‘Ayinu Diyi Mpinji Yayiwahi Nankashi’

‘Tiyenu, ayinu diyi mpinji yayiwahi; tiyenu, adinu hiifuku dawamwinu.’ —2 KOR. 6:2.

1. Chumanyi chalema chitwatela kwila mpinji yejima?

 “YUMA yejima yikweti yilaaka yayu, niyuma yejima yafuukulawu mwishina dewulu yikweti hawililu wayu.” (Mukwa. 3:1) Solomoni wasonekeli nindi twatela kwiluka mpinji yayiwahi yakwililamu chuma chitunakufwila, chidi neyi kudima, kwenda, kuselujola hela kutiyañana nawakwetu. Hela chochu, twatela kwiluka cheñi mudimu walema nankashi wutwatela kuzata hanoyu mpinji. Hela netu, twatela kwiluka yuma yitwalemesha.

2. Tuneluki ñahi netu hampinji yadiña nakushimwinayi Yesu, welukili chikupu mpinji yadiñayi nakushakamamu?

² Hampinji yadiñayi hamaseki, Yesu welukili chikupu mpinji yadiñayi nakushakamamu ninyidimu yateleli kwilayi. Hamuloña wakwiluka chachiwahi nyidimu yalemesheliyi, welukili nindi mpinji yeneni yahembeleleñayi yakushikijewa kwawuprofwetu wawuvulu wawuMesiya yadiñi kwakwihi. (1 Pet. 1:11; Chim. 19:10) Wadiña namudimu wakuleja antu amwiluki nawu diyi Mesiya wakaniniwu. Wadiña  cheñi namudimu wakushimwina nsañu yalala yaWanta kwejima nikupompesha antu akayuulayi nawu muWanta. Walili cheñi chikuku chachipompelu chawakwaKristu, chikatwalekahu namudimu wakushimwina nikwilisha atumbanji kushika nikwakumina iseki.—Maku 1:15.

3. Hamuloña wakwiluka mpinji yashakamineñamu chamuleñeleli Yesu kwiladi?

³ Hamuloña wakwiluka mpinji yashakamineñamu dikwamusañumwini Yesu muchihandilu chindi kudikita mumudimu wakwila nkeñelu yaTata yindi. Walejeli atumbanji twindi nindi: “Mbutu yinahi yayivulu, ilaña akwakukalakala anakehi. Dichi lombenu kudi Mwanta diyi mukwakwañula, atemeshi akwakukalakala kumudimu wakwañula mbutu yindi.” (Luka 10:2; Mal. 4:5, 6) Hatachi Yesu watondeli atumbanji 12, kuhiñahu watondeli atumbanji 70 hakachi kawu, wayinkeli nshimbi, nawa wayitemesheli kuya nakushimwina nsañu yakuzañalesha nindi: “Wanta wamwiwulu wudi kwakwihi.” Kutalisha hadi Yesu, twatañaña netu: “Chelili Yesu nakumishi dehi kulejaleja atumbanji twindi ikumi nayedi, hakufuma kwenoku hakuya nakuleja antu, nikushimuna munyikala yawu.”—Mat. 10:5-7; 11:1; Luka 10:1.

