Bayi Mudiwula Akwenu Akakwitiyaku

JAROSŁAW niñodindi Beata ahosheli nawu, “hadi yaaka ikumi, twaswejeli kuta maana kunyidimu yakulanda nakulandulula yamukaayi, nawa twadiña namaheta chikupu. Hela chakwila twakulilili muchalala, twaheñukili nakufuma kudi Yehova nawa twatoñojokeleña netu hitunateli kufuntaku.” *

Mana kwetu mukwawu wejina daMarek, wahosheli nindi: “Hamuloña wakuhimpika kwansañu jamuchituñilu nijamatuña nachiyuulu mwituña daPoland, hinashakamineña hamudimu wumuku. Chaneñesheleña hama. Hinakeñeleña kutachika kampani yamuku, muloña hinadiña nachawaana chakutachika mudimu wakulanda nakulandululaku. Nkumininaku, natachikili kampani, natoñojokeleña nami chikunkwashaku kuwana mali akukwasha nachu chisaka chami chakadi kuzeyesha wuspiritu wami. Chimwahitili mpinji, nelukili nami naluwañesheli chikupu.”

Kushakama mukaayi mwakwila chihandilu chinakusweja kukala nawa nyidimu niyena yinakukala kuwana, antu amakwawu anakukañanya kutulisha nyichima yawu, chinakufumamu, hiyanakufuukula chiwahuku. Amana kwetu amakwawu azataña maora amavulu kubadika hampinji yatela kuzatawu, kwiñila nyidimu yikwawu, kutachika kudizatila aweni hela chakwila hiyakuluka yitembi munyidimu yeniyiku. Atoñojokaña nawu mali amakwawu akuwanañawu  akukwashañaku chisaka nawa wuspiritu wawu wukutwalekahu kwikala wakola. Ilaña, kukala kwenzaña chakukashimwisha nikukala kwamali kunateli kuluwañesha munafuukuliyi muntu. Ichi chinaleñeli antu amakwawu kufwa mumuhetu wakwikala nalwisu nawa anajimbeshi wuspiritu wawu hamuloña wamaheta.—Mukwa. 9:11, 12.

Amana kwetu amakwawu niahela anasweji kwiñija nyitu mukufwila yuma yamukaayi chakwila analeki nikudiza, kupompa, hela kuya nakushimwina. Chakadi nikujina, kudiwula iyi yuma kwakojejaña muntu kuholokela muwubanji wakuspiritu nikuluwañesha wubwambu windi naYehova. Anateli nikujimbesha wubwambu wukwawu walema, wubwambu wawu nawamana kwawu ‘akakwitiya kwakukuhwelela.’ (Ŋal. 6:10) Amakwawu niwena alekaña kudikunda nawana kwawu akwaKristu chovu-chovu. Toñojokenuhu chikupu haniyi nsañu.

Tukweti Mudimu Wakukwasha Akwetu Akakwitiya

Hakwikala anyana evumu dimu, tukweti kukooleka kwakuvulu kwakumwekesha kukeña kudi wumu namukwawu. (Rom. 13:8) Muchipompelu chenu, hekwawu mudi ‘atuzweñi anakudila, nakukeña wakuyikwasha.’ (Yoba 29:12) Amakwawu hiyakweti yakudyaku. Kapostolu Yowanu watwanukishili nindi twatela kukwasha antu amuchidawa. “Muntu wukweti yuma yampata yamunu mwishina, wukumona mana kwindi nayibuli, hakumuumina muchima windi mwivumu, kukeña kwaNzambi kukutwesha kushakama mudi yena ñahi?”—1 Yow. 3:17.

Hadaha mwamonahu antu anakaankili nawa mwolweli chikasa chenu nakuyikwasha chikupu. Ilaña, hitwatela kumwekesha kukeña kudi amana kwetu kuhitila mukuyinka hohu yuma yakumujimbaku. Amakwawu anakudila nakukeña wakuyikwasha hamuloña wakutiya wudi hela chineñi. Atoñojokaña nawu hiyanateli kumukalakela Yehovaku, anakuyekela nayikatu yamaneni, hela anafwishi ntaña yawu. Njila yimu mutwatela kuyikoleshela yidi yakutiyilila neyi anakuhosha nikuhanjeka nawu, neyi twila mwenimu tukuyikwasha muyitoñojoka nikuspiritu. (1 Tesa. 5:14) Neyi twila mwenimu tukukolesha mpanda yakukeñañana nawamana kwetu.

Atubiña akuspiritu atela kushaku muchima chikupu wakutiyilila nawushona, nikutiya munakuhoshayi muntu, nikumufumba chiwahi kuzatisha Nsona. (Yil. 20:28) Neyi ela mwenimu, dikwila nawu ankoñi anakumwimbujola kapostolu Pawulu ‘waswejeli kuyikunda’ amana kwindi niahela akuspiritu.—1 Tesa. 2:7, 8.

