Zatishenu Chiwahi Wujiki Wenu

“Yowu natweshi kutambula, atambuli.”—MAT. 19:12.

1, 2. (a) Indi Yesu, Pawulu niantu amakwawu, amweneña ñahi wujiki? (b) Muloñadi amakwawu chabulilañawu kutoñojoka nawu wujiki hichawana?

 CHAKADI nikujina maluwi hichawana chekala hayawana yalema nankashi chenkayi Nzambi antu. (Yish. 19:14) Ilaña, akwaKristu amavulu ajiki niwena adiluñishaña chikupu muchihandilu. Mana kwetu Harold wudi nayaaka 95 yakusemuka wabulahu dehi kusumbula, wahosheli nindi: “Hela chakwila natiyaña kuwaha kwikala nawantu amakwawu nikuyimwekeshela chisambu, neyi nindi nkawami hinatiyaña wudiku. Eñañi natela kuhosha nami nikweti chawana chawujiki.”

² Eñañi, Yesu Kristu nikapostolu Pawulu ahosheli hansañu yawujiki, nimaluwi nawu hiyawana yakufuma kudi Nzambi. (Tañenu Matewu 19:11, 12; 1 Akorinda 7:7.) Hela chochu, bayi neyi antu ejima achidi ajiki adikeñelaña kwikala ajikiku. Mpinji yikwawu chakalaña kuwana muntu watelela wakudisumbula nindi. Indi kwiji hanyima yakushakama mumaluwi hadi yaaka yayivulu, amakwawu ashalaña wujiki chakadi kwiluka  hamuloña wakudiseña hela hamuloña wakufwisha mwini kwawu. Hanu dinu wujiki wunateli kwikala ñahi chawana? Nawa akwaKristu ajiki anateli kuzatisha ñahi chiwahi wujiki wawu?

Chawana Chachiwahi

3. Yumanyi yadiluñishañawu akwaKristu ajiki?

³ Mujiki wekalaña nampinji yeneni nikwikala wakasunuka chikupu kwila yuma yinakukeñayi kubadika muntu wudi mumaluwi. (1 Kor. 7:32-35) Iyi hinjila yayiwahi nankashi yinateli kumukwasha kudikita chikupu mumudimu wakushimwina, kudiluka chiwahi nawantu amakwawu, nikukundama kwakwihi naYehova. Dichi, akwaKristu amavulu eluka kuwaha kwekala muwujiki nawa afuukulañahu ‘kwikala ajiki’ hadi mpinji yantesha. Amakwawu hiyafuukulañahu kushakama wujikiku, ilaña neyi yuma yihimpika muchihandilu chawu, alombaña nakushinshika hachihandilu chawu nawa elukaña nawu Yehova nateli kuyikwasha kuwunda mumuchima. Dichi, hiyadineñaña hamuloña wakuhimpika kwachihandilu chawuku nawa atwalekañahu kushakama wujiki.—1 Kor. 7:37, 38.

4. Muloñadi akwaKristu ajiki chatela kwilukilawu nawu Nzambi wayilemesha chikupu chazatañawu mumudimu windi?

⁴ AkwaKristu ajiki eluka nawu hiyeñilaña mumaluwi kulonda ayiluki hela ayihameki kudi Yehova hela mukuloñesha kwinduku. Nzambi wamwekeshaña kukeña kwindi kudi antu ejima. (Mat. 10:29-31) Kwosi muntu hela chuma chidi chejima chatela kutwambula kukukeña kwaNzambi. (Rom. 8:38, 39) Hela tudi mumaluwi hela tudi ajiki, twatela kwiluka netu Nzambi watulemesha nankashi chitwazataña mudimu windi.

5. Chumanyi chakeñekaña hakwila nawu muntu yadiluñishi chikupu nawujiki windi?

⁵ Chakeñekaña kuzata nañovu hakwila nawu muzatishi chiwahi chawana chenu chawujiki. Indi akwaKristu ajiki makonu amana kwetu hela ahela, atwansi chili akulumpi, afuukulahu kwikala ajiki hela hamuloña wakuhimpika kwachihandilu, anateli kuzatisha ñahi wujiki wawu? Tushinshikenu yakutalilahu yayiwahi yawakwaKristu amuchipompelu chakusambila kulonda tudiziluku.

