Nasakililaña Nankashi Hakumuzatila Yehova niMukweseka

Washimwini Maatje de Jonge-van den Heuvel

NIDI nayaaka yakuvwalika 98. Namukalakeli Yehova hadi yaaka 70, hela chakwila chikuhwelelu chami chahita mukweseka. Munjita Yakaayi Kejima Yamuchiyedi, añumbilili muchilombu chakuyandishila antu, nawa mpinji yimu chineñi chanleñeleli kufuukula mwaheña chakwila kumbidi naditoñesheli. Chimwahitili yaaka, nahitili cheñi mukweseka kweneni. Hela chochu, namusakililaña Yehova hakunyinka kukooleka kwakumukalakela, hela chakwila nahiti mukweseka.

Chihandilu chami chahimpikili muOctober 1940. Nashakamineña muHilversum, mbaka yekala muchipakasu chakukabeta kambwela namusela hekala makilomita 24 nakushika mumusumba waAmsterdam mwituña daNetherlands. Ituña dadiña mumakasa awaNazi. Haniyi mpinji, nadiña nanfumwami Jaap de Jonge, wunashakamini nindi yaaka yitanu mumaluwi, iyala wamuwahi, nawa twavweli mwanetu wamumbanda walubanji wayaaka yisatu wejina daWilly. Chisaka chimu chitwadikumashanini nachu chadiña chahutwa nawa ayandileña hakwila nawu adiishi anyana atanu nasatu. Ilaña, adiña cheñi nakushakama namukwenzi wumu, mwenyi wahembeleñawu. Nadihwileña nami, ‘Muloñadi chiyatelela kuwejelahu chiteli chikwawu?’ Hampinji yinayitwalilili yakudya, dihu hinelukili nami ona mukwenzi wadiña payiniya. Walenjeli nsañu yaWanta waNzambi ninkisu yiwukaleta. Yuma yinadizili yanshikili hamuchima hama nawa netejeli kudiza chalala. Muchaaka chochimu, nadihanini kudi Yehova nawa napapatisheweli. Chimwahitili chaaka chimu kufuma hamupapatishiluwu, mwanta wami niyena watachikili kudiza chalala.

Hela chakwila chalala chamuBayibolu hinachilukishiluku, nelukili nami chinekalili Chinsahu, nekalili mukuloñesha kwalekesheluwu kushimwina. Nelukili cheñi nami aYinsahu amavulu adiña ayumbila dehi mukaleya hamuloña wakushimwina nsañu yaWanta. Hela chochu, natachikili kushimwina kwitala nikwitala, nawa ami nimwanta wami twatambwilileña apayiniya niankoñi endaña. Cheñi mwitala detu dimutwahembeleleña nyikanda yashindamena haBayibolu, yaleteleñawu kudi amana kwetu niahela afumineña kuAmsterdam. Kumakingawu asendeleleñaku yiteli yalema yanyikanda, yavuñilileñawu mumalejeli. Awa akwakusenda nyikanda amwekesheleña kukeña niwulobu! Ashili wumi wawu hakatoña kukoola amana kwawu.—1 Yow. 3:16.

“Mama, Mukufunta Swayi?”

Chimwahitili tukweji tutanu nakamu kufuma hapapatishiluwu, atupokola asatu enjili kwitala detu. Eñilili mwitala nakusanda-sanda. Hela chakwila chisweku mutwenzeshileña nyikanda hiyachimwenuku, awanini nyikanda yakusweka mwishina dakadidi ketu. Hohenohu, anlejeli nawu niyilondeli kuchiteshenyi chawakapokola muHilversum. Chinamukumbatili mwanami wamumbanda iku inakumushiika  nami shalakuhu mwanami, Willy wañinhwili nindi, “Mama, mukufunta swayi?” Namwakwili nami, “Eña mwanami, keña ninzi.” Ilaña nakabakeni hadi tukweji 18 chakadi kumumonahu cheñi mwanami.