4. Munjilanyi Pawulu mwamwimbujolileñayi Yesu Kristu?

⁴ Yesu wemikili chakutalilahu chakwikala neyena nikwakama Nzambi chembujolileñawu atumbanji twindi ejima. Dihafumini kapostolu Pawulu kuleja akwawu akakwitiya nindi: “Ikalenu akwakuñimbujola ami, neyi chinelaña ami nawa nembujolaña Kristu.” (1 Kor. 11:1) Munjilanyi Pawulu mwamwimbujolileñayi Kristu? Wamwimbujolileña chikupu kuhitila mukudikita nankashi mukushimwina nsañu yayiwahi. Munyikanda yasonekeliyi Pawulu kuyipompelu, twawanañamu mazu akwila nawu, ‘bayi mulabajala hamudimu wenuku,’ ‘mukalakelenu Mwanta,’ “swejenu kukalakala mudimu waMwanta mafuku ejima,” ‘niyuma yejima yimukwila yilenu namuchima wakukalakela Mwanta.’ (Rom. 12:11; 1 Kor. 15:58; Kol. 3:23) Pawulu wanukileña mpinji yamwekeniyi Mwanta Yesu Kristu munjila yaya kuDamakasa nimazu aYesu amulejeluwu Pawulu kudi kambanji Ananiya akwila nawu: “[Iwu iyala] hinsaba yinatondi ami aweni, kulonda atwali ijina dami kudi aJentili, nikudi anyanta ankanu, nikudi aIsarela.”—Yil. 9:15; Rom. 1:1, 5; Ŋal. 1:16.

‘Ayinu Diyi Mpinji Yayiwahi Nankashi’

5. Chumanyi chamusañumwineña Pawulu kuzata mudimu windi neyena?

⁵ Neyi tutaña mukanda waYililu, twamonaña chikupu kuhamuka niyena damwekesheliyi Pawulu hakukalakala mudimu windi wakushimwina. (Yil. 13:9, 10; 17:16, 17; 18:5) Pawulu welukili nindi mpinji yashakamineñamu yadiña yalema nankashi. Wahosheli nindi: ‘Tiyenu, ayinu diyi mpinji yayiwahi; tiyenu, adinu hiifuku dawamwinu.’ (2 Kor. 6:2) Muchaaka cha 537 B.C.E., yadiña mpinji yayiwahi yafuminuwu ankoli muBabiloni nakufunta kwituña dawu. (Isa. 49:8, 9) Hanu dinu Pawulu wahosheleña hachumanyi? Nsañu yahosheleñayi yatukwashaña kwiluka mwatalishiliyi.

6, 7. Mudimwinyi walema wayinkawu akwaKristu awayishewa makonu, nawa anakuzata nawanyi?

⁶ Mumukanda wasonekeliyi hakusambila, Pawulu wahosheli hamudimu weneni wamukunjikiluwu yena niakwawu akwaKristu awayishewa. (Tañenu 2 Akorinda 5:18-20.) Walumbulwili nindi ayitambikili kudi Nzambi kulonda azati iwu mudimu, “wakushimuna nsañu yakukundamisha,” nikulembelela antu kulonda ‘afunti  kudi Nzambi.’ Dikwila nawu ateleli kukwata cheñi wubwambu naNzambi.

⁷ Kufuma tuhu hakudikaña kwamwekeni muEdeni, antu ejima adambula kudi Yehova. (Rom. 3:10, 23) Hamuloña wakudambula kudi Nzambi kunaleñeli antu kwikala mumwidima wakuspiritu, nawa kwaleta makabi nikufwa. Pawulu wasonekeli nindi: “Tuneluki netu kuleña kwejima kwaabaña nakufunyisha hamu, nikulelu.” (Rom. 8:22) Ilaña Nzambi waloñesha njila yakulejelamu antu, ‘nikuyilembelela’ kulonda afunti kudi Nzambi, hela akundami kudi yena. Iwu diwu mudimu wamwinkeluwu Pawulu niakwawu akwaKristu awayishewa mpinji yakunyima. “Mpinji yayiwahi” yadiñi “hiifuku dawamwinu” kudi antu akuhweleleli mudi Yesu. AkwaKristu awayishewa ejima nialunda nawu, “anyikoku acheñi,” anakuzatila hamu nakutwalekahu kutambika antu kulonda aheteli muniyi “mpinji yayiwahi.”—Yow. 10:16.

8. Chumanyi chaleñelaña mudimu wakufuntisha antu wikali walema nankashi?

⁸ Mudimu wakutambika antu afunti kudi Nzambi walema chikupu muloña hela chakwila antu diwu atamishili wubwambu wawu naNzambi hakudikaña kwamwekeni muEdeni, Nzambi yomweni wafuukwiluhu njila yakufuntishilamu wubwambu. (1 Yow. 4:10, 19) Chumanyi cheliliyi? Pawulu wakwili nindi: “Nzambi mudi Kristu nakukundamisha antu ampata yamunu mwishina kudi yomweni, nakubula kuyifuukwila nyiloña yawu; natukunjiki mazu akukundamisha.”—2 Kor. 5:19; Isa. 55:6.

