Komana Mwahela Yuma Yatama?

‘Yesu waheleli yuma yatama.’—HEB. 1:9.

1. Yesu watañishili nindidi hansañu yakukeña?

 HAMPINJI yakonkomweneniyi hakulema kwakumwekesha kukeña, Yesu Kristu walejeli atumbanji twindi nindi: “Tiyenu, nukuyileja lushimbi lwalwiha nami, Mukeñañani. Chinayikeñami, ninenu nawa keñañanenu. Neyi mukukeñañana, dihu hakayilukilawu antu ejima nawu mudi atumbanji twami.” (Yow. 13:34, 35) Yesu walejeli atumbanji twindi kumwekesha kukeña kwakweni kudi wumu namukwawu. Atumbanji twaYesu adi kuyilukila kukukeña. Yesu wayikolesheli cheñi nindi: “Keñenu ayilumbu jenu, ninawa ayikabishaña, yilombelenu.”—Mat. 5:44.

2. Yumanyi yatela kuhelawu atumbanji twaKristu?

² Kubombela hakuyidizisha atumbanji twindi chililu chakukeña, Yesu wayilejeli cheñi yuma yatela kuhelawu. Kutalisha hadi Yesu ashimwineñahu dehi nawu: ‘Wunakeñi kuloña, wunaheli yuma yatama.’ (Heb. 1:9; Mas. 45:7) Awa mazu anakumwekesha nawu twatela kukeña kuloña nikuhela nshidi hela yuma yatama. Dihafumini kapostolu Yowanu kuhosha nindi: “Ejima avulumunaña hiyakuputola, muloña kuvulumuna yowu kuputola.”—1 Yow. 3:4.

3. Kutalisha hakuhela yuma yatama, mbadinyi yamuchihandilu chetu yitukuhanjeka muchinu chibaaba?

³ Etu akwaKristu twatela kudihula netu, ‘Komana nahela yuma yatama?’ Tushinshikenu chitwatela kumwekesha netu twahela yuma yatama mumbadi yiwana mukuhanda kwetu: (1) chitwatoñojokaña hakusweja kunwa walwa,  (2) chitwamonaña kupanda, (3) chakutondolwela yililu yatama, (4) nichitwamonaña antu akeña kwila yuma yatama.

Bayi Walwa Wuyitadiki Wuduñuku

4. Muloñadi Yesu chadiñileñayi wakasunuka hakusoñamisha antu hansañu yakusweja kunwa walwa?

⁴ Mpinji yikwawu Yesu wanwineña vinyu, welukili nindi hichawana chakufuma kudi Nzambi. (Mas. 104:14, 15) Hela chochu, haswejeleña kunwa vinyuku. (Yish. 23:29-33) Chaleñeleli Yesu kwikala wakasunuka hakuhosha hampinji yafumbileñayi antu hansañu yakunwa walwa. (Tañenu Luka 21:34.) Kusweja kunwa walwa kunateli kuleñela muntu kwila nshidi yahamesu bwi-i. Dichi, kapostolu Pawulu wasonekeli nindi: “Bayi musheta walwaku, chaletaña ipumba, ilaña inzalenu spiritu.” (Efwes. 5:18) Wakonkomweneni cheñi akulumpi awambanda muchipompelu nindi, “bayi asweja kunwa walwaku.”—Tit. 2:3.

5. Malwihwinyi atela kudihulawu antu akeñaña kunwa walwa?

⁵ Neyi munakukeña kutachika kunwa walwa, mwatela kudihula nenu: ‘Komana yitoñojoka yami yidi neyi yaYesu kutalisha hakusweja kunwa walwa? Neyi inakukeña kukwasha antu hansañu yakunwa walwa, komana nekalaña wakasunuka hakuhosha? Komana nanwaña kulonda nibuleña kwakamena hela nibuleña kuneña? Indi mumulungu wumu nanwaña chumpa jiñahi? Neyi muntu yanleja nindi inakusweja kunwa walwa, nahoshaña namidi? Komana nadibabaña hela kuhilashana?’ Kusweja kunwa walwa kunateli kutuleñela kukañanya kutoñojoka chachiwahi nikukañanya kufuukulahu chiwahi. Atumbanji twaKristu afwilaña kukiña yitoñojoka yawu.—Yish. 3:21, 22.