Kapokola watwalili kumusumba waAmsterdam namasuwa nakuñihujola. Mukwakuñihujola washinjilili nindi nishimuni majina awamana kwetu asatu akuHilversum nami hiyaYinsahu jaYehova. Nayilejeli nami: “Hinayilukaku, nelukaku wumu hohu. Muloña diyi watuleteleleña mayeli.” Hinatwambiluku; iwu mana kwetu wadiña nakuleta mayeli. Natwalekeluhu nami, “Neluki wanyi neyi hiChinsahu chaYehova, kamwihulenu yamweni bayi amuku.” Chinakaanini kuhosha, añeteli mbañala hamesu nawa ashili mukaleya, munashakamini hadi tukweji tuyedi. Nfumwami chelukiliyi kunadiña, wanleteleli yakuvwala niyakudya. MuAugust 1941, antwalili kuchilombu chatama nankashi chakuyadishilamu chawambanda kuRavensbrück, musumba wekala kukabeta kaluwunda kaBerlin, Germany, hekala makilomita 80.

“Bayi Wuneñaku Yaleyi”

Chitwashikili, atulejeli nawu akutumbaku neyi tufwachika hachipapilu chakukaana netu hitudi aYinsahuku. Hela chochu, hinafwachikiluku. Ilaña, nayinkeli yuma yami nawa nasubwili yakuvwala mukapeka kakukosela, munadiwanini nawahela akwaKristu akuNetherlands. Atwinkeli yakuvwala yamuchilombu hadiña hakuchimina chinjikijilu chateneneñawu nawu purple triangle, cheña, lupasa, ningutu. Hakusambila, atushili mukaleya mwahembelañawu atuyili hadi mpinji yantesha. Iyi diyi mpinji yatachi yinadilili kufuma hankasiluwu. Iku inakushikoka nadihwili nami, “Chumanyi chikumwekana? Nukushakama mukaleya yaaka yiñahi?” Kuhosha chalala, haniyi mpinji wubwambu wami naYehova wadiña kanda wukoli nankashi, muloña kufuma hinatachikili kudiza chalala hahitili tukweji twantesha hohu. Nadiña kanda niluki yuma yayivulu. Chikwachili hakututambika majina, muhela wamu wakuNetherlands wamweni nindi naneñi chikupu. Wahosheli nindi: “Bayi wuneñaku yaleyi! Chumanyi chikutumwekena?”

Hanyima yakututambika majina, atutwalili kukaleya kakwawu, chitwashikili atutambwilili kudi ahela akwaKristu amavulu afumini kuGermany nikuNetherlands. Ahela amakwawu afumini kuGermany adiña ashakama dehi mukaleya kubadika hachaaka chimu. Eñañi, nazañaleli hamuloña wakudikunda nawu nawa ankolesheli. Natiyili cheñi kuwaha muloña mukaleya mwadiña ahela mwadiña wunyoji nankashi kubadika muyilombu yikwawu. Cheñi mukaleya ketu himwadiña wukombi, kutukana, hela ndombuku. Hela chakwila twamweneña ihuñu muchilombu, kaleya ketu kadiña neyi chitutu chawunyonji chidi hakachi kejiya damajilu.

Chihandilu Chamuchilombu

Muchilombu twazatileña nyidimu yakola ilaña twadyileña tuyakudya twantesha. Twahindukileña na 5 koloku yabudidi, hohenohu atachika nikutambika majina. Atulama atwimikileña hanzi hadi ora yimu, chili nvula yinakunooka hela kudi nkanza. Chashika 5 koloku yamelela, henohu tunomoki, ahitileñamu nakutambeka majina. Twakaminineña hohu muzoñu nikadinkedi, iku tunazeyi chikupu.