9. Chumanyi cheliliyi Pawulu chamwekesheli nawu wahamekeli haluwi lwaNzambi lwamumwekesheleluwu?

⁹ Kuhitila mukuhana mulambu wefutu danyiloña, Yehova waloñesheli njila yakwanakena nyiloña yawantu akweti chikuhwelelu nikukwata cheñi wubwambu nayena. Cheñi, watemesheli atuñanda twindi kuya nakukonkomwena antu kwejima kulonda atiyañaneña naNzambi. (Tañenu 1 Timotewu 2:3-6.) Chelukiliyi nkeñelu yaNzambi nimpinji yashakamineñamu, Pawulu wadiheni chikupu ‘mumudimu wakushimuna nsañu yakukundamisha.’ Nkeñelu yaYehova hiyinahimpikiku. Yehova wuchidi kukeña nindi antu akwati cheñi wubwambu nayena. Mazu ahosheliyi Pawulu akwila nawu ‘ayinu diyi mpinji yayiwahi,’ nimazu akwila nawu ‘adinu hiifuku dawamwinu’ achidi kuzatika nikulelu. Mwalala Yehova Nzambi wukweti luwi lwabadika niwushona.—Kwid. 34:6, 7.

Bayi ‘Mudiwula Luwi lwaNzambuku’

10. Indi “ifuku dawamwinu” datalisha mudihi kudi akwaKristu awayishewa akunyima niamakonu?

¹⁰ ‘Antu adi mudi Kristu’ diwu asambilili kwikala nakukooleka kwakufunta kudi Nzambi. (2 Kor. 5:17, 18) Kudi wena, “ifuku dawamwinu” datachikili haPentekosta 33 C.E. Kufuma haniyi mpinji, ayinka mudimu wakushimuna “mazu akukundamisha.” Nikulelu, akwaKristu ashalahu awayishewa achidi kudikita “mudimu wakushimuna nsañu yakukundamisha.” Eluka nawu añelu awana amweniyi kapostolu Yowanu muchimwenu chawuprofwetu achidi ‘akwata mpepela jeseki jiwana, kulonda akañeshi mpepela kukunka heseki.’ Dichi, ‘ifuku dawamwinu’ dichidi kwoku nawa ‘himpinji yayiwahi.’ (Chim. 7:1-3) Dichi, kufuma tuhu kukutachika kwayaaka nkulakaji yamu 20, awayishewa ashalahu anakudikita chikupu muniwu “mudimu wakushimuna nsañu yakukundamisha” kushika nikwakumina iseki.

11, 12. Indi akwaKristu awayishewa amwekesheli ñahi nawu elukili mpinji yashakamineñamu hakutachika kwayaaka nkulankaji yamu 20? (Talenu mwevulu wudi hefu 15.)

¹¹ Chakutalilahu, neyi chashimunawu mumukanda waJehovah’s Witnesses—Proclaimers of God’s Kingdom, hakwiñila muyaaka nkulankaji yamu 20, “C. T. Russell nialundanindi elukili chikupu nawu adiña mumpinji yakumuna nawa antu ateleleli kutiya chalala chawamwinu.” Chumanyi cheliluwu? Chelukiluwu nawu adiñi mumpinji yakumuna, ‘mumpinji yayiwahi,’ awa amana kwetu hiyashili hohu muchima hakutambika antu kwinza nakupompa hohuku. Muloña dichelileñawu akulumpi amuKristendomu. Ilaña, awa akwaKristu awayishewa atachikili kukeñakeña njila jikwawu  jakutandishilamu nsañu yayiwahi. Atachikili kuzatisha yozelu yayiha yakutandishilamu mudimu wawu.