Kwikala Mujiki Nawansi

6, 7. (a) Kukoolekanyi kwatambwililuwu anyana kaFwilipu awambanda ajiki mumudimu waNzambi? (b) Indi Timotewu wazatishili ñahi yaaka yindi yawujiki, nawa amukiswilili ñahi hakudihana kulonda yakalakali henohu wuchidi kansi?

⁶ Fwilipu mukwakushimuna nsañu yayiwahi wadiña nawanyana awambanda ajiki awana adikitileña neyi chadikitileñayi tata yawu mudimu wakushimwina. (Yil. 21:8, 9) Kuprofweta kwadiña hakachi kayawana yachihayamisha yaspiritu yajila, nawa awa atwansi awambanda azatishileña ichi chawana hakushikija wuprofwetu wekala haYoweli 2:28, 29.

⁷ Timotewu wadiña kansi weyala wazatishili chiwahi wujiki windi. Kufuma tuhu kuwansi Timotewu amudizishileña “nyikanda yajila” kudi  mama yindi Yunisi ninkaka yindi wamumbanda Lowisi. (2 Tim. 1:5; 3:14, 15) Hadaha ekalili akwaKristu hampinji yayiliyi Pawulu katachi kuLisitira, musumba mwashakamineñawu, mu 47 C.E. Chimwahitili yaaka yiyedi, Pawulu wayihempwili kamuchiyedi, nawa hadaha Timotewu wadiña muyaaka yindi yatachi yamuma 20. Hela chakwila wadiña kansi nawa wadiña wamuha muchalala, aeluda akwaKristu akuLisitira nikuIkoniyumu ‘amuhamekeleña hama.’ (Yil. 16:1, 2) Dichi Pawulu wamutambikili Timotewu kulonda azatileña hamu mumudimu wakwenda. (1 Tim. 1:18; 4:14) Hitunateli kushimuna jiika netu Timotewu hasumbwiluku. Ilaña tweluka netu iwu kansi weyala wetejeli chakufuma hamuchima mutambi waPawulu, nawa chimwahitili yaaka yayivulu Timotewu wadiluñishili kukalakala neyi kamishonali nawa nkoñi mujiki.—Fwi. 2:20-22.

8. Chumanyi chamukwashili Yowanu Maku kufwila yikonkwanyi yakuspiritu nawa wahetelelumu ñahi?

⁸ Yowanu Maku niyena wazatishili chiwahi yaaka yindi yawujiki hadiñayi kansi. Yena nimama yindi, Mariya, kushilahu nimusonyindi Baranaba diwu atachikili kwikala muchipompelu chamuYerusalema. Chisaka chaMaku chatela chadiña nakuhanda chachiwahi chineli adiña netala dawu mumusumba nawa adiña nañamba. (Yil. 12:12, 13) Hela chakwila adiña aheta, iwu kansi weyala Maku hadiña namuchima wakwila yuma yakuditiyisha yomweni kuwahaku; nawa hakeñeleña kuleka yikonkwanyi yikwawu kulonda yekali nachihandilu chachiwahuku. Hamuloña wakudikunda nawapostolu kufuma tuhu kuwansi kwatela dikwamuleñeleli yekali nampwila yakukalakala mudimu wawumishonali. Dichi wayili hamu naPawulu niBaranaba halwendu lwawu lwatachi lwawumishonali kulonda yekali mukwakuyikwashaku. (Yil. 13:5) Nkumininaku, wayili naBaranaba, kuhiñahu wazatili naPetulu muBabiloni. (Yil. 15:39; 1 Pet. 5:13) Hituneluki yaaka yashakaminiyi Maku muwujikiku. Ilaña watuñili ijina dadiwahi nawu himuntu wadiña namuchima wakukalakela akwawu nikudikita chikupu mumudimu waNzambi.

9, 10. Njilanyi jatela kulondelawu atwansi akwaKristu ajiki kulonda azateña chikupu mumudimu wawu wakushimwina? Shimunenu chakutalilahu.

