Bayi Mudidimba Nayitoñojoka Yakutwambaku

CHELILI Evu nadya dehi kumutondu wamulekesheluwu, Nzambi wamwinhwili nindi: “Ichi chuma chiwuneli hichumanyi?,” Evu wakwili nindi, “Kapela diyi wandimba dichi nadya.” (Kutach. 3:13) Satana, kapela wababala waleñeleli mumbanda yakañanyi kumwovwahila Nzambi, atachikili cheñi kumutena nawu “kapela mukulu, . . . wadimbaña antu ampata yamunu mwishina ejima.”—Chim. 12:9.

Iyi nsañu yekala mumukanda waKutachika yamulumbululaña Satana nawu hisakutwamba, wavubaña nsañu kulonda yadimbi antu abula kubabala. Chakadi nikujina, Evu watiyilili mwamudimbiluwu kudi Satana. Hela chochu, bayi tutoñojoka netu Satana hohu diyi watela kutudimbaku. Bayibolu yatusoñamishaña cheñi hawubanji wekala ‘mukudidimba etu aweni nayitoñojoka yakutwamba.’—Yak. 1:22.

Tunateli kutoñojoka netu hitunateli kudidimba etu awenuku. Hela chochu, Nzambi weluka muloña watusoñamishilañayi. Dichi chikuwaha neyi tushinshika hanjila mutwatela kudidimbila etu aweni nayitoñojoka yakutwamba yinateli kutuheñula. Tutalenu chakutalilahu chamuNsona chinateli kutukwasha.

Chuma Chitukudizila Kudi Antu Adidimbileña Aweni

Kukamwihi nachaaka cha 537 B.C.E., Kirusi Muneni waPeresi watemesheli mazu kudi aYudeya atweluwu muwunkoli muBabiloni nindi afunti kuYerusalema nakutuñulula tembeli. (Ezera 1:1, 2) Mumwaka walondeleluhu, kwesekeja nakufuukula kwaYehova, antu alili chikuku hakutuñila tembeli yayiha. Antu afuntili azañaleli nawa amushimekeli Yehova hakuyikiswila hampinji yatachikiluwu kuzata mudimu walema. (Ezera 3:8, 10, 11) Ilaña mumpinji yantesha, atachikili kuyikabisha namudimu wawu wakutuñulula nawa antu azeyeli. (Ezera 4:4) Chimwahitili yaaka kwakwihi na 15 kufuma hafuntiluwu, anyanta awaPerisi alekesheli mudimu wejima wakutuña muYerusalema. Hakwila nawu akoleshi mwahosheluwu, akulumpi amutubeta enjili muYerusalema “hiyakuyilekesha [aYudeya] chandombu nañovu.”—Ezera 4:21-24.

Chamwenuwu ikañesha, aYudeya atachikili kudidimba aweni nayitoñojoka yakutwamba. Ahosheli nawu: “Mwaka wakutuña itala daYehova kanda wushiki.” (Hag. 1:2) Akunkulwili nawu Nzambi hakeñeleña nindi tembeli ayituñi mukunyakashanaku. Chatela afwili kwila mwaya kukeña kwindi, alekeli mudimu wajila wayinkeluwu kuzata nawa atachikili nyidimu yakuwahisha matalawu. Kaprofwetu kaNzambi Hagayi wayihwili chakadi kuhita mumbadi nindi: “Iwu komana himwaka wenwenu aweni, himwaka wakushakamaña enu mumatalenu akusha mapalanga mukachi, iku italidi [tembeli ya Yehova] saña dashakamina kwanyilumba hohu?”—Hag. 1:4.

Muneluki chuma chitwatela kudizilaku? Neyi tukañanya kwiluka mpinji yatanjikawu yakuzatilamu nyidimu yaNzambi kukutuleñela tudiwuli nyidimu yetu yakuspiritu nakusha maana kunyidimu yetu. Twili netu, munakutalila enyi. Dichi hakukwata hakuvula, mukutachika kuzata nyidimu yahetala muloña muneluki nenu keña ashiki kulonda ashikeni mwitala mwamuwahi. Ilaña, kutwala muna mutambwila nimazu nawu enyi hiyakushika swayiku. Komana mukuleka kudiloñesha?

