Spiritu Yajila Yatwinkaña Ñovu Yakuumika Kweseka Kwejima

“Natweshi kwila yuma yejima mudi Kristu wankoleshaña.”—FWI. 4:13.

1. Muloñadi antu jaYehova chamwenañawu kukala kwamboka-mboka?

 ANTU jaYehova amonaña kukala kwamboka-mboka. Kweseka kukwawu kwenzaña hamuloña wakubula kuwanina hela hamuloña wayuma yamwekanaña mukanu kaayi kitunakushakamamu. Kweseka kukwawu kwenzaña hamuloña wankunyi yekala hakachi kawantu amukalakelaña Nzambi nawantu abulaña kumukalakela. (Kutach. 3:15) Kufuma tuhu hatachi, Nzambi wakwashaña ambuñindi ashinshika kuumika yihuñu yamonañawu hamuloña wansakililu, kutondolwela ikakeja datama, nikuumika kukala kwashiyashana. Spiritu yindi yajila yinateli kutwinka ñovu jakuumika.

Yatukwashaña Kuumika Ikabisha Ditwamonaña Hamuloña Wansakililu

2. Muloñanyi watuyandishilañawu, nawa ikabisha denjilaña munjilanyi?

² Ikabisha ditwamonaña hamuloña wansakililu hikukabisha hela kumwesha antu yihuñu mumushikila hamuloña wachikuhwelelu chawu hela yuma yakuhwelelawu. Atuyandishaña muloña akeñaña kutulekesha kwila yuma yitwakuhwelela, kubula kulejaku antu amakwawu, hela kufumpa kashinshi kawakwakwitiya. Makabisha enzaña munjila yashiyashana, amakwawu enzaña hatooka, amakwawu hiyamwekanañaku. Bayibolu yafwanisha kulukuka kwaSatana nakulukuka kwamwenzi wamutupa nikapela.—Tañenu Masamu 91:13.

3. Indi Satana walukukaña ñahi neyi mutupa nikapela?

³ Neyi chochalukukaña mutupa, Satana walukukaña antu jaNzambi hatooka, wazatishaña ndombu, tuleya hela kulekesha mudimu wakushimwina. (Mas. 94:20) Yileji yamuYearbook yashimunaña nyidimu yawaYinsahu jaYehova makonu yamwekeshaña nyihetu yayivulu yazatishañayi Satana. Akulumpi jansakililu hela akajipolitiki atemeshaña  mazanvu awantu amadombu kuya nakuyandisha antu jaNzambi mumatuña amavulu. Awa ayilumbu alukukaña neyi mutupa analeñeli antu amakwawu kuleka kumukalakela Yehova. Neyi chasumanaña kapela, Diyabolu niyena wadiswekaña hakulukuka antu kulonda yaluwañeshi yitoñojoka yawu nikuyidimba kulonda eleña yuma yakeñayi. Welaña mwenimu kulonda yatuhuñumuni hela yazeyeshi chikuhwelelu chetu. Ilaña spiritu yaNzambi yajila yatwinkaña ñovu yakuumika kweseka kwejima.

4, 5. Njilanyi yayiwahi yitwatela kudiloñeshelamu kumona makabisha, nawa muloñadi? Shimunenu chuma chamwekeni.

⁴ Bayi tutoñojokaña netu njila yayiwahi yakwikala adiloñesha kumona makabisha yidi yakufwikijaña kweseka kwashiyashana kunateli kutumwekena kumbidiku. Muloña hitunateli kwiluka makabisha akatumwekenaku, dichi kwakama yuma yikabula nikumwekana hikunateli kutukwashaku. Hanu dinu, kudi chuma chitwatela kwila. Antu amavulu omikaña chikupu makabisha atweshaña muloña atoñojokaña hachihandilu chawambuña aYehova ashinshika asonekawu muNsona, nikutoñojoka hantañishilu nichakutalilahu chaYesu. Ichi chayikwashaña kusweja kumukeña Yehova. Iku kukeña, kwayikwashili kushinda kweseka kwejima kwayiholokeleli.

