Mwanenu Watela Kwakula Nindidi?

ANVWALI: MuKaposhi Kakutalila kaJanuary 15, 2010, hamafu 16-20, twashimwini netu mwatela kwikala nampinji yakuhituluka muyuma yimwadizaña nawanyanenu. Chinu chibaaba chikuyileja njila jimwatela kulondela hakukwasha mwanenu kulonda yeluki chakumanisha kukala kwamonañayi kushikola. Munateli kuhitulukamu nawu hampinji yaKudifukula Kwachisaka kwamelela.

ANYANA aYinsahu jaYehova amonaña kukala kwakuvulu. Akwawu akashikola avula kuyihula chakaaninañawu kwila yuma yikwawu yidi neyi kubuzwila mpandelu, kwanakana mafuku akuvwalika, niyuma yikwawu yelañawu neyi anenzali shikola. Neyi mwanenu anamwihuli malwihu amuchidiwu, wukwakula nindidi?

Anyana amakwawu akwaKristu akulaña nawu: “Ankaanisha kwila yuma yamuchidiwu. Muchipompelu chetu akaanisha.” Twatela kuhameka anyana akulaña munjila yamuchidiwu. Neyi akula muniyi njila, akwawu akuleka kuyihujola. Ilaña, Bayibolu yatukonkomwenaña nawu twikali ‘adiloñesha kwakula antu ejima akutwihula nsañu yakuchiñeja kutwachiñejaña.’ (1 Pet. 3:15) Kwikala adiloñesha hikwatalisha mukuhosha hohu nawu, “Ankaanisha kwila yuma yamuchidiwuku.” Hela chakwila akwetu hiyakwiteja yuma yitwakuhwelelaku, amakwawu akukeña kwiluka chaleñelaña tubuleña kwila yuma yamuchidiwu.

Atwansi amavulu aYinsahu alejaña akwawu akashikola nsañu yamuBayibolu kuzatisha nyikanda yidi neyi mukanda waSambilila Kuli Kasambilisha Mukalamba. Nsañu yekala muniwu mukanda yikumukwasha kulumbulula chelilañawu anyana aYinsahu yuma yikwawu nichakaaninañawu. Akashikola amakwawu atiyililaña nakanañachima kunsañu yamuBayibolu nawa iyi njila yinakwashi anyana aYinsahu kutachika kudiza nawantu amavulu Bayibolu. Akashikola amakwawu chayikalilaña kutiyilila nsañu yejima yamuBayibolu. Chakadi kuyilumbulwila chiwahi, akashikola amakwawu hiyakutwesha kutiya nsañu yamuBayiboluku. Kankaña wayaaka 11, wejina daMinhee, chamutambikiluwu kudi ibwambu dindi kuchidika chakwanakana ifuku davwalikiliyi, yena wamulejeli nindi: “Bayibolu hiyashimuna nawu twanakaneña mafuku akuvwalikaku. Muntu ashimunawu muBayibolu, Yowanu Mpapatishu, amujahili hefuku dakwanakana ifuku dakuvwalika.” Minhee wanukaña nindi ibwambu dindi hatiyili mwatalishiliyuku.

Mpinji jikwawu, nateli kuleja mukwawu mukashikola mwevulu hela nsañu yekala munyikanda yetu kulonda yeluki. Indi neyi antañishi akaanisha nawu akashikola hiyatela kuleja akwawu akashikola nyikanda yansakililuku? Komana anyanetu anateli kushimwina chiwahi chakadi kuzatisha nyikanda? Munateli kukwasha ñahi anyanenu kuhakwilaku chalala?

Ikalenuña Nampinji Yakuhitulukamu Nawanyanenu

Kwikala nampinji yakuhitulukamu nawanyanenu kwitala kunateli kuyikwasha nankashi, anvwali akwikala neyi diwu amabwambu jawanyanawu mwatañilañawu. Anyana chiyakuhakwilaku chikuhwelelu chawu, anvwali atela kuyihameka nikuyileja  chatela kuyilaku hambidi muyitoñojoka yawu nikuyileja chichawahila. Chakutalilahu, mwatela kuyileja nenu azatishi mazu atela kutiyawu akwawu atwansi. Joshua, kansi weyala wayaaka yitanu nayiwana, wahosheli nindi akwawu akashikola akañenyi kwiluka izu “dachinleji” niizu “dakashinshi.” Yena wazatishili mazu apela hakuyilumbulwila.—1 Kor. 14:9.