Ilaña, neyi mukwaKristu wukwambuka hamutaña, chumanyi chikumwekana kumudimu windi wakukwasha akwawu akakwitiya? Ankoñi niwena anateli kufwa mumuhetu wakufwila maheta. Chumanyi chatela kwilayi mukwaKristu neyi naholokeli mukweseka kwamuchidiwu?

 Kwakama Yuma Yakumujimba Kwazeyeshaña

Neyi chitunadizi dehi, ikabi ditwamonaña hakukeñela chisaka chetu yuma yakumujimba datuleñelaña kwakamena nawa datuzeyeshaña kuspiritu. (Mat. 13:22) Marek, itwatena dehi, walumbulwili nindi: “Chinaholokeli munyidimu yami yakuselujola, nafuukwiluhu kuya kwituña dacheñi nakukeña mudimu. Nafuminuhu hadi tukweji tusatu, nibombelahu nitukwawu tusatu, nitukwawu cheñi, nawa nafuntileña hohu kapinji kantesha kwitala. Iñodami wabula kwitiya waneñeleña nankashi.”

Chisaka chami hidichayadililumu hohuku. Marek wahosheli cheñi nindi: “Kubombela hamaora amavulu inazatilileña munkanza, nazatileña nawantu akweti winyi akeñeleña kukabisha akwawu. Adiña neyi ambanji. Chumichi channeñesheleña nankashi. Nakañenyeña nikuwana mpinji yakudakamena kumujimba, natachikili kujinoka nami hinateli kukwasha akwetuku.”

Yuma yatama yafumini mukufuukula kwaMareki yatela kutuleñela kushakama hamaseki nakutoñojoka. Neyi mutachika kutoñojoka nenu chimwaya nakuzatila kwituña dacheñi wuzweñi wukumana, komana himukuleta kukala kukwawuku? Chakutalilahu, chisaka chetu chikuhandaña ñahi kuspiritu nimuyitoñojoka? Neyi tuya kwituña dacheñi, tukwambuka nachipompelu? Komana kuya kwituña dacheñi hikunateli kutukañesha kwikala nakukooleka kwakukalakela amana kwetuku?—1 Tim. 3:2-5.

Neyi chimuneluki, muntu hanateli kuluwankana namudimu neyi yaya nakuzatila kwituña dacheñi hohuku. Talenu chuma chamumwekeneni Jarosław niBeata. Jarosław wahosheli nindi: “Chatachikili tuhu neyi maleñu. Chineli twadiña amaha mumaluwi, twatachikili kasitolu mutwalandishileña tumankendi twanyanya mwakusha mbiji. Mali amavulu afumineñamu atuleñeleli kutohesha mudimu wetu wakulandulula. Ilaña mpinji yatukeheleleña, dichi hitwayileña kukupompa kwetu kwawakwaKristuku. Nkumininaku, wupayiniya niwunkoñi wakuzatila niwunata nijonkolu. Hamuloña wakuzañalala namali itwakwatileña, twashinkwili nisitolu yeneni nawa twatachikili kuzatila hamu namuntu wabula kwitiya. Natachikili kuya kumatuña acheñi nakufwachika yitiyañenu yakutambula mali amavulu akwituña daAmerica. Hinashakamineña hetalaku nawa wubwambu wami nañodama nimwanami wamumbanda wakeheli. Nkumininaku, hamuloña wakusweja kwiñija mutu mumaheta, twalekeli kumuzatila Yehova. Chineli twalekeli kupompa, hitwatoñojokeleña hadi amana kwetu niahelaku.”

Chumanyi chitukudizilaku? MukwaKristu wukufwa mumuhetu neyi yekala namuchima wakudituñila “paradisa” yakanka windi, wukutachika kudishindamena, nikutachika “kwenda nzekesi,” dikwila nawu wukujimbesha chinjikijilu chindi chakwikala mukwaKristu. (Chim. 16:15) Dichi tukwambuka kudi amana kwetu itwakwashileña kunyima.

Dishinshikenu Chachiwahi

Hadaha tukutachika kutoñojoka netu, ‘Chumichi hichinateli kummwekenaku.’ Ilaña wejima wetu twatela kutoñojoka chikupu kulonda twiluki yuma yitunakaankili muchihandilu. Pawulu wasonekeli nindi: “Muloña hitwaleteli chuma munu mwishinaku, nichitwakafumamu hitwakatwesha kusenda chumaku. Dichi neyi tukweti yakudya niyakudivwika, yumiyi yinawani.” (1 Tim. 6:7, 8) Hela chochu, nshakaminu yawantu yenda kwamboka kwesekeja namatuña. Wufwetu wamonañawu antu mumatuña atona nawu wanyanya, mumatuña amavulu awumonaña nawu himali amavulu nankashi.

