Keñenu Kuloña Namuchima Wenu Wejima

“Wunakeñi kuloña.”—MAS. 45:7.

1. Chumanyi chikutukwasha kwenda “munjila yakuloña”?

 KUHITILA Mwizu dindi nimuspiritu yindi yajila, Yehova nakulombola antu jindi “munjila jakuloña.” (Mas. 23:3) Chineli hitwawaninaku, twekalaña nachaaku chakusenuka muniyi njila yakuloña. Chakeñekaña kuzata nañovu hakwila nawu tutachiki cheñi kwila yuma yaloña. Chumanyi chikutukwasha kwila yuma yaloña? Kufwana Yesu, twatela kukeña kwila yuma yaloña.—Tañenu Masamu 45:7.

2. Indi ‘njila yakuloña’ hichumanyi?

² Indi ‘njila jakuloña’ hichumanyi? Iji ‘hinjila’ jashindamena hanshimbi jaYehova jakuloña. Mwidimi dachiHeberu nichiGriki, “kuloña” kwatalisha kuchuma “choloka” dikwila nawu kukakela kunshimbi jaloña. Chineli Yehova diyi “wushakaminu wakuloña,” akwakudifukula indi atiyaña kuwaha kumulomba kulonda yayikwashi eluki njila yaloña yatela kulondelawu.—Yere. 50:7.

3. Tunateli kwiluka ñahi yuma yayivulu kutalisha hakuloña kwaNzambi?

³ Tunateli kumuzañalesha Nzambi chikupu neyi tukakela kunshimbi jindi jaloña namuchima wetu wejima. (Kuhit. 32:4) Kumuzañalesha kwatachikilaña kukudiza chikupu hadi Yehova Nzambi kuhitila Mwizu dindi Bayibolu. Neyi tukudizaña chikupu hadi Yehova, ifuku niifuku tukukundama kwakwihi nayena, nawa tukukeña kuloña kwindi. (Yak. 4:8) Twatela cheñi kulondela wunlomboli waMwizu daNzambi donenewa neyi hitukufuukula hayuma yalema muchihandilu.

Keñenu Kuloña kwaNzambi

4. Chumanyi chakeñekaña hakukeña kuloña kwaNzambi?

⁴ Tañenu Matewu 6:33. Kudi yuma yikwawu yitwatela kwila hakukeña kuloña kwaNzambi kubadika kushimwina hohu nsañu yayiwahi yaWanta. Hakwila nawu mudimu wetu wajila awiteji kudi Yehova, yililu yetu ifuku niifuku yatela kwesekanaña nanshimbi jindi jaloña. Chumanyi chatela kwilawu antu ejima anakukeña kuloña kwaYehova? Atela ‘kudivwika wuntu wawuha waleñeluwu mwekalilayi Nzambi mukuloña nakujila kwansañu yalala.’—Efwes. 4:24.

5. Chumanyi chikutukwasha kumanisha chineñi?

⁵ Hampinji yitunakufwila kulondela nshimbi jaNzambi jaloña, mpinji yikwawu twaneñaña hamuloña wayiluwa yetu. Chumanyi chinateli kutukwasha kumanisha chineñi chatuzeyeshaña nikukeña kuloña nikwila yuma yaloña? (Yish. 24:10) Twatela kulomba mpinji yejima kudi Yehova “namuchima walala, nakukuhwelela kwakweni.” (Heb. 10:19-22) Hela chakwila tudi akwaKristu awayishewa hela tukweti kuchiñeja kwakushakama hamaseki, twatela kukuhwelela mumulambu wefutu damuloña daYesu Kristu nimunyidimu yindi hakwikala Kapristu ketu Muneni. (Rom. 5:8; Heb. 4:14-16) Kapostolu Yowanu wasonekeli nindi: ‘Nimashi aYesu atutookeshaña nshidi yejima.’ (1 Yow. 1:6, 7) Hela chochu, Bayibolu yahosha nawu hela neyi “nshidi jenu jichinana, jakatooka to-o neyi mpeza.” Mwalala, Yehova watwinka chawana chachiwahi chefutu danyiloña daMwanindi akeñayi.—Isa. 1:18.

 Shinshikenu Hayitwa Yenu YakuSpiritu

6. Muloñadi chichalemena kushinshika hayitwa yetu yakuspiritu?

⁶ Mpinji yejima, twatela ‘kuvwala hebwambu chikuñu chakujika chakuloña,’ muloña hichitwa chalema chakuspiritu chatwinkayi Nzambi. (Efwes. 6:11, 14) Hela chakwila dihu hitunadihani kudi Yehova hela twatachikili dehi kumukalakela, ifuku niifuku twatela kushinshika hayitwa yetu yakuspiritu. Muloñadi? Muloña Diyabolu niandemoni indi ayinatila hamaseki. (Chim. 12:7-12) Satana nahilashani, muloña neluki nindi nashali nakapinji kantesha. Dichi, naswejeshi kulukuka antu jaNzambi. Komana tweluka netu ‘kuvwala hebwambu chikuñu chakujika chakuloña’ hichuma chalema?

