Namoni Ñovu Yachalala ChamuBayibolu

Washimwini VITO FRAESE

HADAHA kanda mutiyeñahu dehi ijina damukala watenañawu nawu Trentinara. Himukala wanyanya wekala kukabeta kambwela kamusumba waNaple, mwituña daItaly. Dimwavwalikililuwu anvwali jami niyayami weyala, Angelo. Chavwalikiliyi Angelo, anvwali jami abukilili kuUnited States nawa ayili nakushakama mumusumba waRochester, New York, munavwalikilili mu 1926. Muchaaka cha 1922 diyi mpinji yatachikiluwu aTata kudiza Nawatudizi aBayibolu katachi, neyi chayiteneneñawu aYinsahu jaYehova kunyima. Hashimbwili wanyi aTata nawaMama ekalili Atudizi aBayibolu.

A Tata adiña amwena nawa avulileña kutoñojoka chikupu, ilaña yuma yatama yamwekeneña yayineñesheleña. Chamweneñawu akulumpi jansakililu anakudimba antu, chayileñeleli kuya nakushimwina chalala chamuBayibolu mpinji yejima. Chatambwiluwu peshoni, atachikili mudimu wampinji yejima nawa atwalekeluhu nichalekeluwu iku adi nayaaka 74 hamuloña wayikatu nikusweja kutuuta. Hela chochu, atwalekeluhu nakushimwina maora 40 ni 60 hakakweji iku adi muyaaka yamuma 90. Chakutalilahu chemikiluwu aTata chakwanshili nankashi. Hela chakwila adiña namaleñu, adiña asha maana kuyuma yakuspiritu. Ahosheleña nawu, “Twatela kulemesha chalala.”

Anvwali jetu afwilileña kutudizisha Izu daNzambi wejima wetu atanu. Ampapatishili haAugust 23, 1943, nawa muJune 1944, natachikili wupayiniya. Muhelami Carmella wadiña payiniya muGeneva, New York, hamu naFern mukwawu mwazatilileñawu nawa wadiña waha mukanwa. Mwahitili hohu mpinji yantesha niluka nikwiluka nami wacheñi kwosi chiña Fern hohu diyi mumbanda natela kushakama nindi muchihandilu chami. Dichi muAugust 1946, twadisumbwili.

Mudimu Wawumishonali

Asambilili kututemesha kumaluña ayedi kuGeneva niNorwich, New York, nakuzatilaku wupayiniya wadimena. MuAugust 1948, twadiña nakukooleka kwakuya kushikola yaGilead yanaambala 12. Kufumahu atutemesheli kumusumba waNaples, muItaly, hamu nawamishonali ayedi eyala namumbanda, Carl niJoanne Ridgeway. Haniyi mpinji, musumba waNaples dihu watachikili kutona muloña wanjita yadiñamu. Chatukalilili kuwana itala, dichi hadi tukweji twantesha, twashakamineña mukaditala katupeka tuyedi.

Chinakulileña natiyileña anvwali jami anakuhosha idimi daNaples, antu atiyileña chinahosheleña chiItalian, hela chakwila nhoshelu yami yatiyakeneña nawu nidi wakuAmerica. Fern wakañenyeña kuhosha idi idimi. Ilaña watachikili kuhosha chachiwahi nawa wambadikilumu.

Hakusambila, muNaples twawanini hohu chisaka mwadiña antu awana adiña nampwila yakudiza. Alandishileña makanya akaanishawu. Ifuku dejima damukachi kamulungu, muntu wumu wamunichi chisaka, wejina daTeresa, wahimpileña  yililu yindi chikupu. Nantetemena, Teresa waloñeleña makanya muyisweku yasiketi yindi, nawa wamwekeneña kutoha. Chikwela melela, wakeheleña nakushala tuhu neyi hamunu. Ichi chisaka chabalumukili chikupu muloña wachalala. Nkumininaku, antu 16 amunichi chisaka ekalili aYinsahu. Chayinu mpinji mumusumba waNaples mudi aYinsahu akushika ku 3,700.