Lekenu Yililu Yakupanda

6, 7. (a) Indi Yesu welili ñahi nakulukuka kwaSatana nikwawandemoni? (b) Muloñadi yililu yakupanda chiyinaswejeli kutanda nankashi makonu?

⁶ Hampinji yadiñayi hamaseki, Yesu wadikañili naSatana ninawandemoni. Wakaanini kulukuka kwaSatana kwesekeleñayi kashinshi kindi. (Luka 4:1-13) Welukili cheñi nyihetu yindi nawa wakaanini kweseka kwakeñeleñayi nindi yaluwañeshi yitoñojoka niyililu yindi. (Mat. 16:21-23) Yesu wakwashili antu anyichima yayiwahi kufuma muwuduñu wawandemoni atama.—Maku 5:2, 8, 12-15; 9:20, 25-27.

⁷ Chelili Yesu anamuswanyiki dehi kwikala Mwanta mu 1914, wamuhañili Satana mwiwulu niandemoni jindi aluwañeshaña. Dichi kufuma hayina mpinji, Satana nakufwila chikupu ‘kudimba antu ampata yamunu mwishina ejima.’ (Chim. 12:9, 10) Dichi, hitwatela kuhayama hakumona yililu yakupanda chiyinakutanda nikuswejelakuku. Twatela kwila ñahi kulonda tudikiñi?

8. Twatela kudishinshika ñahi kutalisha hakutonda yisela?

⁸ Bayibolu yasoñamisha hawubanji wekala mukupesha. (Tañenu Kuhituluka 18:10-12.) Makonu, Satana niandemoni anakuluwañesha yitoñojoka yawantu kuhitila munyivwimbimbi, munyikanda, nimuyisela yahamakina akesi kawuneñu mwekala nsañu yakupanda. Dichi neyi hitukutonda yisela, twatela kudihula netu: ‘Hatukweji tunahituhu, komana natalaña nyivwimbimbi, maprogiramu ahaTV,  yisela yahamakina akesi kawuneñu, nyikanda, hela yisela yakusehesha mwekala nsañu jakupesha? Komana neluka chichawahila kutondolwela yuma yatama yafumaña mukupanda, indi kwiji natoñojokaña nami kupanda kwatama wanyi? Natoñojokahu dehi ntahi chatela kutiyayi Yehova kutalisha hayisela yinatondaña? Neyi nadiñija dehi mukuluwañesha kwaSatana, komana kumukeña Yehova nikukeña nshimbi jindi jaloña kunateli kunleñela ninyakali kufuukulahu kulonda niyitondolweleña?’—Yil. 19:19, 20.

Tiyililenu Chafumbiliyi Yesu haYililu Yatama

9. Indi muntu nateli kukeña ñahi yuma yatama?

⁹ Yesu walondeleleña nshimbi jaYehova kutalisha hansañu jawuvumbi. Wahosheli nindi: “Himunatañi nsañu yakwila nawu, wayileñeli hatachi, wayileñeli niiyala nimumbandaku, tahindi? nindi, Dichi muntu ashiyi tata yindi nimama yindi, akakeli iñodindi, niwena ayedi akekali mujimba wumu. Hiyadi cheñi ayeduku, adi mujimba wumu. Dichi anabombuwu kudi Nzambi, bayi ayambula kudi muntuku.” (Mat. 19:4-6) Yesu welukili nindi yuma yitwatalaña yinateli kuluwañesha muchima wetu. Dichi muMpanji yindi yaHampidi wahosheli nindi: “Munatiyi cheliluwu nawu, Kwila wuvumbi chinjila. Ilaña ami nukuyileja nami muntu wukutala mumbanda namesu akumufwila, neli dehi nindi wuvumbi mumuchima windi.” (Mat. 5:27, 28) Antu adiwulaña kufumba kwaYesu amwekeshaña nawu akeña yuma yatama.