7. Neyi twakeña chikupu ‘chikuñu chakujika hebwambu chakuloña’ twatela kudihemba ñahi?

⁷ Chikuñu chakujika nachu hebwambu chakiñaña muchima wamuntu. Hamuloña wakubula kuwanina, muchima wetu wachifwikija wadimbanaña nikukata. (Yere. 17:9) Chineli muchima wetu wakeñaña kwila yuma yatama, chikuwaha neyi tukuwudizisha nikuwufumba. (Kutach. 8:21) Neyi twalemesha ‘chikuñu chakujika hebwambu chakuloña,’ hitunateli kuchisubula hakapinji kantesha kuhitila mukutonda yisela yahelayi Nzambuku; hela kutachika kufwikija tunakukoña yuma yatamaku. Hitukumanishilaña mpinji yeneni nakutalaña chisanji chanyivwimbimbiku. Ilaña, tukufwilaña kwila yuma yamuzañaleshaña Yehova. Hela neyi tudimbuka hakapinji kantesha hamuloña wakwikala nayitoñojoka yatama yakumujimba, tunateli kunyamuka cheñi muloña Yehova wukutukwasha.—Tañenu Yishimu 24:16.

8. Muloñadi chitunakukeñela “nkebu yakukuhwelela”?

⁸ “Nkebu yakukuhwelela,” yidi hakachi kayitwa yakuspiritu. Yatukwashaña “kujima nachu nyivu yakesi yamukwakutama yejima.” (Efwes. 6:16) Cheñi, chikuhwelelu nikumukeña Yehova namuchima wejima kwatukwashaña kukeña kuloña nikutwalekahu kwenda munjila yaya kuwumi wahaya nyaka. Neyi tusweja kumukeña Yehova, tukusweja nawa kulemesha kuloña kwindi. Indi chinleji chetu? Chatukwashaña ñahi hakufwila kukeña kuloña?

Hembenu Chinleji Chitooka

9. Indi kuhemba chinleji chitooka kwatukwashaña ñahi?

⁹ Hampinji yatupapatishiluwu, twamulombeli Yehova netu yatwinki “chinleji chamuchima chachiwahi.” (1 Pet. 3:21) Hamuloña wakukuhwelela mwifutu danyiloña, mashi aYesu abutaña hanshidi jetu nawa twekala atooka kumesu aNzambi. Hela chochu, hakwila nawu tutwalekuhu kwikala atooka kumesu aNzambi, twatela kuhemba chinleji chitooka. Neyi chinleji chetu chituhisha namuloña nikutusoñamisha, tukwiluka netu chinakuzatika chiwahi. Kutwanukisha muniyi njila kwamwekeshaña nawu chinleji chetu chinakulondela njila jaYehova jaloña. (1 Tim. 4:2) Hela chochu, chinleji chinateli kuzata mudimu wukwawu kudi antu anakufwila kukeña kuloña.

10, 11. (a) Shimunenu chakutalilahu chinakumwekesha muloña wutwatela kutiyilila mwatulejaña chinleji chetu chafumbewa naBayibolu. (b) Indi kukeña kuloña kunateli kutuzañalesha ñahi?

 ¹⁰ Neyi tukoña yuma yatama, chinleji chetu chinateli kutuhisha namuloña hela kutukabisha. Kansi wumu wapwempukili “munjila jakuloña.” Wadiña nachaaku chakutalaña nyevulu yanzekesi nawa watachikili kunwa damba. Hampinji yayileñayi nakupompa chinleji chamukabishileña nawa wadimweneña neyi hinfwikiji hampinji yayileñayi mumudimu wamwiha nakushimwina, dichi walekeli kukalakala iyi nyidimu yawakwaKristu. Wahosheli nindi, “Hinelukili nami chinleji chami chikunkabishaña hamuloña wayiluwa yinakoñeleñaku.” Wabombeleluhu nindi, “Natwalekeluhu nakushakama ichi chihandilu chamukunkulwayi hadi yaaka yiwaana.” Kufumahu watachikili kutoñojoka hakufunta muchalala. Hela chakwila watoñojokeli nindi Yehova hakutiya kulomba kwinduku, walombeli nindi amwanakeni. Hahitili hohu maminiti antesha, amama yindi enjili nakumutala nawa amukolesheli nawu yatachiki kuya nakupompa. Wayili Kwitala daWanta nawa walejeli eluda nindi yatachiki kudiza nindi. Chimwahitili mpinji, amupapatishili nawa wamuhamekaña Yehova hakupulwisha wumi windi.

