Munateli Kumukalakela Nzambi Nimuwushinakaji

Mama yawantu wumu nimwanindi wamumbanda, wejima wawu diwu aAna, ayipapatishili haDecember 19, 2009 mumusumba waMálaga, wekala kukabeta kambwela ketuña daSpain. Adiña hakachi kawantu 2,352 apapatishiluwu mu 2009 muSpain. Ilaña kudi chuma chimu chekomwesha hadiwu mama yawantu namwanindi, yaaka yawu yakuvwalika. Mama yawantu wadiñi nayaaka 107, mwanindi wadiña nayaaka 83.

Chumanyi chaletesheli adihani kudi Yehova kuhitila muchipapatishu? Kukutachika kwayaaka yamu ma 1970, Ana mwana kawantu amusendeleña kudi ntuñi nindi kukupompa kwaKudiza Mukanda haChipompelu kwapompeleleñawu hetala daChinsahu. Ana wayileña nakupompa kazoku kazoku. Ilaña, hamuloña wamudimu wazatileñayi, Ana hapamini kuspirituku.

Chimwahitili yaaka kwakwihi nekumi, anyana kaAna atachikili kudiza Bayibolu nawa ekalili ambuña aYehova. Mwanindi wumu Mari Carmen, wamukwashili mama yindi kwikala nampwila yakwiluka chalala chamuBayibolu nawa wetejeli kudiza Bayibolu. Kuhiñahu, Ana, nkaka yaMari Carmen, niyena watachikili kwikala nampwila yakudiza Bayibolu. Mukuhita kwampinji munichi chisaka mwafumini antu ikumi apapatishiluwu.

Hefuku dayipapatishiluwu, awa amama yawantu namwanindi azañaleli nankashi. Mama yawantu wadiña nayaaka 107 wahosheli nindi: “Yehova nankwashi chikupu, nanyiki mpinji yakumwiluka.” Mwanindi niyena wahosheli nindi: “Henohu Paradisa kanda yinzi, inakukeña kumukalakela Yehova, kwila mwakeñañayi nikushimwina nsañu yayiwahi kushika hakumina ñovu yami.”

Kupompa dichuma chayiletelaña awa anfwila ayedi muzañalu weneni. Eluda wumu wamuchipompelu chawu wahosheli nindi: “Hiyajiñaña kukupompaku. Nawa Hakudiza Kaposhi Kakutalila akulañahu mpinji yejima.”

Chakutalilahu chawu chakwikala ashinshika chatwanukishaña nfwila wejina daAna “hafuminaña mutembeluku, wafukaminaña niwufuku nimwaana, nakulembelela kwakujiñojoka nanzala yakuleka kudya.” Chumichi chamuleñeleli kwikala nakukooleka kwakumona mukeki, Yesu. (Luka 2:36-38) Hadiñayi nayaaka 84, Ana haswejeli kushinakaja chakukañanya kumuzatila Yehovaku neyi chochinakudikitawu awa amajina yindi makonu.

Komana muduhu nawantaña adi nampwila yakutiya nsañu yamuBayibolu? Ntahindi kuduhu kashinakaji wudi nampwila yakutiyilila neyi muya nakushimwina kwitala dindi? Antu amuchidiwu anateli kwikala neyi awa amama yawantu namwana itunakuhanjekahu, muloña niwena anateli kumukalakela Yehova Nzambi walala nimuwushinakaji.

[Mazu ekoku adi hefu 25]

“Yehova nankwashi chikupu”

[Mazu ekoku adi hefu 25]

“Henohu Paradisa kanda yinzi, inakukeña kumukalakela Yehova”