Komana Mwahamekaña Chikupu Hayuma Yayikoñelayi Yehova?

CHELILUWU anayifumishi dehi muwuduñu muEjipitu muchihayamisha, aIsarela azañaleli nankashi hakwikala akasunuka kudifukula kudi Yehova. (Kwid. 14:29–15:1, 20, 21) Chimwahitili mpinji, yitoñojoka yawu yahimpikili. Atachikili kutoba hachihandilu chawu. Muloñadi? Muloña atachikili kutoñojoka nankashi hakukala kwamweneñawu mumasaña kubadika hayuma yayikoñeleliyi Yehova. Amulejeli Mosi nawu: “Mwatufumishililidi muEjipitu tufwili munu mwisaña? Mwakadi yakudya mwakadi meji; iyi yakudya [manina] yahehuka tunayitiyi dehi kwetu kumuchima bwi.”—Kuch. 21:5.

Chimwahitili yaaka nkulakaji, Mwanta Davidi wamuIsarela yakushankulu wembili nindi: “Ilaña ami kwami nakuhweleli luwi lweyi; muchima wami wakatiya kuwaha nawamwinu weyi. Nukumwimbila Yehova tumina, nanichi chinawani wuselewa kudi yena.” (Mas. 13:5, 6) Davidi wadiña nakwanuka luwi lwabadika lwamumwekesheleluwu kudi Yehova. Cheñi nawa mpinji yejima wadina nakutoñojokahu. (Mas. 103:2) Ninetu Yehova watutiyilaña luwi, nawa bayi tudiwula yuma yatukoñelayuku. Tushinshikenu hankisu yaNzambi yitwadiluñishaña makonu.

‘Kwikala Hampuña naYehova’

Ñimbi yamasamu wembeli nindi: “Mpuña yanatiyañaniyi Yehova yidi nawenawa amwakamaña.” (Mas. 25:14) Hikukooleka kweneni chikupu antu abula kuwanina hakwikala nawubwambu wawuwahi naYehova! Indi neyi tusweja kudiñija munyidimu yetu chakwila tukañanyaña nikuwana mpinji yakulomba? Toñojokenu chuma chikumwekana hawubwambu wetu wawuwahi naYehova. Chineli Hibwambu detu, Yehova wakeñaña nindi tumukuhweleli nikumuleja yuma yidi munyichima yetu mukulomba, nakumuleja yuma yatutiyishaña woma, yitwafwilaña, niyatuleñelaña  kwakama. (Yish. 3:5, 6; Fwi. 4:6, 7) Komana kwila tutoñojoka hachitwalombaña nehi?

Chinsahu wakansi wejina daPaul chatoñojokeliyi hakulomba kwindi, welukili nindi wateleleli kulombaña munjila yayiwahi. * Wahosheli nindi, “Nadiña nachaaku chakuhosha mazu wowamu hakulomba kudi Yehova.” Paul chasandujoleliyi haniyi nsañu muWatch Tower Publications Index, welukili nindi muBayibolu mwekala kulomba kwashiyashana kwakushika ku 180. Muniku kulomba, ambuña aYehova akushankulu alombeleña chakufuma hamuchima. Paul wahosheli nindi: “Chinatoñojokeli haniyi yakutalilahu yamuNsona, nadizili nami natela kushimunaña jiika yuma yinakukeña mukulomba. Chumichi chankwashaña hakulomba kudi Yehova, namulejaña yuma yejima yidi kumuchima. Ichi natiyaña kuwaha kukundama kwakwihi naYehova mukulomba.”

‘Yakudya Yahampinji Yatelela’

Yuma yayivulu yitwadizaña muNsona diyi nkisu yikwawu yitwatambwilaña kudi Yehova. Chitukudyaña yakudya yayiwahi yayivulu yakuspiritu, twatela ‘kwimba tumina twachiseki mumuchima.’ (Isa. 65:13, 14) Hela chochu, twatela kwikala asoñama kulonda yuma yatama yibuli kutuleñela tuleki kusha maana kuchalala. Chakutalilahu, kutiyilila kunsañu yakutwamba yawakwakusekesha kunateli kuluwañesha yitoñojoka yetu nikutuputisha mesu kulonda tubuleña kulemesha ‘yakudya yakuspiritu yahampinji yatelela’ yatuloñeshelañawu kudi Yehova kuhitila mudi ‘nduñu wamaana nikashinshi.’—Mat. 24:45-47.

André, wamukalakeleli Yehova hadi yaaka yayivulu, wamweni yuma yomisha mbaña hamuloña wakwikala nayitoñojoka yawakwakusekesha yamuleñeleli kuheñuka mukwitiya. Watoñojokeleña nindi kusumbila haWebu sayiti yawakwakusekesha kwafwana wanyi. Wanukili nindi: “Hakusambila, nsañu yateneneñawu akwakusekesha nawu yalala, diyankokweli. Chinaswejeli kushinshika hansañu yashimwineñawu, natachikili kutoñojoka chikupu nami kufuma mukuloñesha kwaYehova kwatama wanyi. Ilaña mukuhita kwampinji, chinesekeli kusandujola nsañu yatadikañawu akwakusekesha hadi aYinsahu jaYehova, nelukili nyihetu yazatishañawu antañishi akutwamba. Nsañu yahimpawu diyi yateneneñawu nawu ‘wunsahu waweni.’ Dichi, natachikili cheñi kutaña nyikanda yetu nikuya nakupompa. Nashikeneni dakwiluka nami, nashalilili muyuma yayivulu.” O kuwaha, André wafuntili muchipompelu.