Kukañesha Mudimu Wetu Wakushimwina

Chitwashakamini muNaples hadi tukweji tutanu natuwana, akulumpi janfulumendi atuhañili mumusumba. Twayili kwituña daSwitzerland hadi kakweji kamu, nawa twafuntili kuItaly neyi enyi. Ami niñodami Fern atutemesheli kuTurin. Hakusambila, twatachikili kusonkela mwitala damumbanda wumu nawa twazatishileña itala dakuwelela, musalanyi nichisambu chindi. Chashikiluwu amana kwetu aRidgeway namwini kwindi muTurin, twatachikili kusonkela hamu aka kaditala. Mukuhita kwampinji amishonali adisumbula atanu atachikili kushakama munidi itala.

Mu 1955, chatuhañiluwu kudi akulumpi janfulumendi muTurin, twashili tunali chikuku chakutachika yipompelu yayiha yiwaana. Kwadiña amana kwetu apama akutala iwu mudimu. Akulumpi janfulumendi atulejeli nawu, “Tunakuhweleli chikupu netu neyi enu akaAmerica muya, yuma yejima yakaluwankana.” Ilaña kuvula kwawantu kwamwekesheli nawu mudimu wejima washindamena hadi Nzambi. Makonu mumusumba waTurin, mudi aYinsahu akubadika ha 4,600 nawa mudi yipompelu 56.

Florence, Himusumba Wawuwahi

Atutemesheli cheñi kumusumba waFlorence. Twatiyileña hohu mpuhu yaniwu musumba, muloña dikwazatilileñayi muhelami Carmella ninfumwindi Merlin Hartzler wumishonali. Wenowu muzañalu wutwatiyili hakushakama kunawa maluña. Mumaluña adi neyi Piazza della Signoria, Ponte Vecchio, Piazzale Michelangelo, Palazzo Pitti, diwu awahisha iwu musumba! Wenowu muzañalu wutwatiyileña hakumona antu amumusumba waFlorence chetejeleñawu nsañu yayiwahi.

Twatachikili kudiza nachisaka chimu, nawa anvwali jawu apapatisheweli. Ilaña, tata yawantu wanwineña makanya. Mu 1973, Kaposhi Kakutalila kalumbulwili nawu kunwa makanya kwatama nawa kakonkomweneni antañi nawu aleki kunwa makanya. Mwanindi wamukulumpi wamulembeleleli tata yindi nindi yaleki kunwa  makanya. Tata yawantu wamulejeli nindi wukuleka, ilaña halekeluku. Ifuku dimu nawufuku, iñodindi walejeli ampamba ayaaka yitanu nayiwana kuya nakukama henohu kanda alombi hakuya nakukama. Nkumininaku, waneñeli yeñila nimukapeka kawanyanindi. Kuwana alomba dehi. Wayilili nindi, “Yumanyi yimwalomba?” Anyana ahosheli nawu twalomba netu, “Eyi Yehova mwani, yikwashenu aTata aleki kunwa makanya.” Mama yawantu hakutambika nfumwindi nindi, “Inzaku wutiyi chinalombuwu anyaneyi.” Chatiyiliyi mwalombeluwu, watachikili kudila nakuhosha nindi, “Hinakanwa makanya cheñuku!” Walekeli kunwa makanya, nawa munichi chisaka mudi aYinsahu 15.

Kuzatila muAfrica

Mu 1959, atutemesheli mumusumba waMogadishu, muSomalia, nawakwetu amishonali ayedi, Arturo Leveris nimana kwami Angelo. Iwu musumba watatashanini nansañu jamapolitiki. Nfulumendi yaItaly diyi yateleleli kukwasha ituña daSomalia kulonda dikuuliki kuhitila munshimbi jawaUnited Nations, ilaña yuma yaswejeleluku kukala. Antu itwadizileña nawu amuItaly, atemukili mwituña nawa chakalili kutachika chipompelu munidi iluña.