Ifuku dejima kufumishaku hohu daMulungu, anyikeleña mudimu wakuzatila mumaha, munakeseleña tidiku nachikwakwa, kwimba tupila,  nikuwahisha mumadimba awañulu. Hela chakwila mudimu wadiña wakola nawa wamajilu, nazatileña mafuku ejima muloña nachidiña namashi. Cheñi, kwimba tumina twashindamena hansañu yamuBayibolu hampinji yinazatileña, twankolesheleña. Hela chochu, ifuku niifuku nanukileña nfumwami nimwanami.

Atwinkeleña yakudya yantesha nankashi, ilaña ahela ejima twashileñahu kachikunku kadinkendi hefuku hefuku kakudya haMulungu, hitwabulakeneña nakuhanjeka hansañu yamuBayibolu. Hitwadiña nanyikanda yashindamena haBayiboluku, hela chochu, natiyilileña nakashinshi kudi ahela awakulumpi ashinshika akuGermany neyi hiyakuhanjeka nsañu yakuspiritu. Twadiñi cheñi nakwanakana Chanukishu chakufwa kwaKristu.

Chineñi, Kuditoñesha, niKukoleshewa

Mpinji jikwawu, atulejeleña kuzata mudimu wakundamini kukukwasha njita yasileñawu aNazi. Hamuloña wakubula kudiñija munsañu jamatuña, ahela ejima akaanineña kuzata iwu mudimu, anami nawa nayimbujolileña chakubula woma. Hamuloña wakukaana kuzata, atuminineña yakudya mafuku amavulu nawa atwimikileña maora amavulu nakututambika majina. Mpinji yimu, muchilaaka chachishika, atushili mukaleya hadi mafuku 40 chakadi kutushilamu ikina datatishaña mukapeka.

Hakwikala aYinsahu jaYehova, atulejeleña mpinji yejima nawu akutumbaku neyi tufwachika hachipapilu chakukaana netu hitudi cheñi aYinsahuku. Chinashakamini muRavensbrück kubadika hachaaka chimu, naneñeli nankashi. Hamuloña wakusweja kukeña kumona nfumwami nimwanami nayili kudi atulama, natambwili fomu hakusoneka nawu ami hinidi cheñi Kadizi waBayiboluku, nifwachika nikufwachika.

Chelukiluwu ahela nawu nafwachiki fomu, amakwawu atachikili kuntemoka. Ilaña ahela ayedi awakulumpi akuGermany aHedwig naGertrud atambikili nakunkolesha. Hampinji yitwazatileña mwidimba dawañulu, alumbulwilili chachiwahi chichalemena kwikala ashinshika kudi Yehova nichitwatela kumwekesha netu twamukeña chakadi kufumpa nshimbi jindi. Hamuloña wakwikala namuchima wawunvwali ankwashili hama. * Nelukili nami naluwañesheli, dichi nakeñeleña nami fomu yinafwachikili ayitaboli. Ifuku dimu namelela namulejeli muhela nami inakuya nakuyileja nami ayitaboli yina fomu. Mukulumpi wachilombu watela watiyili chitwahanjikeleña muloña ifuku dodimu namelela, anfumishili muchilombu mukukasumwisha, akandamisha nimumasuwa nakufuntisha kuNetherlands. Kapitawu wumu, nichidi kumwanuka, wañilili nindi, “Wuchidi Bibelforscher (Kadizi waBayibolu), nawa wukatwalekahu.” Namwakwili nami, “Nukutwalekahu, neyi Yehova neteji.” Hela chochu, natwalekeluhu kutoñojoka nami, ‘Nikwila ñahi hakwila nawu atwalekuhu kuñiluka nawu nindi Chinsahu?’

Chikuma chadiña hayina fomu chahosheleña nawu: “Nasanyiki chikupu nami hinamba kazata cheñi mumudimu wamuKaayi Kejima Wawatudizi aBayiboluku.” Nelukili chuma chinateleli kwila. Mukakweji kaJanuary 1943, chinashikili kwitala, natachikili cheñi kukalakala mudimu wakushimwina. Nelukili nami, neyi awana cheñi kudi amashidika awaNazi inakushimwina haWanta waNzambi, adi kubabesha chikupu.