⁵ Shinshikenu hachuma chayimwekeneni ahela ayedi amwituña daMalawi. Hakuyikanjikija nawu alandi makaadi achipompelu chajipolitiki, izanvu dawayilumbu dayeteli, nikuyisubula nikuyichinisha nawu akwila nawu wuvumbi. Idi izanvu dayidimbili nawu niankoñi amuchisaka chaBeteli analandi makaadi. Indi ahela akwili nawudi? Akwili nawu, “Etu twamukalakelaña Yehova Nzambi hohu. Neyi amana kwetu ahakasanji kamutayi analandi makaadi, etu kwetu nehi. Hitukulanda makaadiku, hela tuhu mukutujaha.” Ahela ayumbiluku, chelili anahoshi dehi chakadi woma.

6, 7. Yehova wayikoleshaña ñahi ambuñindi hakwila omiki makabisha?

⁶ Kapostolu Pawulu wahosheli nindi akwaKristu muTesalonika atambwilili nsañu yalala “mulukadi lwalweni” ilaña ‘namuzañalu waspiritu yajila.’ (1 Tesa. 1:6) Eñañi, akwaKristu amavulu, akunyima nikulelu, anashindi makabisha ashimunaña nawu hampinji yaswejaña kweseka kwayiholokelaña, munyichima yawu mwekalaña kuwunda, chililu chamukabu waspiritu yajila yaNzambi. (Ŋal. 5:22) Iku kuwunda, kwakiñaña nyichima yawu niyitoñojoka yawu. Eñañi, Yehova wazatishaña ñovu yazatikaña hakukolesha ambuñindi kulonda omiki kweseka nikufuukula chiwahi neyi aholokela mukweseka. *

⁷ Antu atumonaña ahayamaña nankashi hakumona antu jaNzambi chafwilañawu kuhemba kashinshi kawu hela chakwila anaholokeli mumakabisha atama. Chakadi nikujina, aYinsahu enzeleña nañovu yaspiritu. Kapostolu Petulu watukonkomweneni nindi: ‘Neyi akuyisawula hansañu yejina daKristu, munakooleki; muloña spiritu yaNzambi wakulema yekala hadenu.’ (1 Pet. 4:14) Chineli atukabishaña hamuloña wakukakela kunshimbi jaloña chinakumwekesha nawu tukweti wuselewa waNzambi. (Mat. 5:10-12; Yow. 15:20) Twazañalalaña hakwiluka netu tukweti nkisu yaYehova.

Yatukwashaña Kutondolwela Ikakeja Dawakwetu

8. (a) Chumanyi chayikwashili aYoshuwa naKalebi kukaana mwahosheluwu akwawu? (b) Chumanyi chitukudizila kudi aYoshuwa niKalebi?

⁸ Ikañesha dakala kwiluka datela kuumikawu akwaKristu hikakeja datama dafumaña kudi akwawu. Hela chochu, tunateli kutondolwela antu atusehaña, atutwambilaña, hela afwilaña nawu tulondeleña yuma yelañawu, muloña spiritu yaYehova yikweti  ñovu nankashi kubadika spiritu yampata yamunu mwishina. Chumanyi chamukwashili Yoshuwa niKalebi kukaana mwahosheluwu akwawu ikumi atemesheluwu nakwendesha ituña daKenani? Spiritu yajila yayinkeli ‘spiritu’ yacheñi hela yitoñojoka.—Tañenu Kuchinda 13:30; 14:6-10, 24.