¹¹ Komana tunamoni netu kwila yuma yaloña kwaletaña muzañalu weneni. Chitukudizaña kukeña kuloña nikukwizatisha chikupu, tukutiyaña kuwaha kwila yuma yamuzañaleshaña Tata yetu wamwiwulu. Nawa toñojokenu! Ifuku dinakwinza dakatiyawu antu ejima kuwaha nachinleji chawu; nawa akamwekeshaña munjila yawanina nawu ayileña muchifwanisha chaNzambi. Dichi, wejima wetu tusweji kukeña kuloña munyichima yetu kulonda tumuzañalesheña Yehova.—Yish. 23:15, 16.

12, 13. Tunateli kufumba ñahi chinleji chetu?

¹² Chumanyi chitwatela kwila kulonda tufumbi chinleji chetu? Hakudiza Nsona ninyikanda yashindamena haBayibolu, twatela kwanuka netu “muchima wamukwakuloña watoñojokaña chachiwahi mwakwakwila.” (Yish. 15:28) Talenu kutoñojoka chachiwahi chikwatukwashaña neyi hitukufuukula hansañu yakukeña nyidimu. Neyi mudimu wutunakukeña kuzata hiwunakwendela hamu nanshimbi jamuNsonaku, etu amavulu twanyakalaña kulondela kufumba kwatulejaña izaza danduñu wamaana nikashinshi. Hela chochu, neyi tunakujinoka netu mudimu wutunakukeña kwiñila wunateleli hela hiwunateleluku, twatela kukeña nshimbi jamuBayibolu jinesekani naniku kukala nawa twatela kutoñojokahu nikulombelahu. Twatela kuzatisha njila yoyimu nihakulondela nshimbi yatulejaña hakubula kuneñesha yinleji yawantu amakwawu. (1 Kor. 10:31-33) Sweje-e dinu, twatela kusha kashinshi kunshimbi jahosha hawubwambu wetu naNzambi. Neyi tuneluki chikupu netu Yehova wudi kwoku, twatela kudihula netu, ‘Komana neyi niñila iwu mudimu nukumuneñesha chikupu Yehova?’—Mas. 78:40, 41.

¹³ Neyi hitukuloñesha chibaaba Chakudizamu muKaposhi Kakutalila niKudiza Bayibolu haChipompelu, twanukeña netu twatela kutoñojoka chikupu hansañu yitunadizi. Komana  twanyakalaña kufunjika ñakwilu yamalwihu adi muchibaaba kulonda tuyi swayi muparakalafu yikwawu? Neyi tukuloñeshaña muniyi njila hadaha hitukusweja kukeña kuloña hela kwikala nachinleji chinakuzatika chiwahiku. Dichi, neyi tunakukeña kuloña, twatela kudiza nikutoñojokañahu chikupu hayuma yitwatañaña Mwizu daNzambi dasonekawu. Twatela kuzata nañovu hakwila nawu tudizi kukeña kuloña namuchima wejima.

Tiyenu Nzala Nimpwila Yakuloña

14. Indi Yehova Nzambi niYesu Kristu akeñaña nawu tutiyeña ñahi hampinji yitunakukalakala mudimu wajila?

¹⁴ Yehova Nzambi niYesu Kristu akeñaña nawu twikaleña amuzañalu hampinji yitunakukalakala mudimu wajila. Chumanyi chinateli kutuletela muzañalu? Chiña yowu kukeña kuloña hohu! Mumpanji yindi yaHampidi, Yesu wahosheli nindi: “Atiyaña nzala nampwila yakuloña anakooleki, muloña akayiikutisha.” (Mat. 5:6) Indi awa mazu alema ñahi kudi antu afwilaña kukeña kuloña?

15, 16. Munjilanyi mwakayikutishilawu antu adi nanzala nimpwila yakuspiritu?

¹⁵ Mpata yitunakushakamamu anakuyiyuula kudi watama. (1 Yow. 5:19) Neyi tukushakama hamaseki nakutaña yipapilu yansañu yakwituña didi dejima, tukuwanamu nsañu jinakuhosha hawukatu nimadombu jinakuswejelaku nankashi. Antu aloña chamonawu antu chayandishaña akwawu antu chayikataña kumuchima nankashi. (Mukwa. 8:9) Etu twamukeña Yehova, tweluka netu yena hohu diyi watela kumanisha nzala nimpwila yakuspiritu yawantu anakukeña kwiluka kuloña. Antu abula kumwiluka Nzambi katataka ayifumishuhu nawa antu akeña kuloña hiyakatiya cheñi chineñi chayiletelañawu antu afumpaña nshimbi ninyidimu yawu yatamaku. (2 Pet. 2:7, 8) Mwalala kwakekala kuzañalala!

