Malwihu Kufuma Kudi Antañi

HaKutachika 6:3, twatañañahu nawu: ‘Spiritu yami hiyikakabakanaña namuntu nyaka yejimaku, muloña niyena kwindi himuntu hohu, ilaña nyaka yindi yakashika munyaka nkulakaji namakumi ayedi.’ Komana Yehova watalishili mukwila nindi muntu wakahandaña hohu hadi yaaka 120? Komana Nowa washimwinini nsañu yakwinza kwaDibaji hadi yaaka 120?

Hidimu mwatalishiliyi Yehovaku.

Henohu Dibaji kanda dinzi, antu amavulu ashakamineña yaaka yayivulu. Chakutalilahu, Nowa wadiña nayaaka 600 hampinji yenjili Dibaji nawa washakamini yaaka 950. (Kutach. 7:6; 9:29) Antu amakwawu avwalikili hanyima yaDibaji ashakamini yaaka yakubadika ha 120. Arapashadi wafwili nayaaka 438 nawa Shela washakamini yaaka 433. (Kutach. 11:10-15) Kushika mumafuku aMosi, yaaka yakuhanda kwawantu yafuntili mwishina nakushika muyaaka 70 hela 80. (Mas. 90:10) Dichi mukanda waKutachika 6:3 hiwashimwini nawu muntu watela kushakama yaaka 120 hohuku.

Komana mazu adi muniyi vasi himazu amulejeluwu Nowa kudi Nzambi akusoñamisha antu nawu kujilumuka kwakenza muyaaka 120? Inehi. Kakavulu, Nzambi wahosheleña naNowa. Havasi 13 twatañañahu nawu: ‘Nzambi hakumwila Nowa, nindi, Namoni antu ejima kunayikumi dehi; muloña iseki adiwanisha dehi madombu.’ Muyaaka yahiñiluhu, Nowa wakumishili mudimu wakutuña watu weneni, nawa haniyi mpinji ‘Yehova wamwilili Nowa, nindi, Inzaña wiñili muwatu nineyi niantu akwitala deyi ejima.’  (Kutach. 6:13; 7:1) Kudi mpinji yikwawu yamulejeluwu Nowa kudi Yehova yuma yikwawu.—Kutach. 8:15; 9:1, 8, 17.

Ilaña, nsañu yitwatañaña haKutachika 6:3 yambuka; hiyamutena Nowa hela kuhosha nawu Nzambi wahosheli naNowaku. Iyi vasi tunateli kuyitiya netu Nzambi washimwineña nkeñelu yindi hela mwafuukwiliyi. (Esekejenu Kutachika 8:21.) Twatela kwiluka netu, munsañu yakunyaka yayuma yamwekeni henohu Adama kanda yekaluku, twawanañamu mazu akwila nawu: “Nzambi wahosheli nindi.” (Kutach. 1:6, 9, 14, 20, 24) Chakadi nikujina, Yehova hahosheleña namuntu wudi wejima hamasekiku, muloña haniyi mpinji muntu adiña kanda amuleñi.

Komana, twatela kukunkulula netu, nsona yaKutachika 6:3 yashimunaña kufuukula kwaNzambi kwakujilumuna yuma yatama heseki. Yehova washimwini wunsompeshi wakujilumuna kaayi muyaaka 120, hela chakwila Nowa hachilukiluku. Muloñadi chateneneniyi iyi yaaka? Muloñadi chachiñilililiyi?

Kapostolu Petulu washimuna yuma yaleñeleli nindi: “Hadiwunjikiliyi Nzambi nakuchiñilila mafuku aloñeshelañayi Nowa watu, mwahandilili antu antesha, wowu atanu nasatu, kumeji.” (1 Pet. 3:20) Eñañi, Nzambi chashimwiniyi kufuukula kwindi kutalisha hayaaka 120, kudi yuma yikwawu yadiña kanda ayili. Chimwahitili yaaka 20, Nowa niñodindi atachikili kuvwala anyana. (Kutach. 5:32; 7:6) Anyanawu asatu akulili nawa asumbwili, chisaka chawu chavulili nakushika ‘antu atanu nasatu.’ Kuhiñahu atuñili watu, wadiña mudimu weneni muloña watu watoheli nawa chisaka chaNowa chadiña chanyanya. Dichi, kudiwunjika kwaNzambi hadi yaaka 120 kwaleñeleli nyidimu yejimiyi yimani nikupulwisha mawumi awantu ashinshika atanu nasatu, ‘ahandishiluwu kumeji.’

Bayibolu hiyashimuna chaaka chamulejeluwu Nowa kudi Yehova nawu Dibaji dakenzaku. Kufuma tuhu havwalikili anyanindi, nimwakulililuwu, nikusumbula, hadaha kwashalili yaaka 40 hela 50 nakwinza kwaDibaji. Dichi Yehova wamwilili Nowa nindi: “Namoni antu ejima kunayikumi dehi.” Wahosheli cheñi nindi Nowa wateleli kutuña watu weneni nikwiñilamu nachisaka chindi. (Kutach. 6:13-18) Hayaaka yashaliluku, Nowa wakoñeli yuma yayivulu yabadikili hakwikala hohu waloña. Wadiña “mukwakushimuna kuloña” alejeluwu kushimuna nsañu yalema, yakufuukula kwaNzambi kwakujilumuna antu abulili kujila hayina mpinji. Nowa helukili chadimu chaaka chakamwekana yumiyuku, ilaña welukili nindi antu atama akayijilumuna. Anenu mweluka nenu ayijilumwini.—2 Pet. 2:5.