Yehova Watiyaña Kwaaba Kwawantu Akweti Nyichima Yachikeka

MWANTA wamaana Solomoni wamuIsarela wakushankulu wahosheli nindi, ‘mpinji nakululakana chatululakenaña tuhu wejima wetu.’ (Mukwa. 9:11) Chihandilu chetu chaluwankanaña neyi chuma chatama chitumwekena hela tuholokela mukukala kweneni. Chakutalilahu, twaneñaña nankashi neyi tujimbesha ntaña yetu mukukasumwisha. Twaswejaña kuneña nikudishona hadi nyilungu nitukweji twatuvulu. Muntu nateli kuluwankana nawa wukutoñojoka nindi hanashikilumu kulomba kudi Yehovaku.

Muntu wunaholokeli mukukala kwamuchidiwu, wakeñekaña kumukolesha, kumwakamena nikumukeña. Dihafumini ñimbi yamasamu Davidi kwimba nindi: “Yehova wayikwataña chachiwahi ejima adimbukaña, wayihindwishaña wejima wawu anoñamaña.” (Mas. 145:14) Bayibolu yatulejaña nawu “mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.” (2 Kushi. 16:9) Nzambi wudi ‘hamu namuntu wukweti muchima wachikeka, kulonda yahizumwishi nyichima yawantu akweti nyichima yachikeka.’ (Isa. 57:15) Indi Yehova wakwashaña ñahi nikukundeja antu akweti nyichima yachikeka?

‘Izu Dakuhosha Hampinji Yatelela’

Njila yimu mwatukwashilañayi Yehova hampinji yatelela yekala yakuhitila mudi amana kwetu akwaKristu. AkwaKristu ayikonkomwena ‘kukundeja antu ananeñi.’ (1 Tesa. 5:14) Neyi akwenu akakwitiya akweti luwi ahosha mazu akwakamena munjila yakukeña, mazu awu anateli kukolesha muntu wunaholokeli mukukala nawa wunaneñi. Neyi tuhosha mazu akukundeja hela tuhu antesha anateli kukolesha muntu wunaneñi. Awa mazu akukundeja anateli kuyihosha kudi muntu wunakuumika kukala kwamuchidiwu nichineñi. Hela anateli kuyihosha kudi ibwambu denu wahitahu dehi mukukala kwamuchidiwu. Yehova nateli kukolesha muntu wukweti muchima wachikeka kuhitila mudi amana kwetu niahela.

Talenu chamwekeni kudi eluda mukwaKristu wejina daAlex wafumini tuhu hakusumbula, wafwishili ñodindi mukukasumwisha muloña wakatili chikatu chakadi kuuka. Nkoñi wendaña wukweti wushona washili muchima hakuhosha mazu akumukundeja Alex. Niyena wafwishili ñodindi ilaña haniyi mpinji wadiña wasumbula dehi wacheñi. Nkoñi wendaña wamulumbulwilili chaswejeliyi kuneña. Chineñi chatiyileñayi chakeheleña neyi yaya mumudimu wakushimwina nawakwawu hela yaya kukupompa. Ilaña cheñilayi mwitala  yashinkaku, chineñi chaswejeleña. Alex wahosheli nindi: “Chanzañalesheli hakwiluka nami chineñi chinatiyileña dichatiyaña niantu amakwawu.” Mwalala, ‘izu dakuhoshela hampinji yatelela’ dinateli kukundeja muntu wunaneñi.—Yish. 15:23.