¹⁶ Hakwikala ambuña aYehova niatumbanji twaYesu Kristu, tweluka netu antu ejima adi nanzala nimpwila yakuloña “akayiikutisha.” Akayikutisha chikupu kuhitila mukuloñesha kwaNzambi kwamawulu amaha nimaseki amaha “mwakekala kuloña.” (2 Pet. 3:13) Dichi, bayi tuneñaku hela kuhayama hayuma yomisha mbaña nimadombu anajiyishi kuloña mukanu kaayi kaSatanaku. (Mukwa. 5:8) Yehova, Mukwakubadika, wamonaña yuma yinakumwekana nawa katataka yapulwishi antu akeña kuloña.

Hetelenu Mukukeña Kuloña

17. Nkiswinyi jikwawu jitwatela kutambwila neyi tukeña kuloña?

¹⁷ Masamu 146:8 yakonkomwenaña hankisu yabadika yafumaña mukulondela njila yakuloña. Ñimbi yamasamu wembili nindi: “Yehova wakeña aloña.” Toñojokenu! Mwanta waleñeli yuma yejima watukeña hamuloña wakukeña kuloña. Chineli Yehova wukweti kukeña, tunakuhweleli chikupu netu wukutwinka yuma yitwakeñaña kumujimba neyi tutwamijaku Wanta windi muchihandilu chetu. (Tañenu Masamu 37:25; Yishimu 10:3.) Nkumininaku, iseki dejima dakenzala to-o nawantu akeña kuloña. (Yish. 13:22) Antu jaNzambi amavulu, akayinka wumi wahaya nyaka nikwikala namuzañalu chikupu muparadisa yayiwahi yakekala hamaseki hamuloña wakukeña kuloña. Hela tuhu makonu, antu akeña kuloña kwaNzambi anakuyikiswila muloña ashakamaña kumatu kwamwena nawa anuñañana muyisaka yawu nimuyipompelu.—Fwi. 4:6, 7.

18. Yumanyi yitwatela kwila hampinji yitunakutalila ifuku daYehova?

¹⁸ Hampinji yitunakutalila kwinza kwefuku  daYehova deneni, twatela kutwalekahu kukeña kuloña kwindi. (Zef. 2:2, 3) Dichi, tukeñenu nankashi njila jaYehova Nzambi jaloña. Chumichi chinabombelumu ‘kuvwala chikupu chikuñu chakujika hebwambu chakuloña’ kulonda tukiñi nachu muchima wetu. Cheñi twatela kuhemba chinleji chitooka chikutuzañalesha nikuzañalesha muchima waNzambi yetu.—Yish. 27:11.

19. Chumanyi chitwatela kufwila kwila nawa yumanyi yitukahanjekahu muchibaaba chinalondeluhu?

¹⁹ “Mesu aYehova adi nakutalatala mwahita iseki dejima kulonda akwashuku nañovu adi nanyichima yalala yindi chikupu.” (2 Kushi. 16:9) Awa mazu atukundejaña hama hampinji yitunakwila yuma yaloña hela chakwila nshakaminu yatama, madombu, niyuma yaheña yidi mukanu kaayi katama yinakuswejelaku. Eñañi, hamuloña wakwila twalondelaña njila jaloña, antu abula kumwiluka Nzambi ahayamaña. Ilaña twahetelañamu nankashi neyi tukakela kukuloña kwaYehova. (Isa. 48:17; 1 Pet. 4:4) Dichi, tutwalekuhu kukeña chikupu kuloña namuchima wetu wejima, nikwila yuma yaloña, neyi twila mwenimu, tukwikala namuzañalu. Hela chochu, hakwila nawu twikali namuchima washinshika, chiña tuhela yuma yatama. Chibaaba chinalondeluhu chikatuleja chitwatela kuhela yuma yatama.

Mukwakula Nenudi?

• Muloñadi chichawahila kwiluka kulema kwefutu danyiloña hakwila nawu tukeña kuloña?

• Muloñadi chichalemena ‘kuvwala hebwambu chikuñu chakujika chakuloña’?

• Tunateli kufumba ñahi chinleji chetu?

[Malwihu aKuzatisha haKudiza]

[Mwevulu wudi hefu 26]

Chinleji chafumbewa chatukwashaña kushinshika hamalwihu itwatela kudihula hakwiñila nyidimu