9. Muloñadi akwaKristu chatelela kwikalawu ambukaku nawantu amavulu?

⁹ Spiritu yajila yakwashili apostolu aYesu kumwovwahila Nzambi bayi antu alemesheleñawu kudi antu amavulu nawu diwu antañishi ansakililu yalala. (Yil. 4:21, 31; 5:29, 32) Antu amakwawu akeñaña kwila mwelañawu antu amavulu, kuchina yikonkojola hela ndombu. Ilaña akwaKristu alala, wena akolelaña hakwila yuma yaloña. Hela chochu, hamuloña wakuyikolesha nañovu yaNzambi yazatikaña, hiyatiyaña woma wakwikala ambukaku nawakwawuku. (2 Tim. 1:7) Talenu chuma chatela kutuleñela kubula kwiteja ikakeja dawakwetu.

10. Kukalanyi kwamonañawu akwaKristu amakwawu?

¹⁰ Atwansi amakwawu chinateli kuyikalila neyi eluka nawu ibwambu dawu neli chuma chatama. Anateli kutoñojoka nawu neyi aleja aeluda kulonda amukwashi ibwambu dawu chikuleñela mukwawu yaleki kuyikuhwelela; dichi adimwenenañahu muloña wakukeña kuhemba wubwambu wawu. Wunavulumuni niyena nateli kukanjikija akwawu kulonda abuli kumushimwinamu. Hela chochu, bayi neyi atwansi diwu amonaña iku kukala hohuku. Akulumpi niwena akañanyaña kuya nakushimuna kudi aeluda muchipompelu yiluwa yinakoñi ibwambu dawu hela ntaña yawu. Hanu dinu akwaKristu alala anateli kwila ñahi nakukala kwamuchidiwu?

11, 12. Mwatela kwila ñahi neyi muntu wamuchipompelu yayileja nindi mujindi chiluwa chindi, nawa muloñadi?

¹¹ Toñojokenu hanichi chakutalilahu. Twili netu Alex, mana kwetu wakansi, neluki nindi Steve, ibwambu dindi wamuchipompelu, wudi nachaaku chakutala nyevulu yanzekesi. Alex hakumuleja Steve nindi yuma yinakwilayi yatama nankashi. Ilaña, Steve niwinduku. Alex chinamulejiyi ibwambu dindi nindi yayi nakuyilejamu aeluda, Steve hakumwakula nindi neyi mwalala wudi ibwambu dami, wukunshimwinamu wanyi. Komana Alex wukukasa kukanwa kuchina kumanisha wubwambu wawu? Hadaha wukutachika kujinooka nindi aeluda akumudiwula neyi Steve yakaana. Hela chochu, neyi Alex yadimwenenahu kwosi chuma chachiwahi chikufumamu. Chikumuleñela Steve kumanisha wubwambu windi naYehova. Alex watela kwanuka nindi ‘kutiya antu woma hikuditila muhetu; ilaña muntu wakuhwelelaña Yehova wakashakama hamwena zo-o.’ (Yish. 29:25) Chumanyi chikwawu chatela kwilayi Alex? Watela kuya cheñi kudi Steve nakuhanjeka hakukala kukwetiyi chakadi kumuhita mumbadi. Chiña dinu yashamu katwa. Hadaha haniyi mpinji, Steve wukwiteja kuhosha  hakukala kukwetiyi. Alex watela kumuleja cheñi Steve nindi yayi nakuyileja aeluda nawa wukumuleja cheñi nindi neyi yabula kuya nakuyileja hampinji yinamulejiyi, yena wukaya nakuyileja.—Lev. 5:1.

¹² Neyi kumbidi mumona kukala kwamuchidiwu, hakusambila ibwambu denu hanateli kuyisakililaku. Ilaña mukuhita kwampinji wukwiluka nindi munakufwila kumukwasha. Neyi wunavulumuni yeteja mumunakumukwasha, hadaha mpinji yejima wakayisakililaña hakuhamuka kwenu nihakashinshi. Ilaña neyi yayihilila hamuloña wakulejamu aeluda kulonda amukwashi, komana nashikilumu kwikala ibwambu denu? Chuma chachiwahi chochakuzañalesha Ibwambu detu muneni, Yehova. Neyi tukumutwamijaku muchihandilu chetu, antu amukeña akutulemesha muloña twashinshika nawa akwikala amabwambu jetu alala. Dichi bayi tumushila Diyabolu hakushakama muchipompelu chawakwaKristuku. Muloña neyi tukumushila hakushakama, tukuneñesha chikupu spiritu yajila yaYehova. Ilaña twalondejaña mwatulombolaña spiritu kuhitila mukuhemba chipompelu chawakwaKristu chakadi majilu.—Efwes. 4:27, 30.

