Hetenu Nkisu Kuhitila Mudi Mwanta Walombolewaña Naspiritu yaNzambi!

‘Spiritu yaYehova yakashakama hadi yena.’—ISA. 11:2.

1. Yumanyi yinakuhoshawu antu amakwawu kutalisha hakukala kunakumwekana mukaayi?

 “CHINELI kaayi kanakutaminaku munsañu jamatuña nachiyuulu, munshakaminu nimuyileñaleña, indi chihandilu chawantu chakekala ñahi yaaka nkulakaji yikahiñahu?” Ilu dilwihu lwehwiliyi Stephen Hawking nkuluñaña weluka jamapulaneti mu 2006. Chibaaba chasonekeluwu mumagazini yaNew Statesman chahosheli nawu: “Hitunamanishi wuzweñi hela kuleta kuwunda mukaayiku. Ilaña, tunamwekani neyi tunakañanyi. Chinakumwekana neyi tunakuzata niwanyi. Tuneseki jinfulumendi jiyedi jashiyashana jatalaña hakuleta maheta mwituña; tuneseki cheñi kutuña mutayi wakuleta kuwunda mukaayi waLeague of Nations nawa tunatuñi nyitenda nzumbu yakukañesha nachu njita. Tuneseki ‘kumanisha njita kuhitila mukwasa njita jajivulu’ nakutoñojoka netu tweluka chakumanisha njita.”

2. Munjilanyi munakukeña kumwekeshelayi Yehova chiyuulu chindi chaloña hamaseki?

² Ambuña aYehova hiyahayamaña hakutiya awa mazuku. Bayibolu yatulejaña nawu antu hiyayileñeli nawu adiyuuleña aweniku. (Yere. 10:23) Yehova hohu diyi Mwanta wetu. Dichi, wukweti ñovu yakutwinka nshimbi yitwatela kulondela, nikutuleja yuma yitwatela kwila muchihandilu, nawa watukwashaña kulonda twili yuma yakeñañayi. Kubombelahu, katataka yazatishi ñovu yindi nakufumishahu nfulumendi yawantu yinakañanyi kuyuula. Hampinji yoyimu, wakajilumuna antu ejima akaanaña kulemesha chiyuulu chindi chaloña analeñeli antu akakeli kuwuduñu wanshidi, kukubula kuwanina, nikudi “nzambi yampata yamakonu,” Satana Diyabolu.—2 Kor. 4:4.

3. Yumanyi yashimwineñahu dehi Isaya hadi Mesiya?

³ Mwituña dadiha daParadisa, Yehova wakayuulaña antu chachiwahi kuhitila muWanta wawuMesiya. (Dan. 7:13, 14) Isaya waprofweteli kutalisha hadi Mwanta waniwu Wanta, nindi: ‘Muchishinji chaJesi mwakamena mutombu, mutayi wakunyiji yindi wakasoña nyikabu. Spiritu yaYehova yakashakama hadi yena spiritu yamaana niyakashinshi, spiritu yakuleja maana niyañovu, spiritu yakwiluka yakutiya Yehova woma.’ (Isa. 11:1, 2) Munjilanyi mwazatishililiyi Nzambi spiritu yajila hakukolesha ‘mutombu wakamena muchishinji chaJesi,’ Yesu Kristu, wakayula antu? Chiyuulu chindi chakaleta nkisu yamuchidinyi? Chumanyi chitwatela kwila kulonda tukatambwili iyi nkisu?

Nzambi Wamwinka Yesu Ñovu Jakuyuula

4-6. Yumanyi yalema yelukayi Yesu yikamuleñela kwikala Mwanta wamaana, wawushona, Kapristu Muneni, nawa Nsompeshi?

⁴ Yehova wakeñaña antu jindi akayuulañayi akekali awanina muwunlomboli waMwanta wamaana nawa wawushona, Kapristu Muneni, nawa Nsompeshi. Dichamutondeleluwu Yesu Kristu kudi Nzambi, naspiritu yajila kulonda yatweshi kuzata iyi nyidimu yalema. Shinshikenu hayuma yikaleñela Yesu yakazati chachiwahi nyidimu yamwinkayi Nzambi.

