‘Kwovwahila Kwabadika Mulambu’

SAWULU wadiña mwanta watachi muIsarela wakushankulu. Hela chakwila amutondeli kudi Nzambi walala, mukuhita kwampinji Sawulu walekeli kwovwahila.

Yiluwanyi yakoñeliyi Sawulu? Komana wateleleli kuyitondolwela? Tunateli kuhetelamu ñahi munichi chakutalilahu chindi?

Yehova Washimwini Mwanta Watondeliyi

Henohu Sawulu kanda yekali mwanta, kaprofwetu Samweli diyi wadiña ñimenu yaNzambi muIsarela. Dichi Samweli wadiña washinakaja dehi, nawa anyanindi hiyadiña ashinshikaku. Nawa hampinji yoyimu, iwu munza adiña nakuwutiyisha woma kudi ayilumbu jawu. Chelili akulumpi awaIsarela amwili Samweli nawu ayikunjiki mwanta wunateli kuyisompesha nikuyilombola munjita, Yehova wamulombweli kaprofwetu kutonda Sawulu kulonda yekali nlomboli nawa wahosheli nindi: “Wakahandisha antu ami kudi aFwilistinu.”—1 Sam. 8:4-7, 20; 9:16.

Sawulu wadiña “mukwenzi wamuwahi wawutotombu.” Kubombela hakuwaha kwindi, wadiña nayililu yayiwahi. Wadiña cheñi wadizoza. Chakutalilahu, Sawulu wamwihwili Samweli nindi: “Ami hinikaBenjaminuku? Muchidi wetu hidiwu wasweja kukeha munyichidi yawaIsarela yejimaku? Nichisaka chetu hidichi chasweja kukeha hayisaka yamumuchidi waBenjamini yejimaku? Indi wunahoshelidi nanami mwenimu?” Sawulu wadiña wadizoza hamu nichisaka chindi, hela chakwila tata yindi Kishi wadiña “chilobu mukwañovu.”—1 Sam. 9:1, 2, 21.

Talenu cheñi mazu ahosheli Sawulu chelili Samweli yaleji antu mwanta wamuIsarela atondeluwu kudi Yehova. Samweli wasambilili kumuwayisha Sawulu kumbadi nawa wamulejeli nindi: “Wakela mwonsu muwunakeñi, muloña Nzambi wudi naneyi.” Kufumahu, kaprofwetu wapompesheli antu kulonda yashimuni mwanta watondeliyi Yehova. Hela chochu, Sawulu chamutenenuwu nawu diyi mwanta, hiyamumwenuku. Sawulu waswamini muloña watiyileña nsonyi. Yehova wayilejeli kwaswaminiyi, nawa Sawulu amuswanyikili hawanta.—1 Sam. 10:7, 20-24.

Kwiluña Kwasililuwu Njita

Mumpinji yantesha Sawulu wahishili namuloña antu ejima amujinokeleña nawu hateleleli kwikala mwantaku. Akamutaña waAmoni chakeñeleñawu kulukuka mukala wawaIsarela, ‘spiritu yaNzambi yenjili hadi Sawulu.’  Wapompesheli amashidika amumunza, wayamboleli mumazanvu, nawa wayilombweli kunjita. Hela chochu, Sawulu wamuhamekeli Nzambi nindi: “Lelu Yehova nakoñi jakupulwisha muIsarela.”—1 Sam. 11:1-13.

Sawulu wadiña nayililu yayiwahi nawa Nzambi wamukiswilili. Cheñi welukili nindi Yehova wukweti ñovu. Hela chochu, kudi chuma chalema nankashi chateleli kwilawu hakwila nawu aIsarela nimwanta wawu atwalekuhu kushakama chachiwahi. Samweli walejeli antu amuIsarela nindi: “Neyi mwakamutiyaña Yehova woma, nakumukalakela, nakutiyilila mwizu dindi, nakubula kudikaña nanshimbi jaYehova, neyi ninenu nimwanta wenu wukuyiyuulaña mwakakakela Yehova Nzambi yenu, chakawaha.” A Isarela adi kukuhwelela chumanyi neyi atwalekeluhu kwikala ashinshika kudi Nzambi? Samweli wahosheli nindi: “Muloña Yehova hakayishiya antu induku nanochu chatoha ijina dindi; muloña Yehova natiyi kuwaha kuyilisha antu ambala ayena.”—1 Sam. 12:14, 22.