⁹ Atwansi amavulu muyipompelu makonu niwena azatishaña chiwahi yaaka yawu yawujiki hakukalakala chikupu mumudimu waNzambi. Kufwana Maku niTimotewu, eluka nawu wujiki wayikwashaña “kumukalakelaña Mwanta chakadi kuyiluwañesha.” (1 Kor. 7:35) Mwalala wujiki wawuwahi nankashi. Kudi njila jajivulu mwatela kumukalakelawu Yehova ajiki, kuzataku wupayiniya, kuya nakuzatila kudi kukaankila kwawakwakushimwina aWanta, kudiza idimi dakwituña dacheñi, kuzata mumudimu wakutuña Matala aWanta hela kutuña mutayi, kuya kuShikola Yakudiza Mudimu wawuNkoñi, nikuzatila haBeteli. Neyi muchidi atwansi nawa muchidi ajiki, komana munakuzatisha chachiwahi iku kukooleka kumukweti?

¹⁰ Mana kwetu wejina daMark watachikili wupayiniya henohu kanda yashikiji yaaka 20, wayili kuShikola Yakudiza Mudimu wawuNkoñi, nawa nazati nyidimu yamboka-mboka mumatuña amavulu. Hakwanuka yaaka 25 yinazatiyi mumudimu wampinji yejima, wahosheli nindi: “Wafwilaña kukolesha antu ejima muchipompelu, kuzata nawu mumudimu wakushimwina, kubiña anyikoku, kuyitambika kwitala nakudya nawu, nikuloñesha yidika yakudikolesha kuspiritu. Yuma yejimiyi yanzañaleshaña chikupu.” Kwesekeja nachahosheliyi Mark, muzañalu waweni wafumaña mukuhana, nawa kudihana chikupu mumudimu wajila kwaleñelaña muntu kwikala nakukooleka kweneni kwakuhana. (Yil. 20:35) Atwansi amavulu makonu anateli kukalakala chikupu mumudimu waMwanta hichikweti muloña nayuma yafwilañawu, yelukawu, hela yinamonuwu muchihandilu chawuku.—1 Kor. 15:58.

11. Kuwahanyi kwafumaña mukubula kutemukila maluwi?

¹¹ Hela chakwila atwansi amavulu atoñojokaña nawu kumbidi akeñila mumaluwi, kudi yuma yayiwahi yikuyileñela abuli kutemukila maluwi. Pawulu wakolesheli atwansi kuhembelela sampu ‘anakuli’ dehi, nakuhita hachipimu chaswejaña kutiyawu wuvumbi. (1 Kor. 7: 36)  Hahitaña mpinji hakwila nawu wudiluki chiwekala nikwiluka yuma yayivulu yikuyikwashaku kutonda muntu watelela kwikala mwinikwenu. Kusanyika kwamaluwi hichuma chalema nankashi, nawa kwatela kwikala kwahaya nyaka.—Mukwa. 5:2-5.

Kwikala Mujiki Muwukulumpi

12. (a) Indi Ana mumbanda nfwila womikili ñahi nakukala kwamweniyi? (b) Kukoolekanyi kwamwinkeluwu?

¹² Ana, ashimunawu muNsañu Yayiwahi yaLuka, watela waneñeli nankashi chafwili nfumwindi chakukasumwisha hanyima yakushakama mumaluwi hadi yaaka yitanu nayiyedi. Tuneluki wanyi neyi adiña nawanyana hela neyi watoñojokeli kusumbuka cheñi. Ilaña Bayibolu yahosha nawu chashikijiliyi yaaka 84, Ana wachidiña nfwila. Dichi kwesekeja nachahosha Bayibolu, tunateli kukunkulula netu Ana wazatishili chiwahi mpinji yekaliliyi mujiki kulonda yakundami kwakwihi naYehova. Ana “hafuminaña mutembeluku, wafukaminaña niwufuku nimwaana, nakulembelela kwakujiñojoka nanzala yakuleka kudya.” (Luka 2:36, 37) Dichi muchihandilu chindi watwamijileñaku yuma yakuspiritu. Washiluku maana nawa wazatili nañovu, nawa amukiswilili hama. Wadiña nakukooleka kwakumona kuvwalika kwaYesu nikushimwina kudi antu hansañu yakukuula kwakaletayi Mesiya.—Luka 2:38.

13. (a) Chumanyi chamwekeshaña nawu Dokasi wadikitileña chikupu muchipompelu? (b) Indi Dokasi amukiswilili ñahi hamuloña wayuma yayiwahi yakoñeliyi nikutiyila antu luwi?

