakakweji. Hela chakwila antu hiyadyiluhu mbiji hadi mpinji yenenuku, Nzambi wayinkeli manina amavulu nindi adyeña. Ilaña aholokeleli mukweseka muloña walwisu hampinji yakuñulwileñawu tuñumbi.—Kuch. 11:19, 20, 31-35.

¹⁸ Hatachi, hampinji yakandaminiyi Mosi Hampidi yaSinayi nakutambula Nshimbi, aIsarela atachikili kupesha, kudifukula kudi mwana kañombi nikwila wuvumbi. Chineli nlomboli yawu wadiñaku wanyi, hiyashileña maana kuyuma yatela kuyileñela wena kuholokela mukwesekaku. (Kwid. 32:1, 6) Henohu kunashali hohu kwanti nakwiñila Mwituña Dachikaninu, aIsarela amavulu ayihuñumwini kudi ambanda akuMowabi, nawa elili nawu wuvumbi. Hayina mpinji, aIsarela amavulu ahondekeli muloña wanshidi yakoñeluwu. (Kuch. 25:1, 9) Mpinji jikwawu aIsarela atobeleña nakudikaña, nawa mpinji yimu atachikili kumuhoshola Mosi niNzambi. (Kuch. 21:5) A Isarela atachikili kutoba hanyima yakujilumuka kwawantu atama aKora, Datani, Abiramu niamabwambu jawu, atoñojokeli mwaluwa nawu analuwañeshi hakuyijaha awa akwakudikaña. Chafuminumu, aIsarela 14,700 ahondekeli nachipupu chafumini kudi Nzambi.—Kuch. 16:41, 49.

¹⁹ A Isarela adiña nawuswa wakutondolwela kweseka kwejima kutunateni. Ilaña aholokeleli mukweseka muloña wakubula chikuhwelelu nawa amufutaleleli Yehova, nawa adiwili njila mwadiña nakuyakamenayi nikuloña kwanjila jindi. Neyi chichadiña kudi aIsarela, kweseka kutunakumona dikwamonañawu antu ejima. Neyi tushaku muchima wakutondolwela iku kweseka nawa tushindamena hadi Nzambi, tunateli kuhemba kashinshi ketu. Tunateli kukuhwelela netu Nzambi wukutukwasha muloña “Nzambi washinshika,” nawa hakutwiteja nindi atweseki ‘chakubadika muñovu jetuku.’ Yehova hanateli kutushiya chisayikila chakwila yatwiteji kwiñila mukweseka kukutuleñela tukañanyi kwila yuma yakeñañayiku.—Mas. 94:14.

20, 21. Neyi anatweseki, indi Nzambi ‘wabuzilañaku ñahi njila’?

 ²⁰ Yehova ‘wabuzilañaku njila’ kuhitila mukutukolesha kulonda tuumiki kweseka. Chakutalilahu, akwakuyandisha anateli kutumwesha ihuñu dadeni kulonda tuluwañeshi chikuhwelelu chetu. Neyi kubabala nehi tunateli kuluwañesha chikuhwelelu chetu muloña wakukeña kutemuka mahumpu, ikabisha, hela tuhu kufwa. Hela chochu, kwesekeja namazu onenewa akukolesha asonekeliyi Pawulu ha 1 Korinda 10:13, atukwashaña kwiluka netu kweseka kutunamoni kwakapinji kantesha hohu. Yehova hanateli kwiteja tuholokeli mukweseka kukutuleñela tukañanyi kwikala ashinshika kudi yenaku. Nzambi nateli kukolesha chikuhwelelu chetu nikutwinka ñovu yakuspiritu kulonda tuhembi kashinshi ketu.

²¹ Yehova watukwashaña kuhitila muspiritu yindi yajila. Iyi spiritu yatukwashaña kwanuka nsañu yamuNsona yatukwashaña kulonda tubuli kuholokela mukweseka. (Yow. 14:26) Dichi, kwosi watela kutudimba kulonda tutachiki kwila yuma yatama. Chakutalilahu, tuneluki nyiloña yadifwana yinakundami kuchiyuulu chaYehova nikashinshi kawantu. Hamuloña wakwiluka yumiyi, antu amavulu anayikwashi kudi Nzambi nakwikala ashinshika kushika nikukufwa. Bayi neyi kufwa dikwayibuzilili njilaku, ilaña Yehova diyi wayikwashili kuumika kushika nikunsa chakadi kuholokela mukweseka. Anetu nawa nateli kutukwasha. Watukwashaña cheñi kuhitila mukuzatisha añelu jindi ashinshika, añamba azatilaña antu amavulu ‘atemeshañayi kukalakela antu akaswana wamwinu.’ (Heb. 1:14) Neyi chinalumbululuwu muchibaaba chinalondeluhu, antu akweti kashinshi hohu diwu achiñejaña kukooleka kwakukakela kuchiyuulu chaNzambi haya nyaka. Anetu nawa tunateli kwikala haniwu mukanka neyi tukakela kuChiyuulu chaYehova Mukwakubadika Kwiwulu.

Mukwakula Nenudi?

• Muloñadi chitwatela kumwiluka Yehova netu diyi Mukwakubadika Kwiwulu?

• Indi kwikala ashinshika kumesu aNzambi kwatalisha mudihi?

• Tuneluki ñahi netu Yehova keña yayiñishi chiyuulu chindi?

• Kwesekeja na 1 Akorinda 10:13, muloñadi chitukuhoshela netu tunateli kuhemba kashinshi ketu?

[Malwihu aKuzatisha haKudiza]

[Mwevulu wudi hefu 24]

Satana wadimbili Adama naEvu kulonda adikañi naYehova

[Mwevulu wudi hefu 26]

Ikalenu namuchima wakukakela kuchiyuulu chaYehova