⁵ Yesu diyi wamwiluka chikupu Nzambi. Iwu Mwanindi wavwalika nkawindi hohu diyi wamwiluka Tata yindi kubadika muntu wudi wejima,  hadaha washakamini nindi hadi yaaka yayivulu nankashi. Hayaaka yashakaminiyi naTata yindi, Yesu wamwilukili nankashi Yehova chakwila twatela kumutena netu “Diyi wamufwana chikupu Nzambi wakamonewaña.” (Kol. 1:15) Yesu yomweni wahosheli nindi: “Muntu nanmonami namoni Tata.”—Yow. 14:9.

⁶ Hakwikala chinlonda chaYehova, Yesu weluka chikupu yileñaleña yejima, kushilahu niantu. Mukanda waAkolose 1:16, 17 wahosha nawu: “Mudi yena [Mwana kaNzambi] dimu mwaleñeleluwu yuma yejima, niyamumawulu niyahamaseki; niyuma yamonewaña, niyuma yakamonewaña . . . Yena diyi wakusambila, hadiñi yuma yejima yichidi kanda; mudi yena dimu mwakolela yuma yejima.” Toñojokenu! Yesu, hakwikala “mukalawenu” waNzambi, waleñeluku yuma yikwawu. Dichi, weluka yileñaleña yejima, kubombelahu niwoñu wamuntu watuñawu chakuhayamisha. Eñañi, Kristu diyi wekala namaana abadika!—Yish. 8:12, 22, 30, 31.

7, 8. Indi spiritu yaNzambi yamukwashili ñahi Yesu mumudimu windi wakushimwina?

⁷ Yesu amuwayishili naspiritu yaNzambi yajila. Yesu wahosheli nindi: ‘Spiritu yaYehova yidi hadami, muloña wanwayisha dehi manji nishimwini atuzweñi nsañu yayiwahi; nantemeshi kulonda nibidiki ankoli nsañu yakuyisubula, niamputamesu atoni; kulonda kuyumbaku antu anachikuwu, nishimuni mwaka waYehova wunawahi dehi.’ (Luka 4:18, 19) Yesu chamupapatishiluwu, spiritu yajila yamwanukishili yuma yadiziliyi henohu kanda yenzi heseki mumujimba wawuntu, kushilahu ninyidimu yakeñeleña Nzambi nindi yazati hampinji yakalakeleñayi mudimu wakushimwina heseki hamu neyi Mesiya.—Tañenu Isaya 42:1; Luka 3:21, 22; Yowanu 12:50.

⁸ Yesu bayi neyi wadiña hohu muntu wabadika washakamini hanu hesekuku ilaña wadiña cheñi Ntañishi wabadika, muloña spiritu yajila yamukolesheleña nawa wadiña namujimba wawanina niyitoñojoka. Mwalala, antu adiña nakumutiyilila ‘ahayamini hakuleja kwindi.’ (Mat. 7:28) Muloña, Yesu washimwineña yuma yaleñelaña antu akabakaneña, yidi neyi nshidi, kubula kuwanina, nikubula kumwiluka Nzambi. Cheñi, wamweneña munyichima yawantu nawa wayikwashileña.—Mat. 9:4; Yow. 1:47.

