Malwihu Kufuma Kudi Antañi

Muloñadi Mosi chazuwililiyi anyana kaAroni aEleyazari naItamari hanyima yakufwa kwawanakwawu aNadabi niAbihu, nawa kuzuwa kwindi akumanishili ñahi?—Lev. 10:16-20.

Mwahitili hohu mafuku antesha kufuma haswanyikiluwu atupristu akukalakala hatabanaka, Yehova wakisañeni anyana kaAroni aNadabi niAbihu muloña alambwili kesi kacheñi kudi Yehova. (Lev. 10:1, 2) Mosi walejeli anyana kaAroni awamayala asheluhu nindi bayi ayidila amana kwawu afwiluku. Hashimbwili wanyi, Mosi wazuwilili aEleyazari naItamari muloña hiyadiili mpembi wamulambu wanshiduku. (Lev. 9:3) Muloñadi Mosi chazuwililiyi?

Nshimbi yamwinkeluwu Mosi kudi Yehova yashimwini chikupu nawu kapristu hakuhana mulambu wanshidi wateleli kudyaku mutamba muchipañu chetenti dakubulakena. Kudya kumulambu wanshidi yadiña njila yakwanakenamu nshidi jawantu alambwileña. Ilaña, neyi mashi amakwawu amulambu ayitwala Mwajila, mukapeka katachi kamumalala, owu mulambu hiyawudiileñaku. Ilaña, awocheleña.—Lev. 6:24-26, 30.

Chidi neyi hanyima yawubanji wamwekeni hadina ifuku, Mosi washiluku muchima kulonda nshimbi jaYehova ajilondeleña chikupu. Chelukiliyi nindi mpembi wakuhana kumulambu wanshidi anamusukumishi, Mosi wayihwili mukuzuwa aEleyazari niItamari nindi ashimuni chabulililuwu kudya mpembi kwesekeja namwaya nshimbi, muloña mashi ampembi hiyayihanini kudi Yehova Mwajilaku.—Lev. 10:17, 18.

Aroni wakwili lwihu lwehwiliyi Mosi, muloña atupristu asheluhu azatili kwesekeja namwayilejeliyi. Chelili anyanindi ayedi ayijahili, hadaha Aroni wajinookeli neyi chakwila kapristu wudi wejima wateleli kwiteja kudya mulambu wanshidi hadina ifuku. Hadaha watoñojokeli nindi kudya wuna mulambu hikwadi kumuzañalesha Yehovaku, hela chakwila chiluwa chakoñeli Nadabi naAbihu hichayikumini wenaku.—Lev. 10:19.

Sweje-e dinu, Aroni watela watoñojokeleña nindi hefuku datachikili chisaka chindi kukoña nyidimu yawu yawupristu, ateleli kushaku kashinshi chikupu kulonda abuli kumuneñesha Nzambi munjila yidi yejima. Hela chochu, Nadabi naAbihu asawili ijina daYehova nawa kuzuwa kwaNzambi kwayishikeneni. Dichi Aroni watela watoñojokeli nindi chisaka mwafumini antu avulumwini hichateleleli kudya kuniwu mulambu wajilaku.

Mosi watela wetejeli mwakwiliyi mana kwindi, muloña iyi nsañu yakunkulula nawu: “Mosi chanatiyiyi mwenomu atiya nikuwaha.” (Lev. 10:20) Chakadi nikujina Yehova niyena watela watiyili kuwaha chakwiliyi Aroni.