10. Shimunenu chakutalilahu chinakumwekesha nawu muntu nateli kuleka kutala nyevulu yanzekesi.

¹⁰ Satana watiyakeshaña yililu yawuvumbi kuhitila munyevulu yanzekesi. Kaayi kamakonu kanenzali nayililu yamuchidiwu. Antu atalaña nyevulu yanzekesi akañanyaña kujima nyevulu yatama muyitoñojoka yawu. Anateli nikuteñuka nakutala nyevulu yanzekesi. Talenu chuma chamwekeni kudi mukwaKristu wumu. Wahosheli nindi: “Nadiña nakutala nyevulu yanzekesi mukuswamujoka. Natoñojokeleña nami nateli kutala nyevulu yanzekesi nikutwalekahu kumuzatila Yehova. Nelukili nami ichi chaaku chatama ilaña nadidimbileña ami aweni nami Nzambi wetejeleña nyidimu yinadiña nakumukalakela.” Indi iwu mana kwetu wahimpili ñahi? Wahosheli nindi: “Hela chakwila chadiña chuma chakala nankashi chinabulahu dehi kwila, nafuukwiluhu kuyilejamu aeluda haniku kukala kwami.” Nkumininaku, iwu mana kwetu walekeli ichi chaaku chatama. Wahosheli nindi, “Hanyima yakuleka iyi nshidi, dihinelukili nami komana nindi nachinleji chachiwahi.” Eñañi, antu ahela yuma yatama atela kuhela nikutala nyevulu yanzekesi.

11, 12. Hakusakula tumina tutwatiyililañaku tunateli kumwekesha ñahi netu twahela yuma yatama?

¹¹ Tumina nimazu ekalañamu tunateli kuluwañesha yitoñojoka yetu nimuchima wetu wachifwikija. Tumina hichawana chakufuma kudi Nzambi nawa anatuzatishi hadi mpinji yayilehi mukudifukula kwalala. (Kwid. 15:20, 21; Efwes. 5:19) Ilaña kaayi kaSatana kaletaña tumina twahamekaña yililu yatama. (1 Yow. 5:19) Munateli kwiluka ñahi nenu tumina tumwatiyililañaku tunakuyiluwañesha hela nehi?

¹² Mwatela kudihula nenu: ‘Komana tumina tunatiyililañaku twahamekaña nsañu yakujahañana, wuvumbi, nimatuka? Neyi nimutañila  muntu mazu adi mukamina, komana wukumona nindi nahela yuma yatama, indi kwiji mazu adumu akumwekesha nawu itu tumina tunaluwañeshi muchima wami?’ Hitwatela kuhosha netu twahela yuma yatama henohu twatiyililaña kutumina twahamekaña yuma yatamaku. Yesu wahosheli nindi: “Yuma yedikaña mukanwa diyi yatamishaña muntu. Muloña kumuchima diku kwafumaña yitoñojoka yatama, niwubanji, niwuvumbi, nikubajama, niwukombi, niwunsahu wakutwamba, nikutukana.”—Mat. 15:18, 19 esekejenu Yakoba 3:10, 11.