¹³ Mumbanda wejina daDokasi, hela Tabita, washakamineña muYopa, hakachi kakabeta kaluwunda namujika iluña dakushankulu kwashikenaña mbopolu muYerusalema. Chineli Bayibolu hiyatena nfumwinduku, hadaha wadiña wasumbuka wanyi. Dokasi “waswejeli nyidimu yayiwahi, niyuma yaluwi yeliliyi.” Watela wayituñilileña antuluwa niantu amakwawu adiña mukukaankila yakuvwala yayivulu, nawa dichaleñeleli amukeñi nankashi. Dichi chakatiliyi kuhiñahu yafwa nikufwa, chipompelu chejima chamutambikili Petulu nakumulembelela nawu yayisañwili muhelawu wakeñewa. Chelili nsañu yakusañuka kwindi yitiyakani mwahita Yopa mwejima, antu amavulu etiyili. (Yil. 9:36-42) Dokasi niyena watela wakwashiluku antu amakwawu kuhitila muluwi lwindi lwasweja.

14. Chumanyi chaleñelaña akwaKristu ajiki kukundama kwakwihi naYehova?

¹⁴ Kufwana Ana niDokasi, antu amavulu muchipompelu ekalaña ajiki muwukulumpi. Amakwawu akañanyaña kuwana muntu watelela kwiñila nindi mumaluwi. Amakwawu niwena adiseña hela afwisha. Hamuloña wakukañanya kuwana muntu wakushakama nindi mumaluwi, akwaKristu achidi ajiki amukuhwelelaña Yehova chikupu. (Yish. 16:3) Silvia, muhela mujiki wunazatili haBeteli hadi yaaka yakubadika ha 38, wamonaña wujiki nindi hikukooleka hama. Wahosheli nindi: “Mpinji yikwawu nakañanyaña kukola. Nadihulaña nami, ‘Hinyi watela kunkolesha?’” Wahosheli cheñi nindi: “Kukuhwelela nami Yehova weluka chikupu yuma yejima yinakeñaña kubadika chineluka ami aweni kwankwashaña kukundama kwakwihi nayena. Nawa mpinji yejima ankoleshaña kudi antu inabuli kukuhwelela nami akwinza nakunkolesha.” Mpinji yejima yitwakundamaña kwakwihi naYehova, watukwashaña munjila yayiwahi nikutukolesha.

15. Indi akwaKristu ajiki anateli ‘kusweja’ kukeña ñahi antu?

¹⁵ Wujiki waleñelaña muntu kwikala nampinji yeneni ‘yakusweja’ kukeñañana. (Tañenu 2 Akorinda 6:11-13.) Jolene, muhela mujiki wunazati mumudimu wampinji yejima hadi yaaka 34, wahosheli nindi: “Nazataña nañovu kulonda nikwati wubwambu nawantu ejima, bayi neyi nawakwetu mutwesekenañaku. Mwalala wujiki diyi mpinji yayiwahi yakumukalakela chikupu Yehova, nikukwasha chisaka chenu, amana kwenu niahela, niatuñi nenu. Inakusweja kuzañalala muwujiki wami hakumona hinukushinakaja.” Atushinakaji, akata, anvwali ajiki, atwansi, niantu amakwawu muchipompelu ahamekaña nankashi chayikwashañawu kudi ajiki namuchima wumu. Eñañi, neyi tukeña antu amakwawu twatiyaña kuwaha. Komana ninenu munateli ‘kusweja’ kukeña antu amakwawu?

 Kushakama Wujiki Muchihandilu Chejima

16. (a) Muloñadi Yesu chashakamininiyi wujiki? (b) Indi Pawulu wazatishili ñahi chiwahi wujiki windi?

