Toñojokenu Chikupu Hayuma Yayikoñelayi Yehova

MWAHITILI hohu mpinji yantesha kufuma hamusañwiluwu Yesu, atumbanji twindi ayedi adiña halwendu lwakufuma kuYerusalema ayileña kuEmawusa. Nsañu Yayiwahi yaLuka yashimuna nawu, “Chadiñi nakuhanjikawu nakudihujola, yomweni Yesu hakukundama kwakwihi, hakwenda nawu. Ilaña mesu awu akañenyi kumwiluka.” Kuhiñahu, Yesu wayilili nindi: “Oyu nsañu yimudi nakuya nakuhosha, nsañwinyi? Wena hiyakwimana ku-ka nakudihomba.” Muloñadi chadihombeleluwu? Atumbanji atoñojokeleña nawu haniyi mpinji Yesu wukupulwisha aIsarela kudi aJentili, ilaña hiyayipulwishiluku. Yesu amujahili. Dihafumini hiyakudihomba.—Luka 24:15-21; Yil. 1:6.

Yesu watachikili kuyihujola atumbanji. “Hakuyilumbulwila munyikanda yajila, kutachika hadi Mosi niatuprofwetu ejima, yuma yatenenuwu yomweni.” Eñañi, hampinji yadiña nakushimwinayi Yesu, kwamwekeni yuma yayivulu yalema nawa yakukolesha yikuhwelelu yawantu! Chelili atumbanji atiyi chalumbulwileñayi Yesu, azañaleli nankashi chatela adihombi. Kushika nampinji yamelela, ahosheli nawu: “Twatiyilahu nyichima yetu mumavumu busu, chadiñi nakutulejayi munjila, chadiñi nakutulumbulwilayi nyikanda yajila.” (Luka 24:27, 32) Chumanyi chitukudizila kuchuma cheliluwu atumbanji twaYesu?

Twatiyaña Ñahi Neyi Yuma Yitwakuhwelela Kumwekana Nehi?

Atumbanji ayedi ayileña kuEmawusi adihombeli muloña yuma yadiña nakukuhwelelawu hiyamwekenuku. Atiyili neyi chashimunawu haYishimu 13:12 nawu: ‘Chikuhwelelu chakwila hachike-e chaleteshaña muchima kukata.’ Chochimu, etu amakwawu, tunamukalakeli Yehova nakashinshi hadi yaaka yayivulu twatoñojokahu dehi netu “lukadi lwasweja” chiña lwahita dehi. (Mat. 24:21; Chim. 7:14) Eñañi, yuma yitwakuhwelela yinakubula kushikijewa yinateli kutuleñela tudihombi.

Ilaña anukenu nenu, atumbanji ayedi azañaleli cheñi chelili Yesu yayileji kushinshika hawuprofwetu wadiña washikijewa dehi niwashikijeweli mumpinji yawu. Anetu  tunateli kwikala namuzañalu munyichima yetu nikuumika nachineñi neyi chomikiluwu. Eluda mukwaKristu wapama wejina daMichael wahosheli nindi: “Bayi mutoñojokaña hayuma yinabuli kwilayi Yehovaku. Ilaña, toñojokenuña hayuma yakoñayi dehi Yehova.” Wahosheli mazu amawahi nankashi!

Yuma Yinakoñiyi Yehova

Shinshikenu hayuma yayiwahi nankashi yakoñayi dehi Yehova. Yesu wahosheli nindi: “Muntu wukunkuhwelela, nyidimu yinukukoña niyena wakayikoña; wakakoña niyakubadika iyi.” (Yow. 14:12) Makonu, ambuña aNzambi anakukalakala nyidimu yamaneni nankashi yabulahu dehi kuzatawu kudi akwaKristu. Antu akubadika hayihita yitanu nayiyedi anakutalila kupuluka halukadi lwasweja. Chitoñojokenu, ambuña aYehova ashinshika amavulu nankashi kanda ashimwineñahu dehi mumatuña amavulu neyi chinakushimwinawu makonu mukaayi kejima! Eñañi, Yehova nakwashi ambuñindi kukalakala ‘nyidimu yamaneni nankashi yakubadika iyi.’

Yumanyi yikwawu yinatukoñeliyi Yehova? Nakwashi antu ashinshika kufuma munaka kaayi katama muchifwikija, nakwiñila muparadisa yakuspiritu yinaloñeshiyi. (2 Kor. 12:1-4) Ikalenu nampinji yakushinshika hayuma yayiwahi yidi muniyi paradisa yitunakumona. Chakutalilahu, talenu mulayibulali yenu hela yaMwitala daWanta. Talenu Watch Tower Publications Index, hela sandujolenu haWatchtower Library yahakopyuta. Tiyililenu kuchimwenu chamuBayibolu. Anukenu nikufwikija yivuminu ninyevulu yayuma yimwadizili hakupompa kwatataka. Toñojokenu cheñi chitwadiluñishaña hakuhanjeka nawamana kwetu niahela akwaKristu. Mwalala Yehova watwinkaña chikupu yakudya yayivulu yakuspiritu niamana kwetu akeñewa, eñañi tunakudiluñisha paradisa yakuspiritu.

Ñimbi yamasamu Davidi wahosheli nindi: “Eyi Yehova Nzambi yami, nyidimu yeyi yakuhayama yiwuneli yinavuli, niyitoñojoka yeyi yiwatutoñojokaña.” (Mas. 40:5) Eñañi, neyi tukutoñojokaña hayuma yayiwahi yinatukoñeliyi Yehova nikushinshika chatutoñojokañayi, chikutukwashaku kwikala nañovu yakuumika chiwahi hakumukalakela namuchima wumu Tata yetu wamwiwulu, Yehova.—Mat. 24:13.

[Mwevulu wudi hefu 31]

Yesu wakwashili atumbanji twindi kutoñojoka hayuma yayikoñeleliyi Yehova

[Nyevulu yidi hefu 32]

Anukenu nikufwikija yivuminu ninyevulu yayuma yimwadizili hakupompa kwakatataka