9. Kushinshika hayuma yamweniyi Yesu hamaseki kunayileñeli ñahi musweji kumukuhwelela nenu hiNyuuli?

⁹ Chihandilu chaYesu chadiña neyi chawantu. Yuma yamweniyi mumujimba wawuntu nikudikunda nawantu abula kuwanina kwamukwashili Yesu kwikala Mwanta watelela. Kapostolu Pawulu wasonekeli nindi: “Chamuwahilili yena [Yesu] kwikala neyi ana kwindi muyuma yejima, kulonda ekali kapristu muneni waluwi nakashinshi kunsañu yaNzambi; ekali ifutu danyiloña yawantu. Chakabiliyi yomweni nakumweseka, yena natweshi kukwasha antu akwesekawu.” (Heb. 2:17, 18) Chineli Yesu ‘amwesekeli,’ nateli kutiyila luwi antu anakuhita mukweseka. Hampinji yakalakeleñayi mudimu windi wakushimwina heseki, Yesu wayitiyilili antu luwi. Ayeji, ayifwayi, antu ayandishileñawu, nianyana, atiyileña kuwaha kwinza kudi Yesu. (Maku 5:22-24, 38-42; 10:14-16) Antu adizoza niadiña nanzala  yakuspiritu niwena enjileña kudi Yesu. Ilaña, akwakudivwimba, akwakudinka wanta, niantu ‘abulili kumukeña Nzambi’ amukaanini, amuheleli, nikumudimbulula.—Yow. 5:40-42; 11:47-53.

10. Njilanyi yabadika mwamwekesheleliyi Yesu nindi watukeña?

¹⁰ Yesu waheni wumi windi kukola nyijimba yetu. Hadaha chuma chacheni chinamwekeshi chikupu nawu Yesu washikilamu kwikala Nyuuli wabadika hikudihana kulonda yotufwili. (Tañenu Masamu 40:6-10.) Kristu wahosheli nindi: “Hikudi kukeña kwabadika kwenikuku, kwakutulayi muntu wumi windi hanyijimba yawamabwambu jindi.” (Yow. 15:13) Eñañi, kwambukaku nawanyuuli awantu aluñaña namaheta atambulañawu kudi antu jawu, Yesu wafwilili muchidi wawantu.—Mat. 20:28.

Amwinka Ñovu Yakuhana Wuloku Wefutu Danyiloña

11. Muloñadi chitwatela kumukuhwelela chikupu Yesu Mukwakuhana Ifutu?

¹¹ Chineli Yesu hiKapristu Muneni diyi watela kutwinka wuloku windi wamulambu wefutu danyiloña. Mpinji yakalakeleñayi mudimu wakushimwina heseki, Yesu watumwekesheleli yuma yamba kelayi neyi Mukwakuhana ifutu Muchiyuulu chindi Chekombakaji daYaaka, mutwakashakamaña neyi twikala ashinshika. Yesu wokili akata niayifwayi, wasañwili afu, wadyishili antu amavulu, nawa wamwenesheli nimpepela. (Mat. 8:26; 14:14-21; Luka 7:14, 15) Wakoñeli yuma yejimiyi, bayi neyi muloña wakumwekesha ñovu yinduku, ilaña wakeñeleña kumwekesha wushona nikukeña. Wamulejeli mukwambumba wamulembeleleli nindi yamuuki nindi: “Neteji.” (Maku 1:40, 41) Yesu wukatiyila cheñi antu wushona Muchiyuulu chindi Chekombakaji Danyaaka, mukaayi kejima.

12. Indi mazu ekala haIsaya 11:9 akashikijewa ñahi?

¹² Kristu nianyuuli akayuulayi nawu akatwalekahu cheñi namudimu wakuspiritu wakudizisha antu watachikiliyi Yesu yaaka 2,000 yinahituhu. Dihakashikijewa mazu ekala haIsaya 11:9 akwila nawu: “Iseki dejima dakawanina kumwiluka Yehova, neyi chabutaña meji hakaluñalwiji.” Iyi shikola yakuspiritu yakabombelamu kuleja antu chakuhemba iseki niyileñaleña yayivulu yekalamu, neyi chamulejeluwu Adama hatachi. Kukukuma kwayaaka 1,000, nkeñelu yaNzambi yatachi yasonekawu haKutachika 1:28 yikashikijewa, nimulambu wefutu danyiloña wakekala awuhana dehi.