Eluda MukwaKristu mukwawu, weluka antu amavulu ajimbesha enikwawu, wanyamukili nakumukolesha Alex. Wahosheli mazu aluwi nawa akukeña nindi, Yehova weluka chitwatiyaña niyuma yitwakeñaña. Iwu mana kwetu watwalekeluhu nindi: “Neyi kumafuku akumbidi wukakeña kusumbula, Yehova washaku ntanjikilu yayiwahi yakusumbula cheñi.” Hela chochu, bayi neyi antu ejima ajimbeshaña enikwawu nawa akeñaña kusumbula cheñi hohenohu anateli kushikena dakusumbulaku. Ilaña chatoñojokeliyi hamazu ahosheli mana kwetu, Alex wahosheli nindi, “Chañanukishiliyi nindi kusumbula cheñi hinjila yayiwahi yatanjikayi Yehova kwanleñeleli kwikala wakasunuka nakuleka kutoñojoka nami neyi kumbidi nisumbula cheñi hinukwikala washinshika kudi mwini kwami hela kuntanjikilu yaYehova yamaluwuku.”—1 Kor. 7:8, 9, 39.

Ñimbi yamasamu Davidi, waholokeleli mukweseka kwakuvulu nikukala, wahosheli nindi: “Mesu aYehova atalaña antu aloña, nimatu indi atiyililaña chakutambikawu.” (Mas. 34:15) Mwalala, Yehova nateli kwakula kulomba kwawantu akweti nyichima yachikeka hampinji yatelela kuhitila mumazu amaana nawa akashinshi ahoshañawu munjila yawushona kudi akwetu akwaKristu apama. Iyi njila yayiwahi nawa yatukwashaña.

Wukwashu Wutwatambwilaña Kukupompa KwawakwaKristu

Muntu wunaneñi waswejaña kwikala nayitoñojoka yaheña yinateli kumuleñela kudambula. Ilaña, mukanda waYishimu 18:1 watusoñamishaña nawu: “Wadambulaña hakanka windi nafwili mwakeñayi yena hohu, hakuzuwila maana alala ejima.” Alex wetejeli nindi: “Neyi wujimbesha mwini kweyi, mumutu mwenzalaña kwayitoñojoka yatama.” Wanukili chadihwileñayi nindi: “‘Hadaha nateleleli kwila yuma munjila yacheñi? Hela chiña naswejeleña kumwakamena nikumutiyila luwi?’ Kwami hinakeñeleña kushala nkawamiku. Hinakeñeleña wujikiku. Mpinji yejima wukutoñojokaña  hachuma chinamwekani muloña ifuku niifuku wukwanukaña neyi nidi nkawami.”

Muntu wukweti muchima wachikeka wakeñaña amabwambu anateli kumukundeja chikupu. Mwatela kuwana antu anateli kuyikundeja hakupompa kwachipompelu. Hakupompa, twatambwilaña kufumba kwaNzambi kwakuwahi nawa kwatukoleshaña.

Kupompa kwawakwaKristu kwatukwashaña kubula kutoñojoka nankashi hakukala kutukweti. Hampinji yitunakutiyilila nikutoñojoka chikupu hansañu yamuBayibolu, twatoñojokaña nankashi hayuma yiyedi yasweja kulema—kuyiñisha chiyuulu chaYehova nikujilika ijina dindi—bayi hakukala kunatuholokeluku. Kubombelahu, hampinji yinakutulejawu hadi Yehova hakupompa kwetu kwawakwaKristu, chatukoleshaña hakwiluka netu hela akwetu hiyaneluki kukala kutunakumona hela chitunakutoñojokaku, ilaña Yehova weluka. Neluki ‘muloña kuneña kwakumuchima kwabalulaña muchima wamuntu.’ (Yish. 15:13) Nzambi walala wakeñaña kutukwasha, nawa chumichi chatusañumunaña nikutukwasha kutwalekahu.—Mas. 27:14.

Mwanta Davidi wabileleli kudi Nzambi hampinji yamulukukiluwu kudi ayilumbu jindi nindi: “Spiritu yami jinamukañi dehi mukachi kami; muchima wami wafwa dehi puchi mwivumu.” (Mas. 143:4) Kakavulu makabi azeyeshaña muntu kumujimba nimuyitoñojoka, nimuchima wafwaña puchi mwivumu. Tunateli kuholokela mukukala kudi neyi kankati hela kuyekela nayikatu. Twatela kukuhwelela netu Yehova wukutukwasha kulonda tutweshi kuumika. (Mas. 41:1-3) Hela chakwila makonu Nzambi hokaña antu muchihayamishaku, wenkaña muntu wunakukabakana maana niñovu yakuumika kukala kunakumonayi. Mwatela kwanuka nenu, Davidi chaholokeleliyi mukukala walombeli kudi Yehova. Wembili nindi: “Hinukwanuka mafuku akumwaka, hinukutoñojoka mwejima muwelaña, muchima wami hiwukuhita mwaya nyidimu yakumakaseyi.”—Mas. 143:5.