Antu Akeña Yuma Yatama Yimonenuña Neyi Chayimweneñayi Yesu

13. Indi Yesu wamweneña ñahi antu aswejeleña kwila nshidi?

¹³ Yesu wahosheli nindi wenjili nakutambika akwanshidi, hela elaña yuma yatama, kulonda abalumuki munyichima yawu. (Luka 5:30-32) Indi antu aswejeleña kwila nshidi wayimweneña ñahi? Yesu wasoñamishili nindi bayi ayiluwañesha kudi antu amuchidiwuku. (Mat. 23:15, 23-26) Wahosheli cheñi nindi: “Antu ejima akuntenatena nawu, Mwanta, Mwanta; hiyakawanina kwiñila muwanta wamwiwuluku, chiña muntu welaña muchima waTata yami wudi mwiwulu. Amavulu amba kañila hefuku odu [mpinji yakasompeshañayi Nzambi] nawu, Mwanta, Mwanta, hitwaprofweteli mwijina deyuku? Hitwafumishili andemoni mwijina deyuku? Hitwakoñeli nyidimu yañovu yayivulu mwijina deyuku? Henohu nakayakula nami, Hinayilukili hela ifuku nidimuku; fumenu kudami.” (Mat. 7:21-23) Muloñadi awantu chakayisompeshelawu muniyi njila? Muloña hiyamulemeshaña Nzambuku nawa akatishaña akwawu muloña wayuma yatama yakoñañawu.

14. Muloñadi akwanshidi abulaña kubalumuka mumuchima chayifumishilañawu muchipompelu?

¹⁴ Izu daNzambi dakonkomwenaña nawu akwanshidi abulaña kubalumuka mumuchima atela kuyifumisha muchipompelu. (Tañenu 1 Akorinda 5:9-13.) Kudi yuma yisatu yaleñelaña anavulumuni ayifumishi muchipompelu: (1) kubula kuleta kasawuntu hejina daYehova, (2) kukiña chipompelu kuyuma yaluwañeshaña, (3) nikumukwasha wunavulumuni kulonda yabalumuki mumuchima neyi chinatwesheki.

15. Neyi tunakukeña kutwalekahu kwikala ashinshika kudi Yehova, malwihwinyi itwatela kudihula?

¹⁵ Komana ninetu twamonaña antu aswejaña kwila yuma yatama neyi chayimweneñayi Yesu? Twatela kutoñojoka hanawa malwihu: ‘Komana natela kufuukulahu kudikundaña namuntu ahañawu hela wunadambuli yomweni muchipompelu chawakwaKristu? Tunateli kwila ñahi neyi muntu ahañawu hintaña itwabulaña kushakama nindi hetala?’ Kukeña kuloña nikumwovwahila Nzambi kunateli kwikala mukweseka.

16, 17. Kukalanyi kwamweniyi mama yawantu mukwaKristu nawa chumanyi chamukwashili kulondela ntanjikilu yakuhaña mukwanshidi wunabuli kubalumuka mumuchima muchipompelu?

¹⁶ Talenu chakutalilahu chamuhela wukweti mwana weyala wadiña wamukeña Yehova. Nkumininaku, wafuukwiluhu kwila yuma yatama chakadi kuleka. Dichi, amuhañili muchipompelu. Iwu muhela wamukeñeli Yehova, nimwanindi wamukeñeli nawa chamukalilili  kulondela kufumba kwamuNsona kwahosha hakutondolwela kudikunda namuntu wahañawu muchipompelu.

¹⁷ Indi iwu muhela mwadi kumukwasha ñahi? Eluda wamulejeli nindi Yehova welukili chineñi chatiyileñayi. Mana kwetu wamulejeli nindi toñojokaku Yehova chaneñeliyi chelili anyanindi amakwawu añelu adikañi. Eluda wamulejeli nindi, hela chakwila Yehova weluka chichakataña kumuchima, wakeñaña nindi akwanshidi anabuli kubalumuka mumuchima ayihañi muchipompelu. Muhela wahembeli iku kufumba nawa walondejeli nakashinshi ntanjikilu yakuhaña muntu wuneli nshidi muchipompelu. * Kwikala nakashinshi muniyi njila kwamuzañaleshaña Yehova.—Yish. 27:11.