Hichikweti muloña nachidi chihandilu mwituña mutwashakamaku, talenu mazu ahosheliyi Pawulu cheñi nindi: “Antu akukeña nawu aheti, akudimbukila mukweseka, akufwa mumuhetu, akufwila yuma yawusupi yayivulu yakatishaña, yajiyishaña antu mukukisika nimukunoña.” (1 Tim. 6:9) Kwosi kanyama wamonaña ikoñaku. Ikoña aditaña kulonda kanyama yafwimu chakukasumwisha. Tunateli kutondolwela ñahi muhetu wakufwila ‘yuma yakatishaña’?

Kutwamijaku yuma yalema kukutuleñela kwikala nampinji yakumukalakela Yehova, nikudiza nkawetu. Kudiza nikulomba kukukwasha  mukwaKristu kwikala ‘wawanina chikupu, wawahila’ kukwasha akwawu.—2 Tim. 2:15; 3:17.

Hadi yaaka yantesha yahitiluhu, aeluda azatili nañovu kulonda amukwashi nikumukolesha Jarosław. Chumichi chamuleñeleli yahimpi yililu yindi chikupu. Wahosheli nindi: “Ifuku dimu ditwahanjekeli chikupu, aeluda anlejeli chakutalilahu chamuNsona chamukwenzi mukwamaheta wakeñeleña kushakama haya nyaka ilaña wakaanini kushiya mahetindi. Kuhiñahu, añinhwili munjila yayiwahi neyi chakwila iyi nsañu yinakundami kudami. Aha dinu, mesu ami atona nikutona!”—Yish. 11:28; Maku 10:17-22.

Jarosław washakamini hamaseki nakushinshika hachihandilu chindi nawa walekeli kwiñija mutu mumudimu weneni wakulanda nakulandulula. Hadi yaaka yiyedi hohu, yena nichisaka chindi akoleli cheñi kuspiritu. Ichi mwani nakukalakela amana kwindi nawa hieluda. Jarosław wahosheli nindi: “Neyi amana kwetu asweja kwiñija nyitu munyidimu yakulandulula chakwila afutalela niyuma yakuspiritu, nazatishaña chakutalilahu chami hakuyilumbulwila wubanji wafumaña mukudikunda nawantu abula kwitiya. Kutondolwela yuma yatukokolaña nikuleka wupwapoki hichuma chakala nankashi.”—2 Kor. 6:14.

Marek niyena wamweni kalula. Hela chakwila mudimu wawuwahi wazatileñayi kwituña dacheñi wamukwashileña kwakamena chisaka chindi, wubwambu windi naNzambi ninawana kwindi wadiña hakatoña. Mukuhita kwampinji, wahimpili yuma yatwamijileñaku muchihandilu. “Hayaaka yinahituhu, chihandilu chami chadiña neyi chaBaruki wakushankulu wadina ‘nakukeñakeña yuma yamaneni.’ Nkumininaku, nalombeli kudi Yehova nakumuleja yuma yinadiña nakwakama nawa chayinu mpinji nakoli kuspiritu.” (Yere. 45:1-5) Ichi Marek nakuzata nañovu kulonda yawanishi yuma yakeñekaña hakuzata “mudimu wawuwahi” wakwikala nkoñi muchipompelu.—1 Tim. 3:1.

Marek wasoñamishaña antu akeñaña kuya kumatuña acheñi nakukeña mali nindi: “Neyi wudi kwituña dacheñi, chekala chaswayi kufwa munyihetu yanaka kaayi katama. Hamuloña wakubula kwiluka idimi dahoshañawu munodu ituña, chakalaña kuhanjeka nawantu amakwawu. Wunateli kufunta kwituña kuwafumini nachimali chachivulu, hampinji yoyimu wukufunta namaboñola akuspiritu ashimbulaña kukusuka.”

Kwiluka mwakukumina kutalisha hanyidimu yakumujimba nimudimu wakukalakela amana kwetu chikutukwashaku kumuzañalesha Yehova. Tukwikala akutalilahu kudi akwetu nawa tukuyikwasha afuukuleña chachiwahi. Antu adi mukukala, akeñaña kuyikwasha, kuyitiyila wushona nikumwekesha chakutalilahu chachiwahi kudi amana kwawu niahela. Aeluda muchipompelu niakwaKristu amakwawu apama atela kukwasha akwawu akakwitiya eluki mwakukumina nawa aleki kusweja kwakama.—Heb. 13:7.

Dichi, bayi tulalamena akwetu akakwitiya kuhitila mukwiñija mutu mumudimu wetu wakumujimbaku. (Fwi. 1:10) Ilaña, twikalenu ‘namaheta kumesu aNzambi’ chitukutwamijañaku Wanta muchihandilu chetu.—Luka 12:21.

[Tumazu twaheshina]

[Nyevulu yidi hefu 21]

Komana mudimu wakumujimba wayikañeshaña kuya nakupompa?

[Nyevulu yidi hefu 23]

Komana mwalemesha kukooleka kumukweti kwakukwasha amana kwenu niahela akuspiritu?