¹⁶ Yesu hasumbwiluku; wadiloñesheli hakwila nawu yakalakali mudimu windi wakushimwina. Wendeleña maluña amavulu, wazatileña kufuma budidi kushika niwufuku, nawa nkumininaku waheni wumi windi wikali mulambu. Wujiki wamukwashili kuzata mudimu windi. Kapostolu Pawulu wendeleña mumaluña amavulu nawa wamweni ikezeñi mumudimu windi wakushimwina. (2 Kor. 11:23-27) Hela chakwila watela wasumbwili hakusambila, chamwinkeluwu mudimu wawukapostolu Pawulu watondeluhu kwikala mujiki. (1 Kor. 7:7; 9:5) Hamuloña wamudimu wakushimwina, Yesu niPawulu akolesheli akwawu akutwesha kwimbujola chakutalilahu chawu. Ilaña, hiyaheni nshimbi yakwila nawu muntu watela kushakama wujiki kulonda ashimwineñaku.—1 Tim. 4:1-3.

17. Antu amakwawu makonu embujolaña ñahi chakutalilahu chaYesu niPawulu, nawa tuneluki ñahi netu Yehova wahamekaña antu adihanaña muniyi njila?

¹⁷ Makonu, amakwawu niwena afuukulañahu kwikala ajiki kulonda adikiteña chiwahi mumudimu wakushimwina. Harold, itwashimuna hakusambila, nazati muBeteli hadi yaaka yakubadika ha 56. Wahosheli nindi: “Chinashakamini yaaka ikumi haBeteli, namweneña adisumbula amavulu alekeleña mudimu wahaBeteli muloña wayikatu hela kukeña kuhemba anvwali ashinakaja dehi. Anvwali jami adiña afwa dehi. Ilaña naswejeli kukeña haBeteli nawa hinakeñeleña kusumbulaku muloña hinakeñeleña kufuma haBeteliku.” Cheñi hayaaka yinahituhu, muhela Margaret wunashimbuli mumudimu wawupayiniya wahosheli nindi: “Amayala enjileña nawu asumbuli, ilaña nakaanineña. Nazatishileña iyi mpinji yawujiki nakudikita nankashi mumudimu wakushimwina nawa chumichi chazañaleshaña nankashi.” Eñañi, Yehova hakajimbala antu adihanaña chikupu mukudifukula kwalalaku.—Tañenu Isaya 56:4, 5.

Zatishenu Chiwahi Mpinji Yenu Yawujiki

18. Antu amakwawu anateli kukolesha nikukwasha ñahi akwaKristu ajiki?

¹⁸ Twatela kuhameka nikukolesha chikupu ajiki ejima akwaKristu anakudikita nankashi mumudimu waYehova. Twayikeña wejima wawu nawa twahamekaña hanyidimu yinakukalakalawu nankashi muchipompelu. Hiyanateli kutiya wudi neyi twikala ‘ana kwawu, niahelawu, niamama jawu nianyanawu’ akuspirituku.—Tañenu Maku 10:28-30.

19. Chumanyi chimwatela kwila hakwila nawu muzatishi chiwahi wujiki wenu?

¹⁹ Hela chakwila mwafuukulahu kwikala ajiki hela hamuloña wakuhimpika kwachihandilu chenu, tunakuhweleli netu iyi yakutalilahu yamuNsona niyamakonu yikuyikwasha mwiluki nenu munateli kwikala amuzañalu nikwikala nachihandilu chachiwahi. Yawana yikwawu twayikuhwelelaña ilaña yikwawu yenzaña chakadi kwiluka. Yawana yikwawu twayilemeshaña hohana hitunayitambwili, ilaña yikwawu twayilemesha neyi hanahiti mpinji. Dichi kulemesha yawana yitukweti kwashindamenaña hayitoñojoka yetu. Chumanyi chimwatela kwila hakwila nawu muzatishi chiwahi wujiki wenu? Kundamenu kwakwihi naYehova, swejenu kukalakala mumudimu waNzambi, nikukeña antu amakwawu. Neyi chochekala maluwi, wujiki wunateli kwikala wawuwahi neyi tuwumona neyi chawumonañayi Nzambi nikuzatisha chiwahi ichi chawana.

Munakwanuka?

• Indi wujiki wunateli kwikala ñahi chawana?

• Wujiki wunateli kuleta ñahi nkisu muwansi?

• Kukoolekanyi kukwetuwu akwaKristu ajiki kukuyikwasha kukundama kwakwihi naYehova nikusweja kukeña antu amakwawu?

[Malwihu aKuzatisha haKudiza]

[Nyevulu yidi hefu 18]

Komana munakufwila kukalakala chikupu mumudimu waNzambi?