Hakwila nimwekeshi kudi Yehova nami inakufwila kwikala kambuñindi washinshika, ami nimfumwami twetejeli cheñi netu amana kwetu aleteleña nyikanda niankoñi endaña ashikeneña mwitala detu. Natiyili kuwaha nankashi hakwikala cheñi nakukooleka kwakumwekesha chinamukeña Yehova niantu jindi!

Chuma Chatuñesheli Chikupu

Chikwashalili tukweji twantesha henohu njita kanda yimani, ami nimfumwami twahitili mukukala kwatuneñesheli chikupu. Mu October 1944, mukukasumwisha mwanetu  wamumbanda wakatili. Willy wakatili chikatu chatenañawu nawu diphtheria. Chimwahitili mafuku asatu, yikatu yashinini nawa wafwili. Wadiña nayaaka yakusemuka yitanu nayiyedi.

Chatukatili kumuchima chikupu hakujimbesha mwanetu wumu hohu. Eñañi, kweseka kunamweni muRavensbrück hikwesekeni nachineñi chinatiyili hampinji yitwajimbesheli mwanetuku. Hela chochu, hampinji yitwamweni kukala, mazu ekala haMasamu 16:8 atukundejeleña, akwila nawu: “Namushi Yehova kumesu ami mafuku ejima. Chadiyi yena kuchikasa chami chachidiilu hijikunkumaku.” Ami nimfumwami twakuhweleleli chikupu muchikaninu chaYehova chakusañula afu. Twatwalekeluhu nakukolela kunsañu yalala nawa twadikitileña nankashi mumudimu wakushimwina nsañu yayiwahi. Mfumwami wankwashili kumukalakela Yehova namuzañalu nakushika nimpinji yafwiliyi muchaaka cha 1969.

Nkisu niMuzañalu

Yaaka yayivulu yinahituhu, kudikunda nawamana kwetu adi mumudimu wampinji yejima dichuma chatuzañalesheleña chikupu. Neyi chochitwelileña hampinji yanjita, twadiña nakutambwila ankoñi endaña niañodi jawu kwitala detu neyi endela chipompelu chetu. Adisumbula, aMaarten naNel Kaptein, ekala mumudimu wakwenda twashakamini nawu mwiitala detu hadi yaaka 13! Chelili Nel yeñili mukankati kakadi kuuka, namuhembeli mwitala detu hadi tukweji tusatu nichafwiliyi. Mpinji yitwashakamineña nawu nikudikunda nawamana kwetu niahela amunidi iluña kunankwashi kudiluñisha paradisa yakuspiritu mutunakushakama makonu.

Mu 1995 antambikili kuya kuchanukishu chakuRavensbrück, chuma chinanukaña nankashi muchihandilu chami. Chinashikili nadibulakeni nawahela itwadiñileña nawu muchilombu nawa mwahitili yaaka 50 kufuma hitwadimweni nawu! Twazañaleli nankashi hakudibulakana cheñi nawa twatachikili kudikolesha wumu namukwawu nakutalila kuchiñeja kudi kumbidi kwakumona cheñi antaña jetu afwa dehi.

Kapostolu Pawulu wahosheli haAroma 15:4 nindi, “nakutatakena, nikukukundeja kwanyikanda yajila, tumwenuku kuchiñeja.” Namusakililaña Yehova hakunyika kuchiñeja kwamuchidiwu, kunakwashi kumukalakela namuzañalu nimumpinji yakweseka.

[Tumazu twaheshina]

[Mwevulu wudi hefu 10]

Nidi hamu naJaap, mu 1930

[Mwevulu wudi hefu 10]

Mwanetu Willy, henohu wudi nayaaka yitanu nayiyedi ▸

[Mwevulu wudi hefu 12]

Mu 1995, nayili kuchanukishu kunadiwanini nawantu itwadiña nawu. Nashakami mumusululu watachi, yami wamuchiyedi kufuma kuchimunswa