Haniyi mpinji nkoñi wendelaña matuña, wañilili nindi nikali chinlonda chindi. Dichi twatachikili kwendela matuña amakwawu adiña kwakwihi. Antu amakwawu itwadizileña nawu apamini kuspiritu ilaña afumini mwituña hamuloña wakuyimwesha ilamba. Hela chakwila amakwawu ashalili, ilaña adiña nakuumika kukala kwayimwesheleñawu. * Neyi tutoñojoka hakukeña kwamukeñawu Yehova nichomikiluwu hakwila nawu atwelekuhu kwikala nakashinshi kwatusañumunaña hama.

Iyena nimukekemena wadiña mwituña daSomalia nimuEritrea waswejeli nankashi. Yakudya yimu yamunidi iluña yatuchinanishileña mesu. Mpinji yatachi yitwadyili yakudya yamuchidiwu hetala dakadizi waBayibolu, iñodami wahosheli nakusenseka nindi yakudya yinanchinanishi mesu!

Angelo niArturo chayitemesheluwu kwacheñi, twashalili nkawetu. Twamweneña kukala muloña kwadiña kwosi muntu wakutukolesha. Ilaña chatukwashili kukundama kwakwihi naYehova nikumukuhwelela chikupu. Kutoñojoka hamatuña itwendeleli mwakaanishiluwu mudimu wakushimwina kwatukolesheleña chikupu.

Twamweneña kukala kwashiyashana mwituña daSomalia. Hitwadiña nafulijiku, twalandileña hohu yakudya yefuku dimu hohu, ninyisunyi yanshi atenañawu nawu hammerhead shark hela nyikabu yamudina iluña yidi neyi mbuma,  papayi, muvinyu, nyimu, nimakondi amususu. Twamweneña kukala natububu. Mpinji jikwawu twatuntamineña kunshiñu iku tunakudizisha muntu Bayibolu. Twadiña nakatukutuka ketu nawa hitwendeleña munkanzaku.

Twafuntili Cheñi kuItaly

Hamuloña wachisambu chatumwekesheleluwu akwetu, twakandamini mbopolu yasendeleña makondi nakufunta kuItaly kutwayili nakupompela kupompa kwetuña kwadiña muTurin mu 1961. Atulejeli nawu akutuhimpa. MuSeptember 1962, twafuntili kuItaly, nawa natachikili kuzata neyi nkoñi wañinza. Twalandili kamotoka kanyanya mutwendeleli hadi yaaka yitanu nakunyeñumoka muñinza jiyedi.

Chitwafumini muAfrica mutaata, twatachikili kushakama kwiluña kwatutaña. Muchilaaka chamashika chatachi, hampinji yitwendeleli chipompelu chekala mwishina dampidi yaAlps, twakamineña mwitala mutuuta, hewulu hatulileñawu matahu akudyisha ayimuna. Kwaswejeli kutuuta chakwila twakamini nayakuvwala yamashika. Nawufuku kwatuutili chikupu chakwila atusumbi awaana ayaadi nituwa tuyedi twafwili.

Chimwahitili mpinji, nekalili nkoñi wankambi. Muyaaka yeniyi twandeleleña yipompelu yejima yamuItaly. Twayileña kumaluña amakwawu, chidi neyi kuCalabria nikuSicily. Twakwashileña atwansi kupama kuspiritu nikwikala nayikonkwanyi yakwikala ankoñi muchipompelu, ankoñi endaña hela kukalakela haBeteli.