Akashikola amakwawu ehulaña malwihu anateli kusekesha neyi musweja kulumbulula. Kuhitila mukuhanjeka nawu nikuyihujola, atwansi aYinsahu akukwasha akwawu kwikala nampwila. Kankaña wamumbanda wejina daHaneul wayaaka ikumi, wahosheli nindi: “Akwetu akashikola akeña kuhanjeka, bayi neyi kuyilumbulwilaku.” Hakwila nawu mutachiki kuhanjeka, ihulenu malwihu, nawa ikalenu namuchima wakutiya yuma yinakuhoshawu.

Mpanji yidi heshina yinakumwekesha anyana akwaKristu chinateli kudihujolawu nawakwawu akashikola. Dichi bayi muhembela kumutu iyi mpanjuku, muloña anyana ambuka, niñakwilu yashiyashanaña kwesekeja nachuma chinamwekani. Kansi Chinsahu watela kwiluka iyi nsañu  nawa watela kuyihosha mumazu indi nikuyihosha munjila yayiwahi yinesekani nakukala kunamwekani nikudi akwawu akashikola. Neyi mudi nawanyana anashiki hachipimu chakuya kushikola, esekenu kuhanjeka haniyi nsañu.

Mwatela kwikala nampinji nikuzata nañovu hakwila nawu mudizishi anyana. Anvwali akwaKristu atela kuleja anyanawu nshimbi jamuBayibolu nikuyishinjila kulonda ahembi iji nshimbi.—Kuhit. 6:7; 2 Tim. 3:14.

Ifuku dikwawu Dakudifukula Kwachisaka kwamelela, mukeseki kuhituluka nawanyanenu mumpanji jinashimunuwu. Talenu neyi iyi njila yatela kuzatika chiwahi. Anukenu nenu bayi neyi mwatela kuhembela ñakwilu hela mazu kumutuku. Hadaha munateli kumwekesha chimwenu kakavulu nakwakula munjila jashiyashana nikwiluka chinakwakulawu anyanenu hayuma yakuhwelelawu. Neyi hiyakulumbulula hashindamena yuma yakuhwelelawu, yikwashenu ekali namaana akutoñojoka nikwakula chakadi woma nawa chakadi kuyineñesha. Mukuhita kwampinji, mukudizisha anyanenu chakuhakwilaku yuma yakuhwelelawu neyi akwawu akashikola, enyimbu niantañishi ayihula.

[Chikasha/Mwevulu wudi hefu 4, 5]

KWANAKANA IFUKU DAKUVWALIKA

Mariya: Wudi ñahi Yowanu. Inakukeña nami wakenzi kuchidika chakwanakana kuvwalika kwami.

Yowanu: Nasakililuku Mariya hakuñanukahu. Nukwihuluku ntahi, chumanyi chinakuleñeli kwanakana ifuku dakuvwalika kweyi?

Mariya: Inakukeña kwanakana ifuku dakuvwalika kwami. Eyi komana hiwanakanaña ifuku diwavwalikiluku?

Yowanu: Inehi yaleyi.

Mariya: Muloñadi? Anvwali jami atiyili kuwaha mpinji yinavwalikili.

Yowanu: Anami nawa anvwali jami atiyili kuwaha. Azañaleli hampinji yinavwalikili. Bayi neyi iyi diyuma yatela kunleñela kwanakana ifuku dakuvwalika kwami hachaaka hachaakaku. Hayidika yakwanakana mafuku akuvwalika, antu amavulu atoñojokaña nawu wena diwu alema nankashi. Komana Nzambi hidiyi wabadika kulemaku? Komana kwila tumuhameka yena watwinka wumi nehi?

Mariya: Wunakunleja neyi hinatela kwanakanaña ifuku dakuvwalika kwamuku?