Chineli awa mazu onenawu ayisoneka Mwiizu daNzambi chinakumwekesha nawu Yehova weluka chitwatiyaña. Awa mazu atuleñelaña kwiluka netu watiyaña kulembelela kwetu. Neyi tutambwila wukwashu waYehova, ‘yena wukutukwashaku.’—Mas. 55:22.

“Bayi Muleka Kulombaku”

Mukanda waYakoba 4:8 wahosha nawu: “Kundamenu kwakwihi naNzambi, niyena wukukundama kwakwihi nanenu.” Kulomba diyi njila yimu yakukundaminamu kudi Nzambi. Kapostolu Pawulu watukonkomwenaña nindi ‘bayi tuleka kulombaku.’ (1 Tesa. 5:17) Hela chakwila chatukalilaña kuhosha chitunakutiya, ‘spiritu yayeni yatulembelelaña nakwaba kwakweni kwakukañanya kushimuna.’ (Rom. 8:26, 27) Mwalala Yehova weluka chitwatiyaña.

Monika, wekala nawubwambu wawuwahi naYehova wahosheli nindi: “Kuhitila mukulomba, kutaña Bayibolu, nikudiza, kunaleñeli niluki nami Yehova Hibwambu dami chikupu. Wudi kwakwihi nankashi nanami nawa namoni chinakunkwashayi muchihandilu chami. Chankundejaña hama hakwiluka nami hela neyi nikañanya kulumbulula chinakutiya, welukaña. Neluka nami luwi lwindi ninkisu yindi yatwalekañahu.”

Eñañi, twitejenu mazu akukeña nawa akukundeja ahoshañawu akwetu akwaKristu, tuzatishenu kufumba kwakuwahi niyuma yakukolesha chikuhwelelu chetu yatulejañawu hakupompa kwetu kwawakwaKristu, nikumuleja Yehova yuma yejima yidi munyichima yetu. Yehova watwakamenaña kuhitila muyuma yejimiyi. Alex wahosheli yuma yamweniyi nindi, “Neyi tuzata nañovu yetu yejima nakulondela yuma yejima yatuloñeshelañayi Yehova Nzambi yakukoleshelamu wubwambu wetu nayena, twakekala nañovu ‘jabadika nankashi’ jakuumika kweseka kwejima kwatela kutuholokela.”—2 Kor. 4:7.

[Chikasha/Mwevulu wudi hefu 18]

Mazu Akundejaña Antu Akweti Nyichima Yachikeka

Mumukanda wamasamu mwenzala nsañu yayivulu yayiwahi nawa mudi mazu achikaninu akufuntila-funtilahu akwila nawu Yehova watiyaña kudila kwamuntu wachikeka mumuchima wunakumona kukala kwasweja. Talenu yikunku yidi heshina:

“Chinamweni kukala namutambikili Yehova, hinukumubilela Nzambi yami; watiyili izu dami mutembeli yindi, niikumbu dami nadilili dashikili kumatu indi.” —Mas. 18:6.

“Yehova wudi kwakwihi nawantu abaluka nyichima yawu mwivumu, wayamwinaña antu akweti spiritu yachikeka puchi.”—Mas. 34:18.

“[Yehova] wakuswishaña abaluka nyichima; wakasaña hayilonda yawu.”—Mas. 147:3.

[Mwevulu wudi hefu 17]

Neyi tudi mukukala ‘izu dakuhosha hampinji yatelela’ dinateli kutukundeja chikupu!