Anukenu nenu, Hagayi niZekariya ayilejeli aYudeya kulonda eluki nawu Yehova wakeñeleña nindi tembeli ayituñululi swayi-swayi. Hagayi wayikolesheli nindi: “Ninenu antu amwituña ejima; . . . Dikwatishenu mukoñi.” (Hag. 2:4) Ateleleli kutwalekahu namudimu wazatileñawu, nakukuhwelela nawu spiritu yaNzambi  yadi kuyikwasha. (Zek. 4:6, 7) Komana ichi chakutalilahu chinateli kutukwasha tubuleña kutoñojoka mwaheña kutalisha hefuku daYehova?—1 Kor. 10:11.

Kuleka Yitoñojoka Yakutwamba naKwikala Yitoñojoka Yayiwahi

Mumukanda windi wamuchiyedi, kapostolu Petulu wahosheli hampinji yaYehova yatanjikayi yakuleña “mawulu amaha niiseki dadiha.” (2 Pet. 3:13) Wahosheli nindi akwakusekesha amakwawu atachikili kujinoka nawu Nzambi hamba kamanisha kukala kwamonañawu antuku. Atadikileña chikupu nawu kwosi chuma chikamwekana, nawa ahosheleña nawu “yuma yejima [yadiña nakutwalekahu neyi] chochiyekala, neyi chiyadiñi hatachi haleñeluwu yuma.” (2 Pet. 3:4) Petulu wakeñeleña kujimañesha yitoñojoka yakutwamba yamuchidiwu. Wasonekeli nindi: “Nalondi kuhizumwisha nachu nyichima yenu yalala nakuyanukisha.” Walejeli akwawu akwaKristu nindi akwakusekesha atwambili. Mpinji yakunyima Nzambi wamanishili kukala kwamweneñawu antu, waleteli dibaji deneni dajilumwini kaayi kejima.—2 Pet. 3:1, 5-7.

Hagayi niyena wayikolesheli aYudeya aneñeli, nawa azeyeli muchaaka cha 520 B.C.E. Wayikonkomweneni nindi: “Toñojokenu chachiwahi yuma yimwelaña.” (Hag. 1:5) Hakwila nawu yayisañumuni, wayanukishili akwawu akwakudifukula kutoñojoka hayuma yafuukulayi Nzambi niyakanayi antu Jindi. (Hag. 1:8; 2:4, 5) Hanyima yakuyikolesha, atachikili cheñi mudimu wakutuña, hela chakwila akwanshimbi ayikañesheleña. Cheñi, ayilumbu akeñeleña nawu mudimu wakutuña wubuli kutwalekahu, ilaña akañenyi. Ikañesha damanini, nawa chimwahitili yaaka yitanu amanishili mudimu wakutuña tembeli.—Ezera 6:14, 15; Hag. 1:14, 15.

Twatela Kutoñojoka Chiwahi Hayuma Yitwelaña

Komana mwatoñojokaña nenu kufwana aYudeya adiñaku mumafuku aHagayi, ninetu tunateli kuneña neyi tuholokela mukukala? Neyi tuneña, tunateli kukañanya kutwalekahu kudikita mumudimu wakushimwina nsañu yayiwahi. Hanu dinu, chumanyi chinateli kutuneñesha? Tunateli kuholokela mukukala hamuloña wakumona yuma yaheña yekala mudinu ituña. Toñojokenu hadi Habakuki, wenhwili nindi: “Nukubidika kushika mpinjinyi hakwila wutiyi, hakwila wutupulwishi kumadombu?” (Hab. 1:2, Today’s English Version) Kwesekeja nachamonañawu antu amakwawu nawu hikulaba, mukwaKristu niyena nateli kwikala muwufuku nakutachika kusha maana kumaheta. Komana chumichi chatela kuyimwekena? Neyi tutoñojokaña muniyi njila, tukutachika kudidimba etu aweni. Chikuwaha neyi tulondela kufumba kwamuNsona kwakwila nawu ‘twatela kutoñojoka chachiwahi hayuma yitwelaña’ ‘nikuhizumwisha nyichima yetu yalala.’ Twatela kudihula netu, ‘Komana nateli kuhayama hakumona kanu kaayi katama kanashimbuli kubadika chinatoñojokeleña?’