Yowanu: Mariya, chidi kudi eyi aweni. Kwila wutoñojokahu nehi? Hela chakwila antu amavulu akeña kutambula yawaana yahefuku dakuvwalika, Bayibolu yahoshaña nawu kuhana kwaletaña muzañalu kubadika kutambwila. Chatela tusheña maana kukwanakana ifuku ditwavwalikili, twatela kusha muchima hakumusakilila Nzambi, nikutoñojoka hadi antu amakwawu nikuyilila kakawahi.

Mariya: Kanda nitoñojokeñahu dehi haniyi nsañu. Dikwila nawu hiwatambulaña yawana kudi anvwali jeyuku?

Yowanu: Natambulaña. Ilaña anvwali jami hiyahembelelaña ifuku dinavwalikili dishiki mwaka dinu anyinkeña chawanaku. Anyinkaña yawana mpinji yejima yinakukeñawu. Mariya, wunakukeña kwiluka ntahi chatachikiluwu antu kwanakana mafuku akuvwalika?

Mariya: Nlejuku yaleyi.

Yowanu: Kumadiki, nakakuleja nsañu yayiwahi yahosha hakwanakana ifuku dakuvwalika yamwekeni kumashiita.

KUBUZWILA MPANDELU

Musamba: Lidiya, muloñadi chiwabulilaña kubuzwila mpandelu?

Lidiya: Kusakililaku Musamba hakuñihula. Nikwihuluku ntahi, chumanyi chiwabuzwilaña mpandelu?

Musamba: Nayibuzwilaña muloña nakeña ituña dami.

Lidiya: Musamba, neluka nami amama yeyi wayikeña. Ilaña hiwayibuzwilañaku, netuku?

Musamba: Eña. Nabuzwilaña mpandelu muloña nayilemesha. Komana eyi hiwalemesha mpandeluku?

Lidiya: Nayilemesha. Ilaña hitwabuzwilaña antu ejima niyuma yejima yitwalemeshaku, tahindi natwambi?

Musamba: Dimu, nalemesha antañishi ilaña hinayibuzwilañaku. Neluka wanyi chinabuzwilaña mpandelu.

Lidiya: Musamba, antu amavulu atoñojokaña nawu mpandelu yemenañaku ituña dawu. Antu abuzwilaña mpandelu etejaña nawu atela kwilila ituña dawu yuma yejima. Ami dichinatoñojokaña wanyi. Kwila nilambula wumi wami kwituña damiku, muloña Nzambi diyi wanyinkeli wumi. Nafuukuluhu kuhana wumi wami kudi Nzambi. Hela chakwila nalemesha mpandelu, kwila niyibuzwila nehi.

Musamba: Nachitiyi.

Lidiya: Musamba, natiyi kuwaha hakunleja iyi nsañu. Neyi wunakukeña kwiluka chinelilaña yuma yikwawu nichinabulilaña kwila yuma yikwawu, wenda wuñihula. Eña ntahi, Bayibolu yahosha nawu kunyaka, mwanta waBabiloni walejeli antu kudifukula kumukishi watuñiliyi. Antu amakwawu akaanini kudibuka kuniwu mukishi, hela chakwila ashili wumi wawu hakatoña.

Musamba: Mwamweni? Chumanyi chayililuwu?

Lidiya: Nukuleja chuma chayililuwu hampinji yachayili.

NSAÑU JAPOLITIKI

Maku: Timotewu, neyi kwikala kuvota, wukavotelanyi?

Timotewu: Kwosi nimuntu inakavotela.

Muku: Muloñadi?

Timotewu: Nikweti nyuuli wamuwahi. Nafuukulahu kumulonda Yesu muloña nidi mukwaKristu. Hinatela kutonda nyuuli mukwawuku. Wuneluki chinahosheli nami diyi Nyuuli waloña?

Maku: Inehi.

Timotewu: Neyi wukeña kwiluka, nakakuleja.

[Mwevulu]

“Wudi ñahi Yowanu. Inakukeña nami wakenzi kuchidika chakwanakana kuvwalika kwami”

[Mwevulu wudi hefu 3]

“Muloñadi chiwabulilaña kubuzwila mpandelu?”