Amwinka Ñovu Yakusompesha

13. Yesu wamwekesheli ñahi nindi wakeña kuloña?

¹³ Kristu diyi “anafuukuluwu kudi Nzambi kwikala mukwakusompesha niamomi niafu.”  (Yil. 10:42) Wenowu muzañalu wutukweti hakwiluka netu Yesu woloka, nawa kuloña nikashinshi kadi neyi mukwatu wakukasa kumayindi. (Isa. 11:5) Waheleli antu akwalwisu, anfwikiji, niyuma yikwawu yatama, nawa wahishili antu abulileña kwakamena akwawu akabakeneña. (Mat. 23:1-8, 25-28; Maku 3:5) Hela chochu, Yesu wamwekesheli nindi hamweneneña antu kumesuku, “yomwenindi diyi welukili yekala mudi antu.”—Yow. 2:25.

14. Yesu nakumwekesha ñahi makonu nindi wakeña kuloña niwuñanji, nawa malwihwinyi itwatela kudihula?

¹⁴ Yesu nakutwalekahu nakumwekesha chakeñayi kuloña niwuñaji kuhitila mukulombola mudimu weneni wakushimwina nikutañisha mukuhanda kwawantu kwejima. Kwosi muntu, nfulumendi yawantu, hela spiritu yatama yinateli kukañesha iwu mudimu abuli kuwumanisha kwesekeja nakukeña kwaNzambuku. Dichi tunateli kukuhwelela chikupu netu neyi Amagedoni yinahiti dehi, wuñanji waNzambi wukatanda iseki dejima. (Tañenu Isaya 11:4; Matewu 16:27.) Dihulenu nenu: ‘Komana nakeña antu inawanaña mumudimu wami wakushimwina neyi chelileñayi Yesu? Komana namukalakelaña Yehova nañovu yami yejima neyi chakwila nakatakataña hela nidi nakukala kukwawu?’

15. Chumanyi chitukwanukaña chikutukwasha kumukalakela Nzambi nañovu yetu yejima?

¹⁵ Neyi tukwanukaña netu mudimu wakushimwina wambala waNzambi chikutukwasha kumukalakela namuchima wumu. Diyi waheni iwu mudimu, nakuwulombola kuhitila mudi Mwanindi; nawa wakoleshaña antu anakuzata iwu mudimu naspiritu yindi yajila. Komana mwalemesha iwu mudimu wakwikala akwakukalakala naNzambi niMwanindi walombolewaña naspiritu? Yehova hohu diyi wunatweshi kusañumuna antu akubadika hatununu tutanu natuyedi, amavulu hakachi kawu ayimonaña nawu ‘hiyantu abula kutaña chikupu,’ anakushimwina nsañu yaWanta kudi antu mumatuña 236.—Yil. 4:13.

Tambwilenu Nkisu Mudi Kristu!

16. Indi mukanda waKutachika 22:18 wahosha nawudi hankisu yaNzambi?

¹⁶ Yehova wamulejeli Abarahama nindi: “Kudi anyaneyi nyuza yejima yahamaseki yakawenaku kukooleka, nanochu chiwunovwahili mwizu dami.” (Kutach. 22:18) Antu eluka nawu kumukalakela Nzambi niMwanindi hikukooleka kweneni, anateli kutalila nkisu yikaleta Lubutu lwawuMesiya. Makonu anakudikita chikupu iwu mudimu nayitoñojoka yamuchidiwu.

17, 18. Chumanyi chakanayi Yehova chitwatañaña haKuhituluka 28:2, nawa ichi chikaninu chatuleñelaña kwiladi?

¹⁷ Mpinji yimu Nzambi wahosheli nawanyana kaAbarahama akumujimba, mutaña waIsarela nindi: “Ninkisu jejimiji [jashimunawu muchitiyañenu Chanshimbi] wakajimona, jakakulondela jakakuwana, neyi wakatiyilila mwizu daYehova Nzambi yeyi.” (Kuhit. 28:2) Dichatela kutiyilila niambuña aNzambi makonu. Neyi munakukeña nkisu yaYehova, ‘twalekenuhu nakutiyilila’ mwizu dindi. Nawa nkisu jindi ‘mwakajimona, jakayilondela jakayiwana.’ Hanu dinu ‘kutiyilila’ kwabombelamu yumanyi?