Mpinji Yakuchiñeja Yashimwineñawu Dehi muBayibolu

Toñojokenu hamazu ahosheliyi Yesu kutalisha hakukuma kwakanu kaayi. Nsañu yasonekeliyi Maku hawuprofwetu waYesu wahosha  hamafuku akukuminina yamwekeshaña nawu Yesu watukonkomwenaña nankashi nindi twikali asoñama. (Maku 13:33-37) Twawanaña kusoñamisha kwokumu mumazu awuprofwetu ahoshaña hefuku daYehova deneni daAmagedoni. (Chim. 16:14-16) Muloñadi chahoshelawu nankashi haniyi nsañu yakusoñamisha? Twakeñaña nsañu yamuchidiwu yakusoñamisha muloña tunatalili hadi mpinji yeneni nawa antu anakuzeya.

Yesu waheni chakutalilahu chikutukwasha kutwalekahu kwikala asoñama hampinji yitunakutalila kukuma kwakanu kaayi. Wahosheli hadi mwini itala wukweti itala dinabaluluwu kudi amakombi. Indi mwini itala wadi kukañesha ñahi amakombi kubula kumubuwila yuma? Kuhitila mukutona wufuku wejima. Yesu wakunkulwili ichi chakutalilahu kuhitila mukutufumba nindi: ‘Babalenu, muloña mpinji yimukubula kutoñojoka diyi yakenzayi Mwana kamuntu.’—Mat. 24:43, 44.

Ichi chakutalilahu chinakutuleja nawu twatela kwikala namuchima wakuchiñilila, hela chakwila hakushimbula. Nawa bayi tusweja kwakamena netu adinu ituña datama dinasweji kushimbula kubadika chitwakuhweleleli. Dichi bayi tudidimbaña etu aweni nayitoñojoka yatama netu ‘Mwaka waYehova kanda wushiki.’ Yitoñojoka yamuchidiwu yikutuleñela kubula kwikala nampwila yakushimwina nsañu yayiwahi yaWanta.—Rom. 12:11.

Twatela Kuleka Yitoñojoka Yakutwamba

Lushimbi lwekala haAŋalija 6:7 lwahoshaña hayitoñojoka yakutwamba nawu: “Bayi mudidimbaku, . . . yonsu yakudimayi muntu, diyi yakadyayi.” Neyi hamuhaña kutumbahu mbutu nehi, hashimbulaña wanyi nakumena matahu. Chochimu, neyi tukubula kusañumuna yitoñojoka yetu yayiwahi, tunateli kwikala nayitoñojoka yatama. Chakutalilahu, tunateli kutoñojoka netu, ‘Chakadi nikujina ifuku daYehova dinakwinza, ilaña hidinakwinza katatakaku.’ Neyi twikala nayitoñojoka yamuchidiwu, yikutuleñela kufunta hanyima munyidimu yaNzambi. Mukuhita kwampinji, tukutachika kudiwula yuma yakuspiritu. Ifuku daYehova dikatushintakesha.—2 Pet. 3:10.

Hela chochu, hitukwikala nayitoñojoka yatamaku neyi mpinji yejima tukushinshikaña “mwaya muchima waNzambi, diwu wawuwahi, watiyishaña kuwaha, walala chikupu.” (Rom. 12:2) Kutaña mpinji yejima Izu daNzambi diyi njila yayiwahi yatela kutukwasha. Nsona yinateli kutukwasha tusweji kukuhwelela netu mpinji yejima Yehova welaña yuma hampinji yatoñolayi.—Hab. 2:3.

Kudiza, kulomba, nikupompa mpinji yejima, nikushimwina, kubombelahu nikwilila antu yuma yayiwahi, kukutukwasha ‘kwanuka kwinza kwefuku daYehova.’ (2 Pet. 3:11, 12) Yehova wukumona kashinshi ketu. Kapostolu Pawulu watwanukishaña nindi: “Bayi tuzeyaña nakwila mwamuwahuku, muloña twakadya hachilaaka chakudya, neyi tunabuli kuzeya.”—Ŋal. 6:9.

Ayinu bayi neyi diyi mpinji yakwiteja yitoñojoka yatama yituleñeli tutachiki kutoñojoka netu ifuku daYehova hidakenza swayiku. Ilaña, ayinu himpinji yakukolesha nyichima yetu, muloña ifuku daYehova didi mukamwihi.

[Mwevulu wudi hefu 4]

Hagayi niZekariya ayikolesheli aYudeya kutwalekahu namudimu wakutuña

[Mwevulu wudi hefu 5]

Chumanyi chikwilayi mwiniitala neyi neluki nindi ikombi nakwinza?