Hakutambwila wuselewa waNzambi, chakeñekeleña kwikala ovwahila nankashi, nikulelu kwovwahila kwalema hama. Yehova wakiswilaña ambuñindi neyi ovwahila nshimbi jindi. Indi neyi abula kumwovwahila Yehova?

“Wuneli Chuma Chawusupi”

Chuma chayikoñeliyi Sawulu aFwilistinu chayivundwili chikupu. Mukanka wawamashidika amavulu nankashi “neyi wusekulula wekala kuchikumu chakaluñalwiji” amulotokeleli Sawulu. “AIsarela chamwenuwu chinakali dehi muloña antu hiyakumona ihuñu, antu hiyakuya nakubatajala nimumayeñu, nimuyiputa, nimumalola, nimujimpwembu, nimumena.” (1 Sam. 13:5, 6) Chumanyi cheliliyi Sawulu?

Samweli wamulejeli Sawulu nindi abulakeni kuGiligali, kwakalambwilayi kaprofwetu nyilambu. Sawulu welili chiñilile-e, ilaña Samweli henjili swayiku, nawa amashidika aSawulu atachikili nikumwañala. Dichi Sawulu watachikili kuhana yomweni mulambu. Chelili tuhu nindi yamanisheña kuhana mulambu, Samweli yaditula nikuditula. Hanyima yakutiya chuma chakoñeliyi Sawulu, Samweli wamulejeli nindi: “Wuneli chuma chawusupi; hiwunahembi mwakulejeliyi Yehova Nzambi yeyuku. Yehova katataka wakeña kukukoleshela wanta weyi wamuIsarela chahaya nyaka. Ichi dinu wanta weyi hiwakakola nawaku. Yehova naditondeli dehi muntu wakumuchima windi. Yehova namukunjiki dehi kwikala nlomboli yawantu indi, nanochu chiwunabuli kuhemba mwakulejeliyi Yehova.”—1 Sam. 10:8; 13:8, 13, 14.

Sawulu hamwekesheli chikuhweleluku, wakañenyi kwovwahila nshimbi yaNzambi yamulejeluwu nawu yamuhembeleli Samweli kulonda yalambuli mulambu. Chuma chakoñeliyi Sawulu chinambuki chikupu nacheliliyi Gideyona, wadiña mukulumpi wawamashidika muIsarela. Yehova wamulejeli Gideyona kukehesha mukanka wawamashidika indi adiña 32,000 nakushala 300, Gideyona wovwahilili. Muloñadi? Muloña wamukuhweleleli Yehova. Hamuloña wawukwashu waNzambi, washindili amashidika akushika ku 135,000. (Ansomp. 7:1-7, 17-22; 8:10) Sawulu niyena chiña amukwashili kudi Yehova. Dichi hamuloña wakubula kwovwahila kwaSawulu, aFwilistinu ayipupili aIsarela.—1 Sam. 13:17, 18.

Twafuukulañahu ñahi, neyi tunaholokeli mukukala? Kwesekeja nayitoñojoka yawantu abula chikuhwelelu, anateli kutoñojoka nawu kubula kwovwahila nshimbi yaNzambi dichuma chachiwahi. Chineli Samweli walabili, Sawulu watoñojokeli nindi wakoñeli chuma chachiwahi. Ilaña antu afwilaña kwikala nawuselewa waNzambi, eluka nawu kulondela nshimbi jamuNsona jinakuhosha hayuma yinakufuukulawu dichuma chachiwahi nankashi.