¹² Hakwila nawu atiyakeshi nsañu yayiwahi yaWanta, idi izanvu danyanya dawankoñi adikita dazatishileña matilakiti, mabuloshuwa, magazini ninyikanda. Asonekeli cheñi jimpanji niyibaaba nawa ayihanini kulonda ayipulinti muyipapilu yansañu yayivulu. Adiña nakutiyakesha maprogiramu amuNsona hayikuzulemba yamwituña niyamukaayi kejima. Atuñileña nikuzatisha nyivwimbimbi yamazu, hela chakwila makampani atuñaña nyivwimbimbi achidiña kanda eluki chakutuña nyivwimbimbi yamazu. Chumanyi chafumini munyidimu yadikitiluwu? Makonu, antu akubadika hatununu tutanu natuyedi anatambwili iyi nsañu niwena anakuleja antu nawu: “Kundamenu kudi Nzambi.” Eñañi, awa ambuña aYehova akusambila amwekesheli iyena dadeni hela chakwila kwadiña yuma yayikañesheleña.

13. Muloñadi chitwatela kwilukila nkeñelu yaNzambi?

¹³ Mazu ahosheliyi Pawulu nindi ‘yinu diyi mpinji yayiwahi’ achidi kuzatika nikulelu. Etu tunatompi luwi lwaYehova lwasweja tudi namuzañalu muloña anatwinki mpinji yakutiya nikutambwila nsañu yakukundama kudi Nzambi. Chatela twikali nayitoñojoka yakudishindamena, twatela kuhemba mazu ahosheliyi cheñi Pawulu nindi: ‘Hitukuyilembelela netu, bayi mudiwula luwi lwaNzambuku.’ (2 Kor. 6:1) Nkeñelu yaluwi lwaNzambi lwasweja yidi ‘yakukundamisha antu ampata yamunu mwishina kudi yomweni’ kuhitila mudi Kristu.—2 Kor. 5:19.

14. Yumanyi yinakuzatika mumatuña amavulu?

¹⁴ Antu amavulu, anaputishiwu mesu kudi Satana, achidi ambuka kudi Nzambi nawa hiyasha muchima hakwiluka nkeñelu yaluwi lwaNzambi lwaswejaku. (2 Kor. 4:3, 4; 1 Yow. 5:19) Hela chochu, kutaminaku kwayuma mukaayi kunaleñeli antu amavulu kwiteja neyi ayileja nawu kwambuka kudi Nzambi dikunaleñeli antu amoneña yuma yatama nikukabakana. Hela tuhu mumatuña mwekala antu amavulu adiwulaña mudimu wetu wakushimwina, chayinu mpinji anakwiteja nsañu yayiwahi nawa anakufunta cheñi kudi Nzambi. Komana tuneluki chikupu netu yinu diyi mpinji yitwatela kudikita nankashi mudimu wakutiyakesha kukonkomwena kwakwila nawu: ‘Funtenu kudi Nzambi’?

15. Chatela tushimwineña nsañu yakuzañalesha antu, yumanyi yitunakukeña antu ejima eluki?

¹⁵ Mudimu wetu bayi neyi wakuleja antu hohu netu neyi afunta kudi Nzambi, wukumanisha kukala kwejima kunakumonawu nawa akwikala namuzañaluku. Antu amavulu dichakeñañawu neyi aya kumachaachi, nawa machaachi awu afwilaña kuyilila yuma yinakukeñawu. (2 Tim. 4:3, 4) Mudimu wetu hiwashindamena hakwilila antu yuma yinakukeñawuku. Nsañu yayiwahi yitwashimwinaña yakwila nawu, Yehova mukukeña kwindi, nakufwila kwanakena antu nshidi yawu kuhitila mudi Kristu. Dichi, antu atela aleki yuma yayiheñulaña nakufunta kudi Nzambi. (Rom. 5:10; 8:32) Hela chochu, “mpinji yayiwahi,” keña yimani.