¹⁸ Kutiyilila kwabombelamu kuhemba chikupu nsañu yekala Mwizu daNzambi nikutambwila yakudya yakuspiritu yatuloñeshelañayi. (Mat. 24:45) Cheñi kwatalisha mukwovwahila Nzambi niMwanindi. Yesu wahosheli nindi: ‘Antu ejima akuntenatena nawu, Mwanta, Mwanta; hiyakawanina kwiñila muwanta wamwiwuluku, chiña muntu welaña muchima waTata yami wudi mwiwulu.’ (Mat. 7:21) Kumutiyilila Nzambi kwatalisha mukwovwahila ntanjikilu yaloñeshayi, muchipompelu  chawakwaKristu niaeluda atondawu, ‘yamukunkulu mudi antu.’—Efwes. 4:8.

19. Chumanyi chitwatela kwila kulonda tukatambwili nkisu?

¹⁹ Hakachi kaniyi ‘yamukunkulu mudi antu’ hekala mamembala aMwizaza Dalombolaña, añimenu achipompelu chejima chawakwaKristu. (Yil. 15:2, 6) Chitwamonaña amana kwaKristu akuspiritu dichuma cheneni hakashindamena wunsompeshi wetu hampinji yalukadi lweneni lunakwinza. (Mat. 25:34-40) Dichi, njila yimu mutwatela kutambwila nkisu yidi yakukwasha chikupu ambuña aNzambi awayishewa.

20. (a) Mudimwinyi walema wazataña amana kwetu ahanawu neyi ‘yamukunkulu mudi antu’? (b) Tunateli kumwekesha ñahi netu twayilemesha awa amana kwetu?

²⁰ Hakachi ‘kayamukunkulu mudi antu’ hadi cheñi amamembala Amukomiti yaMutayi, ankoñi endaña, niaeluda amuchipompelu, wonsu wawu ayitonda naspiritu yajila. (Yil. 20:28) Awa amana kwetu ekala namudimu wakukolesha antu jaNzambi ‘nichakashika wejima wawu mukunuñañana kwakwitiya kwakukuhwelela, nimukumwiluka Mwana kaNzambi; twakashiki mwiyala walala chikupu, mwashika chiminu chakwinzala kwaKristu.’ (Efwes. 4:13) Eñañi, neyi chochitwekala wejima wetu, niwena awanina wanyi. Hela chochu, twatambwilaña nkisu neyi tulondela chachiwahi mwatulejañawu.—Heb. 13:7, 17.

21. Muloñadi chitwatela kwovwahila Mwana kaNzambi chakadi kulaba?

²¹ Katataka Kristu yakisañani kaayi katama kaSatana. Chamba kakisañanayi kaayi, wumi wetu wakashindamena hawusompeshi waYesu, muloña Nzambi wamwinka ñovu yakulombola “izaza deneni” dashimwineñawu dehi “kutuseloki twameji awumi.” (Chim. 7:9, 16, 17) Dichi, tuzatenu nañovu kulonda twovwahileña chikupu nikuhameka Mwanta walombolewaña naspiritu yaYehova.

Yumanyi Yimwadiza haNsona ya . . .

• Isaya 11:1-5?

• Maku 1:40, 41?

• Yililu 10:42?

• Kutachika 22:18?

[Malwihu aKuzatisha haKudiza]

[Mwevulu wudi hefu 17]

Yesu wamwekesheli wushona hampinji yasañwiliyi mwana kaJayirusa wamumbanda

[Nyevulu yidi hefu 18]

Yesu Kristu nakulombola mudimu weneni wakushimwina mukuhanda kwawantu