Tunadizi yuma yayivulu kudi akwetu ashinshika anamukalakeli Yehova namuchima wumu. Twalemesha yililu yikwetuwu, yidi neyi kwikala ashinshika kumesu aYehova, kuhana, kukeña amana kwawu, nikwikala namuchima wakuhimpa nikudihana. Twayileña kumawija adiña haMatala aWanta. Mawija wenawa ayisumbwishileña kudi aYinsahu etejeluwu munshimbi nawu hiyankoñi ansakililu, ilaña muyaaka yakunyima ayitejeleña wanyi. Yipompelu hiyahumañenaña muyisambu yawamana kwetu hela kushakama hambawu neyi chelileñawu muTurinuku. Ilaña ichi, yipompelu yayivulu yikweti Matala aWanta amawahi aletaña mpuhu kudi Yehova. Ichi hitwapompelaña mumatala akufwetela anyanyaku, ilaña Mumatala aKupompelamu amaneni. Wenowu muzañalu wutukweti hakumona naambala yawakwakushimwina yinabadiki ha 243,000. Chitwashikili muItaly, mwadiña hohu akwakushimwina 490.

Twafuukwili Chuma Chachiwahi

Tunahiti mukukala kwamboka-mboka, kubombelahu nikwanuka kumukala wetu niyikatu. Ñodami waswejeleña kwanuka kumukala mpinji yejima yikumonayi kaluñalwiji. Cheñi  nawa wahitili mukukala kweneni kwamuladikiluwu kapampa kasatu. Mpinji yimu, wayileña nakudizisha kadizi waBayibolu, mukwakudimbulula wumu wamulotokeleli nachitwa. Iku kukala kwamweniyi kwaleñeleli amutenteki muchipatela.

Hela chakwila mpinji yikwawu twaneñeleña, ilaña ‘twamuchiñejaña Yehova,’ kwesekeja namukanda waMukeña 3:24. HiNzambi wakukundeja. Mpinji yimu yitwaneñeli, ñodami watambwilili mukanda wakutukolesha kufuma kudi Mana kwetu Nathan Knorr. Chineli niyena wavwalikilili kwakwihi naBethlehem, Pennsylvania, kwatachikililiyi Fern mudimu wawupayiniya, wasonekeli nindi ambanda akuPennsylvania aDutch, adi neyi Fern wayiluka chikupu nindi akola nawa adikita. Wahosheli mwalala. Yaaka yinahituhu, antu amavulu anatukoleshi munjila jajivulu.

Hela chakwila twakabakanaña, twadikitaña mpinji yejima mumudimu wakushimwina. Neyi twesekeja iyena ditukweti naLambrusco, vinyu yayiwahi yakuItaly, iñondami Fern wahoshaña namaleñu nindi, “Bayi tuleka iyena detu dimaniku.” Hanyima yakukalakala mumudimu wakwenda muñinza nimunkambi kubadika hadi yaaka 40, twatambwilili mudimu wakwendela nikuloñesha mazanvu niyipompelu yazatishaña madimi acheñi bayi idimi daItalianiku. Awa mazanvu ashimwinaña antu afumaña kuBangladesh, China, Eritrea, Ethiopia, Ghana, India, Nigeria, Philippines, Sri Lanka, nikumatuña amakwawu. Neyi tutachika kuchinda njila jajiwahi jitunamoni Izu daNzambi chidinabalumuni chihandilu chawantu anatompi luwi lwaNzambi, mukanda wukwinzala.—Mika 7:18, 19.

Ifuku dejima twalombaña netu Yehova yatwinki ñovu nimaana kulonda tutwalekuhu kuzata mudimu wakushimwina. Muzañalu waMwanta wetu diwu watukoleshaña. Twazañalalaña nikwiluka chikupu netu twafuukwili chuma chachiwahi muchihandilu hampinji yitunakushimwina chalala chamuBayibolu.—Efwes. 3:7; Kol. 1:29.

[Tumazu twaheshina]

[Chati/Mwevulu wudi hefu 27-29]

(Neyi munakukeña kumona ntanjikilu yejima talenu mumukanda)

Anvwali jamu muRochester, NY

1948

Twadiña kukabeta kambwela muLansing kushikola yaGileyadi

1949

Ami niñodami Fern henohu kanda tufumi muItaly

Musumba waCapri, Italy

1952

Hampinji yitwadiña muTurin niNaples nawakwetu amishonali

1963

Fern nawatudizi amakwawu

“Bayi tuleka iyena detu dimaniku”