Yehova Wamukaanini Sawulu

Hampinji yadiña nakulwawu nawaAmaleki, Sawulu wakoñeli chiluwa chikwawu cheneni. Nzambi wayitanyishili Amaleki hamuloña wakulukuka aIsarela chakadi muloña hampinji Yafumineñawu muEjipitu. (Kwid. 17:8; Kuhit. 25: 17, 18) Cheñi, Amaleki adibombeli nawantu amakwawu nakulukuka antu jaNzambi atondewa mumpinji yawaAnsompeshi. (Ansomp. 3:12, 13; 6:1-3, 33) Dichi Yehova wayinkeli Amaleki muloña nawa wamulejeli Sawulu kuya nakuyijilumuna.—1 Sam. 15:1-3.

Chatela yovwahili nshimbi yaYehova yakujilumuna ayilumbu jawu Amaleki nikukisañana mahetawu, Sawulu wakwatili mwanta wawu nikuhemba anyama awu amawahi. Chumanyi chamwekeni chelili Samweli yamwihuli Sawulu chuma chakoñeliyi? Sawulu watachikili kudikaña kuhitila mukuhosha nindi: “Antu aanakeneni nyikoku nañombi asweja kuwaha nawu amuketwili Yehova.” Hela chakwila Sawulu wakeñeleña kulambula atunyama hela nehi, wakañenyi kwovwahila. Sawulu walekeli ‘kudikehesha.’ Dichi, kaprofwetu kaNzambi wahosheli nindi Sawulu hamwovwahilili Nzambuku. Kuhiñahu Samweli wahosheli nindi: ‘Komana Yehova watiyaña kuwaha nanyilambu yakushita, niyimuna yakuketula chakweseka nakwovwahila izu daYehova, tahindi? Tiya kwovwahila kwabadika mulambu, . . . Ochu chiwunaleki izu daYehova, niyena nawa nakuleki dehi kwikala mwanta.’—1 Sam. 15:15, 17, 22, 23.

Chelili Yehova yaleki kumwinka Sawulu spiritu yindi yajila nikumukiswila, “spiritu yatama,” yatachikili kwiñila mudi mwanta watachi wawaIsarela. Sawulu watachikili kumujinoka Davidi nikumutiyila ichima, muntu akaswanyikawu hawanta kudi Yehova. Kapampa kayedi, Sawulu wakeñeli kumujaha Davidi. Bayibolu yahosha nawu chelukiliyi nindi, ‘Yehova wadiña naDavidi; . . . Sawulu wekalili chilumbu chaDavidi hefuku hefuku.’ Sawulu wesekeli kumukeña chikupu nawa waheni nshimbi yakujaha atupristu 85 niantu amakwawu. Dihafumini Yehova hakumushiya Sawulu!—1 Sam. 16:14; 18:11, 25, 28, 29; 19:10, 11; 20:32, 33; 22:16-19.

Hampinji yayilukukiluwu aIsarela kudi aFwilistinu, Sawulu watachikili kulomba wukwashu kudi akwakuhoña. Chikwachili, amukatishili chikupu kunjita nawa wadijahili. (1 Sam. 28:4-8; 31:3, 4) Kutalisha hadi mwanta wawaIsarela watachi wabulili kwovwahila, Nsona yahosha nawu: “Sawulu wafwili namuloña windi waputiliyi kudi Yehova nichamotokeliyi izu daYehova dabulili kuhembayi; nichehwiliyi kudi muntu wazakukaña mukishi, hakwihwilaku nindi amuleji maana; abuli kwihula kudi Yehova.”—1 Kushi. 10:13, 14.

Chakutalilahu chatama chaSawulu chinakumwekesha nawu kumwovwahila Yehova kwabadika kumulambula mulambu wudi wejima. Kapostolu Yowanu wasonekeli nindi, “Kumukeña Nzambi yowu kwila mwatulejañayi; mwatulejañayi himwakalaku.” (1 Yow. 5:3) Dichi twatela kwanukaña ichi chikuma chalema chakwila nawu: Hakwila nawu tutwalekuhu kwikala nawubwambu naNzambi, chiña tumwovwahilaña.

[Mwevulu wudi hefu 21]

Hakutachika Sawulu wadiña nlomboli wadizoza

[Mwevulu wudi hefu 23]

Muloñadi Samweli chamulejeleliyi Sawulu nindi ‘kwovwahila kwabadika mulambu’?