Yatukwashaña Kuumika Yihuñu Yejima

13. Yihuñwinyi yinakumonawu antu jaYehova, nawa muloñadi chiyinakuswejela?

¹³ Yihuñu yenjilaña munjila jashiyashana, chidi neyi mali anamani, mudimu wumana, wubanji wadinjilaña waweni, indi kwiji tufwisha ntaña yetu, yikatu, niyihuñu yikwawu. Chineli tunakushakama ‘munyaka yakala,’ tunateli kukuhwelela netu hadi mpinji yidi yejima tunateli kuholokela mukweseka. (2 Tim. 3:1) Neyi tuholokela mukweseka, bayi tusweja kwakamaku. Spiritu yajila yinateli kutwinka ñovu yakuumika yihuñu yejima.

14. Chumanyi chamwinkeli Yoba ñovu yakuumika yihuñu?

¹⁴ Yoba wamweni yihuñu yamboka-mboka. Wajimbesheli mahetindi, anyanindi, amabwambu jindi, wakatili, iñodindi niyena walekeli kumukuhwelela Yehova. (Yoba 1:13-19; 2:7-9) Hela chochu, Yoba wadiña nebwambu dindi walala Elihu wamukundejeli. Mazu amulejeliyi, nichikuma chamulejeluwu Yoba kudi Yehova chadiña chakwila nawu: “Imanaku zo, wutoñojoki chachiwahi nyidimu yaNzambi yakuhayamisha.” (Yoba 37:14) Chumanyi chamukwashili Yoba kuumika kweseka kwamweniyi? Nawa chumanyi chikutukwashaku ninetu kuumika? Twatela kwanukaña nikutoñojoka chikupu hanjila mwatwinkelañayi Yehova spiritu yajila niñovu. (Yoba 38:1-41; 42:1, 2) Hadaha tunateli kwanuka mpinji yitwamweni chuma chamwekesheli nawu Nzambi watukeña. Nzambi wuchidi kutwakamena.

15. Chumanyi chamukolesheli kapostolu Pawulu kuumika kweseka?

¹⁵ Kapostolu Pawulu wahitili muyihuñu yayivulu kukoola chikuhwelelu chindi. (2 Kor. 11:23-28) Watwesheli ñahi kuumika nikubula kuneña hampinji yahitileñayi mukweseka kwamuchidiwu? Kulomba nikushindamena hadi Yehova dikwamukwashili. Hampinji  yahitiliyi mukweseka hadaha kwamushikijili nikukufwa, Pawulu wasonekeli nindi: ‘Mwanta wañimenenuku, wankolesheli, kulonda nisweji kushimuna nsañu, aJentili ejima atiyi. Ampulwishili mukanwa kamutupa.’ (2 Tim. 4:17) Dichi, kukala kwamweniyi Pawulu kwamuleñeleli yaleji akwawu akwakwitiya nindi “bayi mwakama chumaku.”—Tañenu Afwilipi 4:6, 7, 13.

16, 17. Shimunenu chakutalilahu chinakumwekesha Yehova chinakwinkayi antu jindi ñovu yakuumika yihuñu makonu.