“Ikalenu Neyena muSpiritu”

16. Chumanyi chamukwashili Pawulu kwikala wahamuka nikwikala neyena?

¹⁶ Tunateli kutwalekahu ñahi kwikala neyena dakudifukula kwalala? Antu amakwawu ekala nansonyi hela hiyahosha-hoshañaku nawa chayikalilaña kushimuna yitoñojoka yawu hela kudikunda nawakwawu. Ilaña, twatela kwiluka netu iyena hidamwekenaña hohu muyuma yelaña  muntu hela mukuzañajalaku; nawa hidashindamena hayililu yamuntuku. Pawulu washimwini chakutwalekahu kwikala namuzañalu hampinji yakonkomweneniyi akwawu akwaKristu nindi: “Ikalenu neyena muspiritu.” (Rom. 12:11) Spiritu yaYehova yamukwashili chikupu kapostolu hakwikala wahamuka nihakuumika mumudimu wakushimwina. Kufuma mpinji yamutambikiluwu kudi Yesu kushika nihamukasiluwu kakukumishaku nichamujahiluwu kufwila nsañu yayiwahi muRoma—hadi yaaka yakubadika ha 30—iyena dadiña naPawulu hidamaninuku. Mpinji yejima washindameneni hadi Nzambi, wamukolesheleña Pawulu kuhitila muspiritu yindi. Pawulu wahosheli nindi: “Natweshi kwila yuma yejima mudi Kristu wankoleshaña.” (Fwi. 4:13) Tunateli kuhetelamu nankashi neyi tushinshika hachakutalilahu chindi!

17. Tunateli ‘kwikala ñahi neyena kuspiritu’?

¹⁷ Mazu abalumunawu nawu “ikalenu neyena” atalisha “mukubwakata.” (Kingdom Interlinear) Hakwila nawu imba yamenji hejiku yitwalekuhu nakubwakata, chiña tutwalekahu nakusonswelaku. Chochimu, hakwila nawu ‘twikali neyena muspiritu,’ spiritu yaNzambi chiña yitulombolaña mpinji yejima. Hakwila nawu spiritu yitulomboleña chiña tudyaña yakudya yakuspiritu yejima yatuloñeshelañayi Yehova yakukolesha kuspiritu. Ichi chakeñekaña kusha kashinshi kukudifukula kwachisaka nikukupompa kwachipompelu, kudiza kwahalwetu nikwachisaka mpinji yejima, kulombaña mpinji yejima, nikupompaña nawakwetu akwaKristu. Diyuma yatela kutukwasha kubutula “kesi” kakutuleñela “tubwakateña” nakutwalekahu ‘neyena kuspiritu.’—Tañenu Yililu 4:20; 18:25.

18. Hakwikala akwaKristu adihana, twatela kusha muchima hachumanyi?

¹⁸ Muntu wadihana washaña muchima wejima hachuma chimu nawa hetejaña chuma chidi chejima chimuluwañeshi hela chimuzeyeshi nakuleka chuma chinakufwilayiku. Hakwikala akwaKristu adihana, mudimu wetu wudi wakufwila kwila munakukeñayi Yehova nindi twili, neyi cheliliyi Yesu. (Heb. 10:7) Makonu, Yehova nakukeña nindi antu amavulu afunti kudi yena. Dichi, tudikitenu chikupu—nakwimbujola Yesu niPawulu muniwu mudimu walema, wakuzata nakunyakala, wutwatela kuzata makonu.

Munakwanuka?

• Indi “mudimu wakukundamisha” wamwinkeluwu Pawulu niakwaKristu awayishewa wadiña mudimwinyi?

• Indi awayishewa ashalahu anakuzatisha ñahi ‘iyi mpinji yayiwahi nankashi’?

• Ankoñi akwaKristu anateli ‘kwikala ñahi neyena kuspiritu’?

[Malwihu aKuzatisha haKudiza]

[Mwevulu wudi hefu 12]

Pawulu wanukileña mpinji yadibulakeniyi naMwanta Yesu Kristu