‘Kukeñañana Nawamana Kwetu’

Kwikala hamu namana kwetu itwakeña, hinkisu yaYehova. (Mas. 133:1) Dichaleñeleli kapostolu Petulu kusoneka nindi: “Keñenu ana kwenu.” (1 Pet. 2:17) Hamuloña wakwikala hamu nawamana kwetu akwaKristu, tukweti atata jetu, amama jetu, amana kwetu, niahela akuspiritu atukwashaña nikututiyila luwi.—Maku 10:29, 30.

Hela chochu, yuma yamboka-mboka  yamwekanaña mpinji yikwawu yinateli kutamisha wubwambu wetu nawamana kwetu niahela. Chakutalilahu, yiluwa yamuntu wabula kuwanina yinateli kutuhilisha nikutuleñela kwikala akalisha kudowu muntu. Neyi chuma chamuchidiwu chimwekana, komana hichinateli kuyikwasha neyi mwanuka nenu Yehova wakeña ambuñindi hela chakwila hiyawaninaku? Kubombelahu, “neyi tukwila netu hitukweti nshiduku, tunadidimbi, ninsañu yalala hiyekala mudetuku.” (1 Yow. 1:8) Komana twafwilaña ‘kutwalekahu nakudovwahila nikudanakena muntu namukwawu’?—Kol. 3:13.

Kankaña wejina daAnn welukili kulema kwakudikunda nawakwaKristu munjila yakala. Wafumini muchipompelu chawakwaKristu, neyi chelili mwana wajimbeli wamuchishimu chaYesu. Chimwahitili mpinji, wanukili nindi waluwañesheli nawa wafuntili muchalala. (Luka 15:11-24) Ann wadizilili kwodi kuchuma chamumwekeneni? Wahosheli nindi: “Chinafuntili mukuloñesha kwaYehova, nalemeshaña amana kwetu niahela ejima hela chakwila hiyawaninaku. Mpinji yakunyima, nanyakeleña kutala hayiluwa yawu. Ilaña ichi inakufwila kuzata nañovu kulonda nikañesheña yuma yidi yejima yinateli kunkañesha kudiluñisha hamu nawakwetu akakwitiya. Mukaayi mwosi yuma yayiwahi yinateli kutuleñela tushiyi paradisa yakuspiritu.”

Mpinji Yejima Hamekenuña Hankisu Yimukweti

Kuchiñeja Wanta waNzambi netu diwu wamba kamanisha kukala kwejima kunakumonawu antu hiheta dabadika chikupu. Nyichima yetu yazañaleli nankashi, hampinji yitwekalili naniku kuchiñeja! Twazañaleli neyi chochazañaleli mukwakulandisha wamuchishimu chaYesu ‘walandishili yuma yadiñiyi nayu yejima’ kulonda yalandi “mperola yimu yasweja kulema wuseya.” (Mat. 13:45, 46) Yesu hahosheli nindi ona mukwakulandisha wadiwili mperolaku. Anetu nawa, bayi tudiwula kuchiñeja kwetu kwakuwahi kwayuma yidi kumbiduku.—1 Tesa. 5:8; Heb. 6:19.

Talenu chakutalilahu chaJean, wunamukalakeli Yehova hadi yaaka yakubadika ha 60. Jean wahosheli nindi: “Kushimwina iwu wanta kudi antu amakwawu dikunankwashi kutwalekahu kutoñojoka haWanta waNzambi. Chankoleshaña hama hakumona antu chazañalalañawu neyi eluka chekala iwu Wanta. Chinamona chalala chansañu yaWanta chichahimpaña chihandilu chawantu adizaña Bayibolu, chanleñelaña kutoñojoka nami, ‘Nikweti nsañu yayiwahi nankashi yakulejaku antu amakwawu!’”

Twatela kuhameka chikupu hamuloña wankisu yayivulu yakuspiritu yitunakudiluñisha. Hela chakwila tunateli kuholokela mukweseka kudi neyi ikañesha, yikatu, kushinakaja, chineñi, kufwisha, nikukala kwachihandilu, tuneluki netu iku kukala kwakapinji kantesha hohu. MuWanta waNzambi, hankisu yakuspiritu yitunakudiluñisha akatuwejelahu nkisu yikwawu yakumujimba. Makabi itunakumona makonu akayifumishahu mwituña dadiha.—Chim. 21:4.

Chayinu mpinji, twatela kuhameka hankisu yakuspiritu neyi chahamekeliyi ñimbi yamasamu wembili nindi: “Eyi Yehova Nzambi yami, nyidimu yeyi yakuhayama yiwuneli yinavuli, niyitoñojoka yeyi yiwatutoñojokaña, hiyakutwesha kukuchindilayuku, hela neyi nakeña kuyishimuna nakuyitena, yinasweji kuvula, kutwesha kuyichinda nehi.”—Mas. 40:5.

[Tumazu twaheshina]

[Mwevulu wudi hefu 18]

Neyi tunaholokeli mukweseka atwinkaña ñovu yakuspiritu