¹⁶ Payiniya wejina daRoxana wamona Yehova chakwashañayi antu jindi. Chalombeliyi mafuku akunooka kudi mukulumpi wanyidimu kulonda yayi kukupompa kwankambi, wamuzuwilili nindi neyi wuyi, wiluki neyi nyidimu yinakumana. Roxana wayili, kwayili wadiña nakulomba nindi abuli kumuhaña hamudimu. Chalombeliyi, muchima wafuntili mwivumu. Neyi mwomwahosheli mukulumpi wanyidimu, haChimu chelili kupompa kunamani, mukulumpi wanyidimu wamuhañili. Roxana waneñeli. Wawukeñeli iwu mudimu, hela chakwila watambwileña nfwetu yantesha, muloña dimwahembeleleñayi chisaka chindi. Walombeli cheñi, nikutoñojoka nindi Nzambi wamudiishili yakudya yakuspiritu hakupompa, dichi nateli kumukwasha nikumujimba. Hakufunta kwitala, Roxana wamweni chinjikijilu hakusoneka nawu “Tunakukeña Muntu Wanyidimu” wakuluka yitembi mukuzatisha makina akuchima nachu, nawa wasonekeli mukanda wakukeñelahu nyidimu. Mukulumpi wanyidimu wamweni nindi mudimu hawilukisha chakashinshiku, ilaña wamwiñijili, nfwetu yatambwileñayi yabadikili yatambwileñayi hatachi. Roxana welukili nindi kulomba kwindi anakwakuli. Chuma chamuzañaleshelaña nankashi, Roxana watwesheleña kushimwina nsañu yayiwahi kudi akwawu mwazatilileñawu. Akwawu atanu, kushilahu nimukulumpi wamudimu adizili chalala nawa ayipapatishili.

¹⁷ Mpinji yikwawu, tunateli kutoñojoka netu Nzambi hanakwakula kulomba kwetu hohenohu, hela munjila yitunakuhweleluku. Neyi kulomba kwetu hiyanakukwakulaku, kudi chuma chinakuleñela. Yehova nachiluki, ilaña etu tukachiluka kumbidi. Twatela kukuhwelela chikupu netu, Nzambi hashiyaña antu jindi ashinshikaku.—Heb. 6:10.

Yatukwashaña Kuumika Kweseka

18, 19. (a) Muloñadi chitwatela kukuhwelela netu tunateli kuholokela mukweseka? (b) Yumanyi yikuyikwasha kuumika chikupu kweseka?

¹⁸ Antu jaYehova hiyahayamaña neyi aholokela mukweseka, chineñi, kuyiyandisha, nikakeja dawakwawuku. Ituña datumweshaña kañalaña. (Yow. 15:17-19) Ilaña, spiritu yajila yinateli kutukwasha kuumika kukala kutwatela kumona hakumukalakela Nzambi. Yehova hakwiteja nindi atweseki kubadika hakumina ñovu jetuku. (1 Kor. 10:13) Hamba katushiya hela kutulekaku. (Heb. 13:5) Kwovwahila Izu dindi donenawu kwatukiñaña nikutukolesha. Cheñi nawa, spiritu yaNzambi yinateli kusañumuna akwetu akakwitiya kutukwasha hampinji yitunakukeña wukwashu nankashi.

¹⁹ Wejima wetu tutwalekuhu kukeña spiritu yajila mukulomba nikudiza Nsona. Tutwalekuhu ‘kukoleshewa nañovu jejima mwaya ñovu jakulema kwindi [kwaNzambi], kulonda tusweji kutatakena nakudiwunjika namuzañalu.’—Kol. 1:11.

[Tumazu twaheshina]

Mukwakula Nenudi?

• Munateli kudiloñesha ñahi kushinda makabisha?

• Mwatela kwila ñahi neyi muntu yayileja nindi mubuli kushimuna chiluwa chindi?

• Chumanyi chimwatela kukuhwelela neyi muholokela muyihuñu yamboka-mboka?

[Malwihu aKuzatisha haKudiza]

[Mwevulu wudi hefu 28]

Chumanyi chitukudizila kudi Yoshuwa naKalebi?

[Mwevulu wudi hefu 29]

Munateli kukwasha ñahi ibwambu denu wunakoñi chiluwa?