18, 19. (a) Kuleka kudikunda namuntu wakeña kwila yuma yatama chamwekeshaña nawu twahela yumanyi? (b) Chumanyi chinateli kufumamu neyi twikala ashinshika kudi Nzambi nintanjikilu yindi?

¹⁸ Neyi munakumona kukala kwamuchidiwu, mwani ilukenu nenu Yehova niyena waneñaña. Neyi mubula kudikunda namuntu anahañiwu muchipompelu hela wunadambuli yomweni, munakumwekesha nenu mwahela yililu yaleñeleli yakoñeña chiluwa. Dichi, mukumwekesha cheñi nenu muntu wunavulumuni mwamukeña nawa munakukeña yeleña yuma yayiwahi. Kwikala ashinshika chikupu kudi Yehova kukuleñela muntu anababeshuwu kubalumuka mumuchima nikufunta kudi Yehova.

¹⁹ Muntu wumu ahañiluwu muchipompelu nawa nkumininaku amufuntishili wahosheli nindi: “Nidi wamuzañalu muloña Yehova wakeña antu jindi nawa wakeñaña nindi kuloñesha kwindi kwikaleña kwakadi majilu. Kumuhaña muntu muchipompelu hichuma chachiwahi nankashi hela chakwila antu abula kwikala muchipompelu amonaña nawu hichuma chatama.” Komana munatoñojoki nenu iwu muntu wadi kuhosha awa mazu neyi chakwila antu amuchipompelu, kushilahu nichisaka chindi atwalekeluhu kutiyañana nindi hampinji yamuhañiluwu muchipompelu? Kulondela nshimbi yamuNsona yahoshaña hakuhaña muntu muchipompelu, kwamwekeshaña nawu twakeña kuloña nawa tweluka netu Yehova wukweti ñovu yakutwinka nshimbi yitwatela kulondela.

“Helenu Yatama”

20, 21. Muloñadi chichalemena kwikala namuchima wakuhela yuma yatama?

²⁰ Kapostolu Petulu wasoñamishili nindi: “Babalenu, tonenu; mukwankunyi nenu [Diyabolu] wudi nakuya nakutambatamba nakukeñekeña akudyayi, neyi mutupa wabulumaña.” (1 Pet. 5:8) Komana yenu anakukeñakeñayi? Ichi chinashindameni hakuhela yuma yatama.

²¹ Kwikala namuchima wakuhela yuma yatama kwakala nankashi. Muloña twavwalikila munshidi, nawa tunakushakama mukaayi kakoleshaña antu kulondela kufwila kwachisemwa. (1 Yow. 2:15-17) Hela chochu, kuhitila mukumwimbujola Yesu Kristu nikumukeña chikupu Yehova Nzambi, tunateli kutwesha kuhela yuma yatama. Dichi tufwilenu ‘kuhela yuma yatama’ nikumukuhwelela chikupu Yehova netu “wahembaña chachiwahi . . . antu indi ajila; wayipulwishaña kudi antu atama.”—Mas. 97:10.

[Tumazu twaheshina]

Mukwakula Nenudi?

• Chumanyi chikutukwasha kwiluka chitwatoñojokaña hakusweja kunwa walwa?

• Yumanyi yitwatela kwila kulonda tudikiñi kunsañu jakupanda?

• Muloñadi kutala nyevulu yanzekesi chikwatamina?

• Tunateli kumwekesha ñahi netu twahela yuma yatama neyi muntu itwakeña anamuhañi muchipompelu?

[Malwihu aKuzatisha haKudiza]

[Mwevulu wudi hefu 29]

Neyi munakukeña kutachika kunwa walwa, yumanyi yimwatela kutoñojokahu?

[Mwevulu wudi hefu 30]

Babalenu nakuluwañesha kwaSatana sweje-e munsañu jayisela

[Mwevulu wudi hefu 31]

Neyi muntu watalaña nyevulu yanzekesi dikwila nawu wakeña yumanyi?